Sección 94
Rrevelasiõ oñeme’ẽva’ekue José Smith upe Proféta rupive, Kirtland, Ohio-pe, agosto 2, 1833-pe. Hyrum Smith, Reynolds Cahoon ha Jared Carter oñehenói omoĩ hag̃ua peteĩ komite Tupao ñemopu’ã rehegua.
1–9, Ñandejára ome’ẽ tembiapoukapy peteĩ óga ñemopu’ã rehegua pe Presidencia rembiaporã; 10–12, Oñemopu’ava’erã peteĩ óga oñeimprimi hag̃ua; 13–17, Ojehechauka mbovy jehejapyre.
1 Ha avei, añetehápe Che ha’e peẽme, che angirũnguéra, Che ame’ẽ peteĩ tembiapoukapy peẽme, peñepyrũ hag̃ua upe tembiapo oñeplanea ha oñembosako’i hag̃ua Sion estáka táva moñepyrũ ha ñemopyenda, ko’ápe, Kirtland retãme, oñeñepyrũvo che rógagui.
2 Ha péina ápe, ojejapova’erã upe techaukarã Che ame’ẽva’ekuépe peẽme oĩháicha.
3 Toñekonsagra chéve g̃uarã pe primer solar sur gotyogua, oñemopu’ã hag̃ua peteĩ óga presidencia-pe g̃uarã, upe presidencia rembiaporã, ohupyty hag̃ua umi rrevelasiõ; ha pe presidencia ministério rembiaporã, opa mba’e ha’évape g̃uarã Tupao ha rreinogua.
4 Añetehápe Che ha’e peẽme, upe koty ryepy ohupytytaha cincuenta y cinco pies ipykue ha sesenta y cinco ipukukue.
5 Oĩta peteĩ koty yvýpe ha ambue yvate, oĩháicha upe techaukarã tenondeve oñeme’ẽtavape peẽme.
6 Ha ojededikáta Ñandejárape g̃uarã ipyenda guive, sacerdocio órdenpe he’iháicha, oĩháicha upe techaukarã tenondeve oñeme’ẽtavape peẽme.
7 Ha ojededikapaitéta Ñandejárape, upe presidencia rembiaporã.
8 Ha ndapehejamo’ãi mba’eve mba’e ky’a oike ipype; ha che glória oĩta upépe, ha che aiméta upépe.
9 Ha katu oikéramo upépe oimeraẽ mba’e ky’a, che glória noĩmo’ãi upépe; ni che ndaikemo’ãi upépe.
10 Ha avei, añetehápe Che ha’e peẽme, ojededikáta chéve g̃uarã upe lóte mokõiha sur gotyogua, oñemopu’ã hag̃ua peteĩ óga chéve g̃uarã, tembiapo oñeimprimi hag̃ua che escritura-kuéra ñembohasa, ha opa mba’e Che amandátava peẽme.
11 Ha koty ryepy ha’éta cincuenta y cinco pies ipyrusukue ha sesenta y cinco ipukukue, ha oĩta peteĩ koty yvýpe ha peteĩ koty yvate.
12 Ha ko óga ojededikapaitéta Ñandejárape g̃uarã pe ipyenda guive, tembiapo oñeimprimi hag̃ua opa mba’e Che amandátava peẽme, imarangatu hag̃ua, imara’ỹ hag̃ua, oĩháicha upe techaukarã opa mba’e oñeme’ẽtavape peẽme.
13 Ha upe lóte mhohapyhápe, che rembiguái Hyrum Smith ohupytýta ijehejapyre.
14 Ha umi lóte peteĩha ha mokõiha nórte gotyoguápe, che rembiguaikuéra Reynolds Cahoon ha Jared Carter ohupytýta ijehejapyrekuéra.
15 Ojapo hag̃ua hikuái pe tembiapo Che ame’ẽva’ekue chupekuéra, omoĩ hag̃ua peteĩ komite oñemopu’ã hag̃ua umi che róga, pe tembiapoukapy, Che, Tupã Ñandejára peẽme ame’ẽva’ekuépe he’iháicha.
16 Noñemopu’ãiva’erã ko’ã mokõi óga, Che ame’ẽ meve peẽme peteĩ tembiapoukapy umíva rehegua.
17 Ha ko’ág̃a Che name’ẽvéima peẽme ko árape. Amén