1 Péicha heʼi Ñandejára pene Tupã, Jesucristo, pe Tuicha Che Haʼe, Alfa ha Omega, pe iñepyrũmby ha ipaha, pe ohechavaʼekue eternida tuichakue ha opa yvagagua tekoveʼaty seráfiko, pe múndo ojejapo ypy mboyve;

2 Pe opa mbaʼe kuaaha, opa mbaʼe oĩgui che resa renondépe;

3 Che haʼe pe añeʼẽvaʼekue, ha pe múndo ojejapo ha opa mbaʼe oikove che rupive.

4 Che haʼe pe aguerahavaʼekue Enoc Sion chepytiʼakuápe; ha añetehápe, che haʼe, jepeve opa umi ogueroviavaʼekue che réra, Che haʼe rupi Cristo, ha che reraitépe, pe tuguy che añohẽvaʼekue rupive rehe, ajerureʼasyvaʼekue hesekuéra pe Túva renondépe.

5 Ha katu péina ápe, añongatúkuri umi iñañáva rembyrépe, umi ypytũ itasãme, pe ára guasu huísio peve, oútava pe yvy ára pahápe;

6 Ha jepeve péicha Che añongatukáta umi iñañáva, umi nohenduséiva che ñeʼẽ, omohatã uvei hikuái ikorasõkuéra, ha ái, ái, ái chuguikuéra!

7 Ha katu, añetehápe, añetehápe, che haʼe peẽme, che resa oĩha pende ári. Che aime penembytépe ha peẽ ndaikatúi cherecha.

8 Ha katu pe ára pyaʼe oúta peẽ cherechataha, ha peikuaáta Che haʼeha; pe vélo ypytũ pyaʼe ojeipeʼátagui, ha pe naipotĩriva ndogueropuʼakamoʼãi upe ára.

9 Upévare, pejekuʼa jokua ha peñembosakoʼi. Péina ápe, pene mbaʼe pe rréino, ha pe oporohayhuʼỹva ndaipuʼakamoʼãi.

10 Añetehápe Che haʼe peẽme, peẽ penepotĩmba, ha katu ndaopavavéi; ha mavave ambuévandi ndacherorýiri;

11 Opa tete oñembyapágui che renondépe; ha umi ypytũ puʼakakuéra ojagarrapa pe yvy, yvypóra raʼykuéra apytépe, opa yvagagua tekoveʼaty renondépe.

12 Ha péva rupi orreina kirirĩ, ha opa eternida ohasaʼasy, ha anhelkuéra ohaʼarõjoa tembiapoukapy guasu omonoʼõ hag̃ua pe yvy, ombyaty hag̃ua umi ñana, ikatu hag̃ua ojehapy; ha péina ápe, umi oporohayhuʼỹva ojoajúma oñondive.

13 Ha koʼága che ahechaukáta peẽme peteĩ ñemimby, peteĩ mbaʼe oĩva umi koty ñemíme, jepeve penerundi hag̃ua ára ohasávo, ha ndapeikuaákuri;

14 Ha katu koʼág̃a che haʼe peẽme, ha pejehovasapyre, ndahaʼéi penerembiapovai rupi, ni penekorasõ ijeroviaʼỹvare; añetehápe oĩ pendeapytépe ikúlpava che renondépe, ha katu cheporiahuverekóta umi pende rekokangy reheve.

15 Upévare, penembaretéke koʼág̃a rire ha tenonderã; ani pekyhyje, penembaʼégui pe rréino.

16 Ha pene salvasiõrã che ameʼẽ peẽme peteĩ tembiapoukapy, ahendúgui pene ñemboʼe, ha umi imboriahúva ochiʼõkuri chéve, ha che ajapo umi irríkova, ha opa tete chembaʼe, ha chéve g̃uarã maymáva peteĩcha.

17 Ha amborríko pe yvy, ha péina ápe, haʼe chepyenda, upévare, amoĩ jeýta che py hiʼári.

18 Ha aikuaveʼẽ ha iporã chéve ameʼẽ peẽme rrikésa tuichavéva, peteĩ yvy ñeʼẽmeʼẽngue jepe, peteĩ yvy osẽhágui kamby ha eíra, ndaiporimoʼãiva hiʼári ñeʼẽngái Ñandejára ou vove;

19 Ha ameʼẽta peẽme pende yvy jehejapyre ramo, pehekáramo opa pene korasõ reheve.

20 Ha kóva haʼéta che konvénio penendive, pemoguahẽta pende yvy jehejapyre ramo, ha pene membykuéra jehejapyre ramo tapiaite g̃uarã, pe yvy oĩ aja, ha pehupyty jeýta eternidápe, arakaʼeve ndojehuvéima hag̃ua.

21 Ha katu, añetehápe che haʼe peẽme, ouha ára ndapeguerekomoʼãi rréi ni sãmbyhyhára, Che haʼéta rupi pende rréi ha añangarekóta penderehe.

22 Upévare, pehendu che ñeʼẽ ha chesegi, ha haʼéta peteĩ tavayguakuéra isãsóva, ha ndapeguerekomoʼãi leikuéra ha katu umi che léi, pe Che aju vove, Che haʼégui pende lehislador; ha mbaʼépa oĩ ikatúva che pojoko?

23 Ha katu añetehápe che haʼe peẽme, peñohekomboʼe, umi oficio che pohenói haguépe;

24 Ha tohayhu opa tapicha ipehẽngue ijupe ijehayhuháicha, ha tomombaʼapo virtu ha santida che renondépe.

25 Ha che haʼe jey peẽme, opa tapicha tohayhu ipehẽngue ijupe ojehayhuháicha.

26 Ha máva tapicha oguerekóva doce mitã, ha peteĩchamba chupe g̃uarã, ha umíva oservi ichupe ñeʼẽrendúpe, ha heʼíta peteĩvape: Emonde ao porã ha eguapy koʼápe; ha ambuévape katu: emonde ao soropa ha eguapy omo gotyo—ikatúta upéi omaña hesekuéra ha heʼi ijehe ijojaha?

27 Péina ápe, kóva ameʼẽ peẽme ñeʼẽ mbojoja ramo, jepeve Che haʼeháicha. Che haʼe peẽme, penepeteĩ hag̃ua; ha napeñemopeteĩri ramo, ndahaʼéi chembaʼe.

28 Ha avei, che haʼe peẽme pe oporohayhuʼỹva, umi ikoty ñemípe oheka hína pende rekove.

29 Pehendu ñorairõguasu tetã mombyrýpe, ha peje pyaʼete oĩtaha ñorairõguasu tetã mombyrýpe, ha katu ndapeikuaái umi tekove peneretãmegua korasõ.

30 Haʼe peẽme koʼã mbaʼe umi peneñemboʼe rupi; upévare, peñongatu arandu pendepype, ani yvypóra ñañangue oikuaauka peẽme koʼã mbaʼe umi hekoñaña rupive, hatãitereítava pende apysápe, peteĩ ñeʼẽpu hatãvéva pe yvy omboryrýitavagui; ha katu peiméramo ñembosakoʼípe, ndapekyhyjemoʼãi.

31 Ha pekañy hag̃ua oporohayhuʼỹva puʼakágui, ha peñembyaty hag̃ua chendive, tavaygua hekojojáva, imaraʼỹ ha ipyʼapotĩva—

32 Upévare, péva rupi amandákuri peẽme peho hag̃ua Ohio-pe; ha upépe ameʼẽta peẽme che léi; ha upépe peñeinvestíta pokatu yvateguáva reheve.

33 Ha upégui, oimeraẽ umi che aipotáva osẽta opa tetãme, ha ojeʼéta chupekuéra ojapovaʼerã; arekógui ñongatupy peteĩ tembiapo tuicha, Israel ojesalvátagui, ha aisãmbyhýta chupe Che aipotahápe, ha mbaʼevéichagua puʼaka ndachepojokomoʼãi.

34 Ha koʼág̃a, Che ameʼẽ peteĩ tembiapoukapy che tupao koʼápe oĩvape, ohenói hag̃ua kuimbaʼe ijapyteguikuéra, ha koʼãva oñehenoivaʼerã pe tupao ñeʼẽpu rupive;

35 Ha haʼekuéra oñangarekóta umi imboriahu ha oikotevẽvare, ha omeʼẽta chupekuéra pytyvõ ani hag̃ua ohasaʼasy; ha omondóta chupekuéra upe tenda che amandahague chupekuéra.

36 Ha kóva haʼéta hembiaporãnguéra, oadministra ko tupaopegua mbaʼekuéra.

37 Ha umi oguerekóva kokue ndaikatúiva ovende, toheja terã toʼalquila, iporãveháicha chupekuéra.

38 Peñehaʼã toñeñongatu opa mbaʼe; ha umi tapicha toñembyao vove pokatu ivateguágui, ha oñemondo, opa koʼã mbaʼe oñembyatyvaʼerã pe tupao mbytépe.

39 Ha pehekáramo umi rrikésa Túva omeʼẽséva peẽme hembipotápe, peẽ haʼéta opa yvyporakuéra apytégui irrikovéva, peguerekótagui rrikésa ijapyraʼỹvagua; ha tekotevẽ umi rrikésa yvy arigua tachembaʼe ameʼẽ hag̃ua; ha katu peñeñangareko orgúllogui, ani oiko pendehegui nefita-kuéra ymaguaréicha.

40 Ha avei, Che haʼe peẽme, Che ameʼẽ peẽme tembiapoukapy opa kuimbaʼe, tahaʼe élder, presbítero térã maestro, ha avei pe miembro, tombaʼapo imbarete reheve, ipo rembiapo reheve, ombosakoʼi ha ojapo hag̃ua umi mbaʼe Che amandavaʼekue.

41 Ha tahaʼe pene mboʼepy amonestasiõ ñeʼẽ, opa tekove hapichakuérape, tekomarangatu ha ñemomirĩme.

42 Ha pesẽ umi hekoñañáva apytégui. Pejesalva. Penepotĩ peẽ pegueraháva Ñandejára váso. Taʼupéicha. Amén.