1 O Tupã, moõ reime? Ha moõ oĩ ogaao ojaho’íva nde reikoha ñemi?

2 Araka’e pevépa rejokóta nde po, ha nde resa, héẽ, nde resa imara’ỹva, oma’ẽta yvága apyra’ỹ guive umi mba’evai ojejapóva nde tavayguakuérare ha ne rembiguaikuérare, ha oikéta nde apysápe umi ijerure’asy?

3 Héẽ, O Ñandejára, araka’e pevépa ohasáta hikuái ko’ã mba’evai ha jejopy oĩvaíva, oñemohu’ũ mboyve ne korasõ ha henyhẽ mboyve nde ryepy poriahuverekógui hesekuéra?

4 O Ñandejára, Tupã Ipu’akapáva, yvága, yvy, umi yguasu ha opa mba’e ipype oĩva apohare, ha ndepu’akáva ha remoĩva nde poguýpe upe aña, ha Seol-pegua pu’akareko iñypytũ ha hatatĩva—eipyso nde po; eheja nde resa tohecha; tojepe’a nde rogaao; anivéma oñemo’ã nde reikoha ñemi; tojere nde apysa; tahu’ũ ne korasõ ha tahenyhẽ nde ryepy poriahuverekógui orerehe.

5 Tahendy nde pochy ore rayhu’ỹva rehe; ha ne korasõ ñeko’õime, orevenga nde kysepukúpe ore mba’evaikuéragui.

6 Nemandu’áke ne santokuéra ohasa’asývare, O ore Tupã, ha umi ne rembiguái ovy’áta nde rérape akoiete g̃uarã.

7 Che ra’y, py’aguapy toĩ ne ángape; ndejeiko’asy ha ndejehasa’asykuéra sapy’amítante;

8 Ha upérõ, regueropu’aka porãramo, Tupã nemomba’eguasúta yvate; ndepu’akáta opa nderayhu’ỹvare.

9 Ne angirũnguéra opyta ndeykére, ha nemomaitei jeýta korasõ imba’eporãva ha po hekorayhúva reheve.

10 Nde ndaha’éi gueteri Job-cha jepe; nopu’ãi nderehe ne angirũnguéra, ni nde’íri rejapyharahague, ojapo haguéicha hikuái Job-re.

11 Ha umi he’íva nde rejapyharahague oñehundíta iñeha’arõmby, ha umi oha’arõva hikuái hykúta ysapy rypy’áicha kuarahy resẽ resape aku guýpe;

12 Ha avei Tupã omoĩma ipo ha iséllo omoambue hag̃ua umi ára ha arajere, ha omoypytũ hag̃ua iñakã ani oikũmby hikuái umi hembiapo rechapyrãva; oipy’ara’ã ha opilla hag̃ua chupekuéra ijapu jave;

13 Avei ikorasõ oñembyai rupi, ha umi mba’e ombohasaséva hikuái ambuekuérare, ha oguerovy’áva ambuekuéra ohasa, tou hi’arikuéra tuichaiteve;

14 Ha avei taikyre’ỹpoi hikuái ha tojei umi iñeha’arõmby;

15 Ha ko’águi mbovy arýpe, ha’ekuéra ha iñemoñarekuéra ojepe’áta yvága guýgui, he’i Tupã, ndopytamo’ãiha ijapytepekuéra ni peteĩ, oñembo’ýtava upe tápia ykére.

16 Toñemoñe’ẽngái opa umi omopu’ãva ipyta umi che aunhiva’ekuére, he’i Ñandejára, oguerosapukáivo iñangaipahague hikuái, naiñangaipáivo che renondépe, he’i Ñandejára, ha katu ojapókuri hikuái pe oĩporãva che resa renondépe, ha pe Che amandava’ekue chupekuéra.

17 Ha katu umi oguerosapukáiva jejapyhara, ojapo hikuái ha’égui angaipa rembiguái, ha ha’ekuéra ha’e upe ñe’ẽrendu’ỹ ra’y.

18 Ha umi ohuráva japúpe che rembiguaikuéra rehe, ogueraha hag̃ua chupekuéra ñeñapytĩmby ha ñemanóme—

19 Ái chuguikuéra; omoangaipa haguére hikuái umi che mitãmíme, ojepe’áta chupekuéra che róga ordenansakuéragui.

20 Ijajakakuéra nahenyhẽmo’ãi, hogakuéra ha ikóga ra’ỹi rendakuéra oñehundíta, ha ha’ekueraite ojejapo’íta umi ombojuruhe’ẽva’ekuére chupekuéra.

21 Ndoguerekomo’ãi hikuái derécho secerdocio-pe, ni iñemoñare ha’ekuéra rire ñemoñareatýgui ñemoñareatýpe.

22 Iporãveva’erãmo’ã chupekuéra toñemosãingo ijajúrare peteĩ molino ita ha ojahoga yguasu ruguápe.

23 Ái opa umi omyangekóiva che tavayguakuérape, ha omosẽ, ha ojuka, ha otestifikáva hesekuéra, he’i pe Señor de los Ejércitos; peteĩ mbói ñemoñareaty nokañymo’ãi añaretã kondenasiõgui.

24 Péina ápe, umi che resa ohecha ha oikuaa opa hembiapokuéra, ha Che aguereko ñongatupy peteĩ huísio hi’araitépe opa chupekuéra g̃uarã;

25 Oĩgui peteĩ ára oñeme’ẽmbyréva opa tekovépe g̃uarã, hembiapo haguéicha hikuái.

26 Tupã ome’ẽta peẽme kuaapy Ijespíritu Marangatu rupive, héẽ, Espíritu Santo don oñemombe’ukuaa’ỹva rupive, kuaapy ndojeikuaaukaiva’ekue múndo ñepyrũmby guive ko’ág̃a peve;

27 Upe ñande ypykuéra oha’arõ asyva’ekue ojeikuaauka hag̃ua umi ára pahápe, iñapytu’ũnguéra omoĩhague gotyo anhelkuéra rupi, oĩrõguáicha ñongatupýpe igloriakuéra pleniturã;

28 Peteĩ ára oútavape mba’eve ndojejokomo’ãihápe, taha’e oĩ peteĩ térã heta Tupã, ojeikuaaukáta.

29 Opa apykajegua ha poguy, prinsipádo ha pu’akakuéra, ojeikuaaukáta ha oñeme’ẽta opa umi py’aguasúpe ogueropu’akava’ekue Jesucristo evanhélio rehe.

30 Ha avei, oñemoĩrõ límite umi yvága, yguasu, térã yvy ikãvape, térã kuarahy, jasy, térã mbyjakuérape—

31 Opa hi’arajere ára, opa ára, mése ha áño oñemoĩva’ekue; ha opa hi’ára, mése ha áño arakuéra, ha opa iglória, léi ha ára oñemoĩmbyre, ojeikuaaukáta dispensasiõ ára oñekumplipaitetaha árape—

32 Oñemoĩ haguéicha Tupã Ijapyra’ỹva Konsílio mbytépe, opa ambue tupãnguéra apytépe, ko múndo oiko mboyve, oñeñongatuva’erã ikumplimiénto ha ipaharã, opa yvypóra oiketahápe iñeime apyra’ỹme ha hekove omanokuaa’ỹva pytu’úpe.

33 Araka’e pevépa ikatúta iky’a umi y osyrýva? Mba’e pu’akápa oĩ ojokótava umi yvága? Reínte yvypóra ikatúne oipyso ijyva kangy ojoko hag̃ua Misuri ysyry rape oñemoĩmbyréva, térã omboguevi hag̃ua, ojokoserõguáicha pe Ipu’akapáva oñohẽ yvágagui kuaapy Santokuéra Ára Pahapegua akã ári.

34 Péina ápe, heta oĩ umi oñehenóiva, ha katu sa’i umi ojeiporavóva. Ha mba’ére ndojeiporavói hikuái?

35 Omoĩetereígui hikuái ikorasõ ko mundogua mba’ekuérare, ha ohupytyse tekovekuéra terakuãporã, ndoikũmbýi hikuái ko mbo’epy peteĩ—

36 Upe sacerdocio derechokuéra ojoajupaiteha umi yvagagua pokatúre, ha ko’ãva ndaikatuiha ojeiporu ni oñeisãmbyhy térã umi tekojoja prinsipiokuérare añónte.

37 Añete ningo ikatuha oñeme’ẽ ñandéve; ha katu ñañomiséramo umi ñane angaipa, térã ñambovy’ase ñande orgúllo, ñande potapy rei, térã ñamandase, ñamoĩse ñande poguýpe térã jajopyse yvypóra ra’ykuéra ánga, oimeháichagua ijoja’ỹva, péina ápe, umi yvága ojei; Ñandejára Espíritu oñembyasy; ha ojeíramo, upe kuimba’e sacerdocio térã autorida opa.

38 Péina ápe, ha’e ohechakuaa mboyve, opyta ha’eñorei opyvoi hag̃ua popíãre, omuña hag̃ua santokuérape, ha oñorairõ hag̃ua Tupã rehe.

39 Jaikuaákuri tembiasa oñembyasýva rupive, haimeteha opa kuimba’e naturalésa ha disposisiõ, ohupyty’imívo autorida, oimo’ãháicha hikuái, ha’eha pya’ete oñepyrũ oiporu pu’akareko ijoja’ỹva.

40 Upévare, hetápe oñehenói, ha katu sa’i ojeiporavóva.

41 Mba’evéichagua pu’aka térã pu’akakuaa ikatu ni noñemanteneiva’erã sacerdocio virtu rupi, ndaha’éirõ py’amovãporã rupi, py’aporã rupi, torypa rupi ha marangatu rupi, ha mborayhu añete rupi;

42 Py’aporã ha kuaapy potĩ rupive, tuicha omopu’ãva pe ánga tovamokõi’ỹ ha japu’ỹre—

43 Reporoja’o mbaretévo oñeikotevẽ vove, Espíritu Santo he’i jave; ha upérõ rehechaukávo mborayhu tuichavéva pe reja’ova’ekuére, ani mba’e nderecha ihayhu’ỹháramo;

44 Oikuaa hag̃ua nde jeroviareko imbareteveha ñemano sãgui.

45 Eheja avei tahenyhẽ nderyepy karidágui opa tekovekuérandi, ha umi ndejeroviápe nemoirũnvandi, ha eheja pe virtu tombojegua meme ne akãremiandu; upérõ ndejeroviapy oñemombaretéta Tupã renondépe; ha sacerdocio doctrina otykytykýta ne ánga ári ysapy yvágagui guáicha.

46 Pe Espíritu Santo ha’éta ne irũ tapia, ha nde vára, peteĩ vára iñambue’ỹva tekojoja ha añeteguágui; ha ndepu’akareko ha’éta peteĩ pu’akareko ijapyra’ỹva, ha jejopy’ỹre oúta ndéve akói ha tapiaite g̃uarã.