1 Aron maselyo ang pagpamatuod niini nga basahon ug sa Basahon ni Mormon, among ipahibalo ang pagkamartir ni Joseph Smith ang Propeta, ug ni Hyrum Smith ang Patriyarka. Gipusil sila didto sa bilanggoan sa Carthage, niadtong ika-27 sa Hunyo, 1844, mga alas singko sa hapon, sa armado nga mga manggugubot—nagpintal og itom sa ilang mga nawong—gikan sa 150 ngadto sa 200 ka tawo. Si Hyrum ang unang gipusil ug inanay nga natumba, nga nagtuaw: Patay na ko! Misulay si Joseph sa pag-ambak gikan sa bintana, ug gipusil-patay, nga nagtuaw: O Ginoo akong Dios! Silang duha gipamusil bisan og patay na, sa walay kaluoy nga paagi, ug ang duha nakaangkon og upat ka pinusilan.

2 Si John Taylor ug si Willard Richards, duha sa Napulog Duha, mao lamang ang mga tawo diha sa lawak nianang higayona; ang una nasamdan sa mabangis nga paagi nga may upat ka pinusilan, apan naayo ra; ang ulahi, pinaagi sa kaluoy sa Dios, nakaikyas, nga walay bisan usa ka buslot sa iyang kupo.

3 Si Joseph Smith, ang Propeta ug Manalagna sa Ginoo, mas daghan og nahimo, gawas lamang kang Jesus, alang sa kaluwasan sa mga tawo niini nga kalibotan, kaysa ubang tawo nga nakapuyo dinhi. Sulod sa mubong panahon sa kawhaan ka tuig, siya ang mipatungha sa Basahon ni Mormon, nga iyang gihubad pinaagi sa gasa ug gahom sa Dios, ug nahimong pamaagi nga mamantala kini sa duha ka kontinente; mipadala sa kahingpitan sa walay kataposan nga ebanghelyo, nga anaa niini, ngadto sa upat ka bahin sa kalibotan; mipatungha sa mga pagpadayag ug mga sugo nga naglangkob niini nga basahon sa Doktrina ug mga Pakigsaad, ug daghan pang maalamon nga mga dokumento ug mga panudlo alang sa kaayohan sa katawhan; mipundok sa daghang liboan ka Santos sa Ulahing mga Adlaw, nagtukod og dakong siyudad, ug nagbilin og dungog ug ngalan nga dili mamatay. Nagpuyo siya nga halangdon, ug namatay nga halangdon sa mga mata sa Dios ug sa iyang katawhan; ug sama sa kadaghanan nga gidihogan sa Ginoo sa karaang mga panahon, miselyo sa iyang misyon ug sa iyang buhat pinaagi sa iyang kaugalingong dugo; ug ingon man usab ang iyang igsoon nga si Hyrum. Sa kinabuhi wala sila mabahin, ug sa kamatayon wala sila mabulag!

4 Sa dihang miadto si Joseph sa Carthage aron itugyan ang iyang kaugalingon ngadto sa gipakaaron-ingnon nga mga kinahanglanon sa balaod, duha o tulo ka adlaw sa wala pa siya gipatay, miingon siya: “Moadto ako sama sa usa ka karnero paingon sa ihawanan; apan malinawon ako sama sa kabuntagon sa ting-init; Dala ko ang tanlag nga walay sala ngadto sa Dios, ug sa tanang tawo. Mamatay ako nga walay sala, ug ikasulti pa kini mahitungod kanako—gituyo siya sa pagpatay sa walay kaluoy.”—Nianang buntaga, human makaandam si Hyrum sa paglakaw—ato bang masulti nga moadto sa ihawan? oo, kay mao gayod kadto—gibasa niya ang mosunod nga parapo, dapit sa kataposan sa ikanapulog duha nga kapitulo sa Ether, sa Basahon ni Mormon, ug gipakli ang palid niini:

5 Ug nahitabo nga nag-ampo ako sa Ginoo nga siya mohatag sa mga Hentil og grasya, nga sila makaangkon og gugma nga putli. Ug nahitabo nga ang Ginoo miingon kanako: Kon sila walay gugma nga putli dili kini mahinungdanon nganha kanimo, ikaw nagmatinud-anon; mao nga ang imong mga sapot pagahimoon nga limpyo. Ug kay nakita nimo ang imong kahuyang, ikaw pagalig-onon, gani ngadto sa paglingkod sa dapit nga akong giandam didto sa mga mansyon sa akong Amahan. Ug karon … manamilit ako sa mga Hentil; oo, ug usab ngadto sa akong kaigsoonan nga akong gihigugma, hangtod nga magkita kita sa atubangan sa hukmanan ni Kristo, diin ang tanang tawo masayod nga ang akong mga sapot walay lama sa inyong dugo. Ang mga testigo patay na, ug ang ilang testamento nagpadayon pa.

6 Si Hyrum Smith kap-atan ug upat ang panuigon niadtong Pebrero, 1844, ug si Joseph Smith katloan ug walo niadtong Disyembre, 1843; ug sukad niadto ang ilang mga ngalan nahilakip sa mga martir sa relihiyon; ug ang magbabasa sa matag nasod mapahinumdoman nga ang Basahon ni Mormon, ug kini nga basahon sa Doktrina ug mga Pakigsaad sa simbahan, nagkantidad sa labing mahal nga dugo sa ikanapulo ug siyam ka gatos nga siglo aron sa pagpatungha niini alang sa kaluwasan sa usa ka daotan nga kalibotan; ug nga kon ang kalayo makasunog sa usa ka buhi nga kahoy alang sa himaya sa Dios, sayon ra kaayo niining sunogon ang uga nga mga kahoy aron malimpyohan ang ubasan gikan sa pagkadaot. Nabuhi sila alang sa himaya; namatay sila alang sa himaya; ug ang himaya mao ang ilang walay kataposan nga ganti. Gikan sa usa ka panahon ngadto sa laing panahon ang ilang mga ngalan mahinumdoman sa kaliwatan ingon og mga mutya alang sa gibalaan.

7 Wala sila makasala sa bisan unsa nga krimen, ingon nga sila sa kanunay napamatud-an kaniadto, ug nabilanggo lamang pinaagi sa plano sa mga mabudhion ug daotang mga tawo; ug ang ilang dugo nga walay sala nga nagbanaw sa bilanggoan sa Carthage usa ka lig-ong selyo nga napatik sa “pagka-Mormon” nga dili masalikway sa bisan unsa nga hukmanan sa yuta, ug ang ilang dugo nga walay sala diha sa dayan-dayan sa Estado sa Illinois, uban sa nabungkag nga pagtuo sa Estado sama sa gipanumpaan sa gobernador, mao ang usa ka saksi sa kamatuoran sa walay kataposang ebanghelyo nga dili malalis sa tibuok kalibotan; ug ang ilang dugo nga walay sala diha sa bandila sa kalingkawasan, ug diha sa magna charta sa Estados Unidos, mao ang nagrepresentar sa relihiyon ni Jesukristo, nga motandog sa mga kasingkasing sa matinuorong mga tawo sa tanang kanasoran; ug ang ilang dugo nga walay sala, kauban ang dugo nga walay sala sa tanang martir nga anaa sa ilawom sa altar nga nakita ni Juan, motuaw ngadto sa Ginoo sa mga Panon hangtod nga siya manimalos niana nga dugo dinhi sa yuta. Amen.