Sección 41
Rrevelasiõ oñeme’ẽva’ekue Tupaópe José Smith upe Proféta rupive, Kirtland, Ohio-pe, Febrero 4, 1831-pe. Ko rrevelasiõme oñehekombo’e Proféta ha Tupaogua élder-kuérape toñembo’e ohupyty hag̃ua Tupã “léi” (tojehecha sección 42). José Smith, og̃uahẽ ramóva Kirtland-pe, Nueva York-gui, ha Leman Copley, peteĩ Tupaogua miembro oikóva Thompson ypýpe, Ohio-pe, “ojerurékuri hermano José ha Sidney [Rigdon]-pe … ou hag̃ua oiko hendive ha ha’e ome’ẽta chupekuéra óga ha hi’upyrã”. Ko rrevelasiõme oñemohesakã moõpa José ha Sidney oikova’erã, ha avei oñehenói Edward Partridge-pe ha’e hag̃ua Tupaogua obispo peteĩha.
1–3, Élder-kuéra oisãmbyhýta Tupao rrevelasiõ espíritu rupive; 4–6, Umi discípulo añetéva ohupytýta ha oñongatúta Ñandejára léi; 7–12, Edward Partridge oñehenói Tupaogua obispo ramo.
1 Pejapysaka ha pehendu, O che tavayguakuéra, he’i Ñandejára ha pende Tupã, peẽ pecherendúva, cherorývape ahovasávo jehovasa opaitégui tuichavévape; ha peẽ pejéva peikuaaha che réra ha na pecherendúi, Che pomoñe’ẽngáita, opa moñe’ẽngái ipohyivévape.
2 Pejapysaka, O che tupaogua élder-kuéra, umi Che ahenoiva’ekue, péina ápe, Che ame’ẽ peẽme peteĩ tembiapoukapy peñembyaty hag̃ua, peime hag̃ua peteĩ ñe’ẽme, che ñe’ẽ reheguávape;
3 Ha pene ñembo’e jerovia rupive pehupytýta che léi, peikuaa hag̃ua mba’éichapa peisãmbyhýta che tupao ha peguereko porãve hag̃ua opa mba’e cherenondépe.
4 Ha Che aju vove ha’éta pene sãmbyhyhára; péina ápe, Che ajupotáma, ha peñangarekóta toñeñongatu che léi.
5 Pe ohupytýva che léi ha oñongatu, péva ha’e che discípulo; ha pe he’íva ohupytyha che léi ha noñongatúi, upéva ndaha’éi che discípulo, ha oñemosẽta pende apytégui;
6 Naiporãigui oñeme’ẽ umi mba’e rreinogua, ta’ýra ha tajyrakuéra mba’éva, umi hekomarangatu’ỹvape, ni jaguakuérape, ni ojeity umi pérla kure renondépe.
7 Ha avei, iporã che rembiguái José Smith, upe ta’ýrape, toñemopu’ã peteĩ óga, oiko ha ombohasa hag̃ua upépe.
8 Ha avei, iporã che rembiguái Sidney Rigdon toiko ohecha porãháicha, oñongatúramo che rembiapoukapykuéra.
9 Ha avei, Che ahenóikuri che rembiguái Edward Partridge-pe; ha Che ame’ẽ peteĩ tembiapoukapy, toñehenói chupe tupao ñe’ẽpu rupive, ha toñeordena obispo tupaópe, toheja iñalmasẽ ha toiporu opa hi’ára tupao rembiapópe;
10 Ojesareko hag̃ua opa mba’e che léipe oñeme’ẽvare chupe, pe ára che ame’ẽ vove umíva.
11 Ha kóva ikorasõ potĩgui che renondépe, ojogua rupi Natanael ymaguarévape, ipype ndaipóriva japu.
12 Ko’ã ñe’ẽ oñeme’ẽ peẽme, ha ko’ãva ipotĩ cherenondépe; upévare, peñeñangarekóke mba’éicha pehecháta umíva, umi pene ánga ombohováitagui ko’ãvare huísio árape. Taupéicha. Amén