1 Che ha’e Alfa ha Omega, Cristo pe Ñandejára; héẽ, Che añete ha’e, pe iñepyrũmby ha ipaha, pe múndo Redentor.

2 Che, akumpli ha ajapopávo pe ha’éva che jára rembipota, pe Túva jepe, umi mba’e chereheguáva—ajapóvo upéva amoĩ hag̃ua che poguýpe opa mba’e—

3 Ajokóvo opa pu’aka, jepe ahundi hag̃ua Satana ha hembiapokuéra múndo pahápe, ha huísio ára guasu paha, aguerútava múndope oikóva ári, ahusgávo mayma tekovépe hembiapokue ha umi ojapova’ekue rehe.

4 Ha añetehápe, opa yvypóra oñearrentiva’erã térã ohasa’asýta, Che, Tupã, ha’égui opave’ỹva.

5 Upévare, Che ndaipe’amo’ãi huisiokuéra amoĩva’ekue, ha katu oúta umi jahe’o, tasẽ, pyahẽ ha tãi pururũ, héẽ, umi oĩvape che asúpe.

6 Upevére, ndojehaíri ndopamo’ãiha ko jehasa’asyvai, ha katu ojehai jehasa’asyvai opave’ỹva.

7 Ha avei, ojehai kondenasiõ ijapyra’ỹva; upéicha ojehechauka porãve ambue escritura-gui, omba’apo hag̃ua yvypóra ra’ykuéra korasõme, opa che réra gloriarã.

8 Upévare, amyesakãta peẽme ko ñemimby, iporãgui peikuaa jepeve che apostolkuéraicha.

9 Añe’ẽ peẽme pejeporavóva ko’ã mba’épe, peteĩcha ramo jepe, peike hag̃ua che pytu’úpe.

10 Ha péina ápe, pe divinida ñemimby, tuichaite ningo! Ha péina ápe, Che ha’e opave’ỹva, ha jehavira che pógui oúva ha’e jehavira opave’ỹva, che réra ha’égui Opave’ỹva. Upévare—

11 Jehavira ijapyra’ỹva ha’e Tupã jehavira.

12 Jehavira opave’ỹva ha’e Tupã jehavira.

13 Upévare, Che amanda ndéve reñearrepenti hag̃ua, ha eñongatu umi tembiapoukapy rehupytyva’ekue che rembiguái José Smith, upe ta’ýra, pógui, che rérape;

14 Ha che pokatu ipu’akapáva rupi rehupytyva’ekue umíva;

15 Upévare Che amanda ndéve eñearrepenti hag̃ua—eñearrepentíke, ani roinupã che juru tukumbópe, ha che ñeko’õi, ha che pochýpe, ha tahasyete umi ndejehasa’asy—hasykue ndereikuaáiva; imbaretekue ndereikuaáiva, héẽ, hasyete ijegueropu’aka ndereikuaáiva.

16 Ha péina ápe, Che, Tupã, ahasa’asyva’ekue ko’ã mba’e opavavére, ani hag̃ua ohasa’asy hikuái, oñearrepentíramo;

17 Ha katu noñearrepentíriramo hikuái, ohasa’asyva’erã chéicha jepeve;

18 Jehasa’asy ojapova’ekue chete, pe Tupã jepe, tuichavéva opavavégui, aryrýi mba’erasy rupi, ha cheruguy opa che pirekua rupi, ha ahasa’asy, mokõive, tete ha espíritupe—ha hi’ãnte chéve nday’úi pe kópa iróvagui, ha chepy’amano—

19 Upevére, glória Túvape, ha che hay’u ha ajapopa umi che ñembosako’i yvypóra ra’ykuérape g̃uarã.

20 Upévare, Che amanda ndéve reñearrepenti hag̃ua, ani romomirĩ che pukatu ipu’akapáva reheve; ha ekonfesa umi ne angaipa, ani hag̃ua rehasa’asy ko’ã jehavira Che añe’ẽhague, sa’imi, héẽ, jepeve michĩmi retanteava’ekue, ára Che aipe’árõguare ndehegui che Espíritu.

21 Ha Che amanda ndéve ani hag̃ua rembo’e mba’eve ndaha’éirõ pe arrepentimiénto, ha ani rehechauka ko’ã mba’e múndope, hi’arandu peve chéve.

22 Ha’ekuéra ndaikatúigui ogueropu’aka so’o ko’ág̃aite, ha katu kamby oñeme’ẽva’erã chupekuéra; upévare, ndoikuaaiva’erã hikuái ko’ã mba’e, ani hag̃ua omano.

23 Eñehekombo’e chehegui ha ejapysaka che ñe’ẽnguérare; eguata che Espíritu marangatúpe, ha reguerekóta py’aguapy chepype.

24 Che ha’e Jesucristo; ajuva’ekue Túva rembipota rupi, ha ajapo hembipota.

25 Ha avei, che ha’e ndéve ani hag̃ua reipota nde rapicha rembireko; ni reipe’ase nde rapicha rekove.

26 Ha avei, ha’e ndéve ani hag̃ua reipotaiterei umi ne mba’erepy tee, ha katu pojerápe eme’ẽ umívagui, oñeimprimi hag̃ua Mormón Kuatiañe’ẽ, oguerekóva pe añetegua ha Tupã ñe’ẽ—

27 Ha’éva che ñe’ẽ Hentilkuérape, pya’e oho hag̃ua Hudiokuérape, umíva rembyre ha’éva Lamanita-kuéra, oguerovia hag̃ua hikuái upe evanhélio, ha anive oha’arõ peteĩ Mesías oumava’ekue ñeg̃uahẽ.

28 Ha avei, che amanda ndéve reñembo’e ayvu hag̃ua, ha avei reñembo’e hag̃ua ne korasõme; héẽ, múndo renondépe ha ñemiháme; yvypóra atýpe ha ne’año jave.

29 Ha remombe’úta umi mba’eporã pyahu, héẽ, emyasãi umi yvyty ári ha opa tenda ijyvatehápe, ha opa tavaygua apytépe, ojehejáva ndéve rehecha hag̃ua.

30 Ha rejapóta opa ñemomirĩ reheve, rejeroviávo cherehe, reñe’ẽvai’ỹre umi oñe’ẽvaívare.

31 Ha doctrina pypukúre nereñe’ẽmo’ãi, ha katu remomarandúta arrepentimiénto ha jerovia Salvador rehe, ha angaipakuéra rremisiõ ñemongarai rupive, ha tata rupive, héẽ, jepe Espíritu Santo rupive.

32 Péina ápe, kóva ha’e tuicha ha ipaháva tembiapoukapy ame’ẽtava ndéve ko mba’e rehe; iporãmagui kóva nde guata ára ha árape g̃uarã, nde rekove paha peve jepe.

33 Ha tekoasy rehupytýta nerepenáirõ ko’ã ñemoñe’ẽre, héẽ, jepe neñehundi ha umi mba’erepy reguerekóva ñehundi.

34 Eme’ẽ umi mba’erepy reguerekóva pehẽngue, héẽ, nde yvy pehẽngue jepe, ha opa mba’e, ndaha’éiva nde rogayguáre reñangareko hag̃ua.

35 Ehepyme’ẽ nde deveha pe impresor ndive. Esẽ ñeñapytĩmbýgui.

36 Eheja nde róga ha nde rogapy, ndaha’éiramo rehechase jave umi nde rogayguápe;

37 Ha enẽ’ẽ jejoko’ỹme opavavéndi; héẽ, embo’e, emokyre’ỹ, emomarandu pe añetegua, jepeve ñe’ẽpu hatãme, vy’apavẽ purahéipe, reguerosapukáivo—Hosána, hosána, tojehovasa Tupã Ñandejára réra!

38 Akóinte eñembo’e, ha añohẽta nde ári che Espíritu, ha tuicháta nde jehovasa—héẽ, tuichavéta rehupytyramoguáicha umi mba’erepy yvy arigua jepe, ha avei ñembyai upeichaguáva.

39 Péina ápe, ikatúpa remoñe’ẽ kóva reñandu’ỹre vy’apavẽ ha opu’ã’ỹre ne korasõ vy’águi?

40 Térã ikatúpa rehoreínte ápe ha pépe mboguataha ohecha’ỹvaicha?

41 Térã ikatúpa reñemomirĩ ha nemarangatu ha neakãguapy cherenondépe? Héẽ, eju che, nde Salvador, rendápe. Amén