Hisitōlia ʻo e Siasí
Papitaiso maʻá e Pekiá

“Papitaiso maʻá e Pekiá,” Ngaahi Tefito ʻi he Hisitōlia ʻo e Siasí

“Papitaiso maʻá e Pekiá”

Papitaiso maʻá e Pekiá

Naʻe toe fakapapauʻi ʻe he ngaahi fakahā kia Siosefa Sāmitá ʻa hono fie maʻu ʻo e papitaisó ki he fakamoʻuí mo akoʻi hono fie maʻu ke fakahoko e ouau ko ʻení ʻaki e mafai lakanga fakataulaʻeiki kuo fakafoki maí. Naʻe hohaʻa ʻa e kāingalotu ʻo e Siasí ʻo kau ai ʻa Siosefa mo hono fāmilí ke ʻiloʻi e tuʻunga ʻo e kau mēmipa ʻo honau ngaahi fāmilí kuo pekia teʻeki ai papitaisó.1 Naʻa nau fakalaulauloto ki he ngaahi potufolofola he Fuakava Foʻoú fekauʻaki mo e malanga ʻa Sīsū Kalaisi ki he ngaahi laumālie ʻi he fale fakapōpulá, pea naʻe mahamahalo ha niʻihi ʻo e Kāingalotú ʻe papitaiso ʻe he kaumātuʻa ʻo e Siasí ʻa kinautolu kuo “pekia ʻi he fuakava kuo maumauʻí” ʻi he taimi ʻo e Hāʻele ʻAnga Ua Mai ʻa Sīsū Kalaisí.2

ʻI he ʻaho 15  ʻo ʻAokosi, 1840, hili pē ha taimi nounou mei he hiki ʻa e Kāingalotú ki he feituʻu Nāvū, ʻIlinoisi ʻi he kahaʻú, naʻe malanga ʻa Siosefa Sāmita ʻi ha meʻafakaʻeiki ʻo ha mēmipa ʻo e Siasí ko Seimoa Pulunisoni. ʻI haʻane fakatokangaʻi ha fefine ʻi he kau fanongó kuo mole hono fohá kimuʻa peá ne papitaisó, naʻe fakahā ʻe Siosefa “ʻe lava ke ngāue ʻa e [Kāingalotú] he taimí ni maʻa honau ngaahi kaumeʻa kuo nau mavahe mei he moʻui ní” ʻaki ʻenau papitaiso maʻanautolu. Naʻá ne fakaʻaongaʻi e ngaahi akonaki fakakuongamuʻa e ʻAposetolo ko Paulá fekauʻaki mo e papitaiso maʻá e kau pekiá mo fakalotolahiʻi e Kāingalotú ke nau fiefia he “naʻe fokotuʻutuʻu ʻa e palani ʻo e fakamoʻuí ke fakamoʻui ai ʻa kinautolu kotoa naʻe fie talangofua ki he ngaahi fie maʻu ʻa e fono ʻo e ʻOtuá.”3

Naʻe tali loto vekeveke ʻe he Kāingalotú ʻa e meʻá ni mo feinga ke fakahoko ʻa e papitaisó ʻi he ngaahi vaitafe ofi maí maʻa honau kāingá, kaungāmeʻá, mo e kakai ʻiloá.4 Naʻe fakahoko ʻa e ngaahi papitaisó ʻe he kau tangata naʻa nau maʻu e Lakanga Taulaʻeiki Faka-Melekisētekí ʻi he ʻao ʻo ha kau fakamoʻoni.5 Naʻe fakahoko ʻa e fuofua papitaiso naʻe lekōtí ʻe Haavi ʻOlimisiteti, ʻa ia naʻá ne papitaiso ʻa Seini Neimani ke fakafofongaʻi hono foha ne toki mālōlō ko Sailosí. Naʻe fakahoko ʻa e papitaisó ʻi he Vaitafe Misisipí pea naʻe fakamoʻoni ki ai ʻa Viena Siaki, ʻa ia naʻá ne heka hoosi ki he vaitafé ke fanongo ki he lotú.6

Naʻe maʻu ʻe Siosefa Sāmita ha fakahā ʻi Sānuali  ʻo e 1841, naʻe fakataumuʻa ʻa e papitaiso maʻá e kau pekiá ke fakahoko ʻi he ngaahi temipalé. Naʻe fakamatalaʻi ʻe he ʻEikí “ʻoku kau ʻa e ouaú ni ki hoku falé” mo fekauʻi e Kāingalotú ke langa ha temipale ʻi Nāvū.7 ʻI he konifelenisi naʻe hoko mai ʻi ʻOkatopá, naʻe fanongonongo ʻe Siosefa Sāmita he ʻikai toe fakamafaiʻi e papitaiso maʻá e kau pekiá kae ʻoua kuo langa e faiʻanga papitaiso ʻi he Temipale Nāvuú.8 ʻI Nōvema taʻu ko iá, ne fokotuʻu ʻe he Kāingalotú ha faiʻanga papitaiso papa naʻe tā tongitongi nima ʻi he konga ki lalo ʻo e temipalé, ʻo ʻato fakataimi pē, mo fakatapui ia kae lava ke hoko atu e papitaisó.

ʻI heʻene fakakaukau ki he fakahā kuó ne maʻú, naʻe akoʻi ʻe Siosefa Sāmita ʻi ha tohi ki he Siasí ʻi he 1842 ko e papitaiso maʻá e kau pekiá ʻoku totonu ke hiki fakalelei, ʻo talaʻofa ange ko e meʻa ʻe “lekooti ʻi he māmaní ʻe lekooti ia ʻi he Langí.”9 Ko ia ai, naʻe uiuiʻi ʻa e kau kalaké ke nau fakapapauʻi naʻe lekooti ʻa e papitaiso kotoa pē maʻá e kau pekiá. ‘I he vahaʻa ʻo e 1840 mo e 1845, ʻi he ʻikai maʻu ha fakahinohino paú, naʻe faʻa fakafofongaʻi ʻe he kakai tangatá he taimi ʻe niʻihi ʻa e kakai fefiné, mo e kakai fefiné maʻá e kakai tangatá. Hili e pekia ʻa Siosefa Sāmita ʻi he 1845, naʻe fanongonongo ʻe Pilikihami ʻIongi mei he taimi ko iá ʻo fai atu, he ʻikai “toe sio [e Kāingalotú] ʻi hano papitaiso ha tangata ke fakafofonga ha fefine pe ha fefine ke fakafofonga ha tangata.” Naʻá ne fakamatalaʻi “naʻe ʻikai maʻu ʻe Siosefa ʻi heʻene moʻuí e meʻa kotoa fekauʻaki mo e tokāteline ʻo e huhuʻí” ka naʻe hokohoko atu hono tataki ʻe he ʻEikí ʻa e Siasí ʻaki e fakahā, “ʻo ʻoange ha siʻi heni mo ha siʻi hena.”10 Naʻe fakahoko ʻa e liliu ko ʻení ʻi ha taimi naʻe kamata ke fakahoko ai ʻe he Kāingalotú ha ngaahi ouau kehe maʻá e kau pekiá, ʻo kau ai e fakanofo ki he lakanga fakataulaʻeikí mo e ngaahi sila malí.11

Kuo hoko ʻa e ngaahi tekinolosia foʻoú, lahi ange ʻa e faʻungá, mo e toutou fakamamafaʻi ʻo e ʻalu ki he temipalé ke tokolahi ange ʻa e kau atu ki he papitaiso maʻá e kau pekiá ʻi he senituli 20. ‘Ikai ngata pē ʻi hono fakahoko ʻo e papitaisó maʻá e kāinga kuo pekiá, ka naʻe kamata hono fakahoko ʻe he Kāingalotú ʻa e ouau ko ʻení maʻá ha niʻihi kehe te nau lava ʻo maʻu honau tohi hohokó mei ha ngaahi lekooti kuo ʻosi maʻu. ‘I ha ngaahi taimi ʻe niʻihi, naʻe kau heni ha kakai ʻiloa mo ha niʻihi fakafoʻituitui naʻa nau kau he ngaahi meʻa fakahisitōlia hangē ko e Fakaʻauha ʻo e Kau Siú. ‘Oku tui ʻa e Kāingalotu ‘i he Ngaahi ‘Aho Kimui ní ʻoku ʻikai ʻai ʻe he papitaiso maʻá e kau pekiá ke hoko e kau pekiá ko ha mēmipa ʻo e Siasí. ʻOku nau tuku pē ke ʻatā ʻa e ngaahi ouaú ki he ngaahi laumālie ʻo kinautolu kuo nau mālōlō mo fili ke tali iá. Ka neongo ia, ‘i he 1990, naʻe fakahaaʻi ʻe ha kau mamata pē ʻi tuʻa ʻenau hohaʻa fekauʻaki mo hono fakahoko ʻení. Naʻe toʻo ʻe he kau taki ʻo e Siasí ʻa e ngaahi hingoa ʻo e niʻihi fakafoʻituitui ko ʻení mei he ngaahi lekooti ʻa e Siasí, ʻoatu ha ngaahi fakahinohino naʻe fakataumuʻa ke taʻofi hono ʻoatu honau ngaahi hingoá ki he papitaisó, mo fakalotolahiʻi e kāingalotu ʻo e Siasí ke tokanga taha ki hono fakahoko e ngaahi ouau fakatemipalé maʻa ʻenau ngaahi kuí.12

Kuo fuoloa e hoko ʻa e papitaiso maʻá e kau pekiá ko e konga lahi taha ia ʻo e moihū ʻi he temipalé ʻa e Kāingalotu ʻi he Ngaahi ʻAho Kimui ní. ‘I Nāvuú, hili hono fakafeʻiloaki e ʻenitaumeni temipalé ki ha kiʻi kulupu tokosiʻi pē, naʻe fakahoko ʻe he Kāingalotu tangata mo fefine ha papitaiso ʻe lau mano maʻá e kau pekiá. Lolotonga e konga kimui ʻo e senituli 19, naʻe fakahoko ʻe ha kāingalotu ʻuliʻuli hako ʻAfilika ʻo e Siasí ha ngaahi papitaiso maʻa honau kāingá ʻi he Fale ʻEnitaumení mo e ongo Temipale Sōleki mo Lōkani ʻIutaá, neongo naʻe ʻikai lava ke nau maʻu e ngaahi ouau fakatemipale kehé kimuʻa he 1978.13 Naʻe kamata ʻi he 1920 tupú ʻa e toutou fononga fakauooti ʻa e ngaahi kulupu toʻu tupú ki he temipalé ke papitaiso maʻá e kau pekiá, ʻo ʻoange ai ha faingamālie ki he kau mēmipa kei talavou ʻo e Siasí ke nau hū ki he temipalé ʻi ha ngaahi taʻu kimuʻa pea nau toki maʻu ʻenitaumení.14 ‘Oku poupouʻi e toʻu tupu ʻo e Siasí he ʻahó ni ke nau fekumi ki heʻenau ngaahi kuí mo ʻalu maʻu pē ki he temipalé ke hoko ko ha fakafofonga ki he papitaisó. ʻI he 2017, naʻe fanongonongo ʻe he kau taki ʻo e Siasí ʻe lava ke fai papitaiso e kau maʻu Lakanga Taulaʻeiki Faka-ʻĒlone ʻi he tuʻunga taulaʻeiki siʻí maʻá e kau pekiá.15

Ngaahi Tefito Fekauʻakí: Temipale Nāvuú

Maʻuʻanga Fakamatalá

  1. Naʻe hohaʻa ʻa e fāmili Sāmitá ki he taʻokete ʻo Siosefa ko ʻAlaviní, ʻa ia ne pekia ʻi ha ngaahi taʻu kimuʻa pea toki fokotuʻu e Siasí. Vakai, Larry C. Porter, “Alvin Smith: Reminder of the Fairness of God,” Ensign, Sept. 1978, 65–67.

  2. Joseph Fielding letter, Dec. 28, 1841, ʻi he “Communications,” Times and Seasons, vol. 3, no. 5 (Jan. 1, 1842), 649; vakai foki, Warren Cowdery, “Love to God,” Messenger and Advocate, vol. 3 (Mar. 1837), 471; Untitled article, Elders’ Journal of the Church of Jesus Christ of Latter-day Saints, vol. 1 (July 1838), 43.

  3. Simon Baker statement, ʻi he Journal History, Aug. 15, 1840.

  4. Alexander L. Baugh, “‘For This Ordinance Belongeth to My House’: The Practice of Baptism for the Dead Outside the Nauvoo Temple,” Mormon Historical Studies, vol. 3, no. 1 (Spring 2002), 47–58.

  5. Matthew McBride, A House for the Most High: The Story of the Original Nauvoo Temple (Salt Lake City: Greg Kofford Books, 2007), 34.

  6. Jane Neyman statement, given Nov. 29, 1854, ʻi he Journal History, Aug. 15, 1840.

  7. “Revelation, 19 January 1841 [DC 124],” ʻi he Book of the Law of the Lord, 5, josephsmithpapers.org; Tokāteline moe Ngaahi Fuakava 124:30.

  8. “Minutes of a Conference,” Times and Seasons, vol. 2, no. 24 (Oct. 1841), 578.

  9. “Letter to ‘The Church of Jesus Christ of Latter Day Saints,’ 6 September 1842 [DC 128],” 3, josephsmithpapers.org; vakai foki, Tokāteline mo e Ngaahi Fuakava 128:7–8.

  10. Brigham Young, “Speech,” Times and Seasons, vol. 6, no. 12 (July 1, 1845), 954–55, naʻe fakatonutonu e sipelá.

  11. Ne faifai pē pea fakahoko ʻa e ngaahi ouau fakamoʻui kotoa pē, ʻo kau ai ʻa e hilifakinimá, maʻá e kau pekiá ʻi he ngaahi temipalé. Naʻe fuofua fakahoko ʻa e ʻenitaumeni maʻá e kau pekiá ʻi he 1877 ʻi he Temipale Seni Siaosi ʻIutaá.

  12. “Background Explanation of Temple Baptism,” mormonnewsroom.org; “Church and Jewish Leaders Resolve Concerns over Baptisms,” Sept. 1, 2010, mormonnewsroom.org.

  13. Tonya Reiter, “Black Saviors on Mount Zion: Proxy Baptisms and Latter-day Saints of African Descent,” Journal of Mormon History, vol. 43, no. 4 (Oct. 2017), 100–123. Ko e Fale ʻEnitaumení ko ha fale ʻi Sōleki Siti naʻe fakatapui ki hono fakahoko ʻo ha ngaahi ouau ʻe niʻihi (kau ai e ngaahi papitaiso mo e ʻenitaumeni maʻá e kakai moʻuí) kimuʻa pea toki ʻosi e Temipale Sōleki Sití. Vakai foki, Tefitó: Race and the Priesthood.

  14. Vakai, Ogden Stake Historical Record, 1912–1921, Mar. 21, 1921, Aug. 22, 1921, June 12, 1922, Church History Library, Salt Lake City; “M.I.A. Notes: Junior Girls,” Young Woman’s Journal, vol. 34, no. 1 (Jan. 1923), 39.

  15. Camille West, “Church Adds New Opportunities for Youth and Children to Prepare for and Participate in Temples,” Dec. 17, 2017, news.lds.org.