1 Peteĩ Jesucristo rrevelasiõ hembiguái José Smith, upe ta’ýra ha séi élder-kuérape, ombojoajúrõguare hikuái ikorasõ ha omopu’ã iñe’ẽpu yvágare.

2 Héẽ, Ñandejára ñe’ẽ itupao rehegua, oñemoĩ’akue umi ára pahápe itavayguakuéra ñemoĩjeyrã, omombe’u haguéicha iprofetakuéra juru rupive, ha isantokuéra ñembyatyrã Monte Sion ári, ha’étava Jerusalén Pyahu táva.

3 Táva oñemopu’ãtava, oñeñepyrũvo témplo terrénogui, Ñandejára kuã ohechaukáva, Misuri Estado kuarahyreike rembe’y gotyo, ha oñekonsagrava’ekue José Smith, upe ta’ýra po rupive, ha ambuekuéra, Ñandejára horyeteva’ekuéndi.

4 Añetehápe kóva ha’e Ñandejára ñe’ẽ, Jesusalén Pyahu táva toñemopu’ã santokuéra ñembyaty rupive, oñeñepyrũvo ko tendápe, jepe upe témplo rendag̃ua, oñemopu’ãtava ko ñemoñareatýpe.

5 Añetehápe ko ñemoñareaty ndopamo’ãigui oñemopu’ã mboyve peteĩ óga Ñandejárape g̃uarã, ha peteĩ arai opytu’úta hi’ári, ha’étava Ñandejára glória omyenyhẽtava upe óga.

6 Ha Moisés ra’ykuéra, Sacerdocio Marangatu Moisés ohupytyva’ekuéicha isuégro Jetro po rupi;

7 Ha Jetro ohupytyva’ekue Caleb po rupi;

8 Ha Caleb ohupytyva’ekue Eliú po rupi;

9 Ha Eliú, Jeremías po rupi;

10 Ha Jeremías, Gad po rupi;

11 Ha Gad, Esaías po rupi;

12 Ha Esaías ohupytyva’ekue Tupã po rupi;

13 Esaías oikova’ekue avei Abraham árape, ha ojehovasava’ekue hese—

14 Ha Abraham ohupytyva’ekue upe sacerdocio Melquisedec pógui, ha ha’e ohupytyva’ekue ituvakuéra lináhegui, Noé peve jepeve;

15 Ha Noé guive Enoc peve, ituvakuéra lináhe rupi;

16 Ha Enoc guive Abel peve, pe ojejukava’ekue hyke’y rembiapoñemi rupi, pe ohupytyva’ekue upe sacerdocio, Tupã rembiapoukapy rupi, itúva Adán pógui, ha’éva upe kuimba’e peteĩha—

17 Ko sacerdocio okontinua Tupã tupaópe opa ñemoñareatýpe, ha ndoguerekói ára ñepyrũmby ni ary paha.

18 Ha Ñandejára okonfirma avei peteĩ sacerdocio Aarón ha iñemoñare ári, opa iñemoñareaty aja, ko sacerdocio avei oho meme ha opyta akoiete g̃uarã upe sacerdocio reheve ha’éva Tupã órden imarangatuvévape oĩháicha.

19 Ha ko sacerdocio mayor oadministra pe evanhélio ha oguereko rréino ñemimby llavekuéra, jepeve Tupã kuaapy lláve.

20 Upévare, iñordenánsape ojehechauka divinida pokatu.

21 Ha umi iñordenánsa ha pe sacerdocio autorida’ỹre, upe divinida pokatu ndojehechaukái tekovekuérape hetépe;

22 Kóva ỹre, avave tekove ikatu ohecha Tupã rova, jepe upe Túva, ha oikove.

23 Moisés ombo’eva’ekue tesakãme kóva Israel ra’ykuérape tave’ỹme, ha jesarekópe oñeha’ãva’ekue osantifika itavayguakuérape, ikatu hag̃ua ohecha hikuái Tupã rova;

24 Ha katu omohatã hikuái ikorasõ ha ndaikatúi ogueropu’aka iñeime; upévare, Ñandejára iñeko’õime, hendýgui iñeko’õi hesekuéra, ohurákuri oĩ aja hikuái upe tave’ỹme ndoikemo’ãiha ipytu’úpe, ha’éva iglória plenitu.

25 Upévare, ha’e oipe’a Moisés-pe ijapyteguikuéra, ha avei upe Sacerdocio Marangatu;

26 Ha okontinua pe sacerdocio menor, oguerekóva umi ánhel ministério lláve ha evanhélio ñembosako’irã.

27 Ha’éva arrepentimiénto ha ñemongarai evanhélio, ha angaipakuéra rremisiõ, ha umi tembiapoukapy tete rehegua léi, Ñandejára iñeko’õime oheja memeva’ekue Aarón rógape, Israel ra’ykuéra apytépe, Juan peve, Tupã omopu’ãva’ekuépe, henyhẽvo Espíritu Sántogui isy ryepy guive.

28 Oñemongaraígui imitã jave gueteri, ha Tupã ánhel oordenava’ekue chupe ko pokatúpe g̃uarã orekóvo ócho ára, oity hag̃ua hudiokuéra rréino, ha ombojoja hag̃ua Ñandejára rapekuéra itavaygua rova renondépe, ombosako’i hag̃ua chupekuéra Ñandejára jejurã, upe ipópe oĩháme opa pu’aka.

29 Ha avei, élder ha obispo ofisiokuéra ha’e ñembojoapy oñeikotevẽva, ha’éva sacerdocio mayor rehegua.

30 Ha avei, umi maestro ha diácono ofísio ha’e ñembojoapy oñeikotevẽva, ha’éva sacerdocio menor-gua, pe sacerdocio oñekonfirmava’ekue Aarón ha ita’yrakuéra ári.

31 Upévare, ha’e haguéicha Moisés ra’ykuérare—Moisés ra’ykuéra ha avei Aarón ra’ykuéra oikuave’ẽta peteĩ ñeme’ẽmby ha peteĩ temikuave’ẽ oñemboajéva Ñandejára rógape, óga oñemopu’ãtava Ñandejárape g̃uarã ko ñemoñareatýpe, upe tenda oñekonsagrapyrépe, Che ahechauka haguéicha.

32 Ha Moisés ha Aarón ra’ykuéra, ita’yrakuéra, ha’éva peẽ, henyhẽta Ñandejára glóriagui, Monte Sion ári Ñandejára rógape; ha avei heta Che ahenói ha ambouva’ekue omopu’ã hag̃ua che tupao.

33 Umi hekojojáva ohupyty peve ko’ã mokõi sacerdocio Che añe’ẽ haguére, ha ombotuicha illamamiénto, oñesantifikágui Espíritu rupive, umi hete ñembopyahurã.

34 Oiko chuguikuéra Moisés ha Aarón ra’ykuéra, ha Abraham ñemoñare, ha upe tupao ha rréino, ha Tupã poravopyre.

35 Ha avei opa umi omog̃uahẽva ko sacerdocio, chéve chemog̃uahẽ, he’i Ñandejára;

36 Pe che rembiguaikuérape omog̃uahẽva chéve chemog̃uahẽgui;

37 Ha pe chéve chemog̃uahẽva, che Rúpe omog̃uahẽ;

38 Ha pe che Rúpe omog̃uahẽva, omog̃uahẽ che Ru rréino; upévare, opa mba’e che Ru orekóva oñeme’ẽta chupe.

39 Ha upéva oho ñe’ẽme’ẽ ha konvéniope he’iháicha, ha’éva ko sacerdocio rehegua.

40 Upévare, opa umi oñeme’ẽvape sacerdocio, ohupyty ko ñe’ẽme’ẽ ha konvénio che Rúgui, ha’e ikatu’ỹva ojapyhara, ni ndakatúiva ojepe’a.

41 Ha katu pe ojapyharáva ko konvénio, ohupyty rire, ha ohejapaite, ndohupytymo’ãi perdón iñangaipakuéragui ko múndope ni múndo oútavape.

42 Ha áina opa umi ndohupytýiva ko sacerdocio oñeme’ẽva’ekue peẽme, ko’ág̃a Che akonfirmáva pende ári, peẽ peiméva ko árape, che ñe’ẽpu tee rupive yvága guive; ha jepe Che ame’ẽkuri umi yvagagua tekoatýpe ha che anhelkuérape oñangareko hag̃ua penderehe.

43 Ha ko’ág̃a Che ame’ẽ peẽme tembiapoukapy peñeñangareko hag̃ua pendejehe, peñatende hag̃ua jesarekópe umi tekove ijapyra’ỹva ñe’ẽre.

44 Peikótagui opa ñe’ẽ Tupã jurúgui osẽvare.

45 Ñandejára ñe’ẽ añeteguágui, ha oimeraẽ añeteguáva ha’e tesape, ha oimeraẽ tesapéva ha’e Espíritu, ha’éva Jesucristo Espíritu.

46 Ha pe Espíritu ome’ẽ tesape opa tekove oúva múndope; ha pe Espíritu ohesape opa mundopegua tekove ohendúva pe Espíritu ñe’ẽpu.

47 Ha opavave ohendúva pe Espíritu ñe’ẽpu, ou Tupãme, héẽ, upe Túva.

48 Ha Túva ombo’e chupe upe konvénio ha’e ombopyahu ha okonfirmava’ekue pende ári, oñekonfirmáva pende ári pene ñeimeporãrã; ha ndaha’éi pene ñeimeporãrã añónte, ha katu opa múndo ñeimeporãrã.

49 Ha opa múndo oĩ angaipápe, ha ipyahẽ angaipa pytũmby ha ñeñapytĩmby guýpe.

50 Ha kóvare peikuaáta oĩha hikuái angaipa ñeñapytĩmby guýpe, ndoúigui hikuái che rendápe.

51 Pe ndoúiva che rendápe oĩgui angaipa ñeñapytĩmby guýpe.

52 Ha pe nomog̃uahẽiva che ñe’ẽpu ndohechakuaái che ñe’ẽpu, ha ndaha’éi chemba’e.

53 Ha péicha pehechakuaáta hekojojáva iñañávagui, ha peikuaáta opa múndo tuichakue ipyahẽha angaipa ha pytũmby guýpe ko’ág̃a jepeve.

54 Ha ambue ára ohasávape pene akã iñypytũkuri jeguerovia’ỹ rupi, ha napemomba’éigui umi mba’e pehupytyva’ekue—

55 Upe vanida ha jeguerovia’ỹ oguerúkuri kondenasiõ opa pe tupao ári.

56 Ha ko kondenasiõ oĩ Sion ra’ykuéra ári, héẽ, opavave hi’arikuéra;

57 Ha opytáta hikuái ko kondenasiõ guýpe oñearrepenti ha imandu’a peve konvénio pyahúre, ha’éva Mormón Kuatiañe’ẽ ha umi tembiapoukapy upe mboyvegua Che ame’ẽva’ekue chupekuéra, ndaha’éi oñe’ẽnte hag̃ua, ha katu ojapo hag̃ua umi Che ahaiva’ekuépe he’iháicha.

58 Ome’ẽ hag̃ua hikuái yva ijojáva Ituvakuéra rréinope g̃uarã; upeicha’ỹramo, opyta oñeñohẽ hag̃uáicha peteĩ jehavira ha huísio Sion ra’ykuéra ári.

59 Ha katu omongy’ánepa rreinogua ta’yrakuéra che yvy marangatu? Añetehápe, Che ha’e peẽme, Nahániri.

60 Añetehápe, añetehápe, Che ha’e peẽme, ko’ág̃a pehendúva che ñe’ẽnguéra, ha’éva che ñe’ẽpu, pejehovasapyre pemog̃uahẽramo ko’ã mba’e;

61 Che aperdonátagui pene angaipakuéra ko tembiapoukapy rupive—Tapepyta ñemova’ỹme akãguapýpe ha ñembo’e espíritupe, peme’ẽvo testimónio opa mundopýre umi mba’e oñemombe’úvagui peẽme.

62 Upévare, tapeho opa mundopýre; ha oimeraẽ tenda pehokuaa’ỹháme, peporombou, osẽ hag̃ua pendehegui upe testimónio opa mundopýre ha opa yvypórape.

63 Ha Che ha’e haguéicha che apostolkuérape, péicha avei Che ha’e peẽme, peẽ ha’égui che apostolkuéra, héẽ, Tupã sumo sacerdote; peẽ ha’e umi che Ru ome’ẽva’ekue chéve; peẽ ha’e che angirũnguéra;

64 Upévare, Che ha’e haguéicha che apostolkuérape ha’e jey peẽme, opa ánga ogueroviáva pene ñe’ẽ ha oñemongaraíva ýpe angaipakuéra rremisiõrã, ohupytýta pe Espíritu Santo.

65 Ha ko’ã techauka osegíta umi ogueroviávape—

66 Che rérape ojapóta hikuái heta tembiapo hechapyrãva;

67 Che rérape omosẽta hikuái añanguéra;

68 Che rérape omongueráta hikuái umi hasývape;

69 Che rérape ojapóta hikuái umi ohecha’ỹva tohecha, ha umi ohendu’ỹva tohendu;

70 Ha oñe’ẽ’ỹva kũ oñe’ẽta;

71 Ha oĩramo ome’ẽva chupekuéra venéno, ndojapovaimo’ãi hesekuéra;

72 Ha pe mbói venéno ndaipu’akamo’ãi ojapovai hag̃ua hesekuéra.

73 Ha katu peteĩ tembiapoukapy Che ame’ẽ chupekuéra, ani oñembotuicha hikuái ko’ã mba’ére, ni oñe’ẽ ko’ãvare múndo renondépe; oñeme’ẽgui peẽme ko’ã mba’e pene ñeimeporã ha salvasiõrã.

74 Añetehápe, añetehápe, Che ha’e peẽme, umi ndogueroviáiva pene ñe’ẽ, ha noñemongaraíriva ýpe che rérape, iñangaipakuéra jorarã, ohupyty hag̃ua hikuái Espíritu Santo, oñekondenáta, ha ndoikemo’ãi che Ru rréinope, Che ha che Ru roĩháme.

75 Ha ko rrevelasiõ ha tembiapoukapy oñeme’ẽva peẽme, ovaléta ko aravoite guive opa múndope; ha pe evanhélio ha’e opa umi ndohupytyiva’ekuépe g̃uarã.

76 Ha katu, añetehápe Che ha’e opa oñeme’ẽva’ekuépe upe rréino—tekotevẽ pendehegui oñembo’e chupekuéra, oñearrepenti hag̃ua hembiapo aña upe mboyveguágui; ojeja’ova’erãgui chupekuéra ikorasõ aña jeguerovia’ỹre, ha péicha avei umi pende joyke’y Sion-gua opu’ã haguére penderehe ára Che pombourõguare.

77 Ha avei, Che ha’e peẽme, che angirũnguéra, ko’ág̃a guive tenonderã Che pohenóitagui che angirũnguéra, iporã Che ame’ẽ peẽme ko tembiapoukapy, ha’e hag̃ua che angirũnguéraicha, ára ahárõguare hendivekuéra ambo’e hag̃ua pe evahélio che pokatúpe;

78 Ndahejáigui chupekuéra ogueraha vosa ni vakapire ati’yregua, ni mokõi ao.

79 Péina ápe, Che pombou peha’ã hag̃ua múndope, ha mba’apohára ohupyty hembiapo repy.

80 Ha avave kuimba’e osẽva ha ombo’e ko rreinogua evanhélio, ha oheja’ỹre ijeroviareko opa mba’épe, naikane’õmo’ãi ni naiñypytũmo’ãi iñakã, ni hete, ijyva térã henypy’a, ni ikangue joajuha; ha ni peteĩ iñakãrague ndo’amo’ãi yvýpe ojehecha’ỹre. Ha noñandumo’ãi hikuái ñembyahýi ni y’uhéi.

81 Upévare, ani pejepy’apy ára ko’ẽro g̃uarãre, mba’épa pe’úta térã pey’úta, térã mba’épa pemondéta.

82 Pema’ẽmi umi ñumegua líriore, mba’éichapa okakuaa; nomba’apói ni nombovyvýi; ha umi mundogua rréino, opa iglóriape, noñemondéi ni peteĩ umívaicha.

83 Pende Ru, yvágape oĩva, oikuaa peikotevẽha opa ko’ã mba’e.

84 Upévare, peheja ko’ẽrõ tojapyhy jepy’apy imba’éva.

85 Ani pejepy’apy mba’épa pejeva’erãre; ha katu peñongatu meme pene akãme umi ñe’ẽ oporomoingovéva, ha aravoitépe oñeme’ẽta peẽme upe pehẽ oñemedítava peteĩteĩ opa tekovépe.

86 Upévare, ani avave pende apytégui, ko tembiapoukapy ha’égui opa umi ijeroviarekóvape g̃uarã, Tupãre oñehenóiva tupaópe ministériope g̃uarã, ogueraha, ko aravo guive, vosa ni vakapire ati’yregua osẽvo omombe’u hag̃ua ko rreinogua evanhélio.

87 Péina ápe, Che pombou peja’o hag̃ua ko múndope opa hembiapovaikuére, ha pembo’e hag̃ua chupekuéra peteĩ huísio oútavagui.

88 Ha umi penemog̃uahẽva, upépe Che avei aiméta, Che ahátagui pene renonderã. Aiméta pende akatúa ha pende asúpe, ha che Espíritu oĩta pene korasõme, ha che anhelkuéra pende jerére, pendejoko hag̃ua.

89 Umi penemog̃uahẽva, chéve chemog̃uahẽ; ha penemongarúta, ha penemondéta, ha ome’ẽta peẽme pirapire.

90 Ha upe penemongarúva, térã penembyaóva, térã ome’ẽva peẽme pirapire, mba’evéicharõ ndopytamo’ãi ijopoi’ỹre.

91 Ha upe ndojapóiva ko’ã mba’e, ndaha’éi che discípulo; upéva rupi peikuaáta che discípulo-kuérape.

92 Pejere penemog̃uahẽ’ỹvagui, ha peneaño jave, pejohéi pende py ýpe, y potĩme, taha’e ára hakúpe térã ro’y jave, ha peme’ẽ testimónio umívagui pende Ru yvagaguápe, ha anive peho jey upe tekove rendápe.

93 Ha péicha pejapo avei oimeraẽ vílla térã táva peikehápe.

94 Upevére, peheka jesarekópe ha ani penekangy; ha ái upe óga, térã vílla, térã táva penembotovéva, térã ombotovéva umi pene ñe’ẽ térã pene testimónio che rehegua.

95 Ái, Che ha’e jey, upe óga, térã vílla térã táva penembotovéva, térã ombotovéva pene ñe’ẽ, térã pene testimónio chehegui;

96 Che, pe Ipu’akapáva, amboguejýgui che po tetãnguéra ári ahavira hag̃ua chupekuéra umi hembiapoñañáre.

97 Ha plága vaiete oñemosarãmbíta, ha ndojepe’amo’ãi umíva ko yvy árigui Che akumpli peve che rembiapo, oñemombykýtava tekojojápe—

98 Chekuaa peve, opavave umi opytava’ekue, michĩvéva guive tuichavéva peve, ha tahenyhẽ hikuái Ñandejára kuaapýgui, ha tohecha hesa tee rupi, ha tohupi iñe’ẽpu, ha oñondivepa topurahéi ko purahéi pyahu, he’ívo:

99 Ñandejára ogueru jey Sion-pe;Ñandejára orredimi itavayguakuéra, Israel-pe,Grásia jeporavópe oĩháicha,Ojejapova’ekue jerovia rupiveHa ituvakuéra konvénio rupive.

100 Ñandejára orredimíkuri itavayguakuéra;Ha Satana ojejokua, ha ára opáma.Ñandejára ombyatýkuri peteĩme opa mba’e.Ñandejára omboguejýkuri Sion-pe yvatégui.Ñandejára ohupíkuri Sion-pe iguýgui.

101 Pe yvy oĩkuri imemby hag̃ua, ha oguenohẽkuri imbaretekue;Ha añetegua oĩ hyepýpe;Ha umi yvága opukavy ichupe;Ha oñemonde Itupã glória reheve;Ha’e oĩgui itavayguakuéra mbytépe.

102 Glória, ha terakuãporã, ha pokatu, ha mbarete,Toñeme’ẽ ñande Tupãme; henyhẽgui poriahuverekógui,Hustísia, grásia ha añetegua, ha py’aguapy,Akói ha tapiaite g̃uarã, Amén

103 Ha avei, añetehápe, añetehápe, Che ha’e peẽme, iporã opa kuimba’e osẽva ombo’e hag̃ua che evanhélio opave’ỹva, orekóramo hikuái hogaygua ha oñeme’ẽ chupe pirapire jopóirõ, tombou chupekuéra térã toiporu umíva iñeimeporãrã, Ñandejára ohechaukaháicha, péicha oĩporãgui chéve.

104 Ha umi ndorekóiva hogaygua, ha ohupytýva pirapire, tomondo Sion-gua obispo-pe, térã Ohio-gua obispo-pe, oñekonsagra hag̃ua umi rrevelasiõ ñembosako’i ha ñeguenohẽrã, ha Sion oñemopu’ã hag̃ua.

105 Ha oĩramo ome’ẽva peẽme peteĩ jaho’iha, térã peteĩ tráhe, pejapyhy pe itujáva ha peme’ẽ umi imboriahúvape, ha tapeho vy’ápe pende rapére.

106 Ha oĩramo pende apytépe imbaretéva Espíritu-pe, togueraha hendive ikangývape, ojeedifika hag̃ua chupe opa tekomarangatúpe, ha’e avei imbarete hag̃ua.

107 Upévare, pejapyhy penendive umi oñeordenáva sacerdocio menor-pe, ha pembou chupekuéra penerenonderã ojapo hag̃ua umi jejuhurã, ha ombosako’i hag̃ua tape, ha ojapo hag̃ua umi kompromíso peẽ ikatu’ỹva pekumpli.

108 Péina ápe, péicha che apostól-kuéra ára ymavépe omopu’ãva’ekue che tupao.

109 Upévare, tojapo opa kuimba’e ijofísio, ha tomba’apo iñehenói teépe; ha ani akã he’i umi pýpe noikotevẽiha hesekuéra; umi py’ỹre, mba’éicha upe tete oñembo’ýta?

110 Avei tete oikotevẽ opa miembro-re, opavave ojoedifika hag̃ua oñondive, upe sistéma oĩporãmba hag̃ua.

111 Ha péina ápe, umi sumo sacerdote ohova’erã, ha umi élder ha presbítero avei; ha katu umi diákono ha maestro oñehenoiva’erã ojesareko hag̃ua tupaóre, ha ha’e hag̃ua iministrokuéra opytáva.

112 Ha pe obispo, Newel K. Whitney, avei ohova’erã opa tupao apytépe, ohekávo umi imboriahúvape oñatende hag̃ua hemikotevẽnguérare, omomirĩvo umi imba’ehetáva ha umi oñembotuichávape.

113 Ha’e avei ogueruva’erã peteĩ ahénte oñatende ha ojapo hag̃ua umi asúnto tupaogua’ỹva ha’e ohekombo’eháicha.

114 Upevére, toho pe obispo Nueva York távape, ha Albany ha Boston-pe, ha emomarandu tekovekuéra umi tavaguápe, upe evanhélio púpe, ñe’ẽ sapukáipe, ñembyai ha ñehundipa oha’arõvare chupekuéra ombotovéramo hikuái ko’ã mba’e.

115 Ombotovéramo hikuái ko’ã mba’e, hi’ag̃uíma ihuisiokuéra aravo, ha hogakuéra ojeheja nandíta.

116 Tojerovia ha’e cherehe ha noñemoapañuãmo’ãi; ha ni peteĩ iñakãrague ndo’amo’ãi yvýpe ojehechakuaa’ỹre.

117 Ha añetehápe Che ha’e peẽme, ambue che rembiguaikuéra, pesẽ pene llamamientokuérape, ikatuháicha peẽme, umi táva tuicha ha hechapyrãvare ha umi víllape, peja’óvo múndope tekojojápe, opa hembiapo ijoja’ỹva ha iñañávare, pejévo chupekuéra tesakã ha ñeikũmbýpe upe ára pahapegua mba’evaiete oporohundívagui.

118 Penendive, he’ígui Ñandejára Ipu’akapáva, Che ahundíta irreinokuéra; ndaha’éi aityvyrótante pe yvy, ha katu umi yvága imbyjakuéra reheve oryrýita.

119 Che, Ñandejára, aipysógui che po aiporu hag̃ua umi yvagagua pokatu; ndapehechái ko’ág̃a, ha katu ára mbykýpe pehecháta, ha peikuaáta Che ha’eha, ha Che ajutaha ha arreinataha che tavayguakuérandi.

120 Che Alfa ha Omega, iñepyrũmby ha ipaha. Amén