1 Roaguyjeme’ẽ nde rérape, O Ñandejára, Israel Tupã, reñongatúva konveniokuéra ha rehechaukáva poriahuvereko ne rembiguaikuérare, oguata jojáva ne renondépe, opa ikorasõ reheve—

2 Nde remandava’ekue ne rembiguaikuérape tomopu’ã nde rérape peteĩ óga ko tendápe [Kirtland].

3 Ha ko’ág̃a rehecha, O Ñandejára, ne rembiguaikuéra ojapohague ne rembiapoukapýpe oĩháicha.

4 Ha ko’ág̃a rojerure ndéve, Túva Marangatu, Jesucristo rérape, Ta’ýra nde ykeregua, hérape añónte ikatúva oñeme’ẽ yvypóra ra’ykuéra salvasiõ, rojerure ndéve, O Ñandejára, emboaje hag̃ua ko óga, ore, ne rembiguaikuéra po rembiapokue, remandava’ekue oréve romopu’ã hag̃ua.

5 Nde reikuaágui rojapohague ko tembiapo tuicha jeiko’asy pa’ũme; ha ore mboriahúramo jepe rome’ẽva’ekue ore mba’erepykuéragui oñemopu’ã hag̃ua peteĩ óga nde rérape, pe Kuimba’e Ra’y oreko hag̃ua peteĩ tenda ojehechauka hag̃uáme itavayguakuérape.

6 Ha ere haguéicha peteĩ rrevelasiõme, oñeme’ẽva’ekue oréve, ore renoihápe ne angirũnguéra, erévo—Pehenói pene asamblea solemne, Che amanda haguéicha peẽme;

7 Ha opavave ndojeroviáigui, peheka jesarekópe ha peñohekombo’e umi arandu ñe’ẽ; héẽ, peheka arandu ñe’ẽ umi aranduka iporãvévagui; peheka kuaapy, jepeve ñemoarandu ha jerovia rupive;

8 Peñemohenda; pembosako’i opa mba’e tekotevẽva; ha pemoĩ peteĩ óga, jepeve peteĩ ñembo’e róga, peteĩ ajúno róga, peteĩ jerovia róga, peteĩ ñehekombo’e róga, peteĩ glória róga, peteĩ órden róga, peteĩ Tupã róga;

9 Umi pende jeike ha’e hag̃ua Ñandejára rérape; pende ñesẽ ha’e hag̃ua Ñandejára rérape; ha opa pene ñemomaitei ha’e hag̃ua Ñandejára rérape, po jehupi reheve pe Ijyvatevéva gotyo—

10 Ha ko’ág̃a Túva Marangatu, rojerure ndéve orepytyvõ hag̃ua ore, nde tavayguakuérape, nde grásia reheve, rohenóivo ore asamblea solemne, ojejapo hag̃ua ndererakuãporãrã ha ndejeguerohory divínope g̃uarã;

11 Ha rojejuhu hag̃uáichaicha hekomarangatúvaramo nde resa renondépe, ojehupyty hag̃ua umi promésa ñekumpli, ojejapova’ekue oréve, nde tavayguakuéra, umi rrevelasiõ reme’ẽva’ekuépe oréve;

12 Nde glória opytu’u hag̃ua nde tavayguakuéra ári, ha ko nde róga ári, rodedikáva ndéve ko’ág̃a, oñesantifika ha oñekonsagra hag̃ua, ha ne ñeime marangatu oĩ meme hag̃ua ko ógape;

13 Ha opavave oikéva Ñandejára róga rokẽme oñandu hag̃ua nde pokatu ha toñemyaña ohechakuaa hag̃ua nde resantifikahague, ha ha’eha nde róga, peteĩ ne santida renda.

14 Ha eheja, Túva Marangatu, opavave otupãitũva ko ógape toikuaa arandu ñe’ẽ aranduka iporãvévagui, ha toheka hikuái kuaapy, jepe ñemoarandu, ha avei jerovia rupive, nde ere haguéicha;

15 Ha tokakuaa nendive, ha tohupyty upe Espíritu Santo plenitu, ha toñemohenda nde léipe he’iháicha, ha toñembosako’i ohupyty hag̃ua opa mba’e tekotevẽva;

16 Ha taha’e kóva peteĩ ñembo’e róga, peteĩ ajúno róga, peteĩ jerovia róga, peteĩ glória róga ha Tupã róga, jepeve nde róga;

17 Opa nde tavayguakuéra jeike, ko ógape, taha’e Ñandejára rérape;

18 Opa umi iñesẽ ko ógagui taha’e Ñandejára rérape;

19 Opa iñemomaitei taha’e Ñandejára rérape, po marangatu reheve, ojehupíva upe Ijyvatevéva gotyo;

20 Ha ani ojeheja oike nde rógape mba’eve mba’e ky’a omongy’a hag̃ua kóva;

21 Ha nde tavayguakuéra ojapyhara vove, taha’e ha’éva, pya’e toñearrepenti ha toujey ndéve, ha tojuhu grásia nde resa renondépe, ha toñeme’ẽjey chupe umi jehovasa nde ereva’ekue toñeñohẽ umi nde rógape netupãitũva ári.

22 Rojerure ndéve, Túva Marangatu, ne rembiguaikuéra osẽ hag̃ua ko ógagui oguerekóvo nde pokatu, ha toĩ nde réra hi’arikuéra, ha nde glória tojere hesekuéra, ha umi ne ánhel toñongareko hesekuéra;

23 Ha ko tendágui togueraha hikuái umi mba’eporã pyahu tuichaite ha igloriosovéva, añetehápe, pe yvy paha peve, oikuaa hag̃ua hikuái kóva ha’eha ne rembiapo, ha reipysohague nde po rekumpli hag̃ua pe reñe’ẽva’ekue profetakuéra juru rupive, umi ára paha rehegua.

24 Rojerure ndéve, Túva Marangatu, remoĩmbarete hag̃ua tavayguakuéra otupãitũtavape, ha terakuãporãme orekótavape peteĩ téra ha peteĩ tenda ko nde rógape, opa ñemoñareaty ha ára apyra’ỹ meve;

25 Mba’evéichagua árma ojejapóva oñemopu’ã hag̃ua hesekuéra ani oñakãrapu’ã; ha to’a yvykua ha’e ojo’ova’ekuépe chupekuéra g̃uarã;

26 Mba’evéichagua tembiapoñaña joaju ani oguereko pu’aka opu’ã hag̃ua ha taipu’aka nde tavayguakuérare, umi oñemoĩtava ári nde réra ko ógape;

27 Ha oimeraẽ tavaygua opu’ãramo ko tavayguakuérare, tahendy nde pochy hesekuéra;

28 Ha ojopýramo hikuái ko tavayguakuérape, nde rejopýta chupekuéra; nde reñorairõta nde tavayguakuérare rejapo haguéicha ñorairõ árape, isãso hag̃ua hikuái opa ihayhu’ỹhakuéra pógui.

29 Rojerure ndéve, Túva Marangatu, emoapañuãi, emopirĩmba ha egueru hag̃ua ñemotĩ ha apañuãi opa umi omosarambiva’ekuépe ñe’ẽjapu ko múndo rupi, ne rembiguái térã ne rembiguaikuéra rehe, noñearrepentíriramo hikuái oñemomarandu vove pe evanhélio opave’ỹva ijapysakuérape;

30 Ha opa hembiapokuéra toñemongu’i ha to’a hi’ári amandáu ha umi huísio remboútavare hi’arikuéra nde pochýpe, toñembopaha umi japu ha ñe’ẽrei nde tavayguakuéra rehe.

31 Nde reikuaágui, O Ñandejára, ne rembiguaikuéra iñangaipa’ỹhague ne renondépe otestifikávo nde réragui, ha kóvare ohasákuri hikuái ko’ã mba’e.

32 Upévare, rojerure’asy ne renondépe peteĩ ñemosãso henyhẽ ha oĩmbaitéva ko júgo guýgui;

33 Eipe’a, O Ñandejára; eipe’a ne rembiguaikuéra ajúragui, nde pokatu rupive, ropu’ã hag̃ua ko ñemoñareaty pa’ũme ha rojapo ne rembiapo.

34 O Jehová, eiporiahuvereko ko tavayguakuérape, ha opa tekove iñangaipágui, eperdona nde tavayguakuéra jejapyhara, ha tojeipe’a umíva akoiete g̃uarã.

35 Eheja ne ministro-kuéra unsiõ tojesella hi’arikuéra yvategua pokatu reheve.

36 Toñekumpli hi’arikuéra, ojejapo haguéicha umi Pentecostés árape; toñeñohẽ nde tavayguakuéra ári ñe’ẽ rehegua don, héẽ, umi ñe’ẽ oñemyasãiva tatáicha, ha avei iñehesa’ỹijo.

37 Ha tahenyhẽ nde róga nde glória reheve, peteĩ yvytu atã oipeju mbaretévaicha.

38 Emoĩ ne rembiguaikuéra ári upe konvénio testimónio, osẽvo hikuái omombe’u hag̃ua ne ñe’ẽ tosella hikuái upe léi, ha tombosako’i ne santokuéra korasõ opa umi huisiorã remboútamava nde pochýpe yvýpe oikovéva ári, ijejapyharakuéra rupi, ani hag̃ua nde tavayguakuéra ikangy jejopyvai árape.

39 Ha oimeraẽ táva ne rembiguaikuéra oikehápe, ha umi oikóva upépe omog̃uahẽrõ itestimoniokuéra, nde py’aguapy ha ne salvasiõ topyta ko táva ári; ombyaty hag̃ua hikuái umi hekojojáva upe távagui, oho hag̃ua hikuái Sion térã ijestakakuérape, umi tenda nde reiporavopyrévape, vy’apavẽ opave’ỹva purahéi reheve;

40 Ha kóva oñekumpli peve, ani reheja ho’a nde huisiokuéra ko táva ári.

41 Ha oimeraẽ táva ne rembiguaikuéra oikehápe, ha pe tavaygua tekovekuéra nomog̃uahẽirõ ne rembiguaikuéra testimónio, ha ne rembiguaikuéra oñemoñe’ẽramo chupekuéra ojesalva hag̃ua ko ñemoñareaty rembiapovaígui, toiko ko távare nde reñe’ẽ haguéicha nde profetakuéra juru rupive.

42 Ha katu rojerure ndéve, O Jehová, emosãso hag̃ua umi ne rembiguái ipoguikuéra ha emopotĩ chupekuéra huguýgui.

43 O Ñandejára, ore ndoroguerohorýi ore rapichakuéra ñehundi; hepyete hi’angakuéra ne renondépe;

44 Ha katu ne ñe’ẽ oñekumpliva’erã. Eipytyvõ ne rembiguaikuérape te’i, nde grásia oipytyvõme chupekuéra: Tojejapo ne rembipota, O Ñandejára, ha ani ore mba’éva.

45 Roikuaa nde profetakuéra juru rupive nde reñe’ẽhague mba’e ivaietéva iñañávare umi ára paha reheguáre—reñohẽtaha nde huisiokuéra medída’ỹre;

46 Upévare, O Ñandejára, esalva nde tavayguakuérape umi iñañáva mba’evaietégui; eheja ne rembiguaikuéra tosella upe léi, ha tojokua pe testimónio, oĩ hag̃ua ñembosako’ípe jehapy árape.

47 Rojerure ndéve, Túva Marangatu, nemandu’a hag̃ua umi oñemosẽva’ekuére ijyvy jehejapyrégui, Jackson kondádope oikóvare, Misuri-gua. Eipe’a, O Ñandejára, ko jehasa’asy júgo oñemoĩva’ekue hi’arikuéra.

48 Nde reikuaa, O Ñandejára, tuicha ojejopy ha oñembohasa’asyhague hikuái tekove iñañávare; ha ore korasõ henyhẽ vy’a’ỹgui ikárga pohyikuéra rupi.

49 O Ñandejára, mboy áraiko rehejáta ko tavayguakuéra ogueropu’aka ko jehasa’asy, ha umi ijapyteguikuéra iñangaipa’ỹva jerure’asy tog̃uahẽ nde apysápe, ha huguykuéra topu’ã testimónio ramo ne renondépe, ha nderechaukái ne testimónio hesekuéra?

50 Eiporiahuvereko, O Ñandejára, pe populácho ñaña omosẽva’ekue nde tavayguakuérape, ombopaha hag̃ua hikuái ñemonda, oñearrepenti hag̃ua iñangaipakuéragui, oĩramo arrepentimiénto chupekuéra g̃uarã;

51 Ha katu ndojapóiramo hikuái, ehechauka nde jyva, O Ñandejára, ha erredimi upe ereva’ekue Sion ramo nde tavayguakuérape g̃uarã.

52 Ha ndaikatúirõ ambue hendáicha, nde tavayguakuéra káusa ani hag̃ua ojavy ne renondépe, tahendy nde pochy, ha to’a hi’arikuéra nde pochykue, oñeikytĩ hag̃ua hapo ha hakã yvága guýgui;

53 Ha katu oñearrepentíramo hikuái, nde nemba’eporã ha ndeporiahuvereko, ha remboykéta ne ñeko’õi rema’ẽvo ne Unhído rováre.

54 Eiporiahuvereko, O Ñandejára, opa tetãnguéra yvy ariguápe; eiporiahuvereko ore retã sãmbyhyharakuérape; eheja, umi prinsípio ore ypykue omo’ãva’ekue tekoporã ha py’aguasúpe, ha’éva, ore retã Kostitusiõ, topyta akoiete g̃uarã.

55 Nemandu’áke rreikuéra, príncipe-kuéra ha noble-kuérare, ha yvy arigua mburuvichakuérare, ha opa tavayguakuérare, ha tupaokuérare, opa umi imboriahúvare, umi oikotevẽvare, ha umi yvy arigua oñembohasa’asývare;

56 Oñemohu’ũ hag̃ua ikorasõnguéra umi ne rembiguái osẽ vove nde rógagui, O Jehová, ome’ẽ hag̃ua testimónio nde réragui; umi oimo’ã avýva hikuái ojei hag̃ua pe añetegua renondépe, ha nde tavayguakuéra ojuhu hag̃ua grásia opavave resa renondépe;

57 Opa yvy paha oikuaa hag̃ua ore, ne rembiguaikuéra, rohenduhague ne ñe’ẽpu, ha nde orembouhague;

58 Umi ne rembiguái, Jacob ra’ykuéra, ombyaty hag̃ua ijapyteguikuéra hekojojávape, omopu’ã hag̃ua peteĩ táva nde rérape, nde remanda haguéicha chupekuéra.

59 Rojerure ndéve eme’ẽ hag̃ua Sion-pe ambue estakakuéra, ko rehenoiva’ekuégui, nde tavayguakuéra ñembyaty oñemotenonde hag̃ua tuicha pu’aka ha mahestápe, ha toñemombyky ne rembiapo tekojoja rupive.

60 Ko’ág̃a, O Ñandejára, ro’ékuri ko’ã ñe’ẽ ne renondépe, umi rrevelasiõ ha tembiapoukapy reme’ẽva’ekuére oréve, hentilkuéra ramo rojekuaáva.

61 Ha katu nde reikuaa reguerekoha tuicha mborayhu Jacob ra’ykuérare, osarambiva’ekue yvytykuérare heta ára aja, peteĩ ijarai ha iñypytũva árape.

62 Rojerure ndéve, upévare, eiporiahuvereko hag̃ua Jacob ra’ykuéra, ko aravoite guive, Jerusalén oñepyrũ hag̃ua oñerredimi;

63 Ha oñepyrũ hag̃ua oñemondoho tembiguái júgo David rógagui;

64 Ha Juda ra’ykuéra oñepyrũ hag̃ua oujey umi yvy reme’ẽva’ekuépe, Abraham, ituvakuérape.

65 Ha ejapo umi Jacob rembyre, oñemoñe’ẽngái ha ojeipy’ajopy’akue ijejapyhara rupi, tañekonverti heko ikatu’ỹva oñehekombo’e ha heko saitégui, upe evanhélio ijapyra’ỹva plenitúpe;

66 Oheja hag̃ua hikuái umi hi’árma huguypáva, ha ombopaha hag̃ua umi hekoñemoĩ.

67 Ha eheja opa Israel rembyre isarambíva, oñemuñava’ekue yvy paha peve, toikuaa upe añetegua, toguerovia Mesías-pe, toñerredimi jejopýgui ha tovy’a ne renondépe.

68 O Ñandejára, nemandu’áke ne rembiguái José Smith, upe ta’ýrare, ha opa ijeiko’asykuéra ha iñemuñanguérare—ha’e ojapohague konvénio Jehová-ndi ha ojapova’ekue vóto nendive, O Jacob Tupã Ipu’akapáva—ha umi tembiapoukapy reme’ẽva’ekuére chupe ha oñeha’ãhague añetehápe ojapo ne rembipota.

69 Eiporiahuvereko, O Ñandejára, hembireko ha imitãnguérape, oje’exalta hag̃ua hikuái nde reimeháme, ha toñemo’ã nde po oporomo’ãvare.

70 Eiporiahuvereko opa ihénte ag̃uíme, oñehundi ha ojepe’a hag̃ua umi iñeimo’ã avy peteĩ amaguasupeguáicha ramo; oñekonverti hag̃ua hikuái ha oñerredimi Israel ndive, ha toikuaa hikuái nde ha’eha Tupã.

71 Nemandu’áke, O Ñandejára, umi presidente-kuérare, héẽ, opa nde tupaogua presidente-kuérare, ojeexalta hag̃ua chupekuéra nde po akatúape, opa hogayguakuéra ha ihentekuéra ag̃ui ndive, herakuéra ijapyra’ỹ hag̃ua momandu’a opave’ỹvape, ñemoñareatýgui ñemoñareatýpe.

72 Nemandu’áke opa nde tupaoguakuérare, O Ñandejára, opa hogayguakuéra ndive, ha opa ihentekuéra ag̃uíre, opa ijapyteguikuéra hasýva ha oñembohasa’asývare, opa yvy arigua imboriahúva ha imarangatúvare; upe rréino, nde remoĩva’ekue ndaha’éiva po rupive, toiko chugui peteĩ yvyty guasu ha tomyenyhẽ opa yvy;

73 Nde tupao osẽ hag̃ua pe tave’ỹ iñypytũvagui, ha tomimbi porã jasýicha, ha tahesakã kuarahýicha, ha toporomondýi ehérsitoicha ipoyviveve reheve;

74 Ha toñembojegua peteĩ tembirekorãicha upe ára reipe’atahápe yvága vélo ha remboykukáta yvytykuéra ne renondépe, ha oñemboyvate umi yvy ipéva ha oñembojoja umi yvy ijoja’ỹva, nde glória omyenyhẽ hag̃ua ko yvy;

75 Pe turu ohenóivo umi omanóvape, ikatu hag̃ua rojehupi araípe ndéve romog̃uahẽ hag̃ua, akóinte roime hag̃ua Ñandejárandi;

76 Ipotĩ hag̃ua ore aokuéra, ha roñembyao hag̃ua tekojoja ao reheve, pálma ore pópe, ha glória rehegua koróna ore akã ári, ha toromono’õ vy’apavẽ ijapyra’ỹva opa ore jehasa’asykuérare.

77 O Ñandejára, Tupã Ipu’akapáva, orerendúke ore mba’ejerurépe, ha orembohovái yvágagui, nde koty marangatu, reguapyhápe nde apyka ári, glória, terakuãporã, pokatu, mahesta, mbarete, pu’akareko, añetegua, hustísia, huísio ha poriahuvereko reheve, ha opa’ỹva plenitúpe, ára opave’ỹva guive ára opave’ỹva peve.

78 Orerendu, orerendu, orerendu, O Ñandejára! Embohovái ko’ã mba’ejerure, ha eguerohory ko óga dedikasiõ ndéve g̃uarã, ore po rembiapokue, romopu’ãva’ekue nde rérape;

79 Ha avei ko tupao, emoĩ hag̃ua hi’ári nde réra. Orepytyvõ nde Espíritu pu’aka rupive, romoirũ hag̃ua ore ñe’ẽpu umi serafin omimbi ha ojajaipávandi nde apykajegua jerére, ñemomorã sapukái reheve, opurahéivo Hosána Tupãme ha Cordero-pe!

80 Ha eheja ko’ã, nde reunhiva’ekue, toñemonde salvasiõ reheve, ha ne santokuéra tosapukái vy’águi, Amén ha Amén.