1 Añetehápe, péicha he’i ndéve Ñandejára, che rembiguái José Smith, upe ta’ýra, ha avei che rembiguaikuéra Sidney Rigdon ha Hyrum Smith-pe, ha umi ha’éva ne konsehéro ha oñehenóitavape tenondeve;

2 Ha avei ndéve, che rembiguái Edward Partridge, ha ne konseherokuérape;

3 Ha avei che rembiguaikuéra ijeroviarekóvape che tupao sumo konsehogua Sion-pe, péicha oñehenóitagui, ha opa élder-kuéra ha tavayguakuéra che Jesucristo Tupao Santokuéra Ára Pahapeguápe, isarambíva opa múndore;

4 Péicha oñehenóitagui che tupao umi ára pahápe, ha’éva, Jesucristo Tupao Santokuéra Ára Pahapegua.

5 Añetehápe Che ha’e opavavépe: Pepu’ã ha pemimbi, pende resape ha’e hag̃ua peteĩ techaukaha opa tetãnguérape;

6 Ha ñembyaty Sion retãme ha ijestakakuérape ha’e hag̃ua ñemo’ã ha ñeñongatuha upe aravai ha ñeko’õigui, oñeñohẽ vove ñembojehe’a’ỹre opa pe yvy ári.

7 Taha’e, upe táva Far West, peteĩ yvy imarangatu ha oñekonsagrava’ekue chéve g̃uarã; ha oñehenóitava santísima, imarangatúgui ko yvy peñembo’yha.

8 Upévare, Che amanda peẽme pemopu’ã hag̃ua peteĩ óga chéve g̃uarã, che santokuéra ñembyatyrã, chetupãitũ hag̃ua hikuái.

9 Toñeñepyrũ ko tembiapo, ha umi iñemopyenda, ha peteĩ tembiapo ñembosako’irã, ko arahaku oúvape;

10 Ha toñeñepyrũ irundy ára julio oúvape, ha upe ára guive tenonderã tomba’apo che tavayguakuéra jesarekópe, omopu’ã hag̃ua peteĩ óga che rérape;

11 Ha peteĩ arýpe ko ára guive, toñepyrũ jey hikuái omoĩ che róga pyenda.

12 Péicha tomba’apo hikuái jesarekópe upe ára guive tenonderã ojapopa peve, pe ita pyenda guive técho peve, ndaiporivéi peve mba’eve ojejapopa’ỹva.

13 Añetehápe Che ha’e peẽme, anivéma odeve che rembiguái José ni che rembiguái Sidney, ni che rembiguái Hyrum, oñemopu’ã hag̃ua peteĩ óga che rérape;

14 Ha katu tojejapo peteĩ óga che rérape, techaukarã Che ahechaukátava chupekuérape oĩháicha.

15 Ha che tavayguakuéra nomopu’ãirõ techaukarã Che ahechaukátava ipresidénsiape oĩháicha, namog̃uahẽporãmo’ãi ipoguikuéra.

16 Ha katu che tavayguakuéra omopu’ãramo techaukarãme oĩháicha Che ahechaukátava ipresidénsiape, ha’éva, che rembiguái José ha ikonseherokuéra, upérõ amog̃uahẽporãta che tavayguakuéra pógui.

17 Ha avei, añetehápe Che ha’e peẽme, che aipota pya’e toñemopu’ã upe Far West táva, che santokuéra ñembyaty rupi;

18 Ha toñeme’ẽ avei ambuekuéra tenda estáka ramo umi tenda jerereguápe, ojehechaukataháicha che rembiguái José-pe sapy’apy’a.

19 Ha péina ápe, Che aiméta hendive, ha Che asantifikáta chupe tavayguakuéra renondépe; Che ame’ẽgui chupe ko rréino ha ministeriokuéra lláve. Taupéicha. Amén.