1 Ko’ág̃a, péina ápe, umi mba’e nde, che rembiguái, Oliver Cowdery, reikuaasévagui chehegui, ha’e ndéve ko’ã ñe’ẽ:

2 Péina ápe, ahechaukákuri ndéve, heta jey che Espíritu rupive, umi mba’e rehaiva’ekue ha’eha añetegua; upévare, reikuaa añeteha umíva.

3 Ha reikuaáramo añeteguaha, péina ápe, ame’ẽ ndéve tembiapoukapy, rejerovia hag̃ua umi mba’e ojehaívare.

4 Umívape ojehaígui opa mba’e che tupao, che evanhélio ha che itaguasu pyenda rehegua.

5 Upévare, remopu’ãramo che tupao che evanhélio ha che itaguasu pyenda ári, umi añaretã rokẽ ndaipu’akamo’ãi nderehe.

6 Péina ápe, múndo hi’ajúma tembiapovaípe; ha tekotevẽ oñemokyre’ỹ yvypóra ra’ykuéra oñearrepenti hag̃ua, mokõive, Hentilkuéra ha avei Israel róga.

7 Upévare, reñemongaraígui che rembiguái José Smith, upe ta’ýra, po rupive, che amanda haguéicha chupe, ha’e okumplíkuri pe mba’e che amandava’ekue chupe.

8 Ha ko’ág̃a, ani rehecha ramo ahenoihague chupe che propositorãite, propósito che aikuaáva; upévare, ha’e ojesarekóramo oñongatúvo che rembiapoukapykuéra, ojehovasáta tekove ijapyra’ỹvape g̃uarã; ha héra ha’e José.

9 Ha ko’ág̃a, Oliver Cowdery, añe’ẽ ndéve, ha David Whitmer-pe avei, tembiapoukapy rupive; péina ápe, che amadágui opa tekove opárupi oikóvape toñearrepenti, ha Che añe’ẽ peẽme, che apóstol Pablo-pe añe’ẽ haguéicha jepeve, peẽ peñehenóigui llamamiénto chupe oñehenói haguépe.

10 Penemandu’áke, angakuéra repy tuichaha Tupã resa renondépe;

11 Péina ápe, Ñandejára pene Redentor ohasákuri ñemano hetépe; upévare, ohasa’asýkuri opa yvypóra mba’erasy rehe, ikatu hag̃ua opa yvypóra oñearrepenti ha ou hendápe.

12 Ha ha’e oikovejey umi omanóva apytégui, ogueru hag̃ua ijupe opa yvypóra, oñearrepentíramo hikuái.

13 Ha tuichaitépa ivy’apavẽ pe ánga oñearrepentívare!

14 Upévare, peñehenói perosapukái hag̃ua arrepentimiénto ko tavayguápe.

15 Ha pemba’apóramo opa pende ára, perosapukáivo arrepentimiénto ko tavayguápe, ha pegueru chéve, taha’e peteĩ ánga jepeve, mba’eichaitépa tuicháta pende vy’a hendive che Ru rréinope!

16 Ha ko’ág̃a, tuicháramo pende vy’apavẽ peteĩ ánga peguerúvare chéve che Ru rréinope, mba’eichaitépa tuicháta pende vy’apavẽ, peguerúramo chéve heta ánga!

17 Péina ápe, peẽ peguereko che evanhélio pene renondépe, ha che itaguasu ha che salvasiõ.

18 Pejerure Túvape che rérape, jerovia reheve, pegueroviávo pehupytytaha, ha peguerekóta Espíritu Santo, ohechaukáva opa mba’e iporãva yvypóra ra’ykuérape g̃uarã.

19 Ha ndapeguerekóirõ jerovia, ha ñeha’arõkuaa ha karida, ndaikatúi pejapo mba’eve.

20 Ani peñorairõ mba’evéichagua tupao rehe, ndaha’éiramo pe aña tupao.

21 Pemoĩ pendejehe Cristo réra, ha pemombe’u añetegua akãguapýpe.

22 Ha mayma oñearrepenti ha oñemongaraíva che rérape, ha’éva Jesucristo, ha ogueropu’akáva ipahaite peve, umíva ojesalváta.

23 Péina ápe, Jesucristo ha’e pe téra Túva ome’ẽva’ekue, ha ndaipóri ambue téra oñeme’ẽva, yvypóra ikatu hag̃ua ojesalva;

24 Upévare, opa yvypóra omoĩva’erã ijehe pe téra, Túva ome’ẽva’ekue, upe téra rupi oñehenóitagui chupekuéra ára pahápe;

25 Upévare, ndoikuaáirõ hikuái pe téra oñehenóivare chupekuéra, ndaikatúi oguereko hendag̃ua che Ru rréinope.

26 Ha ko’ág̃a, péina ápe, oĩ ambue tapicha oñehenóiva omombe’u hag̃ua che evanhélio, mokõive, Hentil ha Hudiokuérape;

27 Héẽ, dóse jepe; ha umi Dóse ha’éta che remimbo’e, ha omoĩta ijehe che réra; ha umi Dóse ha’éta pe omoĩséva ijehe che réra, korasõ añetépe.

28 Ha omoĩséramo hikuái ijehe che réra, korasõ añetépe, oñehenóita chupekuéra oho hag̃ua opa mundopýre, ombo’e hag̃ua che evanhélio mayma tekovépe.

29 Ha umíva ha’e mi che aordenapyréva oporomongarai hag̃ua che rérape, umi ñe’ẽ ojehaívape he’iháicha;

30 Ha umi ojehaíva peguereko pene renondépe; upévare, pejapova’erã umi ñe’ẽ ojehaívape he’iháicha.

31 Ha ko’ág̃a Che añe’ẽ peẽme, umi Dóse—Péina ápe, iporãma che grásia peẽme g̃uarã; peguata jojava’erã cherenondépe, ha ani peneangaipa.

32 Ha, péina ápe, peẽ ha’e umi che aordenapyréva, peordena hag̃ua presbítero ha maestro; pemombe’u hag̃ua che evanhélio, Espíritu Santo pu’aka oĩva pende pype rupi, ha Tupã llamamiénto ha don yvypórape oñeme’ẽháicha;

33 Ha Che, Jesucristo, pene Ñandejára ha pende Tupã, añe’ẽva’ekue upéva.

34 Ko’ã ñe’ẽ ndaha’éi yvyporakuéra ni yvypóra mba’e, ha katu chemba’e; upévare, petestifikáta ha’eha chemba’e ha ndaha’eiha yvypóra mba’e;

35 Ha’égui che ñe’ẽpu he’íva peẽme umíva; oñeme’ẽgui peẽme che Espíritu rupive, ha che pu’aka rupive ikatu pemoñe’ẽ umíva ojupe; ha ndaha’éiramo che pu’aka rupive, ndaikatumo’ãikuri peguereko umíva;

36 Upévare, petestifikakuaa pehenduhague che ñe’ẽpu, ha peikuaaha umi che ñe’ẽ.

37 Ha ko’ág̃a, péina ápe, Che ame’ẽ ndéve, Oliver Cowdery, ha avei David Whitmer-pe, peheka hag̃ua umi Dóse, oipotátava umi mba’e Che añe’ẽhague peẽme;

38 Ha ipotapy ha hembiapokuéra rupive peikuaáta chupekuéra.

39 Ha pejuhu vove chupekuéra, peikuaaukáta ko’ã mba’e chupekuéra.

40 Ha peñesũ ha petupãitũta Túvape che rérape.

41 Ha pembo’eva’erã ko múndope, pejévo: Peñearrepenti ha peñemongaraiva’erã Jesucristo rérape;

42 Opa yvypóra oñearrepenti ha oñemongaraiva’erãgui, ha ndaha’éi kuimba’e añónte, ha katu kuña, ha mitã oguerekómava ary oiporavokuaa hag̃ua.

43 Ha ko’ág̃a, peẽ pehupyty rire kóva, peñongatuva’erã che rembiapoukapykuéra opa mba’épe;

44 Ha pende po rupive ajapóta peteĩ tembiapo hechapyrãva yvypóra ra’ykuéra apytépe, hetápe ojepy’amovã hag̃ua iñangaipágui, oñearrepenti hag̃ua, ha og̃uahẽ hag̃ua hikuái che Ru rréinope.

45 Upévare, umi jehovasa ame’ẽva peẽme tuichave opa mba’égui.

46 Ha pehupyty rire ko’ãva, napeñongatúiramo che rembiapoukapykuéra, ndaikatumo’ãi pejesalva che Ru rréinope.

47 Péina ápe, Che, Jesucristo, pene Ñandejára ha pende Tupã, ha pene Redentor, añe’ẽva’ekue upéva, che Espíritu pu’aka rupive. Amén.