Hisitōlia ʻo e Siasí
Ko e Tānaki ʻo ʻIsilelí


“Ko e Tānaki ʻo ʻIsilelí,” Ngaahi Tefito ʻi he Hisitōlia ʻo e Siasí

“Ko e Tānaki ʻo ʻIsilelí”

Ko e Tānaki ʻo ʻIsilelí

Naʻe fakapapauʻi ʻe he ngaahi kikite ʻi he Fuakava Motuʻá ki he fānau ʻo ʻIsilelí, neongo ʻe fakamoveteveteʻi kinautolu ʻi he ngaahi fonuá, ka ʻe ʻi ai e ʻaho ʻe toe tānaki fakataha kinautolu.1 Naʻe akoʻi ʻe he Tohi ʻa Molomoná pea mo e ngaahi fakahā ʻa e ʻEikí kia Siosefa Sāmita ki he Kāingalotu ʻo e Siasí ʻi he kuonga muʻá ʻoku nau moʻui ʻi he kuonga ʻe kamata ai e tānaki ne talaʻofá. ʻE hoko ʻa e tānaki ko ʻení ʻi heʻenau malanga ʻi he funga ʻo e māmaní ke ʻomi ʻa e ongoongoleleí ki he ngaahi hako ʻo ʻIsileli kuo fakamoveteveteʻí pea mo e niʻihi kotoa pē ʻoku nau fie kau ki he fāmili ʻo e fuakavá. ʻI he taimi tatau, naʻe pau ke langa ʻe he Kāingalotú ʻa e “kolo ko Saioné” ʻa ia ʻe lava ke tānaki ki ai ʻa e kau papi uluí, ko e teuteu ki he Hāʻele ʻAnga Ua mai ʻa Sīsū Kalaisí.2

Hili ha ngaahi māhina mei hono fokotuʻu ʻo e Siasí ʻi he 1830, naʻe hanga ʻe ha fakahā kia Siosefa Sāmita ʻo fekauʻi ʻa e kau papi ului foʻoú ke nau mavahe mei honau ngaahi ʻapí ʻo tānaki ki ha “potu pē ʻe taha ʻi he funga ʻo e fonua ko ʻení.”3 Naʻe tala ʻe ha fakahā makehe ke hoko ʻa ʻOhaiō ko e fuofua feituʻu ke fai ki ai ʻa e tānakí.4 Lolotonga e fetukutuku e kakai naʻe tuí ki Ketilani, ʻOhaioó, naʻe maʻu ʻe Siosefa Sāmita ha fakahā ki ha feituʻu ne ofi ki he kolo ko Tauʻatāina ʻi he Vahefonua Siakisoni, Mīsulí ke hoko ia ko e feituʻu ke kamata ai hono langa ʻo e kolo ko Saioné.5 Naʻe tuli ʻa e Kāingalotú mei he vahefonuá ʻi he 1833, ʻo taʻofi ai kinautolu mei hono langa ʻo e kolo ne tala’ofá, ka naʻa nau hokohoko atu pē ke fokotuʻu ha ngaahi nofoʻanga ʻi he tukui kolo takatakai aí ke lava ʻa e kau papi uluí ʻo tānaki ki ai.

Naʻe toe vave ange ʻa e tānakí ʻi he ʻEpeleli ʻo e 1836 ʻi he taimi naʻe hā ai ʻa e palōfita ʻi he Fuakava Motuʻá ko Mōsesé kia Siosefa Sāmita mo ʻŌliva Kautele ʻi he Temipale Ketilaní ʻo foaki kiate kinaua ʻa e “ngaahi kī ʻo hono tānaki mai ʻo ʻIsilelí mei he potu ʻe fā ʻo e māmaní, pea mo hono tataki mai ʻo e faʻahinga ʻe hongofulú mei he Fonua ʻo e Tokelaú.”6 Naʻe ʻikai fuoloa mei ai naʻe uiuiʻi ʻa e ongo ʻAposetolo ko Hiipa C. Kimipolo mo ʻOasoni Haiti ki ʻIngilani ke fokotuʻu ai e fuofua misiona ʻo e Siasí ʻi he fonua mulí.7 Naʻe kamata ke ʻaukolo mai ha kau papi ului ʻe toko laui afe ki he ngaahi siteiki ʻo e Siasí ʻi ʻOhaiō, Mīsuli, pea hoko atu ki ʻIlinoisi kimui ange ai. Naʻe fokotuʻu ʻe he Kāingalotú ha siteiki tokolahi ʻi Nāvū, ʻIlinoisi pea kamata ke nau langa ha temipale foʻou. Naʻe akoʻi ʻe Siosefa Sāmita, “ʻoku hoko ʻa ʻAmelika kotoa ko e Saione,” pea ʻe lava ʻe he Kāingalotú ʻo tānaki ki ha faʻahinga feituʻu pē ko e koloá pē ke ʻi ai ha temipale.8 Naʻá ne fakamatalaʻi ko e “tefitoʻi ʻuhinga” ʻo e tānakí “ke langa ha fale moʻó e ʻEikí ke Ne lava ai ʻo fakahā ki Hono kakaí ʻa e ngaahi ouau ʻo Hono falé mo e ngaahi nāunau ʻo Hono puleʻangá pea mo akoʻi ʻa e kakaí ki he ngaahi founga ʻo e fakamoʻuí.”9

Hili e pekia ʻa Siosefa Sāmitá, naʻe hikifonua ʻa e Kāingalotú ki he Hihifo ʻAmeliká, ʻa ia ne nau hoko atu ai ke fokotuʻu e ngaahi siteiki ʻo Saioné mo langa ha ngaahi temipale. ʻI he 1848, naʻe tapou ʻe he kau taki ʻo e Siasí ki he kau papi ului ʻi ʻIulopé ke nau “hikifonua ʻi he vave taha te nau lavá” ki he Anovai Māsima Lahí.10 Naʻe talangofua ʻa e kau papi ului foʻou ʻi he fonua mulí—tautautefito ki he niʻihi ʻi Pilitānia Lahi mo Sikenitineviá—ki he fakahinohino ʻa e kau taki ʻo e Siasí, ʻi heʻene peheé naʻe aʻusia ai ʻe he Kāingalotu ʻo e Siasí ha ngaahi faingataʻa ʻi he feinga fakaʻekonōmika ke tokoniʻi mo fakatahaʻi ʻa e kau hikifonua tokolahí.11 ʻI he ngaahi misioná, naʻe hoko e fehikitaki ʻa e kau papi uluí mei he ngaahi kolo ʻo e Siasi ki he ngaahi siteiki ʻi ʻIutaá ke faingataʻa ange ai ʻa e malanga fakauluí. ʻI he 1887, naʻe faifai pea fakataʻeʻaongaʻi ʻe he lao ʻo e ʻIunaiteti Siteití ki he fakafepaki ʻo e mali tokolahí ʻa e Paʻanga Tokoni Hikifonua Tuʻu Maʻu ʻa e Siasí, ʻo fakangatangata ai ʻa e malava ʻe he Siasí ke tokoniʻi ʻa e hikifonua mai mei mulí ʻo kehe ia mei he founga ne fakaʻaongaʻi talu mei he 1849.12

ʻI he 1890 tupú naʻe kamata ai ʻe he kau taki ʻo e Siasí ke poupouʻi ʻa e kau ului foʻoú ke nau nofo pē ʻi honau ngaahi fonuá. Hangē ko ʻení, ʻi he 1894, naʻe fakakaukau ai ʻa e Kau Palesitenisī ʻUluakí mo e Kōlomu ʻo e Kau ʻAposetolo ʻe Toko Hongofulu Mā Uá “ʻoku ʻikai totonu ke poupouʻi [e kāingalotu ne nau nofo mamaʻo mei ʻIutaá] ke nau hikifonua mai kae ʻoua leva kuo nau tui moʻoni ki he tui fakalotú ʻi he ngāue mo e aʻusia” pea ko kinautolu ʻoku nau maʻu ha ngāue paʻanga leleí ʻoku “ʻikai poupouʻi ke nau hikifonua mai ki he feituʻú ni he ʻoku siʻisiʻi ai ʻa e ngāué.”13 Ka naʻe kei mahuʻingaʻia pē ha kāingalotu ʻe niʻihi ʻi he ʻuluaki fakahinohino ko ia ke fakataha ki Saioné, pea naʻe ongoʻi ʻe he kau takí he ʻikai ke nau lava ʻo taʻofi ʻa e kāingalotú mei heʻenau hikifonua maí kapau ʻoku nau loto ki ai mo maʻu ʻa e paʻanga feʻunga ke fakahoko ʻaki iá. Neongo naʻe ʻosi kamata ke tokosiʻi ange ʻa e kau hikifonuá, ka naʻe kei hoko atu pē ʻa e ʻōfisi fakamisiona ʻo Livapulú ke hoko ko e kautaha hikifonua ʻo toki ngata ʻi he hiki ʻa e ʻuluʻi ʻōfisi ʻo e Misiona Pilitāniá ki Lonitoni ʻi he 1933.14

ʻI he 1952, naʻe folau ʻa Palesiteni Tēvita O. Makei ki ʻIulope ke fili e ngaahi feituʻu ke tuʻu ai e ngaahi temipale ʻi ʻIngilani mo Suisalaní. Lolotonga ʻene ʻi aí, naʻá ne fakamatala ki ha faiongoongo ʻo pehē, “ʻOku mau taumuʻá ke nofo pē ʻemau kāingalotú ʻi heni kae ʻoua te nau hikifonua ki ʻIutā mo e ngaahi feituʻu kehe ʻi he ʻIunaiteti Siteití.”15 Naʻá ne fakamatala ʻoku hoko e tuʻu e ngaahi temipalé ke ʻomi ai e ngaahi tāpuaki ʻo Saioné ki he Kāingalotu ʻi ʻIulopé. Naʻe hoko atu e kau Palesiteni ʻo e Siasí kimui aí ke fakahoko e taumuʻa ke langa ha ngaahi temipale ʻi ha feituʻu pē ne ʻi ai ha Kāingalotu tokolahi ʻo e Siasí. ʻI he 1977, naʻe toe fakamanatu ʻe ʻEletā Pulusi R. Makongikī ko e feituʻu pē ʻe fakataha ki ai ʻa e kakaí ke hoko ko e kakai moʻoni ʻa e ʻOtuá ʻi he papitaiso mo e fuakava, ko Saione ia. Naʻe akoʻi ʻe ʻEletā Makongikī ʻaki haʻane lave ki he kakai ʻo ʻĪnoké ʻo pehē, “Ko hono faʻu ko ia ha siteikí ʻoku tatau ia mo hono fokotuʻu ha Kolo ʻo e Māʻoniʻoní. ʻOku hoko ʻa e siteiki kotoa pē ʻi māmani ko e tānakiʻanga ʻo e fanga sipi hē ʻo ʻIsileli ʻoku nofo ʻi hono feituʻú.”16 Kuo ʻomi ʻe he ngaahi temipale mo e siteiki ʻi he funga ʻo e māmaní ha ngaahi lelei mo e tāpuaki ʻo hono tānaki fakataha ʻo e Kāingalotu ʻo e Siasí lolotonga iá ʻokú na toe tokoni foki ki hono tānaki ʻa e fānau ʻa e ʻOtuá ʻi honau tukui fonuá.

Ngaahi Tefito Fekauʻakí: Zion/New Jerusalem [Saione/Selusalema Foʻoú], Early Missionaries [Fuofua Kau Faifekaú], Dedication of the Holy Land [Fakatapui ʻo e Fonua Māʻoniʻoní], Wards and Stakes [Uōtí mo e Siteikí]

Ngaahi Fakamatalá

  1. Vakai, Teutalōnome 4:27–31.

  2. Richard Lyman Bushman and Dean C. Jessee, “General Introduction: Joseph Smith and His Papers,” in Dean C. Jessee, Mark Ashurst-McGee, and Richard L. Jensen, eds., Journals, Volume 1: 1832–1839. Vol. 1 of the Journals series of The Joseph Smith Papers, edited by Dean C. Jessee, Ronald K. Esplin, and Richard Lyman Bushman (Salt Lake City: Church Historian’s Press, 2008), xxiii.

  3. Revelation, September 1830–A [DC 29],” in Revelation Book 1, 36, josephsmithpapers.org.

  4. Revelation, 30 December 1830 [DC 37],” josephsmithpapers.org. Vakai foki, “Revelation, 2 January 1831 [DC 38],” josephsmithpapers.org.

  5. Revelation, 20 July 1831 [DC 57],”in Revelation Book 1, 93, josephsmithpapers.org; naʻe fakatonutonu ʻa e sipelá mo e mataʻitohi lahí; Joseph Smith, “History, 1838–1856, volume A-1 [23 December 1805–30 August 1834],” 127, josephsmithpapers.org; “Church Settlements, Northwest Jackson County, Missouri, 31 January 1833,” josephsmithpapers.org.

  6. Visions, 3 April 1836 [DC 110],” in Joseph Smith, Journal, September 1835–April 1836, 193, josephsmithpapers.org.

  7. Letter from Heber C. Kimball and Orson Hyde, between 22 and 28 May 1838,” in Joseph Smith, Journal, March–September 1838, 48–49, josephsmithpapers.org.

  8. Joseph Smith journal, Apr. 8, 1844, in Journal, December 1842–June 1844; Book 4, 1 March–22 June 1844, 73, josephsmithpapers.org.

  9. Joseph Smith,“Discourse, 11 June 1843–A, as Reported by Wilford Woodruff,” in Wilford Woodruff, Journal, 42–43, josephsmithpapers.org; aʻe fakatonutonu ʻa e sipelá mo e mataʻitohi lahí.

  10. Millennial Star, vol. 10, no. 6 (Mar. 15, 1848), 81–88; William G. Hartley, “Gathering,” in Arnold K. Garr, Donald Q. Cannon, and Richard O. Cowan, eds., Encyclopedia of Latter-day Saint History (Salt Lake City: Deseret Book, 2000), 415.

  11. ʻI hono fakakātoá, naʻe toko 65,000 e Kāingalotu Pilitānia ne nau hikifonua mai ki he Hihifo ʻAmeliká, fakataha mo ha toko 30,000 ko e kau Sikeitinevia. See Richard L. Jensen, “The British Gathering to Zion,” in V. Ben Bloxham, James R. Moss, and Larry C. Porter, eds., Truth Will Prevail: The Rise of The Church of Jesus Christ of Latter-day Saints in the British Isles, 1837–1987 (Salt Lake City: Corporation of the President of The Church of Jesus Christ of Latter-day Saints, 1987), 165; William Mulder, Homeward to Zion: The Mormon Migration from Scandinavia (Minneapolis: University of Minnesota, 1957), x.

  12. Jensen, “The British Gathering to Zion,” 188.

  13. Abraham Cannon diary, June 21, 1894, Church History Library, Salt Lake City, cited in Jensen, “The British Gathering to Zion,” 189.

  14. Jensen, “The British Gathering to Zion,” 169; see also Charles W. Penrose, “Advice to Intending Emigrants,” Latter-day Saints’ Millennial Star, vol. 69, no. 21 (May 23, 1907), 328–30.

  15. “McKay Charts Helsinki Visit,” Salt Lake Tribune, June 24, 1952, 13.

  16. Bruce R. McConkie, “Come: Let Israel Build Zion,” Ensign, May 1977, 118.