Sección 30
Rrevelasiõ oñemeʼẽvaʼekue José Smith, pe Proféta rupive, David Whitmer, Peter Whitmer, pe taʼýra, ha John Whitmer-pe, Fayette, Nueva York, Setiembre 1830-pe, mbohapy aragua conferencia ojejapo rire Fayette-pe, ha katu umi Tupaogua élder ojeʼoi mboyve. Iñepỹrũme kóva ko sección-pegua oñeguenohẽkuri mbohapy rrevelasiõ ramo; ha pe Proféta omoĩ oñondive peteĩ sección-pe, Doctrina ha Konveniokéra edisiõ 1835-pe g̃uarã.
1–4, David Whitmer ojejaʼo ndoservírigui jesarekópe; 5–8, Peter Whitmer, pe taʼýra, ohovaʼerã Oliver Cowdery ndive peteĩ misiõme Lamanita-kuéra oĩháme; 9–11, John Whitmer oñehenói omboʼe hag̃ua pe evanhélio.
1 Péina ápe, che haʼe ndéve, David, rekyhyjehague yvypóragui, ha nderejeroviái cherehe romombareteha, rejapovaʼerãháicha kuri.
2 Ha katu pe ne akã oĩvékuri umi yvy arigua mbaʼekuérape, umi che, nde Apohare mbaʼekuérape rãngue, ha ministério reñehenói haguépe; ha nderejapysakáikuri che Espíriture, ni umi nde ári oñehenoivaʼekuépe, ha katu nembojuruheʼẽ umi che amandaʼỹvaʼekuépe.
3 Upévare, repyta ne año reporandu hag̃ua chéve ndejehegui, ha rejepyʼamongeta hag̃ua umi mbaʼe rehupytyvaʼekue rehe.
4 Ha nde rogapyrã haʼéta nde ru róga, ameʼẽ peve ndéve ambue tembiapoukapykuéra. Ha rembaʼapóta ministériope Tupaópe ha múndo renondépe, ha umi tenda ijerereguápe. Amén.
5 Péina ápe, che haʼe ndéve, Peter, rejeʼóita nde joykeʼy Oliver ndive; ára og̃uahẽmagui oĩporãha chéve reipeʼa nde juru remboʼe hag̃ua che evanhélio; upévare, ani rekyhyje, ha katu ehendu umi nde joykeʼy ñeʼẽ ha ñemoñeʼẽ, haʼe omeʼẽtava ndéve.
6 Ha ehasaʼasy hendive opa ijehasaʼasýpe, emopuʼã memévo ne korasõ chéve ñemboʼe ha jeroviápe, haʼe ha nde peñemosãso hag̃ua; ameʼẽgui chupe puʼaka omopuʼã hag̃ua che tupao Lamanita-kuéra apytépe;
7 Ha avavépe nahenóiri haʼe hag̃ua konsehéro hiʼári pe tupaópe, umi mbaʼe tupao reheguávape, ndahaʼéiramo ijoykeʼy, José Smith, pe taʼýra.
8 Upévare, ejapysaka koʼã mbaʼére ha ejesareko eñongatúvo che rembiapoukapykuéra, ha rejehovasáta tekove ijapyraʼỹvape g̃uarã. Amén.
9 Péina ápe, che haʼe ndéve, che rembiguái John, koʼág̃a guive tenonde gotyo eñepyrũta emomarandu che evanhélio, turu ñeʼẽpupeguáicha.
10 Ha ne rembiapo haʼéta nde joykeʼy Philip Burroughsʼ oikohápe, ha tenda ijerereguápe, heẽ, mamo oĩháme ne rendúva, che amanda peve ndéve reho hag̃ua ambue tendápe.
11 Ha opa ne rembiapo haʼéta Sion-pe, opa ne ánga reheve, koʼág̃a guive tenonde gotyo; heẽ, tapiaite rejurupeʼáta che káusa rehehápe, rekyhyjeʼỹre yvypóra ikatúvagui ojapo, che aimégui nendive. Amén.