Hisitōlia ʻo e Siasí
Efiafi Fakafāmili ʻi ʻApí

“Efiafi Fakafāmili ʻi ʻApí,” Ngaahi Tefito ʻi he Hisitōlia ʻo e Siasí (2022)

“Efiafi Fakafāmili ʻi ʻApí,” Ngaahi Tefito ʻi he Hisitōlia ʻo e Siasí

Efiafi Fakafāmili ʻi ʻApí

ʻI ha konifelenisi ʻa e kaumātuʻá ʻi Nōvema 1831, naʻe maʻu ai ʻe Siosefa Sāmita ha fakahā ne ʻomai ai ha “fono ki he kakai ʻoku nofo ʻi Saioné” ke “akoʻi … ʻenau fānaú ke lotu, pea ke ʻaʻeva ʻi he angatonu ʻi he ʻao ʻo e ʻEikí” mo fakatokanga mai naʻe “tupu hake … ʻa [e] fānaú ʻi he fai angahala” mo e mānumanu.1 ʻI he kotoa ʻo e senituli 19, ne poupouʻi ʻe he Kāingalotu tokolahi ʻi he Ngaahi ʻAho Kimui Ní ʻa e ngaahi fāmilí ke akoʻi mo moʻui ʻaki e ngaahi tefitoʻi moʻoni ʻo e ongoongoleleí ʻi ʻapi. Kimuʻa pē pea pekia ʻa Pilikihami ʻIongi ʻi he 1877, naʻá ne pehē, “Kapau he ʻikai ke tau kātekina ʻa e faingataʻa ke akoʻi ʻetau fānaú, ke akoʻi mo fakahinohinoʻi kinautolu fekauʻaki mo e ngaahi moʻoni ko ʻeni ne fakahā maí, ʻe ʻi hotau tumuʻakí ʻa e malaʻiá, ʻi heʻetau hoko ko e mātuʻá, pe ko hano konga.”2 Naʻe fokotuʻu ʻe he Kāingalotu ʻi he Ngaahi ʻAho Kimui Ní ha ngaahi houalotu ke poupou ki he ngaahi fāmilí ʻi hono akoʻi mo ohi hake ʻa e fānaú, kau ai ʻa e Palaimelí, Lautohi Faka-Sāpaté, mo e Ngaahi Kautaha Mutuale Fakalakalaka maʻá e kau finemuí mo e kau talavoú.3

ʻI he kamataʻanga ʻo e senituli 20, naʻe fakahā ʻe Felengi Y. Teila, ko e palesiteni ʻo e Siteiki Kalānite ʻi Sōleki Sití, ha hohaʻa naʻe tuku tāfataha ʻe he ngaahi mātuʻa tokolahi ki he ngaahi houalotu ʻa e Siasí ʻa hono akoʻi e ngaahi tefitoʻi moʻoni ʻo e ongoongoleleí mo tapou ki he kau taki lakanga fakataulaʻeikí ke tokoniʻi e ngaahi fāmilí ke hinoiʻi ʻa e fānaú ʻi he ongoongoleleí mo “ngaohi ʻa e ʻapí ko e feituʻu fakafiefia taha ʻe ʻilo ʻe he kiʻi tamasiʻí pe taʻahiné ʻi he māmaní.”4 Naʻá ne vahe ʻi he 1909, ha kōmiti ke fokotuʻu ha palani ki ha polokalama fakasiteiki angamaheni—ko ha “efiafi ʻi ʻapi ʻa e ngaahi fāmili ʻo e Kāingalotú.”5 Naʻe fakahā ʻe he kōmití ʻenau ngaahi fokotuʻú ʻi ha fakataha makehe maʻá e mātuʻa naʻe kau ki aí pea poupouʻi ʻe Siosefa F. Sāmita ko e Palesiteni ʻo e Siasí. Naʻe fokotuʻu ʻi he palaní ke manatuʻi ʻe he mātuʻá ʻa e fekau ʻi he Tokāteline mo e Ngaahi Fuakava 68 ʻaki hono fokotuʻu ha efiafi ʻe taha he uike takitaha ke fakataha ai honau ngaahi fāmilí ʻi ʻapi pea fevahevaheʻaki ʻi he lotú, hivá, lau folofolá, ngaahi lēsoni nounou ʻi he ongoongoleleí, ngaahi ʻekitivitī ʻoku nofotaha ʻi he fānaú, mo e ngaahi fakaneifuá. Naʻe poupouʻi ʻe he kōmití e mātuʻá ke fakaʻehiʻehi mei he “ʻai ke ʻi ai ʻa e ongoʻi taʻe-fiemālié mo hangē ko ha fakataha pē ʻeni ʻoku faí” pea fakaʻehiʻehi mei hono toe fakahoko ha ngaahi meʻa kehe ʻi he ngaahi efiafi peheé.6

ʻI he vakai ki he ola lelei ʻa e ngaahi efiafi ʻi ʻapí, naʻe fakahinohinoʻi ai ʻe Palesiteni Sāmita mo hono ongo tokoni ʻi he Kau Palesitenisī ʻUluakí ʻa e kau palesiteni fakasiteiki mo e kau pīsope kotoa pē ʻi he 1915 ke fokotuʻu ha efiafi ʻi ʻapi ʻi he māhina takitaha maʻá e ngaahi fāmilí mo fokotuʻu ange ki he mātuʻá ʻa e ngaahi ʻekitivitī tatau mo ia ʻi he polokalama ʻa e Siteiki Kalānité.7 Naʻe ʻuluaki vahevahe ʻe he ngaahi fāmilí mo e kau taki ʻo e ngaahi houalotú ʻa e ngaahi fakakaukau ki he efiafi ʻi ʻapí ʻi he ngaahi makasini mo e tohi lēsoni ʻa e Siasí ʻo aʻu ki he 1946, ʻi he taimi naʻe fokotuʻu ai ʻe he Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ha “toe fakahoko … ʻo e ngāué ni ʻi he malumalu ʻo e tataki ʻa Palesiteni Siosefa F. Sāmitá.”8 Naʻe vahe ʻa e Fineʻofá ke nau tokangaʻi ʻa e polokalama foʻou ko e “houa fakafāmili” ʻi he ngaahi uōtí mo e koló pea ke teuteuʻi e ngaahi naunau tokoni maʻá e mātuʻá.9 Naʻe faipoupoua ʻe ʻEletā ʻEselā Tafu Penisoni e polokalamá ko ha “fatongia kāfakafa” mo e “fakavaʻe fakalaumālie.” ʻI heʻene fakatou hoko ko ha ʻAposetolo mo e sekelitali ki he kapinetí ʻi he puleʻanga ʻo e ʻIunaiteti Siteití ʻi he 1954, naʻá ne fakahoko ha efiafi ʻi ʻapi mo hono fāmilí ʻa ia naʻe fakamafola fakahangatonu ʻi he polokalama televīsone fakafonua ko e “Person to Person”.10

ʻI he 1964, naʻe fakakaukau ʻa Tēvita O. Makei ko e Palesiteni ʻo e Siasí mo ʻEletā Hāloti B. Lī ki ha toe ngaahi fakalakalaka ki hono akoʻi ʻo e ongoongoleleí ʻoku fakatefito ʻi ʻapí. Naʻe fanongonongo ʻe ʻEletā Lī ʻi he konifelenisi lahí, ʻe tataki ʻe he ngāue faaitaha ʻa e lakanga fakataulaʻeikí ʻoku kei fakahokó ha polokalama efiafi fakafāmili foʻou ʻi ʻapi ʻo fakafou ʻi he kau taki lakanga fakataulaʻeiki ʻi he siteikí.11 Naʻe tuku mai ai ʻe he Siasí ʻa e Home Evening Manual (Tohi Lēsoni Efiafi Fakafāmili ʻi ʻApí) ʻoku ʻi ai ha ngaahi fakahinohino, ngaahi fokotuʻu, mo ha ngaahi lēsoni ʻe lava ke feʻunga mo e toʻu kotoa pē. Hili pē ha ngaahi taʻu siʻi, naʻe liliu ʻa e tohi lēsoní ki he lea fakafonua ʻe 17.12

Naʻe ope atu e vēkeveke ki he pō fakafāmili angamahení ʻi he ngaahi ʻapi ʻo e Kāingalotu ʻi he Ngaahi ʻAho Kimui Ní. ʻI he 1973, naʻe fakamamafaʻi ʻe ha fakamatala ʻi he New York Times ʻa e polokalama efiafi fakafāmili ʻi ʻapí ko hono ʻomi ʻo e uouangataha lahi ange ki he ngaahi fāmilí, ʻa ia naʻá ne fakatupulaki ha ngaahi fehuʻi ʻi he ngaahi siasí mo e ngaahi kautaha kehekehe ki he Tohi Lēsoni Efiafi Fakafāmili ʻi ʻApífakamuimuitahá.13 ʻI he taʻu ko iá, ne maʻu ai ʻe he kau faifekaú ha fokotuʻutuʻu foʻou ko e Founga Faaitaha ki hono Akoʻi e Ngaahi Fāmilí, ʻa ia naʻe kau ai ʻa e efiafi fakafāmili ʻi ʻapí ko ha ngaahi founga malanga ne tānaki mai ki ai. Naʻe fakamafola e polokalamá ʻe he kau faifekau he funga ʻo e māmaní ʻaki e ngaahi polokalama ki he kakaí, fakamatala he ongoongó, fakamatala ʻi he halá, mo e ngaahi lēsoni ʻi ʻapí.14 ʻI he taʻu foki ko iá, naʻe aleaʻi ʻe he Kāingalotu ʻi he Ngaahi ʻAho Kimui Ní ʻa e polokalama efiafi fakafāmili ʻi ʻapí pea mo e kōvana ʻo Veisiniá, ʻa ia naʻá ne fakahā kimui ange ko Mē 1974 ko e “Māhina Maʻumaʻuluta ʻa e Fāmilí.” Naʻe faʻifaʻitaki ki ai e ngaahi kolo lalahi mo e ngaahi siteiti kehe, ʻi he fakahoko ʻe he kau pule kolo mo e kau kōvana ʻi he ʻIunaiteti Siteití ʻa e ngaahi ʻekitivitī maʻumaʻuluta fakafāmilí mo fakaongoongoleleiʻi ʻa e efiafi fakafāmili ʻi ʻapí ki honau kakaí.15

Naʻe angamaheni ʻaki hono fokotuʻu ʻe he ngaahi fakataha alēlea fakasiteikí ha ʻaho ʻi he uiké ki he efiafi fakafāmili ʻi ʻapí ʻo aʻu ki he 1970, ʻi he taimi naʻe poupou ai e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá ki he ngaahi siteikí, misioná, uōtí, mo e koló ke fokotuʻu e pō Mōnité maʻá e ngaahi fāmilí.16 Naʻe kau ʻi he fuofua ngāue ʻa Hauati W. Hanitā ko e Palesiteni foʻou ʻo e Siasí ʻi he 1994, ʻa ʻene fakahinohinoʻi ke tāpuni ʻa e ngaahi ʻapisiasi mo e falelotu kotoa pē ʻo e Siasí ʻi he pō Mōnité pea fakapapauʻi ʻe he ngaahi fakataha alēlea fakasiteikí mo fakauōtí ʻoku ʻikai fakahohaʻasi e ngaahi efiafi fakafāmili ʻi ʻapí.17 Hili e taʻu ʻe nima mei ai, naʻe toe fakaongo mai ʻe Palesiteni Kōtoni B. Hingikelī mo hono ongo tokoni ʻi he Kau Palesitenisī ʻUluakí ʻa e tuʻutuʻuni ʻa Palesiteni Hanitaá mo tapou ki he kāingalotu ʻo e Siasí ke poupouʻi honau tukui koló mo e ngaahi akó ke fakaʻehiʻehi mei hono fokotuʻu ha ngaahi ʻekitivitī ʻe mavahe ai ʻa e fānaú pe ko e mātuʻá mei ʻapi ʻi he ngaahi efiafi Mōnité.18 Naʻe fokotuʻu mai ʻi ha fanongonongo ʻi he 2018 ha taimi-tēpile ne fakaleleiʻi ki he lotu he Sāpaté, ha houa ʻe taha ki he ako ʻo e ongoongoleleí ʻi ʻapi. ʻI ha feinga ke fakakau mai mo poupouʻi e kakai lalahi tāutahá, naʻe liliu ai ʻe he Siasí e hingoá ki he “efiafi ʻi ʻapí” ʻi he Tohi Tuʻutuʻuni Fakakātoá mo e ngaahi naunau kehé. Naʻe poupouʻi ʻe he Kau Palesitenisī ʻUluakí e “niʻihi fakafoʻituituí mo e ngaahi fāmilí ke nau fakahoko ʻa e efiafi ʻi ʻapí pea mo ako ʻa e ongoongoleleí ʻi ʻapi ʻi he Sāpaté,” neongo ʻe ʻatā ʻa e ngaahi efiafi Mōnité mei he ngaahi fakataha kehé pe ko hono fakaʻaongaʻi ʻo e ʻapisiasí.19 Naʻe hoko atu hono tali lahia e ngaahi tukufakaholo efiafi ʻi ʻapí ke fakafaikehekeheʻi ai e Kāingalotu ʻi he Ngaahi ʻAho Kimui Ní, tautautefito ʻi hono hoko atu e tukufakaholo fakalotú. Naʻe hanga ʻe he ngaahi fakataha angamaheni ʻi ʻapí ne fakahoko ʻo laka hake ʻi he senitulí, ʻo ʻomi ki he Kāingalotu ʻi he Ngaahi ʻAho Kimui Ní ha taha ʻo e ngaahi fehokotakiʻanga mālohi taha ʻi he ngaahi toʻu tangatá ʻi ha toe kulupu fakalotu pē ʻi onopooni.20

Ngaahi Tefito Fekauʻakí: Palaimelí, Ngaahi Houalotu ʻa e Kau Finemuí, Ngaahi Houalotu ʻa e Kau Talavoú, Lautohi Faka-Sāpaté

  1. Vakai, Tokāteline mo e Ngaahi Fuakava 68:25–32; Joseph Smith, “Revelation, 1 November 1831–A [D&C 68],” ʻi he Revelation Book 1, 113–14, josephsmithpapers.org; vakai foki, Smith, “Revelation, 1 November 1831–A [D&C 68]: Historical Introduction,” josephsmithpapers.org.

  2. Ngaahi Akonaki ʻa e Kau Palesiteni ʻo e Siasí: Pilikihami ʻIongi (1997), 204; vakai foki, Brigham Young, ʻi he Journal of Discourses, 19:92.

  3. Vakai ki he Ngaahi Tefitó: Palaimelí, Lautohi Faka-Sāpaté, Holoki e Ngaahi Fakamolé, Ngaahi Houalotu ʻa e Kau Talavoú, Ngaahi Houalotu ʻa e Kau Finemuí, Church Academies, Seminaries and Institutes.

  4. Frank Y. Taylor, ʻi he Conference Report, Oct. 1902, 59.

  5. Home Evening: With Suggestive Exercises and Explanations, Also a Sermon on Family Government by Pres. Joseph F. Smith (Salt Lake City: Granite Stake of Zion, 1909), 3. Naʻe kau ʻi he kōmití ni ʻa Edward H. Anderson, Joseph W. Musser, William Bradford, Thomas J. Yates, Joseph S. Tingey, mo Jesse T. Badger.

  6. Vakai, Home Evening, 5–9, 50.

  7. Joseph F. Smith, Anthon H. Lund, mo Charles W. Penrose, Letter to Presidents of Stakes, Bishops and Parents in Zion, 27 Apr. 1915, ʻi he “Editors’ Table: Home Evening,” Improvement Era, vol. 18, no. 8 (June 1915), 733–34.

  8. Rex A. Skidmore, “Do You Need the Family Hour?,” The Improvement Era, vol. 57, no. 9 (Sept. 1954), 626–27, 657–58; Ezra Taft Benson, ʻi he Conference Report, Oct. 1947, 27; vakai foki, “Announcement,” Improvement Era, vol. 18, no. 12 (Oct. 1915), peesi ʻi muʻá; Young Men’s Mutual Improvement Associations Manual for Junior Classes, 1916–1917: The Development of Character (Salt Lake City: General Board of YMMIA, 1916); Syllabus for Stake Institutes in Teacher Training, Social and Recreational Leadership, Charities and Relief Work: Manual for Stake and Ward Social Committees (Salt Lake City: Social Advisory Committee, 1920), 30; Claude Richards, Home Evening Handbook for Use of Parents and Older Children: Adopted as Official Guide by the Highland Stake of the Church of Jesus Christ of Latter-day Saints (Salt Lake City: Deseret Book, 1936); Joseph F. Merrill, “Home Evening,” Improvement Era, vol. 21, no. 3 (Jan. 1918), 203–7; J. C. Hogensen, “The Home Evening,” Improvement Era, vol. 32, no. 7 (May 1929), 567–69. ʻI he vahaʻa ʻo e 1956 mo e 1970, naʻe toutou fakamamafaʻi ʻe he Instructor ʻa e ngaahi ʻekitivitī mo e ʻasenita ʻo e efiafi fakafāmilí fakafoʻituituí.

  9. Skidmore, “Do You Need the Family Hour?,” 626–27; Benson, ʻi he Conference Report, Oct. 1947, 27.

  10. Benson, ʻi he Conference Report, Oct. 1947, 27; Edward R. Murrow’s “Person to Person” Program on CBS Television, 1954 September 24, Ezra Taft Benson File Footage, circa 1984–1994, AV 1797, Church History Library, Salt Lake City.

  11. Vakai, Harold B. Lee, ʻi he Conference Report, Oct. 1964, 80–87; vakai, Tefitó: Correlation.

  12. Vakai, Lee, ʻi he Conference Report, Oct. 1964, 80–87; vakai, Boyd K. Packer, ʻi he Conference Report, Oct. 1970, 118–22.

  13. Judy Klemesrud, “Strengthening Family Solidarity with a Home Evening Program,” New York Times, June 4, 1973, 47; vakai, James A. Cullimore, ʻi he Conference Report, Oct. 1975, 38–41.

  14. “Family Home Evenings,” ʻi he The Uniform System for Teaching Families (Salt Lake City: Corporation of the President, 1973), B1–B13; vakai foki, Dennis A. Wright and Janine Gallagher Doot, “Missionary Materials and Methods: A Preliminary Study,” in Reid L. Neilson and Fred E. Woods, Go Ye into All the World: The Growth and Development of Mormon Missionary Work (Provo: Religious Studies Center, 2012), 91–116; Germany Munich Mission Manuscript History and Historical Reports, Feb. 19–July 4, 1972, Church History Library, Salt Lake City; Kenneth Harold Golding, Missionary Journal, 13–27 Dec. 1972, 20–27, https://www.familysearch.org/photos/artifacts/135507982; Germany South Mission Family Home Evening Program Scrapbook, 1972, Church History Library, Salt Lake City; Roy Remund, “Strengthen the Home,” Bayanihan [Philippines Manila Mission, LR 6887 20] (July 1973), 7; Australia East Mission News, vol. 4, no. 12 (Oct. 17, 1973), 1, Australia Sydney Mission Records, 1918–1920; 1941–1991, LR 10871 39, Church History Library, Salt Lake City.

  15. Vakai, Cullimore, ʻi he Conference Report, Oct. 1975, 39–41; “It’s Family Unity Month in Virginia,” Ensign, June 1974, https://www.churchofjesuschrist.org/study/ensign/1974/06/news-of-the-church/its-family-unity-month-in-virginia; Robert A. Walsh, “State Observes Program; Urges Unity in Family,” Church News, May 4, 1974, 15; Whit Wirsing, “Family Unity Is Stressed in Virginia,” Church News, June 8, 1974, 15; “Dateline,” Church News, Oct. 26, 1974, 11; “Dateline,” Church News, Nov. 15, 1975, 11; M. C. O’Bryant, “Golfer Johnny Miller Urges Family Unity,” Church News, Nov. 29, 1975, 7; “Citizens Strive for Family Unity,” Church News, Oct. 30, 1976, 11.

  16. Rex W. Allred, “I Have a Question,” Ensign, Jan. 1987, 52–53.

  17. Tohi ʻa e Kau Palesitenisī ʻUluakí, ʻi he “The First Presidency Reaffirms Importance of Family Home Evening,” Church News, Oct. 1, 1994, 7.

  18. First Presidency Letter, Oct. 4, 1999, ʻi he Ensign, Mar. 2003, https://www.churchofjesuschrist.org/study/ensign/2003/03/family-home-evening.

  19. First Presidency Letter, Oct. 6, 2018, https://www.churchofjesuschrist.org/bc/content/ldsorg/general-conference/16435_900_First-Presidency-Letter.pdf; vakai foki, “Church Announces New Balance between Gospel Instruction in the Home and Church,” Newsroom, Oct. 6, 2018, https://newsroom.churchofjesuschrist.org/article/church-announces-new-balance-between-gospel-instruction-home-church. Naʻe faleʻi mai ʻe he Tohi Tu‘utuʻuni Fakakātoá: “ʻOku fakafaingofua pē ʻa e Efiafi fakafāmili ʻi ʻapí ʻo fakatatau mo e ngaahi tūkunga ʻo e kau mēmipá. ʻE lava ke fakahoko ia ʻi he Sāpaté pe ʻi ha toe ngaahi ʻaho mo ha taimi kehe”; vakai, “Efiafi Fakafāmili ʻi ʻApí mo ha Ngaahi ʻEkitivitī Kehe,” Tohi Tuʻutuʻuni Fakakātoá: Ko e Ngāue ʻi he Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, 2.2.4, https://www.churchofjesuschrist.org/study/manual/general-handbook/2-supporting-individuals-and-families#title_number10.

  20. Vern L. Bengtson, Families and Faith: How Religion Is Passed Down across Generations (New York: Oxford University Press, 2013), 202–3.