Sección 69
Rrevelasiõ oñeme’ẽva’ekue José Smith upe Proféta rupive, Hiram, Ohio-pe, noviembre 11, 1831-pe. Umi rrevelasiõ aty voi oñeguenohẽseva’ekue oñemboajékuri conferencia especial noviembre 1 ha 2-guápe. Ára noviembre 3-pe, oñemoĩve pe rrevelasiõ ko’ápe osẽva sección 133 ramo, tenondeve ojeheróva Apéndice. Oliver Cowdery oñehenóikuri upe mboyve ogueraha hag̃ua umi rrevelasiõ oñembyatypyre ha tembiapoukapykuéra pópe jehaipyre, oñembyatyva’ekue Independence, Misuri-pe, oñeimprimi hag̃ua. Ha’e oguerehava’erã avei hendive pirapire oñeme’ẽ’akue oñemopu’ã hag̃ua pe Tupao Misuri-pe. Ko rrevelasiõme oñehekombo’e John Whitmer-pe oho hag̃ua Oliver Cowdery ndive, ha oñehekombo’e avei Whitmer-pe, oje’ói ha ombyaty hag̃ua material histórico, llamamiénto orekóvape Tupao historiador ha registrador ramo.
1–2, John Whitmer ohova’erã Oliver Cowdery ndive Misuri-pe; 3–8, Avei ha’e ombo’e ha ombyaty, oanota ha ohaiva’erã umi dato histórico.
1 Pejapysaka cherehe, he’i Ñandejára pende Tupã, che rembiguái Oliver Cowdery ñeimeporãre. Naiñarandúi chéve g̃uarã oñeme’ẽ chupe umi tembiapoukapy ni umi pirapire ha’e oguerahátava Sion retãme, ndohóiramo hendive peteĩ hekojoja ha ijeroviarekóva.
2 Upévare, Che, Ñandejára, aipota che rembiguái, John Whitmer toho che rembiguái Oliver Cowdery ndive;
3 Ha avei tohaive ha tombyaty meme ohóvo peteĩ tembiasakue opa umi mba’eguasu ha’e ohecha ha oikuaávagui che tupao rehegua;
4 Ha avei, tohupyty ñemoñe’ẽ ha pytyvõ che rembiguái Oliver Cowdery ha ambuekuéragui.
5 Ha avei, che rembiguaikuéra oikóva yvy ári, ombouva’erã peteĩ ñemombe’u umi imajordomíagui Sion retãme;
6 Sion retã ha’étagui pe omoakãva ha tenda oñemog̃uahẽ ha ojejapo hag̃ua opa ko’ã mba’e.
7 Upevére, toje’ói che rembiguái John Whitmer heta jey peteĩ tendágui ambue tendápe, ha peteĩ tupaógui ambue tupaópe, ohupyty hasy’ỹve hag̃ua kuaapy—
8 Ombo’e ha omyesakãvo, ohai, okopia, oiporavo, ha ohupytývo opa mba’e ha’étava tupao ñeimeporãrã, ha umi ñemoñareaty oútavape g̃uarã, okakuaátavape Sion retãme, oguereko hag̃ua umíva, ñemoñareatýgui ñemoñareatýpe, akói ha tapiaite g̃uarã. Amén.