1 Pejapysaka, O che tupao tavayguakuéra, peẽ rréino oñeme’ẽva’ekuépe; pejapysaka ha pehendu ko yvy pyenda moĩharépe, upe ojapova’ekue umi yvága ha opa tekoveaty ipypeguakuéra, ha opa mba’e oikovéva, ha okue’éva, ha hekovéva apohare.

2 Ha Che ha’e jey peẽme, pejapysaka che ñe’ẽpúre, ani ou peẽme ñemano; aravo peha’arõ’ỹve jave arahaku ohasáta, ha opáta ñemono’õ, ha pene ánga ojesalva’ỹta gueteri.

3 Pehendu upe penderehe ojerurévape Túvape, upe ojerure’asýva pende káusare henondépe—

4 He’ívo: Túva, ehecha upe iñangaipa’ỹva jehasa’asy ha ñemano, upe reguerohoryva’ekue; ehecha nde Ra’y ruguy oñeñohẽ’akue, upe reme’ẽva’ekue ruguy, ndete rejeglorifika hag̃ua;

5 Upévare, Túva, eperdona ko’ã che joyke’ykuéra ogueroviávape che réra, ou hag̃ua che rendápe ha oguereko hag̃ua tekove opave’ỹva.

6 Pejapysaka, O che tupao tavayguakuéra, ha peẽ élder-kuéra pehendu oñondive, ha pehendu che ñe’ẽpu, oĩ aja pe ára ojeheróva ko ára, ha ani pemohatã pene korasõ.

7 Añetehápe Che ha’égui peẽme, Che ha’eha Alfa ha Omega, pe iñepyrũmby ha ipaha, múndo resape ha rekove—peteĩ tesape pytũmbýpe omimbíva, ha umi pytũmby ndoikũmbýi.

8 Aju’akue umi chemba’évape, ha umi chemba’éva nachemog̃uahẽi; ha katu umi chemog̃uahẽvape Che ame’ẽva’ekue pokatu ojapo hag̃ua heta milágro ha oiko hag̃ua chuguikuéra Tupã ra’y ha rajykuéra; ha umi che réra ogueroviávape ame’ẽva’ekue pokatu ohupyty hag̃ua tekove ijapyra’ỹva.

9 Ha péicha ambouva’ekue múndope che konvénio opave’ỹva, ha’e hag̃ua peteĩ tesape múndope ha peteĩ techaukaha che tavayguakuérape g̃uarã, ha hentilkuéra oheka hag̃ua ko’ãva, ha taha’e peteĩ maranduhára che renondépe, ombosako’ívo tape che renonderã.

10 Upévare, peju hendápe, ha Che ahesa’ỹijóta oúvandi, tekovekuéra ára ymaguaréichandi, ha ahechaukáta peẽme che resa’ỹijo mbarete.

11 Upévare, pejapysaka joja ha peheja tahechauka peẽme jepeve che arandu—arandu upe pejévagui ha’eha Enoc ha ijoyke’ykuéra Tupã,

12 Umi ojeipe’ava’ekue ko yvýgui, ha chete amog̃uahẽva’ekue—peteĩ táva oñeñongatúva og̃uahẽ meve tekojoja ára—peteĩ ára opa kuimba’e marangatu oha’arõva, ha ndojuhúi hikuái tembiapoñaña ha tembiapoky’akuéra rupi;

13 Ha omombe’u hikuái ha’eha pytagua ha hetãme oĩ’ỹvaicha ko yvy ári;

14 Ha katu ohupytyva’ekue promésa, ha’ekuéra ojuhúta ha ohechataha chupe hetépe.

15 Upévare, pejapysaka ha Che ahesa’ỹijóta penendive, ha Che añe’ẽ ha aprofetisáta peẽme, yvyporakuéra ára ymaguarépeicha.

16 Ha Che ahechaukáta tesakãme, Che ahechauka haguéicha che rembiguaikuérape, Che aimerõguare hendivekuéra che retépe, ha añe’ẽva’ekue chupekuéra ha’évo: Peporandúgui chéve che jeju techaukakuérare, pe ára Che ajutahápe che glóriape, yvagagua arai ryepýpe, akumpli hag̃ua umi promésa Che ajapova’ekue pende rukuérape,

17 Ha pehechágui ñeñapytĩmby ramo pe ára puku pende espíritu noĩrihague pende reténdi, Che ahechaukáta peẽme mba’éicha oúta pe rredensiõ ára, ha avei Israel sarambipyre ñemoĩjey.

18 Ha ko’ág̃a pehecha ko témplo oĩva Jerusalén-pe, peheróva Tupã róga, ha umi penderayhu’ỹva he’i ko óga araka’eve ndo’amo’ãiha.

19 Ha katu añetehápe Che ha’e peẽme, pe ñehundi outaha ko ñemoñareaty ári mondaháicha pyharekue, ha ko tavayguakuéra oñehundi ha oñemosarambíta opa tetãnguéra apytépe.

20 Ha ko témplo pehecháva ko’ág̃a ojeitýta, ha ni peteĩ ita ndopytamo’ãi ojo’ári.

21 Ha ojehúta, ko hudiokuéra ñemoñareaty ndopamo’ãi, ojehu peve opa ñehundi Che ha’eva’ekue peẽme hesekuéra.

22 Peje peikuaaha oumaha múndo paha; peje avei umi yvága ha yvy opataha;

23 Ha kóvape peje añetegua, péicha haguére; ha katu ko’ã mba’e Che ha’eva’ekue peẽme ndopamo’ãi, ndaha’éirõ opa mba’e oñekumpli rire.

24 Ha kóva Che ha’eva’ekue peẽme Jerusalén-re; ha upe ára ou vove, oñemosarambíta peteĩ hembyre opa tetãnguéra apytépe;

25 Ha katu oñembyaty jeýta hikuái; ha katu opytáta hikuái hentil-kuéra ára oñekumpli rire peve.

26 Ha upe ára oñehendúta ñorairõguasu ha ñorairõguasu rerakuã, ha opa pe yvy oĩta jepy’apyvaípe, ha tekovekuéra ipy’amanóta ha he’íta hikuái Cristo ombo’aremaha ijeju yvy paha peve.

27 Ha tekovekuéra mborayhu ho’ysãmbáta, ha hetavéta tembiapovai.

28 Ha hentilkuéra ára og̃uahẽ vove, omimbíta peteĩ tesape umi pytũmbýpe oĩva apytépe, ha ha’éta che evanhélio plenitu.

29 Ha katu ha’ekuéra nomog̃uahẽi; ndohecháigui pe tesape, ha omboyke ikorasõ chehegui, tekovekuéra mbo’epy rupi.

30 Ha upéva upe ñemoñareatýpe, oñekumplíta hentilkuéra ára.

31 Ha oĩta tekovekuéra oikóva upe ñemoñareatýpe, nomanomo’ãiva ohecha peve peteĩ plága guasuete, peteĩ mba’asy vaiete ojaho’ítagui pe yvy.

32 Ha katu che discípulo-kuéra oĩta tenda marangatúpe, ha noñemongu’emo’ãi; ha katu umi iñañáva apytépe, tekovekuéra ohupíta iñe’ẽpu ha omoñe’ẽngáita Tupãme, ha omano.

33 Ha avei oĩta yvyryrýi heta tenda rupi, ha heta ñehundi; upevére, tekovekuéra omohatãta ikorasõ che rehe ha omopu’ãta kysepuku ojuehe, ha ojojukáta hikuái.

34 Ha ko’ág̃a, Che Ñandejára ha’epa rire ko’ã ñe’ẽ che discípulo-kuérape, ojepy’apy hikuái.

35 Ha Che ha’e chupekuéra: Ani pejepy’apy, opa ko’ã mba’e ojehu vove, peikuaáta oñekumplitaha promesakuéra oñeme’ẽva’ekue peẽme.

36 Ha tesape oñepyrũ vove omimbi, ha’éta chupekuéra peteĩ parávolaicha, Cheahechaukátava peẽme—

37 Pemaña ha pehecha pe ígo máta, ha pehecha pende resa reheve, ha oñepyrũ vove hoky, ha umi hogue ikyrỹi gueteri, peje arahaku ko’ág̃a hi’ag̃uimaha;

38 Péichata avei upe ára ha’ekuéra ohecha vove opa ko’ã mba’e, upérõ oikuaáta hikuái aravo hi’ag̃uimaha.

39 Ha ojehúta, pe chehegui okyhyjéva oha’arõta Ñandejára ára guasu tog̃uahẽ, héẽ, pe Kuimba’e Ra’y jeju rehegua techaukakuéra.

40 Ha ohecháta hikuái umi techauka ha techapyrã, umíva ojehechaukátagui yvate yvágape, ha yvýpe yvy ári.

41 Ha ohecháta hikuái tuguy, ha tata, ha umi tatatĩ ypytũ.

42 Ha ou mboyve Ñandejára ára, pe kuarahy iñypytũta, ha pe jasýgui oikóta tuguy, ha mbyjakuéra ho’áta yvágagui.

43 Ha ambuekuéra oñembyatýta ko tendápe;

44 Ha upérõ cherekáta hikuái, ha péina ápe, Che ajúta; ha cherecháta hikuái umi yvagagua araípe, añemondévo pokatu ha tuicha glória reheve; opa anhelkuéra marangatu ndive; ha pe nachera’arõiva, ojepe’áta.

45 Ha katu Ñandejára jyva ho’a mboyve, peteĩ ánhel ombopúta ituru, ha santokuéra okeva’ekue opu’ãta chemog̃uahẽ hag̃ua pe arai ryepýpe.

46 Upévare, pekéramo py’aguapýpe, pejehovasapy peẽ; ko’ág̃a cherechágui ha peikuaa Che ha’eha, péicha pejúta cherendápe ha oikovéta pene ánga, ha pene rredensiõ oñemoĩporãmbáta; ha santokuéra osẽta irundy yvy pehẽgui.

47 Upérõ Ñandejára jyva ho’áta tetãnguéra ári.

48 Ha upérõ Ñandejára omoĩta ipy ko yvyty ári, ha oñemboja’óta mbyte rupi, ha pe yvy oryrýita ha ovaváta, ha avei umi yvága ojeityvyróta.

49 Ha Ñandejára ombopúta iñe’ẽpu, ha opa yvy paha ohendúta; ha yvy arigua tetãnguéra ojahe’óta, ha umi opukava’ekue ohecháta hovatavykue.

50 Ha mba’evaiete ojaho’íta pe opukava’ekuépe, ha oñembohoryva’ekue oñehundíta; ha umi ndokéiva hembiapovai hag̃ua, ojeitýta ha oñemombóta tatápe.

51 Ha upérõ hudiokuéra oma’ẽta cherehe ha he’íta: Mba’épa ko’ã kuare nde po ha nde pýpe?

52 Ha upérõ oikuaáta hikuái Che ha’eha Ñandejára; Che ha’étagui chupekuéra: Ko’ãva ha’e kuare ajekutuhague che angirũnguéra rógape. Che ha’e pe oñemopu’ãva’ekue. Che ha’e Jesús, ojehupiva’ekue kurusúre. Che ha’e Tupã Ra’y.

53 Ha upérõ hasẽta hikuái hembiapovaikuére; ha upérõ ha’ekuéra hasẽ’asýta omuña haguére irréipe.

54 Ha upérõ oñerredimíta umi tetã oguerovia’ỹva, ha umi ndoikuaaiva’ekue mba’eveichagua léi, oikéta jeikovejey peteĩháme; ha ivevyivéta chupekuéra.

55 Ha Satana ojejokuáta, anive hag̃ua henda yvypóra ra’ykuéra korasõme.

56 Ha upe ára, Che aju vove che glóriape, oñekumplíta upe parávola Che ha’eva’ekue diez virgen rehegua.

57 Umi iñarandúva ha omog̃uahẽva’ekue añetegua, ha ojapyhyva’ekue Espíritu Marangatu oisãmbyhy hag̃ua chupekuéra, ha noñembotavyiva’ekue—añetehápe Che ha’e peẽme, ko’ãvape ndojeitymo’ãi ni noñemombomo’ãi tatápe, ha katu ogueropu’akáta upe ára.

58 Ha oñeme’ẽta chupekuéra pe yvy ijehejapyrerã; ha oñemoña ha imbaretéta hikuái, ha ita’ýra ha tajyrakuéra okakuaáta angaipa ỹre, ojesalva peve.

59 Ñandejára oĩtagui ijapytepekuéra, ha iglória oĩta hi’arikuéra, ha ha’éta irréi ha iléi apohára.

60 Ha ko’ág̃a, péina ápe. Che ha’e peẽme, ndojehejamo’ãi peikuaave ko kapítulo rehegua, oñembohasa peve Nuevo Testamento, ha upévape ojeikuaaukáta opa ko’ã mba’e;

61 Upévare, Che aheja peẽme ko’ág̃a pembohasa, peime hag̃ua ñembosako’ípe umi mba’e oútavape g̃uarã.

62 Añetehápe Che ha’égui peẽme, penera’arõha umi mba’e tuicháva;

63 Pehendu ñorairõguasúgui tetã ambuépe; ha katu péina ápe, Che ha’e peẽme, umíva hi’ag̃uíma, pene rokẽme jepe, ha ndohasamo’ãi heta ary pehendúta ñorairõguasu pene retã teépe.

64 Upévare, Che, Ñandejára, ha’eva’ekue: Pesẽ umi yvy kuarahyresẽgui; peñembyaty, peẽ che tupaogua élder-kuéra; tapeho umi yvy kuarahyreiképe, pehenói umi upépe oikóvape toñearrepenti, ha ha’ekuéra oñearrepentiháicha, pemopu’ã chéve g̃uarã tupaokuéra.

65 Ha korasõ ha akã jojápe pembyaty pende rrikésa, pejogua hag̃ua peteĩ jehejapyre ojehechaukátava peẽme tenondeve.

66 Ha oñehenóita Jerusalén Pyahu, peteĩ py’aguapy yvy, peteĩ tavaguasu ñemo’ãrã, peteĩ tenda porã, Tupã Ijyvatevéva santokuérape g̃uarã.

67 Ha Ñandejára glória oĩta upépe, ha Ñandejára jekyhyje oĩta avei upépe, ha péicha rupi umi iñañáva ndaikatumo’ãi ou, ha ojeheróta Sion.

68 Ha ojehu umi iñañáva apytépe, opa tekove ndojapyhýiva kysepuku ijoyke’y rehe, oñaniva’erã Sion-pe ojuhu hag̃ua tenda porã.

69 Ha upépe oñembyatýta opa tetãguigua yvága guýpe; ha ha’éta peteĩ tevaygua añónte oĩ’ỹva ñorairõ guasúpe oñondive.

70 Ha oje’éta umi iñañáva apytépe: Ani jaha ñorairõme Sion ndive, umi Sion-pe oikóva oporomongyhyjégui; upévare, nañandepu’akamo’ãi.

71 Ha ojehu umi hekojojáva oñembyatýta opa tetã apytégui, ha oúta Sion-pe, opurahéivo vy’apavẽ opave’ỹva purahéi.

72 Ha ko’ág̃a Che ha’e peẽme, ani peheja oho múndope ko’ã mba’e, iporã meve chéve, pekumpli hag̃ua ko tembiapo tavayguakuéra resa renondépe, ha penderayhu’ỹva resa renondépe, ani hag̃ua ohechakuaa hikuái pene rembiapo, ndaha’éirõ pejapopa peve pe Che amandava’ekue peẽme.

73 Oikuaa vove hikuái, ojepy’amongeta hag̃ua ko’ã mba’ére.

74 Ñandejára ojehechauka vove ivaietétagui chupekuéra g̃uarã, ha kyhyje oúta hi’arikuéra, ha oñemomombyry ha oryrýita hikuái.

75 Ha opa tetãnguéra okyhyjéta Ñandejára ñemongyhyje rupi, ha imbarete pokatúgui. Taupéicha. Amén