Sección 38
Rrevelasiõ oñeme’ẽva’ekue José Smith upe Proféta rupive, Fayette, Nueva York-pe, Enero 2, 1831-pe. Péva ha’ékuri peteĩ Tupaogua conferencia.
1–6, Cristo ojapova’ekue opa mba’e; 7–8, Ha’e oĩ Isantokuéra apytépe, ohechapotámava Chupe; 9–12, Opa tekove oñembyaipa Henondépe; 13–22, Ha’e omboykeva’ekue peteĩ yvy ñe’ẽme’ẽngue Isantokuérape g̃uarã ko ára ha ára apyra’ỹme g̃uarã; 23–27, Oñemanda santokuérape ipeteĩ hag̃ua hikuái ha ojohayhu hag̃ua oñopehẽnguéicha; 28–29, Ojepredesi oĩtaha ñorairõguasu; 30–33, Oñeme’ẽta santokuérape pu’aka yvateguigua ha ohóta opa tetãnguérape; 34–42, Oñemanda Tupaópe oñangareko hag̃ua imboriahúva ha oikotevẽvare, ha oheka hag̃ua ára apyra’ỹmegua rrikésa.
1 Péicha he’i Ñandejára pende Tupã, Jesucristo, upe Tuicha Che Ha’e, Alfa ha Omega, pe iñepyrũmby ha ipaha, pe ohechava’ekue ára apyra’ỹ tuichakue ha opa yvagagua tekoveaty seráfiko, pe múndo ojejapo mboyve;
2 Pe opa mba’ekuaaha, opa mba’e oĩgui che resa renondépe;
3 Che ha’e pe añe’ẽva’ekue, ha pe múndo ojejapo ha opa mba’e oikove che rupive.
4 Che ha’e pe aguerahava’ekue Enoc Sion-pe che py’ápe; ha añetehápe, Che ha’e, jepeve opa umi ogueroviava’ekue che réra, Che ha’e rupi Cristo, ha che reraitépe, pe tuguy Che añohẽva’ekue rupivére, ajerure’asyva’ekue hesekuéra pe Túva renondépe.
5 Ha katu péina ápe, Che añongatúkuri umi iñañáva rembyrépe, umi pytũmby itasãme, pe ára guasu huísio peve, oútava pe yvy ára pahápe;
6 Ha jepeve péicha Che añongatukáta umi iñañáva, umi nohenduséiva che ñe’ẽpu, omohatã uvei hikuái ikorasõ, ha ái, ái, ái chuguikuéra!
7 Ha katu, añetehápe, añetehápe, che ha’e peẽme, che resa oĩha pende ári. Che aime pendeapytépe ha peẽ ndaikatúi cherecha.
8 Ha katu pe ára pya’e oúta peẽ cherechataha, ha peikuaáta Che ha’eha; pe vélo pytũmby pya’e ojepe’átagui, ha pe naipotĩriva ndogueropu’akamo’ãi upe ára.
9 Upévare, pejeku’a jokua ha peñembosako’i. Péina ápe, pene mba’e pe rréino, ha pe oporohayhu’ỹva ndaipu’akamo’ãi.
10 Añetehápe Che ha’e peẽme, peẽ penepotĩ, ha katu ndaopavavéi; ha avave ambuévape ndaguerohorýi;
11 Opa tekove oñembyaipágui cherenondépe; ha umi pytũmby pu’akakuéra ojagarrapa pe yvy, yvypóra ra’ykuéra apytépe, opa yvagagua tekoveaty renondépe.
12 Ha upéva rupi orreina kirirĩ, ha opa ára apyra’ỹ ohasa’asy, ha anhelkuéra oha’arõjoa tembiapoukapy guasu omono’õ hag̃ua pe yvy, ombyaty hag̃ua umi ñana, ikatu hag̃ua ojehapy; ha péina ápe, umi oporohayhu’ỹva ojoajúma oñondive.
13 Ha ko’ága che ahechaukáta peẽme peteĩ ñemimby, peteĩ mba’e oĩva umi koty ñemíme, oiko hag̃ua jepe peneñehundi ára ohasávo, ha ndapeikuaákuri;
14 Ha katu ko’ág̃a che ha’e peẽme, ha pejehovasapyre, ndaha’éi penerembiapovai rupi, ni penekorasõ ijerovia’ỹvare; añetehápe oĩ pendeapytépe ikúlpava cherenondépe, ha katu cheporiahuverekóta umi pende rekokangy reheve.
15 Upévare, penembaretéke ko’ág̃a guive tenondeve gotyo; ani pekyhyje, penemba’égui pe rréino.
16 Ha pene salvasiõrã che ame’ẽ peẽme peteĩ tembiapoukapy, ahendúgui pene ñembo’e, ha umi imboriahúva ochi’õkuri chéve, ha che ajapo umi irríkova, ha opa tekove chemba’e, ha chéve g̃uarã maymáva peteĩcha.
17 Ha amborríko pe yvy, ha péina ápe, ha’e chepyenda, upévare, amoĩ jeýta che py hi’ári.
18 Ha aikuave’ẽ ha iporã chéve ame’ẽ peẽme rrikésa tuichavéva, peteĩ yvy ñe’ẽme’ẽngue jepe, peteĩ yvy osẽhágui kamby ha eíra, ndaiporimo’ãiha hi’ári ñe’ẽngái Ñandejára ou vove;
19 Ha ame’ẽta peẽme pende yvy jehejapyréramo, pehekáramo opa pene korasõ reheve.
20 Ha kóva ha’éta che konvénio penendive, pemog̃uahẽta pende yvy jehejapyréramo, ha pene membykuéra jehejapyréramo akoiete g̃uarã, pe yvy oĩ aja, ha pehupyty jeýta ára apyra’ỹme, araka’eve ndopavéi hag̃ua.
21 Ha katu, añetehápe che ha’e peẽme, ouha ára ndapeguerekomo’ãi rréi ni sãmbyhyhára, Che ha’éta rupi pende rréi ha añangarekóta penderehe.
22 Upévare, pehendu che ñe’ẽpu ha chesegi, ha ha’éta peteĩ tavayguakuéra isãsóva, ha ndapeguerekomo’ãi leikuéra ha katu umi che léi, pe Che aju vove, Che ha’égui pende léi apohára; ha mba’épa oĩ ikatúva che po ojoko?
23 Ha katu añetehápe che ha’e peẽme, peñohekombo’e umi kárgo che pohenói haguépe;
24 Ha opa tekove tohayhu ijoyke’ýpe ijupe ojehayhuháicha, ha tomomba’apo virtu ha santida cherenondépe.
25 Ha che ha’e jey peẽme, opa tekove tohayhu ijoyke’ýpe ijupe ojehayhuháicha.
26 Ha máva tapicha oguerekóva dóse mitã, ha peteĩchamba chupe g̃uarã, ha umíva oservi ichupe ñe’ẽrendúpe, ha he’íta peteĩvape: Emonde ao porã ha eguapy ko’ápe; ha ambuévape katu: emonde ao soropa ha eguapy amo gotyo—ikatúta upéi omaña hesekuéra ha he’i ijehe ijojaha?
27 Péina ápe, kóva ame’ẽ peẽme ñe’ẽ mbojoja ramo, ha Che ha’eháicha jepe. Che ha’e peẽme, penepeteĩ hag̃ua; ha napeneteĩriramo, ndaha’éi chemba’e.
28 Ha avei, che ha’e peẽme pe oporohayhu’ỹva, umi ikoty ñemípe ohekahína pende rekove.
29 Pehendu ñorairõguasu tetã mombyrýpe, ha peje pya’ete oĩtaha ñorairõguasu tetã mombyrýpe, ha katu ndapeikuaái umi tekove pene retãmegua korasõ.
30 Ha’e peẽme ko’ã mba’e umi pene ñembo’e rupi; upévare, peñongatu arandu pendepy’ápe, ani yvypóra rekoñañangue oikuaauka peẽme ko’ã mba’e umi hembiapoñaña rupive, hatãitereítava pende apysápe, peteĩ ñe’ẽpu hatãvéva pe yvy omboryrýitavagui; ha katu peiméramo ñembosako’ípe, ndapekyhyjemo’ãi.
31 Ha pekañy hag̃ua oporohayhu’ỹva pu’akágui, ha peñembyaty hag̃ua chendive, tavaygua hekojojáva, imara’ỹ ha ikulpa’ỹva—
32 Upévare, péva rupi amandákuri peẽme peho hag̃ua Ohio-pe; ha upépe ame’ẽta peẽme che léi; ha upépe peñembyaóta pokatu yvateguáva reheve;
33 Ha upe guive, umi Che aipotáva osẽta opa tetãme, ha oje’éta chupekuéra mba’épa ojapova’erã; Che arekógui ñongatupy peteĩ tembiapo tuicha, Israel ojesalvátagui, ha Che aisãmbyhýta chupe Che aipotahápe, ha mba’evéichagua pu’aka ndachepojokomo’ãi.
34 Ha ko’ág̃a, Che ame’ẽ peteĩ tembiapoukapy che tupao ko’ápe oĩvape, ohenói hag̃ua kuimba’e ijapyteguikuéra, ha ko’ãva oñehenoiva’erã pe tupao ñe’ẽpu rupive;
35 Ha oñangarekóta hikuái umi imboriahu ha oikotevẽvare, ha ome’ẽta chupekuéra pytyvõ ani hag̃ua ohasa’asy; ha omondóta chupekuéra tenda Che amanda haguépe;
36 Ha kóva ha’éta hembiaporãnguéra, oadministra ko tupaopegua mba’erepykuéra.
37 Ha umi oguerekóva kokue ndaikatúiva ovende, toheja terã to’alquila, iporãveháicha chupekuéra.
38 Peñeha’ã toñeñongatu opa mba’e; ha tekovekuéra oñembyao vove pokatu yvateguágui ha oñemondo, opa ko’ã mba’e oñembyatyva’erã tupao mbytépe.
39 Ha pehekáramo umi rrikésa Túva ome’ẽséva peẽme hembipotápe, peẽ ha’éta opa yvyporakuéra apytégui irrikovéva, peguerekótagui ára apyra’ỹmegua rrikésa; ha tekotevẽ umi rrikésa yvy arigua tachemba’e ame’ẽ hag̃ua; ha katu peñeñangareko orgúllogui, ani oiko pendehegui nefita-kuéra ymaguaréicha.
40 Ha avei, Che ha’e peẽme, Che ame’ẽ peẽme tembiapoukapy opa kuimba’e, taha’e élder, presbítero térã maestro, ha avei pe miembro, tomba’apo imbarete reheve, ipo rembiapo reheve, ombosako’i ha ojapo hag̃ua umi mba’e Che amandava’ekue.
41 Ha taha’e pene ñehekombo’e ñemomarandu ñe’ẽpu, opa tekove hapichakuérape, py’aguapy ha marangatúpe.
42 Ha pesẽ umi hekoñañáva apytégui. Pejesalva. Penepotĩ peẽ pegueraháva Ñandejára váso. Ta’upéicha. Amén.