Sección 48
Rrevelasiõ oñemeʼẽvaʼekue José Smith, upe Proféta rupive, Kirtland, Ohio-pe, marzo 1831-pe. Proféta oporandúkuri Ñandejárape mbaʼéicha ojejapovaʼerã ojejogua hag̃ua umi yvy santokuéra rendag̃ua. Kóva haʼevaʼekue peteĩ mbaʼeguasu Tupao miembro-kuéra oúva rupive Estados Unidos-pe, kuarahyresẽ guive, iñeʼẽrendúvo Ñandejára rembiapoukapy oñembyaty hag̃ua Ohio-pe (tojehecha umi sección 37:1–3; 45:64).
1–3, Santokuéra oĩva Ohio-pe ombojaʼovaʼerã ijyvy ipehẽnguekuéra ndive; 4–6, Santokuéra ojoguavaʼerã yvy, omopuʼã peteĩ táva, ha osegi umi ijoficial presidente-kuéra ñemoñeʼẽ.
1 Tekotevẽ upévare pepyta umi tenda peikohápe, iporãháicha peẽme g̃uarã.
2 Ha peguerekórõ yvy, pembojaʼóta pene pehẽngue kuarahyresẽmegua ndive;
3 Ha ndapeguerekóiramo yvy, tojogua haʼekuéra koʼág̃a umi tenda jerereguápe, haʼekuéra oipotaháicha, tekotevẽgui oguereko hikuái tenda oiko hag̃ua koʼág̃a.
4 Tekotevẽ peñongatu opa pirapire ikatúva, ha tapehupyty opa mbaʼe ikatúva tekojojápe, ára upe rire ikatu hag̃ua pejogua yvy pende jehejapyrerã, peteĩ táva jepe.
5 Ndojehechaukamoʼãi gueteri upe tenda; ha katu pene pehẽnguekuéra ou rire kuarahyresẽgui, oĩta kuimbaʼe oñehenóitava, ha chupekuéra ojeikuaaukáta upe tenda, térã ojehechaukáta chupekuéra.
6 Ha oñehenóita chupekuéra ojogua hag̃ua yvy, ha oñepyrũ hag̃ua omoĩ pe táva pyenda; ha upéramo peñepyrũta peñembyaty pende rogayguakuéra ndive, mayma tapicha hogayguakuéra ndive, haʼe ikatuháicha, ha tupao presidencia ha obispo ohenoiháicha chupe, umi léi ha tembiapoukapykuéra oñemeʼẽvaʼekuépe heʼiháicha, ha oñemeʼẽtava peẽme tenondeve. Taupéicha. Amén.