Sección 110
Visiõ ojehechaukava’ekue José Smith upe Proféta ha Oliver Cowdery-pe, Kirtland, Ohio Témplope, abril 3, 1836-pe. Upe jave ha’ékuri peteĩ Pytu’uha aragua servicio. José Smith rembiasakuépe he’i: “Ka’arukue, aipytyvytõkuri ambue presidente-kuérape ame’ẽvo Ñandejára Santa Cena Tupaoguakuérape, ahupytývo upéva umi Dósegui, orekova’ekue priviléhio oofisia hag̃ua upe mesa marangatúpe upe ára. Ajapo rire upe pytyvõ che joyke’ykuérape, ahákuri púlpitope, oñemboguejývo umi vélo, ha añesũ, Oliver Cowdery ndive, ñembo’e solemne ha kirirĩme. Ropu’ãvo, roñembo’epa rire, ojehechauka oréve ko visiõ”.
1–10, Jehová Ñandejára ojehechauka iglóriape ha omboaje Kirtland Témplo Hóga ramo; 11–12, Mokõive, Moisés ha Elías ojehechauka ha ome’ẽ illáve ha idispensasiõ; 13–16, Elías oujey ha ome’ẽ idispensasiõ llavekuéra, oñepromete haguéicha Malaquías rupive.
1 Ojepe’ákuri upe vélo ore apytu’ũgui, ha ore ñeikũmby resa ojepe’ákuri.
2 Rohechákuri Ñandejárape púlpito varánda ári, ore renondépe; ha umi ipy guýpe oĩkuri peteĩ paviménto oroitégui, ámbarcha iparáva.
3 Umi hesa tata rendýicha; iñakãrague morotĩ sakã niéveicha; hova ojajaive kuarahy resapégui; ha iñe’ẽpu ha’ékuri heta yguasu ryapúicha, héẽ, Jehová ñe’ẽpu he’íva:
4 Che ha’e peteĩha ha ipaháva; Che ha’e pe oikovéva, Che ha’e pe ojejukava’ekue; Che ha’e penderehe ojeruréva Túva renondépe.
5 Péina ápe, oñeperdona peẽme pene angaipakuéra; penepotĩ che renondépe; upévare, pehupi pene akã ha pevy’a.
6 Tovy’a pende joyke’ykuéra korasõ, ha tovy’a opa che tavayguakuéra korasõ, umi ipu’aka reheve, omopu’ãva’ekue che rérape ko óga.
7 Péina ápe, Che amboajégui ko óga, ha che réra oĩta ko’ápe; ha Che ajehechaukáta ko ógape poriahuverekópe che tavayguakuérape.
8 Héẽ, Che ajehechaukáta che rembiguaikuérape, ha añe’ẽta chupekuéra che ñe’ẽpu teépe, che tavayguakuéra oñongatúramo che rembiapoukapykuéra, ha nomongy’ái ko óga marangatu.
9 Héẽ, millares ha deséna de millares korasõ tuicha ovy’áta, umi jehovasa oñeñohẽtava rupi ha pe ñembyao che rembiguaikuéra oñembyao haguére ko ógape.
10 Ha ko óga rerakuãporã isarambíta umi tetã ambue peve; ha kóva ha’e jehovasa ñepyrũmby oñeñohẽtava che tavayguakuéra akã ári. Taupéicha. Amén.
11 Ko visiõ oñemboty rire, ojepe’a jey oréve yvága; ha Moisés ojehechauka ore renondépe, ha ome’ẽ oréve Israel ñembyaty llavekuéra irundy yvy rendágui, ha umi diez tribu jegueraha norte retãgui.
12 Kóva rire, Elías ojehechauka, ha ome’ẽ Abraham evanhélio dispensasiõ, he’ívo ore ha ore ñemoñarépe ojehovasataha opa ñemoñareaty ore riregua.
13 Opa rire ko visiõ, ojehechauka oréve ambue visiõ tuicha ha igloriósova; oñembo’ýgui ore renondépe Elías, upe Proféta, ojeguerahava’ekue yvágape ohasa’ỹre ñemano, ha he’i:
14 Péina ápe, og̃uahẽmbaitéma ára oñeñe’ẽ haguégui Malaquías juru rupi—otestifikávo ha’e, [Elías upe Proféta] oñemboutaha Ñandejára ára tuicha ha oporomondyietéva mboyve—
15 Ombojere hag̃ua tuvakuéra korasõ ta’yrakuérape, ha ta’yrakuéra korasõ tuvakuérape, ani hag̃ua opa upe yvy ojejopy peteĩ ñe’ẽngáipe—
16 Upévare, oñemoĩ pende pópe ko dispensasiõ llavekuéra; ha kóva rupi peikuaáta Ñandejára ára tuicha ha oporomondyietéva hi’ag̃uimaha, jepeve upe okẽme.