Ngaahi Tokotoko Fakalangí

Naʻe moʻui ʻa Siosefa Sāmita mo hono toʻu tangatá ʻi ha anga fakafonua ne palotoloto ai e ngaahi fakakaukau, ngaahi lea mo e tōʻonga moʻui fakaetohitapú. Naʻe hanga ʻe he ngaahi talanoa fakatohitapú, hangē ko e talanoa ʻo Mōsese mo hono tokoua ko ʻĒloné, ʻo fakamatalaʻi ʻa hono fakaʻaongaʻi ʻo ha meʻa fakatuʻasino hangē ko e tokotokó, ke fakahaaʻi ʻaki e finangalo ʻo e ʻOtuá (vakai, ʻEkesōtosi 7:9–12 mo e Nōmipa 17:8). Naʻe taku ʻe ha kau Kalisitiane tokolahi he kuonga ʻo Siosefa Sāmitá, ʻoku tokoni e ngaahi tokotoko fakalangí ki he maʻu fakahaá. Ne nau tui ʻe lava ke tokoniʻi kinautolu ʻe he ngaahi tokotoko ko ʻení ke maʻu ʻaki e vai pe makakoloa ʻi lalofonuá.¹

ʻŌliva Kautele

ʻŌliva Kautele

Naʻe fakamatalaʻi he muʻaki tatau ʻo e fakahā ʻi he Tokāteline mo e Ngaahi Fuakava 8, naʻe maʻu ʻe ʻŌliva Kautele ʻa e “meʻafoaki ʻo e ngāue mo e tokotokó” pe ko e “tokotoko ʻo natulá,” ke fakahaaʻi mai naʻe ʻi ai ha taimi naʻá ne ngāueʻaki ai ha tokotoko fakalangi. Naʻe ʻafioʻi ʻe he ʻEikí e meʻafoaki ʻo Kautelé, ʻo ne fakahā “ʻoku ʻikai mo ha toe mālohi kehe, ka ko e mālohi pē ʻo e ʻOtuá, ʻa ia ʻoku lava ke ne ngaohi e meʻa ko ʻeni ʻo Natulá ke ngāue ʻi ho nimá.” ʻI hono teuteuʻi ʻe he kau taki ʻo e Siasí e fakahā ko ʻení ke fakakau ʻi he Tokāteline mo e Ngaahi Fuakavá ʻi he 1835, ne nau ui ai e meʻafoaki ʻo Kautelé ko e “meʻafoaki ʻo ʻĒloné,” ko ʻene faitatau mo e tokotoko ʻo ʻĒloné.²

Naʻe fokotuʻu mai ʻe ha ngaahi maʻuʻanga fakamatala kehe, ngalingali naʻe fakaʻaongaʻi ʻe ʻŌliva Kautele mo Siosefa Sāmita  ko e Lahí pea mo Siosefa Sāmita  ko e Siʻí, ha ngaahi tokotoko fakalangi. Ka ʻoku ʻikai fakamahino mai ʻe he fakahaá ia pe naʻe maʻu fēfē ʻe Kautele ʻa e tokotoko ko ʻení. ʻOku fakamatalaʻi mai ko e taha pē ʻeni ia ʻo e ngaahi meʻafoaki ʻo Kautelé. ʻIkai ngata aí, naʻe akoʻi ʻe he fakahá kia Kautele ʻa e founga ke maʻuʻaki e meʻafoaki ʻo e liliu leá ʻo fakafou ʻi he ako, lotu mo e tokoni ʻa e Laumālie Māʻoniʻoní.

Ngaahi Maʻuʻanga Tokoni ʻa e Siasí

Jeffrey G. Cannon, “Oliver Cowdery’s Gift: DC 6, 7, 8, 9, 13,” ʻi he Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 15–19.

“Revelation, April 1829–B [DC 8],” Historical Introduction, josephsmithpapers.org.

Ngaahi Maʻuʻanga Fakamatalá

ʻOku ʻoatu ʻe he pulusinga ko ʻení ha ngaahi fakamatala lahi ange fekauʻaki mo e tefito ko ʻení. ʻI hono tuku atu pe fakafehokotaki kimoutolu ki he maʻuʻanga tokoni ko ʻení, ʻoku ʻikai ke mau poupouʻi pe fakapapauʻi atu e kanotohí pe ngaahi fakakaukau ʻa e kau faʻu tohí.

Larry E. Morris, “Oliver Cowdery’s Vermont Years and the Origins of Mormonism,” BYU Studies,vol. 39, no. 1 (2000), 106–29.

Ngaahi Tefito Fekauʻakí: Ngaahi Foʻi Maka Kikité, Ko e Kumi Makakoloá

Maʻuʻanga Fakamatalá

1. ʻOku kei fakaʻaongaʻi pē e founga tatau ʻe ha niʻihi ʻoku nofo ʻi he tukui kolo ki ʻutá.

2. ʻOku hanga ʻe he fuofua tatau ʻo e ʻū lauʻi peesi ʻo e fakahā ʻoku maʻu he taimí ni ʻi he Tokāteline mo e Ngaahi Fuakava 8, ʻo ui ia ko e “tokotoko.” ʻI he 1833, ʻi hono teuteuʻi ke pulusi e fakahā ko ʻení, naʻe fulihi ai ʻe Sitinei Likitoni e fakaleá ke ui ko e “tokotoko ʻo natulá.” Revelation, April 1829–B [DC 8],” ʻi he Revelation Book 1, 13, josephsmithpapers.org; Book of Commandments, 1833, 19, josephsmithpapers.org; Doctrine and Covenants, 1835, 161, josephsmithpapers.org.