Sección 55
Rrevelasiõ oñeme’ẽva’ekue José Smith upe Proféta rupive, William W. Phelps-pe, Ohio, junio 14, 1831-pe. William W. Phelps, ha’éva impresor, og̃uahẽramókuri Kirtland-pe hogayguakuérandi, ha pe Proféta oporandu Ñandejárape hese.
1–3, William W. Phelps oñehenói ha ojeiporavo oñemongarai hag̃ua, oñeordena hag̃ua elder, ha ombo’e hag̃ua upe evanhélio; 4, Ohaiva’erã avei umi kuatiañe’ẽ mitãnguérape g̃uarã Tupao mbo’ehaópe; 5–6, Oje’oiva’erã Misuri-pe, ha’éva tenda ojapotahápe hembiapo.
1 Péina ápe, péicha he’i ndéve Ñandejára, che rembiguái William, héẽ, jepeve opa tetãmegua Ñandejára, reñehenói ha rejeporavo; ha reñemongarai rire ýpe, rejapóramo che glóriare añónte rema’ẽvo, rehupytýta ne angaipakuéra rremisiõ ha Espíritu Marangatu ñemog̃uahẽ, po ñemoĩ rupive;
2 Ha upérõ reñeordenáta ko tupao elder, che rembiguái José Smith, upe ta’ýra po rupive, rembo’e hag̃ua arrepentimiénto ha angaipakuéra rremisiõ, ñemongarai rupive Jesucristo rérape, Tupã oikovéva Ra’y.
3 Ha reguerekóta pu’aka reme’ẽ hag̃ua Espíritu Marangatu, umi remoĩva ári nde po, ha’ekuéra oñembyasýrõ che renondépe.
4 Ha avei, reñeordenáta reipytyvõ hag̃ua che rembiguái Oliver Cowdery-pe, ojejapo hag̃ua kuatiañe’ẽguéra ñe’imprimi, ha jeporavo ha jehai rembiapo, ko tupao mbo’ehaokuérape g̃uarã, umi mitã michĩva oñehekombo’e hag̃ua avei che renondépe, ha upéva che arohory.
5 Ha avei, añetehápe Che ha’e ndéve, péva rupi reje’óita che rembiguái José Smith, upe ta’ýra, ha Sidney Rigdon ndive, repyta hag̃ua nde yvy jehejapyrépe, rejapo hag̃ua ko tembiapo.
6 Ha avei, toho avei hendivekuéra che rembiguái Joseph Coe. Hembyre ojekuaaukáta tenondeve, jepe Che aipotaháicha. Amén