1 Che ha’e haguéicha peẽme che kuatiápe, asẽ mboyve ógagui, ahaitaha peẽme sapy’apy’a amombe’u hag̃ua heta mba’e rehegua, kóvape añe’ẽjey omanova’ekue ñemongaraíre, upe mba’e ha’etégui oĩva che akãme ha ojopy mbaretevéva che remiandu, umi che rayhu’ỹva chemuña ypy guive.

2 Che ahaíkuri peẽme rrevelasiõ ñe’ẽnguéra peteĩ haihára rehe. Aguerekovékuri mbovymi temiandu ko mba’e rehegua, che amoañetéva ko’ág̃a. Péva he’ise, oje’ékuri che kuatia upe mboyveguápe oĩva’erãha peteĩ haihára, ha’eva’erã testígo ohecháva, ha avei ohendúva ijapysa rupi, ojapo hag̃ua peteĩ añeteguágui jehaipyre Ñandejára renondépe.

3 Ko’ág̃a, ko mba’e rehegua, ijetu’uetereíta peteĩ haihára año oĩ hag̃ua opa ára ha ojapo hag̃ua opa mba’e. Ani hag̃ua oĩ ko mba’e ijetu’úva, opa táva barrio-pe ikatu oñehenói peteĩ haihára ikatupyrýva ojapo hag̃ua nóta oĩporãva; ha tomoĩporã ha tomoĩmbaite ohaívo opa mba’e oikova’ekuégui, omoañetévo ijehaipyrépe, ohechahague hesa rupi ha ohenduhague ijapysa rupi, omoĩvo umi fécha, umi téra, ha ambue, ha opa upe mba’e ñemombe’upaite, ohenóivo avei mbohapy tapicha oĩva’ekue upe jave, oĩramo, ikatu hag̃uáicha umíva omoañete pe oikova’ekue oimeraẽ árape, mokõi térã mbohapy testígo juru rupi oñemoĩ hag̃ua opa ñe’ẽ.

4 Upérõ, toĩ peteĩ haihára general, oñeme’ẽvape ko’ã jehaipyre, ohóva umi kuatia reheve, ha’ekueraite omboteraguapyva’ekue, omoañetéva upe jehaipyre ojapova’ekue hikuái añeteguaha. Upérõ, pe tupao haihára general omoĩta upe jehaipyre tupao kuatiañe’ẽ general-pe, umi kuatia ha opa testígo oĩva’ekue ndive, imomarandu tee reheve, ha’e ogueroviaha umi oje’e ha ojehaiva’ekue añeteguaha, oñemopyendáva kuaapy porã ha’e orekóvare umi kuimba’e rekopy ha iñehenóire tupaópe. Ha kóva ojejapóvo tupao kuatiañe’ẽ general-pe, isantoitéta upe jehaipyre, ha okumplíta pe ordenánsa, ha’e ohecharamoguáicha hesa rupive ha ohenduramoguáicha ijapysa rupi, ha ohairamoguáicha pe tupao kuatiañe’ẽ general-pe.

5 Oiméne peimo’ã ko’ã mba’e hesete oñemohendaha; ha katu pehejami ta’e peẽme upéicha ojejapoha, oñembohovái hag̃ua Tupã rembipota, jasegívo pe ordenánsa ha ñembosako’i Ñandejára oordena ha omoĩva’ekue pe múndo ojejapo mboyve, omanóva ojesalva hag̃ua, umi omanova’ekue evanhélio jeikuaa’ỹre.

6 Ha avei, che aipota penemandu’a Juan, upe Rrevelador, ohechahague ko téma umi omanóva rehegua, he’írõguare, ojehaiháicha Apocalipsis 20:12-pe—Ha ahecha umi omanova’ekue, tuicha ha michĩva, oñembo’ývo Tupã renondépe; ha ojepe’a umi kuatiañe’ẽ, ha ambue kuatiañe’ẽ ojepe’a, ha’éva tekove kuatiañe’ẽ; ha umi omanóva ojehusga umi mba’e ojehaívare umi kuatiañe’ẽme, hembiapokuére.

7 Pehecháta ko pehẽ rupive ojepe’ahague umi kuatiañe’ẽ, ha ojepe’ahague ambue kuatiañe’ẽ, ha’éva tekove kuatiañe’ẽ; ha katu umi omanóva ojehusgákuri umi mba’e ojehaívare umi kuatiañe’ẽme, hembiapokuére; upévare, umi kuatiañe’ẽ oñeñe’ẽha ha’éne umi oguerekóva hembiapokuéra ñemombe’u, ha oñe’ẽ umi jehaipyre ko yvy ári ojeguerahávare. Ha upe ha’éva tekove rehegua kuatiañe’ẽre, ha’e jehaipyre ojegueraháva yvágape; ha upéicha, ko prinsípio ojegueraha porã pe doctrina oñemandávare peẽme, rrevelasiõ oĩva kuatia che ahaiva’ekuépe peẽme asẽ mboyve che rógagui—opa mba’e pehaíva ojehai hag̃ua yvágape.

8 Ko’ág̃a, ko ordenánsa reko ha’e upe sacerdocio pu’aka, Jesucristo rrevelasiõ rupive, oñeme’ẽha rupi, umi peñapytĩva yvy ári toñeñapytĩ yvágape, ha umi pejoráva yvy ári tojejora yvágape. Ambue ñe’ẽme, ñama’ẽ ambuéicharõ upe ñembohasáre, umi pehaíva yvy ári ojehaíta yvágape, ha umi ndapehaíriva yvy ári, ndojehaimo’ãi yvágape; umi kuatiañe’ẽre ojehusgátagui umi omanóva pene mba’éva, hembiapokuére, taha’e ha’ekueraite ojapóvaramo ijehegui umi ordenánsa, térã iñahentekuéra rupive, upe ordenánsa Tupã ombosako’iva’ekuépe isalvasiõrãme oĩháicha, múndo ojejapo mboyve, umi jehaipyre ogueraha háicha hikuái umi omanóva imba’évagui.

9 Oĩne ha’etévape ipy’aguasuha ko doctrina ñañe’ẽvarehína—peteĩ pu’aka ohaíva térã oñapytĩva ko yvy ári ha avei yvágape. Upevére, opa múndo árape, Ñandejára ome’ẽ vove peteĩ sacerdocio dispensasiõ peteĩ tekovépe térã tekovekuéra atýpe, rrevelasiõ añete rupive, akóinte oñeme’ẽva ko pu’aka. Upéicha, opa mba’e umi kuimba’e ojapova’ekue autorida reheve, Ñandejára rérape, ha ojapo hikuái añetépe ha jeroviarekópe, ha ogueraha hikuái peteĩ jehaipyre umívagui, oĩporãva ha ijeroviapýva, kóva ha’ékuri peteĩ léi yvýpe ha yvágape, ha, upe Jehová guasu apoukapykuérape he’iháicha, ndaikatúikuri oñembopaharei. Ko ñe’ẽ añetegua. Mávapa ikatu ohendu?

10 Ha avei, kóina ápe upe mboyvegua, Mateo 16:18, 19: Ha Che ha’e avei ndéve, Nde ha’eha Pedro, ha ko itaguasu ári amopu’ãta che tupao, ha umi añaretã rokẽ ndaipu’akamo’ãi hese. Ha Che ame’ẽta ndéve yvága rréino llavekuéra, ha umi reñapytĩva guive ko yvy ári, oñeñapytĩta avei yvágape; ha umi rejoráva yvy ári, ojejoráta yvágape.

11 Ko’ág̃a, upe tuicha ha imba’eguasúva mba’eñemimby opa ko mba’épe, ha pe summum bonum opa upe téma jarekóvare tenonderã ha’e tajahupyty umi Santo Sacerdocio pu’aka. Pe oñeme’ẽvape ko’ã lláve ndahasýi ohupyty hag̃ua kuaapy, umi mba’e oikova’ekue ha’évare yvypóra ra’ykuéra salvasiõ rehegua, umi oikovéva ha umi omanóvagui.

12 Péina ápe glória ha terakuãporã, ñemanokuaa’ỹ ha tekove ijapyra’ỹva—Pe ýpe ñemongarai ordenánsa, pe ñemoñapymi ipype ha’e hag̃ua omanóva ñemoha’angáicha, peteĩ prinsípio ha’e hag̃ua ambuéicha; ñemoñapymi ýpe ha ñesẽ ipypégui, ha’e umi omanóva jeikovejeýicha osẽvo iñeñotỹhágui; upéicha oñemoĩva’ekue ko ordenánsa oñembojoaju hag̃ua omanova’ekue ñemongarai ordenánsa reheve, ha’évo umi omanova’ekue ñemoha’anga.

13 Upéicha, oñemoĩkuri upe ñemongarai píla peteĩ ñeñotỹha joguaháicha, ha oñemanda oñemoĩ hag̃ua tenda umi oikovéva oñembyatyha guýpe, omoha’anga hag̃ua oikovéva ha omanova’ekuépe, ha opa mba’e oguereko hag̃ua ijoguaha, ha ojojogua hag̃ua hikuái—pe yvy ariguáva yvagapeguáicha, Pablo he’i haguéicha, 1 Corintios 15:46, 47, ha 48-pe:

14 Ha espirituálva ndaha’éi peteĩháva, ha katu upe natural-va; ha upéi pe ijespirituálva. Upe peteĩha kuimba’e ha’e yvy arigua, terrenal; pe kuimba’e mokõiha, ha’éva Ñandejára, ha’e yvagagua. Upe terrenal-va, umíva avei terrenal; ha upe celestial-va, umíva avei celestial. Ha umi jehaipyre yvy arigua umi omanóva pene mba’éva rehegua, ojegueraha porãva, umícha avei yvagagua jehaipyre. Kóva, upévare, ha’e pe pu’aka ojesella ha oñembojoaju hag̃ua, ha peteĩ ko ñe’ẽ he’isévape, umi rreinogua lláve, ha’éva upe kuaapy lláve.

15 Ha ko’ág̃a, che joyke’ykuéra pejehayhuetéva, peheja ta’emi peẽme ko’ãva ha’eha umi prinsípio omanóva ha oikovéva rehegua noñembohasareíriva’erã, ñane salvasiõ reheguávape. Isalvasiõkuéra tekotevẽgui ha imba’eguasúgui ñane salvasiõrã, Pablo he’iháicha tuvakuérare—ha’ekuéra ndaikatuiha oñemoĩporãmba ñande rehe’ỹ—ni ñande ndaikatúi ñañemoĩporãmba umi omanóva ñanemba’éva ỹre.

16 Ha ko’ág̃a, omanova’ekue ñemongaraíre, che ame’ẽta peẽme ambue Pablo jehai pehẽ 1 Corintios 15:29-pe: Ambue hendáicha, mba’e ojapóta umi omanóvare oñemongaraíva, umi omanóva mba’evéicharõ ndoikovejeymo’ãirõ? Mba’ére, upérõ, oñemongarai hikuái umi omanóvare?

17 Ha avei, ko pehẽ reheguáre, che ame’ẽta peẽme peteĩ pehẽ umi proféta orekova’ekue hesa upe sacerdocio rrestaurasiõre, umi glória ojeikuaaukátavagui umi ára pahápe, ha katuete ko témape, upe igloriosovéva opa umi evanhélio opave’ỹvagua apytépe, ha’éva, omanova’ekue ñemongarai; Malaquías he’ígui, upe kapítulo paha, versíkulo 5 ha 6-pe: Péina ápe, Che ambou peẽme Elías upe Proféta, Ñandejára ára tuicha ha oporomondyietéva ou mboyve. Ha ha’e ombojeréta tuvakuéra korasõ ta’yrakuérape, ha ta’yrakuéra korasõ tuvakuérape, ani Che aju ha ajopy pe yvy peteĩ ñe’ẽngái reheve.

18 Ikatúkuri ame’ẽ peteĩ ñembohasa hesakãvéva kóvagui, ha katu che aipotávape g̃uarã hesakã porãma oĩhaichaite. Iporãnte ojeikuaa, ko kásope, pe yvy ojejopytaha peteĩ ñe’ẽngái reheve, ndaipóriramo umi túva ha ta’ýra apytépe peteĩ mbojoajuha oimeháichagua, taha’e peteĩ térã ambue mba’e rehegua—ha péina ápe, mba’épa upe mba’e? Ha’e umi omanóvare ñemongarai. Hesekuéra’ỹ ñande ndaikatúi ñañemoĩporãmba, ni ndaikatúi oñemoĩporãmba hikuái ñande rehe’ỹ. Ni ndaikatúi ñande ni ha’ekuéra ñañemoĩporãmba umi omanova’ekue’ỹre evanhéliope; oñepyrũvo upe dispensasiõ ára oñekumplipaitetaha, dispensasiõ oñepyrũmava, tekotevẽ ojejapo ha ojeikuaauka peteĩ ñembojoajupa oĩmbaitéva ha oĩporãmbáva, ha péicha avei umi dispensasiõ, lláve, pokatu ha glória ñembojoaju, Adán ára guive, ára ko’ag̃agua peve. Ha ndaha’éi kóvante, ha katu umi mba’e araka’eve ojeikuaauka’ỹva’ekue, pe yvy ojejapo ypy guive, ha katu oñeñomiva’ekue umi iñarandu ha iñakãguapývagui, ojeikuaaukáta mitãra’y ha mitã okambúvape, kóva, ko dispensasiõ ára oñekumplipaitetahápe.

19 Ko’ág̃a, mba’e ñahendu evanhélio jahupytyva’ekuégui? Peteĩ vy’a ñe’ẽpu! Peteĩ poriahuvereko ñe’ẽpu yvágagui; ha peteĩ añetegua ñe’ẽpu, yvýgui osẽva; mba’eporã pyahu omanova’ekuépe g̃uarã; peteĩ vy’apavẽ ñe’ẽpu oikovéva ha omanóvape g̃uarã; mba’eporã pyahu vy’apavẽ. Iporãitépa yvytykuéra ári umi py oguerúva mba’eporã pyahu iporãva, ha he’íva Sion-pe: Péina ápe, nde Tupã orreina! Carmelo-gua ysapýicha, Tupã kuaapy oguejýta hi’arikuéra!

20 Ha jeyve, mba’e ñahendu? Cumorah-pegua mba’eporã pyahu! Moroni, peteĩ yvága ánhel, omombe’úvo profetakuéra ñekumpli: upe kuatiañe’ẽ ojeikuaaukava’erã. Peteĩ Ñandejára ñe’ẽpu Fayette tave’ỹme, Séneca kondádope, omomarandúvo umi mbohapy testígo ome’ẽtava testimónio upe kuatiañe’ẽgui! Miguel ñe’ẽpu, Susquehanna rembe’ýpe, ohechakuaávo upe añáme, ojehechaukarõguare tesapegua ánhelcha! Pedro, Santiago ha Juan ñe’ẽpu, Harmony tave’ỹ nandíme, Susquehanna kondádo, ha Colesville, Broome kondádope, upe Susquehanna y osyrývape, omombe’úvo oguerekoha rreinogua ha dispensasiõ ára oñekumplipaitetaha llavekuéra!

21 Ha avei, Tupã ñe’ẽpu Whitmer túva tuja kotýpe, Fayette, Séneca kondádope, ha heta árape ha heta hendápe, opa Jesucristo Tupao Santokuéra Ára Pahapegua je’ói ha jeiko’asýpe! Ha Miguel ñe’ẽpu, upe arkánhel; Gabriel ñe’ẽpu, ha Rafael ha heta anhelkuéra, Miguel térã Adán guive, ko ára peve, opavave omombe’úvo idispensasiõ, iderécho, illáve, herakuãporã, tuichakue ha igloriakuéra, ha isacerdocio pu’aka; ome’ẽvo sa’isa’i, mbo’epy mbo’epy ári, sa’imi ápe, ha sa’imi amo; ñanemoangapyhývo umi mba’e outáva ñemomarandúpe, omombaretévo ñane ñeha’arõkuaa!

22 Joyke’ykuéra, ndajahaiva’erãpa tenonde ko káusa guasuetépe? Peñemotenonde, pejevyrangue. Py’aguasu, hermano-kuéra; ha tapeho tenonde, tapeho ñesẽtenondépe! Tahory pene korasõ ha tapenerenyehẽ vy’águi. Tahyapu purahéipe upe yvy. Tohupi umi omanóva ñemomorã purahéi ijapyra’ỹva Rréi Emanuel-pe, oordenava’ekue, múndo oiko mboyve, upe mba’e ohejátava ñandéve ñarredimi chupekuéra iprisiõgui; umi oñeñapytĩva oñemosãsótagui.

23 Tosapukái vy’águi yvytykuéra, ha opa peẽ, yvy ipéva, pejerure ñe’ẽpu atãme; ha opa peẽ, yguasu ha yvy ikãva, pemombe’u pende Rréi Ijapyra’ỹva techapyrãnguéra! Umi ysyry, ysyry’i ha ysyry’ivéva, pesyry vy’ápe. Tomomorã Ñandejárape opa ñumegua yvyramáta; ha peẽ, ita mbarete, penerasẽ vy’águi! Topurahéi joa kuarahy, jasy ha mbyjakuéra ko’ẽtĩmegua, ha tosapukái vy’águi opa Tupã ra’ykuéra! Tomombe’u akói ha tapiaite g̃uarã héra umi apopy ijapyra’ỹva! Ha Che ha’e jey, igloriosoitépa ñe’ẽpu yvágagui ñahendúva, omomarandúva ñande apysápe glória, ha salvasiõ, ha terakuãporã, ha ñemanokuaa’ỹ ha tekove ijapyra’ỹva; rréino, prinsipádo ha potestakuéra!

24 Péina ápe, hi’ag̃uíma Ñandejára ára guasu; ha mávapa ogueropu’akáta ijeju ára, ha mávapa opytáta ñembo’yhápe ha’e ojehechauka vove? Ha’égui tata oporomopotĩvaicha ha havõ jejoheirãicha; ha oguapýta pláta ñemoporã ha ñemopotĩháicha; omopotĩtagui Leví ra’ykuérape, omopotĩta chupekuéra óro ha plátaicha, oikuave’ẽ hag̃ua Ñandejárape peteĩ ñeme’ẽmby tekojojápe. Ñaikuave’ẽ upévare Ñandejárape, tupao ha tavayguakuéra ramo, ha Santokuéra Ára Pahapegua ramo, peteĩ ñeme’ẽmby tekojojápe; ha jagueraha isánto témplope, oĩmba vove, peteĩ kuatiañe’ẽ oguerekóva umi omanóva ñanemba’éva jehaipyre, upe hekomarangatúva opa jeguerohoryrã.

25 Joyke’ykuéra, aguereko heta mba’e ha’eva’erã peẽme ko mba’ére; ha katu ko’ág̃a ambopaháta, ha ambojoapýta upe mba’ére ambue ára. Che apyta, akóicha, pene rembiguái mirĩvaicha ha pene angirũ tapiagua ramo,