Sección 117
Rrevelasiõ oñeme’ẽva’ekue José Smith upe Proféta rupive, Far West, Misuri-pe, julio 8, 1838-pe, William Marks, Newel K. Whitney ha Oliver Granger umi hembiaporã hi’ag̃uímava reheguáre.
1–9, Ñandejára rembiguaikuéra ndoipotaitereíriva’erã umi mba’e yvy ariguáva, upéicha “mba’épa umi mba’erepy Ñandejárape g̃uarã?”; 10–16, Ohejava’erã hikuái hi’ánga kangy, ha hemikuave’ẽnguéra imarangatúta Ñandejárape g̃uarã.
1 Añetehápe péicha he’i Ñandejára, che rembiguái William Marks, ha avei che rembiguái Newel K. Whitney-pe, pya’e tomohenda hikuái iñemuhakuéra ha toho Kirtland retãgui, Che, Ñandejára, ambou jey mboyve umi niéve ko yvy ári.
2 Topáy ha topu’ã hikuái, ha tosẽ oha’arõ’ỹre, Che, Ñandejára, amandágui.
3 Upévare, oha’arõramo hikuái, ndohoporãmo’ãi chupekuéra.
4 Toñearrepenti hikuái opa iñangaipakuéragui ha opa imba’epotapýgui che renondépe, he’i Ñandejára; mba’épa ha’égui mba’erepy chéve g̃uarã? he’i Ñandejára.
5 Toñeme’ẽ umi mba’erepy Kirtland-pegua ojepagapa hag̃ua umi ojedevéva, he’i Ñandejára. Peme’ẽ, he’i Ñandejára, ha pe hembýva, topyta pende pópe, he’i Ñandejára.
6 Ndaguerekóipa Che umi guyra yvagagua, ha umi pira yguasugua, ha mymbakuéra yvytypegua? Ndajapóipa Che ko yvy? Ha nasãmbyhýipa Che opa tetãnguéra yvy arigua ehérsito destíno?
7 Upévare, ndajapomo’ãipa Che umi tenda nandi tahoky, taipoty ha tahi’a hetaite? he’i Ñandejára.
8 Ndaipóripa tenda oĩporãmava Adán-ondi-Ahmán yvytykuérape, ha Olaha Shinehah yvy ipehápe, térã upe yvy Adán oiko haguépe, peipotaiterei hag̃ua upe ha’éva peteĩ gótante, ha napemomba’éi hag̃ua umi imba’eguasuvéva?
9 Upévare, pejupi ko’ápe che tavayguakuéra retãme, jepeve Sion-pe.
10 Taijeroviarekóke che rembiguái William Marks mbovymi mba’e ári, ha oisãmbyhýta heta mba’e ári. Topresidi ha’e che tavayguakuéra mbytépe Far West távape, ha tojehovasa che tavayguakuéra jehovasa reheve.
11 Tahi’otĩ che rembiguái Newel K. Whitney pe vánda nikolaítare ha opa umi hembiapoky’a ñemíre, ha opa hi’ánga mirĩ’ỹre che renondépe, he’i Ñandejára, ha tojupi Adán-Ondi-Ahman retãme, ha taha’e peteĩ obispo che tavayguakuérape g̃uarã, he’i Ñandejára, ndaha’éiva térape ha katu tempiapópe, he’i Ñandejára.
12 Ha avei, Che ha’e peẽme, chemandu’aha che rembiguái Oliver Granger-re; péina ápe, añetehápe Che ha’e chupe, héra oñeñongatutaha momandu’a marangatúpe, ñemoñareatýgui ñemoñareatýpe akói ha tapiaite g̃uarã, he’i Ñandejára.
13 Upévare, toñeha’ã mbarete che tupao Primera Presidencia rredensiõre, he’i Ñandejára; ha ho’a vove, ha’e opu’ã jeýta, hemikuave’ẽ imarangatuvétagui chéve g̃uarã hemimono’õranguégui, he’i Ñandejára.
14 Upévare, pya’e tojupi ko’ápe, Sion retãme; ha hi’árape oikóta chugui mba’evendeha che rérape, che tavayguakuéra ñeimeporãrã, he’i Ñandejára.
15 Upévare, ani avave tapicha ojapo’i che rembiguái Oliver Granger-pe, ha katu tohupyty che tavayguakuéra jehovasa akói ha tapiaite g̃uarã.
16 Ha avei, añetehápe Che ha’e peẽme, taimandu’a opa che rembiguaikuéra Kirtland retãmegua Ñandejára Itupãre, ha avei che rógare, oñongatu ha oñangareko marangatu hag̃ua upéva, ha che árape omosẽ hag̃ua umi pirapire myengoviahárape, he’i Ñandejára. Taupéicha. Amén.