1 Pejapysaka O che tupaogua élder-kuéra, ha pehendu umi ñe’ẽ Che ha’étava peẽme.

2 Ha péina ápe, añetehápe, añetehápe, Che ha’e peẽme, pehupytyhague peteĩ tembiapoukapy ha’étava léi ramo che tupaópe, pe Che ahenoiva’ekue peẽme rupive pehupyty hag̃ua che pógui umi tembiapoukapy ha rrevelasiõ.

3 Ha kóva peikuaa añetéta—noñehenoihague peẽme avave ambue ohupyty hag̃ua umi tembiapoukapy ha rrevelasiõ, ha’e ojegueraha peve, opytáramo chendive.

4 Ha katu añetehápe, añetehápe, Che ha’e peẽme, avave ambue noñehenoimo’ãiha ko don-pe, ndaha’éirõ ha’e rupive; ha ojepe’áramo chugui, ndoguerekomo’ãi pu’aka, ndaha’éirõ ohenói hag̃ua ambuéva hendaguépe.

5 Ha kóva ha’éta peẽme léi: Napemog̃uahẽmo’ãi rrevelasiõ térã tembiapoukapy ramo, umi mbo’epy, avave oúvagui pene renondépe.

6 Ha kóva Che ame’ẽ peẽme ani hag̃ua avave penembotavy, peikuaa hag̃ua umíva ndaha’eiha chemba’e.

7 Añetehápe Che ha’égui peẽme, pe cherehe oñeordenáva, oikéta okẽ rupi, ha oñeordenáta, Che ha’éma haguéicha peẽme, ombo’e hag̃ua umi rrevelasiõ pehupytyva’ekue ha pehupytýtava, upe máva che ahenoiva’ekue rupive.

8 Ha ko’ág̃a péina ápe, Che ame’ẽ peẽme peteĩ tembiapoukapy, peñembyaty jave oñondive peñohekombo’e ha peñomokyre’ỹta, peikuaa hag̃ua mba’éicha peikova’erã ha peisãmbyhyva’erã che tupao, ha mba’éicha pejapova’erã umi púnto che léi ha che rembiapoukapykuéra reheguávape, Che ame’ẽva’ekue.

9 Ha péicha peñehekombo’éta che tupao léipe, ha peñesantifikáta umi pehupytyva’ekue rehe, ha pejapoukáta pendejupe peiko hag̃ua opa marangatúpe che renondépe—

10 Ha upéva pejapoháicha, oñemoĩvéta glória pe rréino pehupytyva’ekuépe. Ha ndapejapoirõ, ojepe’áta, jepeve umi pehupytyva’ekue.

11 Peñemopotĩ tembiapovai oĩvagui pende apytépe; peñesantifika che renondépe;

12 Ha peipotãrõ umi rréino glória, pehenói che rembiguái José Smith, upe ta’ýrape, ha peñangareko hese che renondépe, jerovia ñembo’e rupive.

13 Ha avei, Che ha’e peẽme, peipotárõ umi rreinogua ñemimby, peme’ẽ chupe tembi’u, ao ha oimeraẽ mba’e oikotevẽva ojapo hag̃ua tembiapo Che ame’ẽva’ekue chupe;

14 Ha ndapejapóiramo ha’e opytáta umi omog̃uahẽva’ekue chupe ndive ñeimeporãrã, Che amboyke hag̃ua chemba’erã peteĩ tavaygua ipotĩva che renondépe.

15 Ha Che ha’e jey peẽme, che tupaogua élder-kuéra, Che ahenoiva’ekuépe: Napeñemondói peñehekombo’e hag̃ua, ha katu pembo’e hag̃ua yvypóra ra’ykuérape umi mba’e Che amoĩva’ekue pende pópe, che Espíritu pu’aka rupive;

16 Ha peñehekombo’éta yvateguágui. Peñesantifika ha peñembyaóta pu’aka reheve, pembo’e hag̃ua, jepeve Che añe’ẽ haguéicha.

17 Pejapysaka, péina ápe, Ñandejára ára guasu hi’ag̃uímagui.

18 Oúma rupi ára Ñandejára omboputaha iñe’ẽpu yvágagui; umi yvága osusũta ha pe yvy oryrýita, ha Tupã turu ipu puku ha hatãporãta, ha he’íta tetãnguéra okévape: Pepu’ã santokuéra ha peikove; peẽ angaipa apohára, pepyta ha peke, Che ahenói jey peve!

19 Upévare, pejeku’a jokua, ani pejejuhu umi iñañáva apytépe.

20 Pemopu’ã pene ñe’ẽpu ha ani pembopaha. Pehenói tetãnguérape toñearrepenti, ituja ha imitãvape, oñeñapytĩ ha isãsovape, pejévo: Peñembosako’i Ñandejára ára guasurã.

21 Ha Che, kuimba’éva, ahupíramo che ñe’ẽpu ha pohenói peñearrepenti hag̃ua, ha napendeja’éi cherehe, mba’épa pejéta ára ou vove umi arasunu ohendukávo iñe’ẽpukuéra yvy paha guive, oñe’ẽvo opa oikovéva apysápe, he’ívo: Peñearrepenti ha peñembosako’i Ñandejára ára guasurã?

22 Héẽ, ha avei, umi aravera omimbi vove kuarahyresẽ guive kuarahyreike peve, ha og̃uahẽ iñe’ẽpukuéra ñe’ẽ opa oikovévape, ha ombohyapu opa umi ohendúva apysa, he’ívo: Peñearrepenti, Ñandejára ára guasu og̃uahẽmagui?

23 Ha avei, Ñandejára oñe’ẽta iñe’ẽpu yvága guive, he’ívo: Pejapysaka, O yvy arigua tetãnguéra, ha pehendu Tupã pende apohare ñe’ẽnguéra.

24 O peẽ, yvy arigua tetãnguéra, mboy ára piko pombyatyva’erãmo’ã ryguasu ombyatyháicha iryguasura’ykuéra umi ipepo guýpe, ha katu ndapeipotáikuri!

25 Mboy ára piko pohenoiva’ekue che rembiguaikuéra juru rupi, ha umi ánhel ministrasiõ rupive, ha che ñe’ẽpu tee rupive, ha arasunu ñe’ẽpu rupive, ha aratiri ha aravaiete ñe’ẽpu rupive; ha yvyryrýi ñe’ẽpu ha amandáu atã rupive, ha ñembyahýi ha opáichagua mba’asyvai ñe’ẽpu rupive; ha peteĩ turuguasu ñe’ẽpu rupive, ha huísio ha poriahuvereko ñe’ẽpu rupive, opa ára pukukue; ha glória ha terakuãporã ñe’ẽpu rupive, ha tekove ijapyra’ỹva rrikésa ñe’ẽpu rupive, ha posalvava’erãmo’ã, salvasiõ opave’ỹva reheve, ha katu ndapeipotáikuri!

26 Péina ápe, og̃uahẽma ára, che ñeko’õi pochykue kópa henyhẽma.

27 Péina ápe, añetehápe Che ha’e peẽme, ko’ãva ha’eha Ñandejára pende Tupã ñe’ẽnguéra.

28 Upévare, pemba’apo, pemba’apo ipahaite che víñape—ipahaite pehenói umi yvy ári oikóvape.

29 Che árape Che ajútagui huísiope yvy ári, ha che tavaygua oñerredimíta ha orreináta chendive yvy ári.

30 Oútagui pe Milénio tuichaite, Che añe’ẽ haguégui che rembiguaikuéra juru rupi.

31 Satana ojejokuátagui; ha ojejora jey vove, ha’e orreináta peteĩ ára mbyky aja, ha upérõ oúta pe yvy ára paha.

32 Ha pe tekojojápe oikovéva oñemoambuéta peteĩ tesa pirĩme, ha pe yvy opáta tata rupiguáicha.

33 Ha umi iñañáva ohóta tata ogue’ỹvape, ha ipahakuéra, avave tekove yvy arigua ndoikuaái, ha araka’eve ndoikuaamo’ãi, ou peve hikuái huísiope che renondépe.

34 Pejapysaka ko’ã ñe’ẽre. Péina ápe, Che ha’e Jesucristo, múndo Salvahára. Peñongatu ko’ã mba’e pene korasõme, ha topytu’u pene akãme umi ára apyra’ỹmegua solemnida.

35 Peneakãguapýke. Peñongatu opa che rembiapoukapykuéra. Taupéicha. Amén