Sección 96
Rrevelasiõ oñemeʼẽvaʼekue José Smith, upe Profétape, ohechaukáva Sion táva térã estáka Kirtland, Ohio-pegua ñemohenda, junio 4, 1833-pe. Oñemeʼẽkuri tembiecharã ramo Kirtland-gua santokuérape. Upe ára haʼékuri sumo sacerdote-kuéra conferencia, ha mbaʼe tuichave oñeñeʼẽhague haʼékuri mbaʼépa ojejapóta umi yvy ojeikuaáva French hacienda ramo, tupao orekóva Kirtland ypýpe. Noñeg̃uahẽi rupi peteĩ ñeʼẽme mávapa oñangarekovaʼerã upe hacienda-re, opavave omboaje oñeporandu hag̃ua Ñandejárape upe mbaʼére.
1, Sion estáka Kirtland-pegua oñemombaretevaʼerã; 2–5, Obispo ombojaʼóta santokuéra jehejapyre; 6–9, John Johnson haʼevaʼerã orden unida miembro.
1 Péina ápe, Che haʼe peẽme, ápe oĩ arandu, peikuaa hag̃ua mbaʼéicha pejapóta ko mbaʼe, iporãgui chéve toñemombarete ko estáka Che amopuʼãvaʼekue Sion ñemombareterã.
2 Upévare, Newel K. Whitney toñenkarga upe tenda ojehechaukavaʼekuére peẽme, Che amopuʼãtaha ári che róga marangatu.
3 Ha avei, toñembojaʼo yvy pehẽngue, arandúpe, umi ohekáva jehejapyre ñeimeporãrã, peñomongeta haguéicha konsíliope.
4 Upévare, peñangarekóke pejesareko hag̃ua ko mbaʼére, ha pe yvy pehẽngue tekotevẽvare che orden ñeimeporãrã, ojegueraha hag̃ua che ñeʼẽ yvypóra raʼykuérape.
5 Ha péina ápe, Che haʼe peẽme, kóva haʼe iporãvéva chéve, tosẽ che ñeʼẽ yvypóra raʼykuérape, omohuʼũ hag̃ua ikorasõkuéra pene ñeimeporãrã. Taupéicha. Amén.
6 Ha avei, añetehápe Che haʼe peẽme, iñarandu ha iporã chéve che rembiguái John Johnson, pe iñemeʼẽmby Che arohoryvaʼekue ha iñemboʼekuéra Che ahenduvaʼekue, Che ameʼẽvape tekove ijapyraʼỹva promésa, oñongatúramo che rembiapoukapykuéra koʼág̃a guive tenondeve gotyo—
7 Haʼégui José ñemoñare ha ohupyty umi jehovasa upe promésa ituakuérape ojejapoʼakuégui—
8 Añetehápe Che haʼe peẽme, iporã chéve haʼe tahaʼe pe orden-gua miembro, oipytyvõ hag̃ua oguerahávo che ñeʼẽ yvypóra raʼykuérape.
9 Upévare, peordenáta chupe ko jehovasarã, ha haʼe oñehaʼãmbaitéta ohepymeʼẽmba hag̃ua umi ojedevéva oĩva pe óga ahechaukavaʼekue peẽme ári, haʼe oiko hag̃ua upépe. Taupéicha. Amén.