1 Añetehápe, péicha heʼi ndéve Ñandejára, che rembiguái Thomas: Che ahendúkuri ne ñemboʼekuéra; ha umi ne mbaʼeporã ojupíkuri, memorial ramo che renondépe, umi nde joykeʼykuérare, ojeporavovaʼekue omeʼẽ hag̃ua testimónio che réragui ha ombou hag̃ua opa tetãnguéra, avaretãnguéra, ñeʼẽnguéra ha tavayguakuéra apytépe, ha umi oñeordenavaʼekuépe che rembiguaikuéra rupive.

2 Añetehápe Che haʼe ndéve, oĩkuri mbaʼeʼimi ne korasõme ha ndejehe, Che Ñandejára, ndaguerohorypaivaʼekue.

3 Upevére, reñemomirĩgui, reñembotuicháta; upévare, oñeperdona ndéve opa ne angaipakuéra.

4 Tahory ne korasõ che rova renondépe; ha nde retesfikáta che réragui ndahaʼéi hentilkuérape añónte, ha katu avei Hudiokuérape; ha remboúta che ñeʼẽ umi yvy paha peve.

5 Eñorairõ, upévare, koʼẽ koʼẽre; ha ára ha ára toñehenduka ne ñemomarandu ñeʼẽpu; ha pyharévo ne ñeʼẽnguéra ani oheja oke umi yvy ári oikóvape.

6 Tojeikuaa tenda reikoha Sion-pe, ha ani reva nde rógagui; Che, Ñandejára, aguerekógui peteĩ tembiapo guasu ndéve g̃uarã, reikuaauka hag̃ua che réra yvypóra raʼykuéra apytépe.

7 Upévare, ejekuʼa jokua upe tembiaporã. Toñembosapatu avei umi nde py, rejeporavógui, ha nde rape opyta umi yvyty paʼũme, ha heta tetãnguéra apytépe.

8 Ha ne ñeʼẽ rupi heta umi oñemombaʼeguasúva oñemomirĩta, ha ne ñeʼẽ rupive heta umi imirĩva oñembotuicháta.

9 Ne ñeʼẽpu haʼéta jehavira pe ojapyharávape g̃uarã; ha nde jehavira rupive topa upe oñeʼẽreíva kũ rembiapoñaña.

10 Eñemomirĩ; ha Ñandejára nde Tupã ndegueraháta nde pógui, ha ombohováita ne ñemboʼekuéra.

11 Che aikuaa ne korasõ ha ahendúkuri ne ñemboʼe nde joykeʼykuérare. Ani ndejojaʼỹ hendiekuéra g̃uarã, rehayhuvévo chupekuéra heta ambuekuéragui, ha katu eguereko mborayhu hesekuéra ndejehéicha; ha tahetave ne mborayhu opa tapichakuérare ha opa umi che réra ohayhúvare.

12 Ha eñemboʼe nde joykeʼykuérare, umi Dóse. Eñemoñeʼẽ mbarete chupekuéra che réra rupi, ha toñeñemoñeʼẽ chupekuéra opa iñangaipakuérare, ha ejeroviareko che rérare che renondépe.

13 Ha ijeipyʼaraʼã rire ha heta ijeikoʼasy rire, péina ápe, Che, Ñandejára, ahekáta chupekuéra; ha nomohatãiramo ikorasõkuéra, ni ndaipyʼahatãi cherehe, oñekonvertíta hikuái ha Che amongueráta chupekuéra.

14 Koʼág̃a, Che haʼe ndéve, ha pe haʼéva ndéve, Che haʼe opa umi Dósepe: Pepuʼã ha pejekuʼa jokua, pejapyhy pende kurusu, chesegi ha pemongaru che ovechakuéra.

15 Ani peñembotuicha; ani peñemoĩ che rembiguái José rehe; añetehápe Che haʼégui peẽme, Che aimeha hendive, ha che po omoʼãta chupe; ha umi lláve Che ameʼẽvaʼekue chupe, ha avei peẽme, ndojepeʼamoʼãi chugui Che aju peve.

16 Añetehápe Che haʼe ndéve, che rembiguái Thomas, nde haʼe kuimbaʼe Che aiporavovaʼekue oguereko hag̃ua che rreinogua llavekuéra, umi Dóse rehegua, opa tetãnguéra apytépe—

17 Nde haʼe hag̃ua che rembiguái, reipeʼa hag̃ua upe rréino rokẽ opa tenda che rembiguái José ha che rembiguaikuéra Sidney ha Hyrum ndaikatuihápe oho;

18 Hiʼarikuéra amoĩgui opa tupao mbaʼepohýi peteĩ ára mbyky aja.

19 Upévare, haʼekuéra ne mbouhápe, tereho, ha Che aiméta nendive; ha oimeraẽ tenda remombeʼuhápe che réra, ojepeʼáta ndéve g̃uarã peteĩ okẽ iporãva, omog̃uahẽ hag̃ua hikuái che ñeʼẽ.

20 Pe omog̃uahẽva che ñeʼẽ, chéve chemog̃uahẽ; ha chéve chemog̃uahẽva, omog̃uahẽ koʼãvape, Primera Presidencia-gua, Che ambouvaʼekue, Che amoĩvaʼekue ndéve g̃uarã konsehéroramo, che réra rupi.

21 Ha avei, Che haʼe ndéve, oimeraẽ remboúvape che rérape, nde joykeʼykuéra umi Dóse ñeʼẽpu rupive, oñemomorã ha oñemoneĩ porãva nde rupive, ipuʼakáta oipeʼa hag̃ua che rréino rokẽ oimeraẽ tenda rembouhápe chupekuéra—

22 Oñemomirĩvo hikuái che renondépe, opytáramo che ñeʼẽme, ha ojapysakáramo che Espíritu ñeʼẽpúre.

23 Añetehápe, añetehápe, Che haʼe ndéve, pytũ ojahoʼi pe yvy, ha ypytũ hypyʼũva tavayguakuéra akãkuápe, ha opa tete oñembyaipákuri che rova renondépe.

24 Péina ápe, vengánsa pyaʼe oúma umi yvy ári oikovéva ári, peteĩ ñekoʼõi ára, peteĩ jehapy ára, peteĩ ñehundi ára, tasẽ, tasẽsoro ha jaheʼo ára; ha oúta yvytu jeréicha opa yvy ape ári, heʼi Ñandejára.

25 Ha che róga ári oñepyrũta, ha che rógagui isarambíta, heʼi Ñandejára;

26 Umi pende apytépegui heʼi raẽvevaʼekue oikuaaha che réra, heʼi Ñandejára, ha ndapecheikuaáikuri, ha peñeʼẽvaíkuri che rehe che róga mbytépe, heʼi Ñandejára.

27 Upévare, pehecháke ani peẽ pejepyʼapy che tupao mbaʼekuérare ko tendápe, heʼi Ñandejára.

28 Ha katu pemopotĩ pene korasõ che renondépe; ha upémarõ peho opa mundopýre, ha pemboʼe che evanhélio mayma tekove neʼírãvape oñemeʼẽ;

29 Ha pe ogueroviáva ha oñemongaraíva ojesalváta; ha pe ndogueroviáiva ni noñemongaraíriva, oñekondenáta.

30 Peẽme, umi Dóse, ha umi Primera Presidencia-guápe, oñehenóiva penendive haʼe hag̃ua umi pene konsehéro ha líder, oñemeʼẽgui ko sacerdocio puʼaka, umi ára pahápe g̃uarã ha ipaha, oikehápe upe dispensasiõ ára oñekumplipaitetaha.

31 Jeipuʼaka peẽ peguerekóva, opa umi ohupytyvaʼekuéndi peteĩ dispensasiõ oimeraẽ árape, upe apopyre ñepyrỹmby guive;

32 Añetehápe, Che haʼégui peẽme, upe dispensasiõ llavekuéra, umi pehupytyvaʼekue, oguejýkuri tuvakuéragui, ha ipahápe, oñemboúkuri yvágagui peẽme g̃uarã.

33 Añetehápe Che haʼe peẽme, péina ápe, tuichaite pende llamamiénto. Pemopotĩ pene korasõ ha pende aokuéra, ani hag̃ua ojejerure pende pógui ko ñemoñareaty ruguy.

34 Pejeroviareko Che aju peve, Che aju ag̃uímagui; ha che jopói oĩ chendive ambojopói hag̃ua peteĩteĩ tekovépe hembiapo haguéicha. Che haʼe pe Alfa ha Omega. Amén.