1 Pejapysaka, O che tupaogua tavayguakuéra, he’i Ñandejára pende Tupã, ha pehendu Ñandejára ñe’ẽ penderehegua—

2 Ñandejára, oútava ñeha’arõ’ỹme itémplope; Ñandejára, oguejýtava múndo ári peteĩ ñe’ẽngái huísio reheve; héẽ, opa tetãnguéra Tupãgui hesaráiva ári, ha opa iñañáva ári oĩva pende apytépe.

3 Ombo’opívotagui ijyva marangatu opa tetãnguéra resa renondépe, ha opa yvy rembe’y ohecháta Itupã salvasiõ.

4 Upévare, peñembosako’i, peñembosako’i, O che tavayguakuéra; peñesantifika, peñembyaty, O che tupao tavayguakuéra, Sión retã ári, opa peẽ noñemandaiva’ekuépe pepyta hag̃ua.

5 Pesẽ Babilonia-gui. Penepotĩke peẽ peguaraháva Ñandejára váso.

6 Pehenói pene asamblea marangatu, ha py’ỹi peñemongeta oñondive. Tohenói opa kuimba’e Ñandejára réra.

7 Héẽ, añetehápe Che ha’ejey peẽme, ára og̃uahẽma Ñandejára ñe’ẽpu he’iha peẽme: Pesẽ Babilonia-gui; peñembyaty tetãnguéra apytégui, umi irundy yvytúgui, peteĩ yvága apýra guive, ambue peve.

8 Pemondo che tupaogua élder-kuéra umi tetã mombyryguápe; umi isla del mar-pe; pemondo umi tetã ambuépe; pehenói opa tetãnguéra, hentilkuérape raẽve ha upéi hudiokuérape.

9 Ha péina ápe, péicha kóva ha’éta isapukái ha Ñandejára ñe’ẽ opa tavayguakuérape: Tapeho Sion retãme, oñembotuicha hag̃ua che tavayguakuéra rembe’y, ha toñemombarete ijestakakuéra, ha Sion tojeipyso umi tenda jereregua peve.

10 Héẽ, toñehendu sapukái opa tavayguakuéra apytépe: Pepáy ha pepu’ã pemog̃uahẽ Menarãme; péina ápe, ou pe menarã; pesẽ pemog̃uahẽ chupe. Peñembosako’i Ñandejára ára guasurã.

11 Peñangarekóke upévare, ndapeikuaáigui ni ára ni aravo.

12 Upéicha, toñani Sion-pe umi hentilkuéra apytépe oĩva.

13 Ha umi Juda-gua toñani Jerusalén-pe, Ñandejára rogapegua yvytykuérape.

14 Pesẽ tetãnguéra apytégui, héẽ, Babilonia-gui, tembiapoñaña mbytégui, ha’éva upe Babilonia espiritual.

15 Ha katu añetehápe, péicha he’i Ñandejára, ani pekañy pya’e, ha katu toñembosako’i opa mba’e penerenonderã; ha aníke omaña tapykue gotyo upe osẽva, ani ou hi’ári peteĩ ñehundi oñeha’arõ’ỹva.

16 Pejapysaka ha pehendu, O yvy ári peikóva. Pehendu oñondivepa, peẽ che tupaogua élder-kuéra, ha pehendu Ñandejára ñe’ẽpu; ha’e ohenóigui opa tekovépe, ha omanda opa tekove opárupi oikóvape toñearrepenti.

17 Péina ápe, Tupã Ñandejára omboúkuri upe ánhel osapukái hag̃ua yvága mbytépe, he’ívo: Pembosako’i Ñandejára rape, ha pembojoja umi hape, ijeju aravo hi’ag̃uímagui—

18 Upe Cordero oñembo’ýta jave Monte Sion ári, ha hendive ciento cuarenta y cuatro mil, oguerekóvo isyvakuérare Itúva réra jehai.

19 Upévare, peñembosako’i upe Menarã jejurã; pesẽ, pesẽ pemog̃uahẽ chupe.

20 Ha péina ápe, ha’e oñembo’ýta pe Olivo mónte ári, ha pe oséano imbaretetéva ári, héẽ, pe yguasu pypuku, ha umi mar-pegua isla ári, ha Sion retã ári.

21 Ha ohupíta iñe’ẽpu Sion guive, ha oñe’ẽta Jerusalén guive, ha oñehendúta iñe’ẽ opa tavayguakuéra apytépe.

22 Ha ha’éta peteĩ ñe’ẽpu yeta ryapúicha, ha peteĩ arasunu guasu ñe’ẽpúicha, oitýtava ivýpe umi yvyty, ha ndojejuhumo’ãi yvykuéra ipéva.

23 Ha’e omandáta pe yguasu pypukúpe, ha oñemyañáta norte-gua tetãnguéra gotyo, ha umi isla-gui oikóta peteĩ yvy añónte;

24 Ha Jerusalén retã ha Sion retã oujeýta henda teépe, ha pe yvy ha’éta umi ára oñemboja’o mboyvéicha.

25 Ha Ñandejára, pe Salvador jepe, oĩta itavayguakuéra mbytépe ha orreináta opa yvypóra ári.

26 Ha umi oĩva norte-gua tetãnguérape oñemomandu’áta Ñandejára renondépe; ha iprofetakuéra ohendúta iñe’ẽpu, ha ndojejokomo’ãvéima hikuái; ha oinupãta hikuái umi itaty, ha pe yrypy’a hykúta henondepekuéra.

27 Ha oñemopu’ãta peteĩ tape pyrusu pe yguasu pypuku mbytépe.

28 Ihayhu’ỹhakuéragui oikóta présa chupekuéra g̃uarã,

29 Ha umi yvy nandi mba’eve heñoi’ỹháme osẽta umi y oikovéva ykua; ha pe yvy ikãva ndaijy’uheimo’ãvéima.

30 Ha oguerúta hikuái imba’erepykueraita Efraín ra’ykuérape, che rembiguaikuéra.

31 Ha umi yvyty’i opave’ỹva rembe’y oryrýita henondepekuéra.

32 Ha upépe oñesũta hikuái, ha oñekoronáta glória reheve, héẽ, Sion-pe, Ñandejára rembiguaikuéra po rupive, Efraín ra’ykuéra jepeve.

33 Ha henyhẽta hikuái vy’apavẽ opave’ỹva purahéi reheve.

34 Péina ápe, kóva ha’e Tupã opave’ỹva jehovasa umi Israel-gua trívu ári, ha jehovasa tuichavéva Efraín ha iñirũnguéra akã ári.

35 Ha avei umi Judá trivugua, ijehasa’asy rire, ojepurifikáta santidápe Ñandejára renondépe, oiko hag̃ua hendive ára ha pyhare, akói ha tapiaite g̃uarã.

36 Ha ko’ág̃a, añetehápe he’i Ñandejára, ojeikuaa hag̃ua ko’ã mba’e pende apytépe, O yvy ári peikovéva, Che amboúkuri che ánhel, mbovýpe ojehechaukava’ekue, oveve hag̃ua yvága mbytére, oguerekóvo pe evanhélio ijapyra’ỹva, ha ome’ẽva’ekue yvypórape, ha ojehechaukáta heta ko yvy ári oikóvape.

37 Ha ko evanhélio oñembo’éta opa tetã, ha avaretã, ha ñe’ẽ ha tavayguápe.

38 Ha Tupã rembiguaikuéra osẽta, he’ívo hatã ñe’ẽpúpe: Pekyhyje Tupãgui ha peme’ẽ chupe glória, ihuísio aravo og̃uahẽmagui;

39 Ha petupãitũ upe ojapova’ekuépe yvága, ha yvy ha yguasu, ha ykuéra yvu—

40 Pehenóivo Ñandejára réra ára ha pyhare, pejévo: O rembokuanga’ura’e umi yvága; reguejynga’ura’e; tahykunga’ura’e umi yvyty ne renondépe.

41 Ha oñembohováita iñakã arikuéra; Ñandejára ñeime ha’étagui tata mboyku ohapývaicha, ha tata y ombopupúvaicha.

42 O Ñandejára, nde reguejýta reikuaauka hag̃ua nde réra umi nderayhu’ỹvape, ha opa tetãnguéra oryrýita ne renondépe—

43 Rejapo vove umi mba’e ivaietéva, umi mba’e ha’ekuéra oha’arõ’ỹva;

44 Héẽ, reguejy vove, ha umi yvyty hyku ne renondépe, remog̃uahẽta upe horýva ha hembiapo rekojojávape, pe imandu’ávape nderehe nde rapére.

45 Múndo ñepyrũmby guive tekovekuéra ndojapysakái ni nohendúi ijapysápe, ni mba’eve tesa ohecháva, ndaha’éiramo nde, O Tupã, tuichaite mba’e rembosako’iva’ekue upe nera’arõvape g̃uarã.

46 Ha oje’éta: Mávapa ko yvágape Tupãgui oguejýva ao oñembosa’ýva reheve; héẽ, tenda ojeikuaa’ỹvagui, ijao gloriósope oñemondéva, oúva imbarete guasúpe?

47 Ha ha’e he’íta: Che upe añe’ẽva’ekue tekojojápe, ipu’akapáva oporosalva hag̃ua.

48 Ha pytãta Ñandejára aokuéra; ha umi ijao uvañamiha opyrũva’ekuéicha.

49 Ha tuichaitétagui iñeime glória, kuarahy ñemotĩme omokañýta hova, ha jasy ojokóta hesape, ha mbyjakuéra ojeitýta hendágui.

50 Ha oñehendúta iñe’ẽpu: Che apyrũmbákuri cheaño pe uvañamiháre, ha aguerúkuri huísio opa tavayguakuéra ári; ha avave noĩrikuri chendive;

51 Ha apyrũmbákuri hesekuéra che ñeko’õime, ha apyrũkuri hesekuéra che pochýpe, ha huguykuérape ahypyipákuri amondéva ha amongy’apa che aokuéra; kóva ha’égui vengánsa ára oĩva’ekue che korasõme.

52 Ha ko’ág̃a che rredimidokuéra áño og̃uahẽma; ha imandu’áta hikuái Ñandejára mborayhu porãre, ha opa mba’e ha’e omoĩva’ekue hi’arikuéra ipy’aporãme, ha imborayhu porãme, akói ha tapiaite g̃uarã.

53 Opa ijehasa’asykuérape ha’e oñembohasa’asyva’ekue. Ha pe ánhel hendivegua osalva chupekuéra; ha imborayhu ha iporiahuverekópe ha’e orredimiva’ekue chupekuéra, ha oñangarekova’ekue hesekuéra, ha oguerahava’ekue chupekuéra opa ára ymaguarépe;

54 Héẽ, ha avei Enoc-pe ha umi hendive oĩva’ekuépe; ha profetakuéra ha’e mboyveguarépe; ha avei Noé ha umi ha’e mboyveguarépe; ha avei Moisés-pe, ha umi ha’e mboyveguerépe;

55 Ha Moisés-gui Elías-pe, ha Elías-gui Juan-pe, oĩva’ekue Cristo-ndi ijeikovejeýpe, ha umi sánto apóstol, Abraham, Isaac ha Jacob-ndi, oĩta Cordero renondépe.

56 Ha santokuéra ñeñotỹha ojepe’áta; ha osẽta hikuái ha oñembo’ýta Cordero po akatúape, ha’e oñembo’y vove Monte Sion ári, ha tavaguasu marangatu ári, pe Jerusalén Pyahu; ha opurahéita hikuái Cordero purahéi, ára ha pyhare akói ha tapiaite g̃uarã.

57 Ha upéva rupi, tekovekuéra ohupyty hag̃ua umi glória ojeikuaaukátava, Ñandejára omboúkuri iñevanhélio plenitu, ikonvénio opave’ỹva, ohesa’ỹijóvo hasy’ỹme ha tesakãme—

58 Ombosako’i hag̃ua umi ikangývape umi mba’e yvy ári oútavape g̃uarã, ha Ñandejára rembiaporã upe ára umi ikangýva omoapañuãitahápe umi iñarandúvape, ha pe michĩvévagui oikóta peteĩ tetã mbarete, ha mokõi omuñáta ideséna de millares-pe.

59 Ha umi mba’e yvy arigua ikangýva rupive Ñandejára omboja’óta tetãnguérape Ijespíritu pokatu rupive.

60 Ha upéva rupi oñeme’ẽva’ekue ko’ã tembiapoukapy; oñemandava’ekue oñeñomi hag̃ua múndogui ára umíva oñeme’ẽrõguare, ha katu ko’ág̃a ohova’erã opa yvypórape—

61 Ha kóva, Ñandejára orreináva opa yvypóra ári he’iháicha ha oipotaháicha.

62 Ha pe oñearrepentíva ha oñesantifikávape Ñandejára renondépe oñeme’ẽta tekove ijapyra’ỹva.

63 Ha umi nohendúiva Ñandejára ñe’ẽpu ári oñekumplíta proféta Moisés ohaiva’ekue, ojepe’ataha hikuái tavayguakuéra apytégui.

64 Ha avei proféta Malaquías ohaiva’ekue: Péina ápe, oúgui pe ára tatakua akúicha, ha opa oñembotuicháva ha hekoñañáva ha’éta ñana pirúicha; ha upe ára oútava ohapýta chupekuéra, he’i pe Señor de los ejércitos, ha ndohejamo’ãi hesekuéra hapo ni hakã.

65 Upévare, kóva ha’éta Ñandejára ñembohovái chupekuéra g̃uarã:

66 Ára Che ajurõguare umi che mba’évape, avave pende apytépe nachemog̃uahẽi, ha peñemosẽkuri okápe.

67 Che ahenói jeýrõ, ndaipórikuri pende apytépe ombohováiva; upevére, che jyva noñemombykýikuri ni michĩmi, Che ndaikatúi hag̃ua porredimi, ni che pokatu pomosãso hag̃ua.

68 Péina ápe, che jehavirápe Che amokã yguasu. Che ajapo tave’ỹ umi ysyrýgui; hyakuãvaipa umi ipira ha omano y’uhéigui.

69 Amonde pytũgui yvagakuéra, ha silísiogui ajapo ijahoja.

70 Ha kóva oúta peẽme che pógui—vy’a’ỹme pejeitýta.

71 Péina ápe, péicha ndaipóri penemosãsova’erã; napeneñe’ẽrendúigui che ñe’ẽpúre pohenoirõguare yvágagui; ndapegueroviái che rembiguaikuérape, ha oñembourõguare peẽme, napemog̃uahẽi chupekuéra.

72 Upévare, osellákuri hikuái upe testimónio ha ojokua upe léi, ha peẽ peñeme’ẽkuri umi pytũmbýpe.

73 Ko’ãva ohóta umi pytũmby okapeguápe, oĩháme tasẽ ha pyahẽvai, ha tái pururũ.

74 Péina ápe, Ñandejára pende Tupã oñe’ẽva’ekue. Amén.