1 Ñandejára Ñe’ẽ ha Hembipota Israel Kampaménto rehegua ije’óipe kuarahyreike gotyo:

2 Toñemohenda kompañíape opa Jesucristo Santokuéra Ára Pahapegua tavayguakuéra ha umi hendivekuéra oje’óiva, konvénio ha promésa reheve oñongatutaha opa Ñandejára ñande Tupã rembiapoukapy ha apoukapykuéra.

3 Toñemohenda umi kompañía cien kapitã, cincuenta kapitã ha diez kapitã reheve, peteĩ presidente ha mokõi ikonseherokuéra iñakãme, umi Dóse Apóstoles ñeisãmbyhy guýpe.

4 Ha kóva ha’éta ñane konvénio—jaikotaha opa Ñandejára ordenánsape.

5 Tome’ẽ je’oirã ikatuháicha ijupe g̃uarã opa kompañía heta mymba júntare, kárro, provisiõ, ao ha ambue mba’e tekotevẽva.

6 Oñemohendapa vove umi kompañía, toho hikuái opa imbarete reheve, ombosako’i hag̃ua umi opytátavape g̃uarã.

7 Opa kompañía, ikapitã ha ipresidentekuéra reheve, tohecha mboýpa ikatúta oho arapoty oútavape; upéi toiporavo hetaporã kuimba’e imbarete ha ikatupyrýva, ogueraha hag̃ua mymba ojerotyryrýva, umi yva ra’ỹi ha kokue rembiporu, oho hag̃ua tenonderã ombosako’i hag̃ua ñemitỹ arapotygua.

8 Peteĩteĩ kompañía, imba’erepykuéra hepyháicha, toipytyvõ peteĩcha ogueraha hag̃ua umi imboriahúva, imena’ỹva, ityre’ỹva ha umi ehérsitope oikeva’ekue rogayguakuérape, ani hag̃ua og̃uahẽ Ñandejára apysápe umi imena’ỹva ha umi ityre’ỹva pyahẽ’asy ko tavayguakuéra rehe.

9 Tombosako’i opa kompañía umi óga, ha yvy oñeñotỹ hag̃ua yva ra’ỹi, umi opytávape g̃uarã tapykue ko temporádape; ha kóva ha’e Ñandejára rembipota itavayguakuéra rehegua.

10 Toiporu opavave kuimba’e opa iñinfluénsia ha imba’erepykuéra oguerova hag̃ua ko tavayguakuérape tenda Ñandejára omoĩtahápe peteĩ Sion estáka.

11 Ha pejapóramo kóva korasõ potĩme, opa jeroviarekópe, pejehovasáta; pejehovasáta pende ovecha’atýpe, ha pene mymba’atýpe, ha pende kokuépe, ha pende rógape, ha pende rogayguápe.

12 Tomohenda che rembiguaikuéra Ezra T. Benson ha Erastus Snow peteĩ kompañía.

13 Ha tomohenda che rembiguaikuéra Orson Pratt ha Wilford Woodruff peteĩ kompañía.

14 Avei che rembiguaikuéra Amasa Lyman ha George A. Smith tomohenda peteĩ kompañía.

15 Ha tohenói presidente ha kapitãnguéra cien ári, cincuenta ári ha diez ári.

16 Ha tosẽ che rembiguaikuéra oñehenoiva’ekue, ha toho ha tombo’e kóva, che rembipota, santokuérape, oĩmba hag̃ua hikuái oho hag̃uáicha peteĩ tetã ipy’aguapývape.

17 Tapeho ha pejapo Che ha’eva’ekue peẽme, ha ani pekyhyje umi pende rayhu’ỹvagui; ndaipu’akamo’ãigui hikuái ojoko hag̃ua che rembiapo.

18 Sion oñerredimíta che árape.

19 Ha peteĩ tekove oñembotuichaséramo, ha ndohekái che ñemoñe’ẽ, ndaipu’akamo’ãi, ha ojehechaukáta hekotavy.

20 Peheka; ha peñongatu pene ñe’ẽme’ẽ ojupe; ha ani peipota pende joyke’y mba’éva.

21 Peñeñongatu angaipa Ñandejára réra jejapyhy reígui, Che ha’égui Ñandejára pende Tupã, héẽ, pende rukuéra Tupã, Abraham, Isaac ha Jaboc Tupã.

22 Che ha’e pe oguenohẽva’ekue Israel ra’ykuérape Egipto retãgui; ha che jyva ojeipyso umi ára pahápe, asalva hag̃ua che tavayguakuéra Israel-pe.

23 Anive peñorairõ oñondive; anive peñe’ẽvai ojuehe.

24 Anive pendeka’ureko; ha umi pene ñe’ẽme tapejo’edifika ojupe.

25 Eipurúramo nde rapichágui, eme’ẽ jeýta chupe pe reipuruva’ekue; ha ndaikatúiramo reme’ẽ jey, pya’e tereho ha ere nde rapichápe, ani nekondena.

26 Ha rejuhúramo pe nde rapichágui okañyva’ekue, reheka porã reme’ẽ jey hag̃ua chupe.

27 Rejesarekóta reñongatúvo reguerekóva, nde ha’e hag̃ua majordómo iñarandúva; ha’égui Ñandejára nde Tupã don ojehepyme’ẽ’ỹva, ha nde ha’e imajordómo.

28 Revy’áramo, emomorã Ñandejárape purahéi reheve, mba’epu, jeroky ha ñembo’e ñemomorã ha aguyjeme’ẽ reheve.

29 Nderevy’áiramo, ehenói Ñandejára nde Tupãme jerure’asy reheve, ne ánga ovy’a hag̃ua.

30 Ani rekyhyje umi nderayhu’ỹvagui, oĩgui hikuái che pópe ha Che ajapóta che aipotáva hendivekuéra.

31 Tekotevẽ che tavayguakueragua oñeha’ã opa mba’épe, oĩ hag̃ua hikuái ñembosako’ípe ohupyty hag̃ua glória Che aguerekóva chupekuéra g̃uarã, héẽ, Sion glória; ha pe ndogueropu’akáiva jeja’o ndahekomarangatúi che rreinorã.

32 Toikuaa arandu iñarandu’ỹva, oñemomirĩvo ha ojerurévo Ñandejára Itupãme, tojehesape’a ohecha hag̃ua, ha toje’apysape’a ohendu hag̃ua;

33 Che Espíritu oñemboúgui múndope ohesape hag̃ua umi imirĩva ha oñembyasývape, ha umi iñañáva kondenasiõrã.

34 Nde joyke’ykuéra nembotovékuri ndéve ha ne testimóniope, jepeve upe tetã penemosẽva’ekue;

35 Ha ko’ág̃a ou imba’evaiete ára, héẽ, umi vy’a’ỹ ára, kuña imembypotávaicha; ha tuicháta ivy’a’ỹkuéra, ndaha’éiramo pya’e oñearrepenti hikuái, héẽ, pya’e voi.

36 Ojukágui hikuái profetakuérape, ha umi oñembouva’ekuépe chupekuéra; ha oñohẽkuri hikuái tuguy iñangaipa’ỹva, ojerure’asýva yvýgui hesekuéra.

37 Upévare, ani pehecharamo ko’ã mba’e, ne’ĩra gueteri penepotĩ; ndaikatúi gueteri pegueropu’aka che glória; ha katu pehecháta, pendejeroviarekóramo peñongatu hag̃ua opa che ñe’ẽ, Che ame’ẽva’ekue peẽme, Adán ára guive Abraham peve, Abraham guive Moisés peve, Moisés guive Jesús ha ijapostolkuéra peve, ha Jesús ha ijapostolkuéra guive, José Smith peve, Che ahenoiva’ekuépe che anhelkuéra rupive, che rembiguaikuéra ministránte ha che ñe’ẽpu tee rupive yvágagui, oguenohẽ hag̃ua che rembiapo;

38 Iñemopyenda ha’e omoĩva’ekue, ha ijeroviarekova’ekue; ha Che ajapyhy chupe chemba’erã.

39 Heta ohecharamova’ekue ijejuka; ha katu tekotevẽkuri ha’e osella huguy reheve itestimónio, chupe oñemoherakuãporã hag̃ua ha umi iñañávape oñekondena hag̃ua.

40 Napomosãipa Che umi penderayhu’ỹvagui, ndaha’éiramo pe Che ahejava’ekue che réra testigorãnte?

41 Ko’ág̃a, upévare, pehendu, O che tupao tavayguakuéra; ha peẽ élder-kuéra, pehendu joja; oñeme’ẽkuri peẽme che rréino.

42 Pejesareko peñongatu hag̃ua opa che rembiapoukapykuéra, ani ou pende ári umi huísio, ha ikangy pende jerovia, ha ipu’aka penderehe umi penderayhu’ỹva. Ha pévantema ko’ág̃a. Amén ha amén.