Sección 71
Rrevelasiõ oñeme’ẽva’ekue José Smith, upe Proféta ha Sidney Rigdon-pe, Hiram, Ohio-pe, diciembre 1, 1831-pe. Upe Proféta ombojoapýkuri Biblia ñembohasa, Sidney Rigdon ndive, chupe g̃uarã ohaíva ramo, ojehupyty peve ko rrevelasiõ, upe ára oñemboyke’imihague upe tembiapo, ikatu hag̃ua okumpli hikuái ñehekombo’e oñe’ẽme’ẽva ko rrevelasiõme. Umi joyke’y osẽva’erãkuri ombo’e omboguapy hag̃ua umi ñemopu’ã andu ouva’ekue Tupao rehe, oñeguenohẽ haguére umi ñe’ẽ ohaiva’ekue Ezra Booth, oapostatava’ekue.
1–4, José Smith ha Sidney Rigdon oñembou omomarandu hag̃ua evanhélio; 5–11, Umi Santokuérape ohayhu’ỹva oñemoapañuãita.
1 Péina ápe, péicha he’i peẽme Ñandejára, che rembiguaikuéra José Smith, upe ta’ýra, ha Sidney Rigdon, añetehápe og̃uahẽmaha ára tekotevẽháme ha iporãmaha pejejurupe’a pemombe’u hag̃ua che evanhélio, umi rreinogua mba’ekuéra, pemohesakãvo iñemimbykuéra umi escritura rupive, upe Espíritu pehẽngue ha upe pu’aka oñeme’ẽtava peẽme rupive, jepeve Che aipotaháicha.
2 Añetehápe Che ha’e peẽme, pemomarandu múndope umi tenda jerereguápe, ha avei tupaópe, peteĩ ára aja, ojekuaauka peve peẽme.
3 Añetehápe, kóva ha’e peteĩ misiõ Che ame’ẽva peẽme peteĩ ára aja.
4 Upévare, pemba’apo che víñape. Pehenói umi yvy ári oikóvape, ha petestifika, ha pembosako’i pe tape umi tembiapoukapykuéra ha umi rrevelasiõ oútavape g̃uarã.
5 Ko’ág̃a, péina ápe, kóva iñarandu; pe omoñe’ẽva, toikũmby ha tomog̃uahẽ avei.
6 Pe omog̃uahẽvape oñeme’ẽ hetavétagui, jepeve, pu’aka.
7 Upévare, pemoapañuãi umi penderayhu’ỹvape; pehenói chupekuéra pejotopa hag̃ua atýpe ha añoháme; ha pendejeroviarekórõ, ojehechaukáta iñemotĩnguéra.
8 Upévare, peheja togueru hikuái oimo’ã mbaretevéva Ñandejára rehe.
9 Añetehápe, péicha he’i peẽme Ñandejára—ndaipóri árma ojejapóva oñepu’ã hag̃ua penderehe oñakarapu’ãtava;
10 Ha oimeraẽ tekove ohupíramo iñe’ẽpu penderehe, oñemoapañuãita che árape.
11 Upévare, peñongatu che rembiapoukapykuéra; umíva añetegua ha ijeroviareko. Taupéicha. Amén.