Sección 34
Rrevelasiõ oñemeʼẽvaʼekue José Smith, pe Proféta rupive, Orson Pratt-pe, Fayette, Nueva York-pe, Noviembre 4, 1830-pe. Hermano Pratt oguerekovaʼekue 19 ary upe ára. Haʼe oñekonverti ha oñemongaraíkuri séi semana upe mboyve, ohendu ypývo guare pe Evanhélio rrestaurádo ñehekomboʼe, hykeʼy, Parley P. Pratt-gui. Kóva ko rrevelasiõ oñemeʼẽkuri Petter Whitmer, pe túva, rógape.
1–4, Umi ijeroviarekóvagui oiko Tupã taʼýra ha tajyrakuéra pe Expiasiõ rupive; 5–9, Pe evanhélio ñemboʼe ombosakoʼi Jejujey Mokõiha rape; 10–12, Profesía ou Espíritu Santo puʼaka rupive.
1 Orson, che raʼy, ejapysaka ha ehendu ha ehecha mbaʼépa che, Tupã Ñandejára, haʼéta ndéve, jepeve Jesucristo, ne Rredentor;
2 Múndo resape ha rekove, peteĩ tesape pytũmbýpe omimbíva, ha umi pytũmby ndoikũmbýi;
3 Pe múndo ohayhuetégui, haʼe omeʼẽvaʼekue hekove tee, opaite umi ogueroviáva, haʼe hag̃ua Tupã raʼy ha rajykuéra. Upévare, nde haʼe che raʼy;
4 Ha rejehovasapyre nde, reguerovia haguére;
5 Ha tuichavéntema rejehovasapyre nde, che rohenói rupi remboʼe hag̃ua che evanhélio—
6 Emopuʼã hag̃ua ne ñeʼẽpu, turu pupeguáicha, ipuku ha hatãporã, ha eguerosapukái hag̃ua arrepentimiento, peteĩ ñemoñareaty hekovai ha hembiapovaívape, rembosakoʼívo Ñandejára rape ijejujey mokõiháme g̃uarã.
7 Péina ápe, añetehápe, añetehápe, che haʼégui ndéve, hiʼaguĩmaha pe ára ajutaha peteĩ araípe, pokatu ha tuicha glória reheve.
8 Ha haʼéta peteĩ ára guasu, pe ára che ajuha, opa tetãnguéra oryrýitagui.
9 Ha katu ou mboyve upe ára guasu, pe kuarahy iñypytũta, ha pe jasýgui oikóta tuguy; ha umi mbyja nomimbisemoʼãi, ha oĩta hoʼáva, ha tuicha ñehundi ohaʼarõ umi iñañávape.
10 Upévare, ehupi ne ñeʼẽ ha ani embopa, Tupã pe Ñandejára oñeʼẽgui; eprofetisa katu; ha oñemeʼẽta ndéve pe Espíritu Santo puʼaka rupive.
11 Ha ndejeroviarekóramo, péina ápe, che aime nendive aju peve—
12 Ha añetehápe, añetehápe, che haʼe ndéve, che ajupotaitéma. Che haʼe ne Ñandejára ha ne Rredentor. Taupéicha. Amén.