Sección 87
Rrevelasiõ ha profesía ñorairõguasu rehegua, oñemeʼẽvaʼekue José Smith upe Proféta rupive, Kirtland, Ohio-pe térã ag̃ui upégui, diciembre 25, 1832-pe. Upe épokape, hendy umi ñorairõ Estados Unidos-pe esclavitud rehe, ha ojeipeʼa hag̃ua umi impuesto federal California del Sur-gui. José Smith rembiasakuépe ojehai, “umi mbaʼevai oúva tetãnguéra apytépe”, káda ve “ojekuakuave” upe Profétape g̃uarã “upe mboyve guarégui, Tupao oñepyrũrõ guare ijeʼói osẽ hag̃ua taveʼỹgui”.
1–4, Ojepredesi umi ñorairõguasu norte estádo ha sur estádo apytépe; 5–8, Tuicha kalamida hoʼáta opa umi yvy ári oikovéva ári.
1 Añetehápe, péicha heʼi Ñandejára umi ñorairõguasu pyaʼe oútavare, oñepyrũvo tekoñemoĩ Carolina del Sur-pe, oguerútava ipahápe heta ánga ñemano ha tekoʼasy.
2 Ha oúta ára ñorairõguasu oñehẽtahápe opa tetãnguéra ári, oñepyrũvo upe tendápe.
3 Ha péina ápe, sur-gua estado-kuéra oñemoĩta norte-gua rehe, ha umi sur-gua estádo ohenóita ambue tetãme, Bran Gretaña retãme jepe, péicha ojeheróva, ha koʼãva avei ohenóita ambue tetãnguérape, oñemoʼã hag̃ua ojupe ambue tetãnguéragui; ha upérõ oñeñohẽta ñorairõguasu opa tetãnguéra ári.
4 Ha ojehúta, heta ára, umi esclavo opuʼãta rire ijarakuérare, umi oñemonguʼe ha oñehekomboʼétava ñorairõguasurã.
5 Ha ojehúta avei umi opytavaʼekue rembyre upe tetãme, oñemonguʼéta ha ipochyetereíta ha ojopýta hentilkuérape jehasaʼasy vaiete reheve.
6 Ha péicha, kysepuku reheve ha tuguy ñeñohẽ rupive umi yvy ári oikovéva ojaheʼóta; ha ñembyahýi reheve, ha plága, yvyryrýi, arasunu yvágagui ha avei aratiri vaiete ha omimbíva reheve, oñeñandukáta umi yvy ári oikovévape peteĩ Tupã Ipuʼakapáva ñekoʼõi ha pochykue ha ipo oporohaviráva, upe ñehundi ojeʼevaʼekue ohundipaite peve opa tetãnguéra.
7 Santokuéra jerureʼasy ha santokuéra ruguy, nog̃uahẽvéima hag̃ua Señor de Sabaot apysápe, pe yvy guive, ojerurévo oñevenga hag̃ua chupekuéra ihayhuʼỹhakuéragui.
8 Upévare, pepyta tenda marangatúpe, ha ani peñemonguʼe, ou peve Ñandejára ára; ha péina ápe, pyaʼe ou, heʼi Ñandejára. Amén.