Declaración Oficial 1
Biblia ha Mormón Kuatiañe’ẽme oñembo’e monogamia ha’eha Tupã apoukapy ñemendápe g̃uarã, ndaha’éiramo Ha’e he’i ambue hendáicha (tojehecha 2 Samuel 12:7–8 ha Jacob 2:27, 30). Ojesegívo peteĩ rrevelasiõ oñeme’ẽva’ekue José Smith-pe, oñemoĩkuri ñemenda hetápe jeiko, Tupao miembro-kuéra apytépe, ary 1840 ñepyrũme (tojehecha sección 132). Ary 1860 guive 1880 peve, Estados Unidos goviérno ombohasa leikuéra ojapo hag̃ua toĩvai ko rrelihiõ mba’e’apo. Ára ohasávo, Estados Unidos Corte Suprema omoañetékuri umi léi. Ohupyty rire rrevelasiõ, Presidente Wilford Woodruff oguenohẽkuri ko manifiésto, Tupao omoneĩva’ekue, oñemboajéva ha obligatorio ramo, octubre 6, 1890-pe. Kóva ogueraha ñemenda heta apo ñembopaha Tupaópe.
Oñemog̃uahẽtavape g̃uarã:
Oñemombe’úgui, propósito político-rã, Lago Salado prensa guive, oñeguenohẽmbaiteva’ekue, he’ívo upe Utah Komisiõ, imarandu ramóme Secretario del Interior-pe, he’i ojejapo gueteriha ñemenda heta, ha cuarenta térã hetave ko’ã ñemenda ojejapohague Utah-pe, junio ohasa ramóva guive, térã ary upe mboyveguápe, ha avei Tupaogua autoridakuéra ombo’ehague ha omokyre’ỹhague, discurso público-pe, ojejapo meménte hag̃ua poligamia-pe jeiko—
Upévare, che, Jesucristo Tupao Santokuéra Ára Pahapegua Presidente ramo, kóva rupive, imarangatuveháicha ha’e na’añeteiha ko’ã mba’e oje’éva. Norombo’eihína poligamia térã ñemenda heta, ni ndorohejái avave ojapo upéva, ha anega upe ára oje’évape ojejapohague cuarenta térã oimeraẽ ambue ñemenda heta ore témplope, térã oimeraẽ tenda pe Territorio-pe.
Ojeikuaákuri peteĩ kásogui, tapichakuéra he’íva pe ñemenda ojejapohague Ñembyao Rógape, Lago Salado-pe, 1889 arapotýpe, ha katu ndaikuaáikuri mávapa ojapo upe ceremonia; oikova’ekue ko kásope, ojejapo che aikuaa’ỹre. Ko mba’e oje’éva oikohague rupi, pe Ñembyao Róga ojeitýkuri, ahekombo’eháicha uperiremi.
Congreso omoĩ haguére léi ombotovéva ñemenda heta, ha umíva, pe Corte Suprema he’íkuri constitucional-ha, kóva rupive che ha’e añemoĩseha ko’ã léi guýpe, ha amomba’aposeha influénsia aguerekóva Tupao miembro-kuéra che apresidívare, upéicha ojapo hag̃ua avei.
Ndaipóri mba’eve umi che rekombo’e Tupaópe, ni umi chendiveguápe, ko ára oje’évape, mba’eve ikatúva rupi oje’e, rombo’e térã romokyre’ỹhahína ojejapo hag̃ua poligamia; ha peteĩ Tupaogua élder oiporúramo ñe’ẽ ombo’évaicha ko’ã mbo’epy, ojeja’ókuri upepete. Ha ko’ág̃a, opavave renondépe ha’e, che ñemoñe’ẽ Santokuéra Ára Pahapeguápe ha’eha, ani hag̃ua ojapo oimeháichagua ñemenda ko tetãmegua léi ombotovéva.
Wilford Woodruff
Jesucristo Tupao
Santokuéra Ára Pahapegua Presidente.
Presidente Lorenzo Snow opresentákuri kóva:
“Apropone, jahechakuaávo Wilford Woodruff-pe, Jesucristo Tupao Santokuéra Ára Pahapegua Presidente ramo ha peteĩ yvypóra año yvy arigua, ko árape oguerekóva umi ordenánsa ojesella hag̃ua llavekuéra, jahecha hag̃ua chupe ojeautorisapaiteha, tenda oguerekóva rupi, oikuaauka hag̃ua pe Manifiésto ojeleeva’ekue ore renondépe, ojefecháva setiembre 24, 1890-pe; ha Tupaóicha, oñembyatýva Conferencia General-pe, tañamoneĩ ideklarasiõ ñemenda heta rehegua, oñemboajepyréva ha obligatorio ramo”.
Salt Lake City, Utah, octubre 6, 1890.
Umi ñe’ẽporavopyre Presidente Wilford Woodruff
mbohapy diskúrsogui
Manifiésto rehegua
Ñandejára araka’eve ndohejamo’ãi che, ni avave kuimba’e oĩva ko Tupao Presidente ramo pendeguerahavai. Ndaipóri upe programa-pe. Ndaipóri Tupã akãme. Che ajaposéramo upéicha, Ñandejára chepe’áta che rendágui, ha péicha Ha’e ojapóta oimeraẽ tekove ndive oñeha’ãvape oguerahavai yvypóra ra’ykuéra Tupã orákulogui ha hembiaporãgui. (Conferencia General Semestral Número 61, Jesucristo Tupao Santokuéra Ára Pahapegua, lunes, octubre 6, 1890-pe, Salt Lake City, Utah. Oñeguenohẽva’ekue Deseret Evening News-pe, octubre 11, 1890-pe, pág. 2).
Taha’e oikovéva térã omanóva, térã oñehenóiva oisãmbyhy hag̃ua ko Tupao, oisãmbyhyva’erã hikuái Tupã Ipu’akapáva ispirasiõ rupi. Ndojapóiramo hikuái upéicha, mba’evéicha ndaikatumo’ãi ojapo hikuái. …
Ahupytýkuri nda’aréi mbovy rrevelasiõ, ha imba’eguasuete chéve g̃uarã, ha ha’éta peẽme Ñandejára he’iva’ekue chéve. Pehejami tamoĩ pende jesareko upe ojeikuaávape Manifiésto ramo. …
Ñandejára he’íkuri chéve ajapo hag̃ua Santokuéra Ára Pahapeguápe peteĩ ñeporandu, ha Ha’e avei he’íkuri chéve ohendúramo hikuái upe ha’éva ha ombohovái, Tupã Espíritu ha pokatu rupive, upe ñeporandu chupekuéra ajapóva, peteĩcha ombohováita opavave, ha peteĩcha ogueroviáta opavave ko mba’e reheguávape.
Kóva ha’e upe ñeporandu: Mávapa ha’e tape porãve osegiva’erã Santokuéra Ára Pahapegua: oñeha’ãnte ojapo ohóvo ñemenda heta, tetãmegua léi reheve ikóntrape, ha sesenta millones tekove hese oñemoĩva rehe, ha opa témplo ñehundi ha jepe’a reheve, ha opa umi ordenánsa ipype ojejapóva jejoko reheve, oikovéva ha omanova’ekuére, ha Primera Presidencia ha umi Dóse ha umi Tupaogua oĩva hogayguakuéra akãme ñenkarsela, ha tekovekuéra propieda personal ñekonfiska (opa ko’ãva ijehegui ombopátava upe jepokuaa) térã jajapo ha jahasa’asy rire opa mba’e ñaneñe’ẽrendu rupi kóva ko prinsípiore, ñambopa ko jepokuaa ha ñañemoĩ upe léi guýpe, ha upéicha rupi, topyta hógape umi Proféta, Apóstol ha túva ogaygua, ohekombo’e hag̃ua hikuái tavayguakuérape ha oñatende Tupao rembiaporãre, ha avei topyta umi témplo santokuéra pópe, ikatu hag̃uáicha oñatende hikuái umi Evanhélio ordenánsare, oikovéva ha omanova’ekuépe g̃uarã?
Ñandejára ohechaukákuri chéve visiõ ha rrevelasiõ rupive, mba’épa oikóta nañambopaháiramo ko jepokuaa. Nañambopaháiramo, napeikotevẽmo’ãikuri … avave kuimba’e ko Logan témplope, opa ordenánsa oñembopahátagui opa Sion retãme. Orreináta apañuãi opa Israel-pe, ha heta kuimba’e oñemoĩtakuri ka’irãime. Ko mba’evai oútakuri opa Tupaópe ha jajejopýtakuri ñambopaha hag̃ua upe jepokuaa. Ko’ág̃a, upe ñeporandu ha’e, oñembopahava’erãpa kóicha, térã Ñandejára ohechauka haguéicha ñandéve, ha jaheja ñande profetakuéra ha umi Apóstol ha umi familia ru kuimba’e isãsóva ramo, ha umi témplo tavayguakuéra pópe, omanova’ekue oñerredimi hag̃ua. Heta umíva oñemosãsóma prisiõgui espiritukuéra múndope ko tavayguakuéra rupi; ha, ojejapo meme térã oñembopahava’erãpa upe tembiapo? Kóva ha’e ñeporandu ajapóva Santokuéra Ára Pahapeguápe. Pehusgava’erã pendejehegui. Aipota pembohovái ko ñeporandu pendejehegui. Che nambohovaimo’ãi; ha katu kóva ha’éta peẽme, kóva ha’étakuri kondisiõ, ñande, tavayguakuéra ramo ñaimetahápe, ndajajapói rire desisiõ jajapova’ekue.
… Ahechákuri mba’etépa oikótara’e ndojejapóiramo mba’eve. Ko espíritu oĩkuri che ári heta ára guive. Ha katu kóva ha’ese: Che ahejátakuri opa templokuéra ojepe’a ñande pógui; chete ahejátakuri añemoĩ ka’irãime ha ahejáta oñekarsela opa ambue kuimba’ekuérape, Tupã yvagagua nomandáirire chéve ajapo hag̃ua pe ajapova’ekue; ha og̃uahẽvo aravo oñemandahague ajapo hag̃ua upéva, opa mba’e hesakãmbaitékuri chéve. Ahákuri Ñandejára renondépe, ha ahai Ñandejára he’iva’ekue chéve ahai hag̃ua. …
Aheja peẽme ko’ã mba’e peheja’ỹijo ha pehecha hag̃ua. Ñandejára omba’apohína ñanendive. (Estáka Cache conferencia, Logan, Utah, domingo, Noviembre 1, 1891-pe. Oñeguenohẽva’ekue Deseret Weekly-pe, noviembre 14, 1891-pe).
Ko’ág̃a ha’éta peẽme ojehechaukava’ekue chéve ha Tupã Ra’y ojapo’akue ko’ãvape. …Opa ko’ã mba’e oikótakuri, Tupã Ipu’akapáva oikoveháicha, pe Manifiésto noñeme’ẽirire. Upévare, pe Tupã Ra’y ohechaporãkuri oñepresenta kóva Tupaópe ha múndope, umi propósito Ha’e oguerekóvape g̃uarã. Ñandejára he’ímakuri Sion oñemopu’ãtaha. Ha’e he’ímakuri ko témplo toñemopu’ãmba. Ha’e he’ímakuri, oikovéva ha omanóva salvasiõ oñeme’ẽva’erã ko’ã yvyty pa’ũme. Ha Tupã Ipu’akapáva he’ímakuri pe Aña ndojokomo’ãiha kóva. Ikatúramo peikũmby péva, kóva ha’e peteĩ kláve upevarã. (Discurso oje’eva’ekuégui Salt Lake City Témplo sexta sesiõ dedikasiõme, abril 1893-pe. Servicio Dedicatorio-kuéra kópia, Tupao Departamento Histórico Archivo-pegua, Salt Lake City, Utah).