1 Pejapysaka, O tavayguakuéra, ha peipe’a pene korasõ ha pejapysaka mombyry guive; ha pehendu, peẽ pejeheróva Ñandejára tavayguakuéra, ha pehendu Ñandejára ñe’ẽ ha hembipota penderehegua.

2 Héẽ, añetehápe, Che ha’e, pehendu pe hendýva ipochy umi iñañáva ha hekoñemoĩvare ñe’ẽ;

3 Pe oguerahaséva umi ha’e oguerahasévape jepe, ha omo’ãva hekovépe umi ha’e omo’ãsévape.

4 Pe omopu’ãva ha’e oipotaháicha ha oiporavoháicha; ha ohundíva ha’e oipotárõ, ha orekóva pokatu oity hag̃ua pe ánga añaretãme.

5 Péina ápe, Che, Ñandejára, apoi che ñe’ẽpu, ha oñeñe’ẽrendúta.

6 Upévare, añetehápe Che ha’e, tojesarekóke upe iñañáva, ha pe hekoñemoĩva tokyhyje ha toryrýi; ha tojejurumboty pe oguerovia’ỹva, upe ñeko’õi ára oútagui hi’ári yvytu jeréicha, ha opa tekove oikuaáta Che ha’eha Tupã.

7 Ha pe ohekáva umi techauka, techaukakuéra ohecháta, ha katu ndaha’éi salvasiorã.

8 Añetehápe, Che ha’e peẽme, oĩha pende apytépe ohekáva techaukakuéra, ha umíva oĩva’ekue jepeve ñepyrũmby guive;

9 Ha katu, péina ápe, jerovia ndoúi techauka rupive, ha katu techaukakuéra osegi umi ogueroviávape.

10 Héẽ, techaukakuéra ou jerovia rupive, ndaha’éi tekovekuéra oipotágui, ni ha’ekuéra oipotaháicha, ha katu Tupã rembipota rupive.

11 Héẽ, techaukakuéra ou jerovia rupive, ojejapo hag̃ua umi tembiapo hechapyrãva, jerovia’ỹre avave tekove ndojeguerohorýigui Tupãre; ha pe Tupã ipochýva ndive, ha’e ndahorypái; upévare, ko’ãvape ha’e ndohechaukái techaukakuéra, ỹrõ ñeko’õime añónte ikondenasiõrã.

12 Upévare, Che, Ñandejára, ndacherorýi umi pende apytépe ohekava’ekue ndive techauka ha techapyrãnguéra ohupyty hag̃ua jerovia, ha ndaha’éi tekovekuéra ñeimeporãrã che glóriape g̃uarã.

13 Upevére, Che ame’ẽ umi tembiapoukapy, ha oĩ heta ojeiva’ekue che rembiapoupakykuéragui ha noñongatúi umíva.

14 Oĩkuri pende apytépe kuimba’e ha kuña oporomoakãratĩva; ha oĩ umi ojeiva’ekue pendehegui, ha oĩ gueteri penendive ambuekuéra tenondeve ojehechaukátava.

15 Toñeñangarekóke umíva, ha pya’e toñearrepenti, ani ñuhãicha ou hi’arikuéra huísio, ha tojehechauka hekotavy ha umi hembiapo tosegi chupekuéra tavayguakuéra resa renondépe.

16 Ha añetehápe Che ha’e peẽme, Che ha’éma haguéicha, pe omañáva peteĩ kuñáre oipotavaívo chupe, térã oĩramo ojapóva ñemoakãratĩ ikorasõme, ha’ekuéra ndoguerekomo’ãi pe Espíritu, ha katu onegáta upe jerovia ha okyhyjéta.

17 Upévare, Che, Ñandejára, ha’ékuri umi okyhyjéva, umi oguerovia’ỹva, ha opa umi ijapúva, ha oimeraẽ ohayhúva ha ojapóva mba’ejapu, ha pe ofornikáva ha pe ojapóva paje, oguerekóta ipárte upe lágo hendýva tata ha asúfre reheve, ha’éva ñemano mokõiha.

18 Añetehápe Che ha’e, ko’ãva ndoikemo’ãiha jeikovejey peteĩháme.

19 Ha ko’ág̃a péina ápe, Che, Ñandejára, ha’e peẽme ndapejehustifikaiha, oĩ rupi ko’ã mba’e pende apytépe.

20 Upevére, pe ogueropu’akáva jerovia reheve ha ojapóva che rembipota, upéva ipu’akáta, ha ohupytýta peteĩ jehejapyre ko yvy ári, ou vove ñemoambue ára;

21 Pe yvy oñemoambuéta vove, jepe upe techaukarã ojehechaukava’ekue che apostolkuérape yvyty ári; ñemombe’upa neĩrava gueteri pehupyty.

22 Ha ko’ág̃a, añetehápe Che ha’e peẽme, Che ha’e haguéicha aikuaaukataha peẽme che rembipota, péina ápe, Che aikuaaukáta peẽme, ndaha’éi tembiapoukapy rupive, oĩgui heta noñeha’ãiva oñongatu che rembiapoukapykuéra.

23 Ha katu pe oñongatúvape che rembiapoukapykuéra, Che ame’ẽta umi rreinogua ñemimby, ha kóva ha’éta ipype peteĩ y oikovéva yvu, osyrýva tekove opave’ỹvape g̃uarã.

24 Ha ko’ág̃a, péina ápe, kóva ha’e Ñandejára pende Tupã rembipota isantokuéra rehegua, oñembyatyva’erãha hikuái oñondivepa Sion retãme, ndaha’éi pya’épe, ani oiko apañuãi, oguerúva mba’asyvaiete.

25 Péina ápe, Sion retã—Che, Ñandejára, che pópe aguerekóva;

26 Upevére, Che, Ñandejára, ame’ẽ César-pe umi César mba’éva.

27 Upévare, Che Ñandejára, aipota pejogua umi yvy, peime porãve hag̃ua múndogui, ha peguereko hag̃ua derécho hi’ári, ani hag̃ua umi mundogua oñemopu’ã pochýpe.

28 Satana omopu’ãgui ikorasõnguéra pochýpe penderehe, ha tuguy ñeñohẽme.

29 Upévare, Sion retã ndojehupytymo’ãi, ndaha’éirõ jejogua térã tuguy ñeñohẽ rupive, upeicha’ỹramo, ndaiporimo’ãi jehejapyre peẽme g̃uarã.

30 Ha jejogua rupivéramo, péina ápe, pejehovasapyre.

31 Ha tuguy ñeñohẽ rupivéramo, oñembotovégui pendehegui peñohẽ tuguy, péina ápe, umi penderayhu’ỹva oúta pende ári, ha pejehaviráta távagui távape, ha sinagógagui sinagógape, ha nahembymo’ãi ndaha’éiramo mbovymínte ohupyty hag̃ua pe jehejapyre.

32 Che, Ñandejára, che pochy umi iñañávandi; Che ajoko che Espíritu umi yvy ári oikóvagui.

33 Che añe’ẽme’ẽva’ekue che pochýpe, ha ha’ékuri tou umi ñorairõguasu yvy ape ári, ha umi iñañáva ojukáta iñañávape, ha oúta kyhyje opa tekove ári;

34 Ha santokuéra avei sa’imi okañýta; upevére, Che, Ñandejára, aime hendivekuéra, ha aguejýta yvágagui, che Ru renondégui, ha umi iñañávape ahapýta tata oñembogue’ỹva reheve.

35 Ha péina ápe, kóva ne’ĩra gueteri, ha katu hi’ag̃uíma.

36 Upévare, ahechávo Che, Ñandejára, ha’ehague tou opa ko’ã mba’e pe yvy ape ári, Che aipota che santokuéra toñembyaty Sion retãme;

37 Ha opa tekove tojapyhy tekojoja ipópe, ha jeroviapy ilómore, ha tomopu’ã ñemomarandu ñe’ẽpu umi yvy ári oikóvape; ha te’i, ñe’ẽ ha ñekañy rupive, outaha ñehundi umi iñañáva ári.

38 Upévare, tomoĩporã imba’ekuéra temporal che discípulo-kuéra Kirtland-pegua, umi oikóva ko rránchope.

39 Tomohenda umi yvy che rembiguái Titus Billings, oñangarekóva umívare, oĩ hag̃ua ñembosako’ípe arapoty oúvape, oje’ói hag̃ua Sion retãme, umi upépe oikóva ndive, ndaha’éirõ umi Che añongatútava chemba’erã, ndohomo’ãiva Che amanda peve chupekuéra.

40 Ha toñembou Sion retãme, opa pirapire oĩva, taha’e michĩ térã heta, peteĩchante chéve, umi Che ahenoi’akue omog̃uahẽtavape g̃uarã.

41 Péina ápe, Che, Ñandejára, ame’ẽta che rembiguái José Smith, upe ta’ýrape, pokatu ohechakuaa hag̃ua, pe Espíritu rupive, mávapa ojupiva’erã Sion retãme, ha máva che discípulo-kuéra apytépe opytava’erã.

42 Toguereko gueteri che rembiguái Newel K. Whitney iñalmasẽ, térã ambue ñe’ẽme, upe almasẽ, ára mbyky aja.

43 Upevére, tome’ẽ ha’e opa pirapire ikatúva, oñemondo hag̃ua Sion retãme.

44 Péina ápe, ko’ã mba’e oĩ ipópe, tojapo umíva arandurekoháicha.

45 Añetehápe Che ha’e, toñeordena chupe ahénte ramo umi discípulo opytátavape g̃uarã, ha toñeordena chupe ko pu’akápe;

46 Ha pya’e tovisita umi tupaokuéra, che rembiguái Oliver Cowdery ndive, omohesakãvo chupekuéra ko’ã mba’e. Péina ápe, kóva ha’e che rembipota, toñembyaty umi pirapire jepe Che ahekombo’e haguéicha.

47 Pe ijeroviarekóva ha ogueropu’akáva ipu’akáta múndore.

48 Pe omondóva mba’erepykuéra Sion retãme, ohupytýta peteĩ jehejapyre ko múndope, ha hembiapokuéra osegíta ichupe, ha avei, peteĩ jopói múndo oútavape.

49 Héẽ, ha ojehovasapyre umi omanóva, omanóva Ñandejárape, ko’ág̃a guive tenondeve gotyo. Ñandejára ou vove, ha umi mba’e itujáva opa vove, ha opa mba’e oñembopyahupa, ha’ekuéra opu’ãta omanóva apytégui ha nomanomo’ãvéima uperire, ha ohupytýta hikuái peteĩ jehejapyre Ñandejára renondépe, pe táva marangatúpe.

50 Ha pe oikovéva Ñandejára ou vove, ha oñongatuva’ekue jerovia, upéva ojehovasapyre; upevére, oje’e chupe omanotaha yvypóra edápe.

51 Upévare, umi mitã okakuaáta ituja ha g̃uaig̃uĩ meve; umi ijedámava omanóta; ha katu ndokemo’ãi hikuái yvytimbópe, ha katu oñemoambuéta chupekuéra peteĩ tesa pirĩme.

52 Upévare, péva rupi apostolkuéra ombo’ékuri múndope, pe omanova’ekue jeikovejey.

53 Ko’ã mba’e ha’e umi mba’e peha’arõva’erã; ha, ñañe’ẽvo Ñandejára oñe’ẽháicha, umíva ko’ág̃a hi’ag̃uíma, ha peteĩ ára oútavape, héẽ, pe Kuimba’e Ra’y jeju árape.

54 Ha upe ára peve, oĩta virgen iñakãguapy’ỹva hikuái umi iñakãguapýva apytépe; ha upe aravópe ojepe’a paitéta umi hekojojáva iñañávagui; ha upe árape Che amboúta che anhelkuéra omosẽ hag̃ua okápe umi iñañáva, ha opoi hag̃ua chupekuéra pe tata ogue’ỹvape.

55 Ha ko’ág̃a, péina ápe, añetehápe Che ha’e peẽme, Che, Ñandejára, ndacherorýi che rembiguái Sidney Rigdon ndive; ha’e oñembotuicha ikorasõme, ha nomog̃uahẽi ñemoñe’ẽ, ha katu ombopy’ambyasy upe Espíritu-pe.

56 Upévare, pe ohaiva’ekue ndahorýi Ñandejárape, ha ojapóta ambue; ha Ñandejára nomog̃uahẽirõ upéva, péina ápe ndopytamo’ãvéima kárgo Che ahenói haguépe chupe.

57 Ha avei, añetehápe Che ha’e peẽme, toñeordena ko pu’akápe, umi ikorasõme ha tekomarangatúpe oñemoñe’ẽséva umi iñangaipávape arrepentimientorã.

58 Kóva ha’égui ñemomarandu ára, ha ndaha’éi ñe’ẽ heta ára. Che, Ñandejárare, avave noñembohorymo’ãigui umi ára pahápe.

59 Péina ápe, Che ha’e yvategua, ha che pokatu oĩ yvýpe. Che aime opa mba’e ári ha opa mba’épe, ha opa mba’e mbytépe, ha ahesa’ỹijo opa mba’e, ha oúta ára opa mba’e oĩtaha che poguýpe.

60 Péina ápe, Che ha’e Alfa ha Omega, jepeve Jesucristo.

61 Upévare, toñeñangarekóke opa tekovekuéra mba’éichapa oiporu che réra ijurúpe—

62 Ha péina ápe, añetehápe Che ha’e, hetaha umi oĩva ko kondenasiõ guýpe, umi oiporúva Ñandejára réra, ha oiporu reíva, oguereko’ỹme autorida.

63 Upévare, toñearrepenti tupaogua iñangaipakuéragui, ha Che, Ñandejára, ajeruréta hesekuéra; upeicha’ỹrõ, ojepe’áta chupekuéra.

64 Penemandu’áke pe yvatégui oúva imarangatuha, ha oje’eva’erã jesarekópe, ha pe Espíritu ñemyaña rupi añónte; ha pévape ndaipóri kondenasiõ, ha ñembo’e rupive pehupyty pe Espíritu; upévare, kóva ỹre, pe kondenasiõ opyta.

65 Toheka peteĩ hogarã che rembiguaikuéra José Smith, upe ta’ýra, ha Sidney Rigdon, ohekombo’eháicha chupekuéra pe Espíritu, ñembo’e rupive.

66 Ko’ã mba’e ojegueropu’akava’erã ñeha’arõkuaa rupive, umi kóicha ojapóva ohupyty hag̃ua tuichaiteve rasa ha ijapyra’ỹva glória pohyikue, térã upéicha’ỹrõ, peteĩ kondenasiõ tuichaiteve. Amén