Hisitōlia ʻo e Siasí
Siosefa F. Sāmita


“Siosefa F. Sāmita,” Ngaahi Tefito ʻi he Hisitōlia ʻo e Siasí

“Siosefa F. Sāmita”

Siosefa F. Sāmita

Ko Siosefa F. Sāmita ʻa e Palesiteni hono ono ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní. Naʻe taʻu 5 ʻa Siosefa ʻi he taimi naʻe fakapoongi ai ʻene tamai ko Hailame Sāmitá, pea taʻu 13 ʻi he taimi naʻe malōlō ai ʻene faʻē ko Mele Filitingi Sāmitá. ʻI he taʻu 15 ʻa Siosefa F. Sāmitá naʻá ne ngāue fakafaifekau ai ki he ʻOtu Motu Saniuisí (ʻa ia ʻoku ʻiloa he taimí ni ko Hauaiʻí), ko e ʻuluaki ia ʻo ʻene ngaahi ngāue fakafaifekau ki Hauaiʻi mo Pilitānia. Naʻe fakanofo ia ko ha ʻAposetolo ʻi he 1866 pea uiuiʻi ia ki he Kau Palesitenisī ʻUluakí ko ha tokoni kia Pilikihami ʻIongi; pea naʻe toki vaheʻi ia ʻi he taʻu hono hokó ko ha mēmipa ʻo e Kōlomu ʻo e Kau ʻAposetolo ʻe Toko Hongofulu Mā Uá.1 Naʻe mali ʻa Sāmita mo ha kau fafine ʻe toko 5 pea naʻe toko 48 ʻene fānaú, ko e toko nima ai naʻe ohi mai. Naʻe ʻiloa hono fāmilí ʻi he vāofi honau vā fetuʻutakí mo ʻenau fepoupouakí. Hili ʻene hoko ko ha tokoni ki ha Kau Palesiteni ʻe toko fā ʻo e Siasí, naʻe hikinimaʻi ʻa Sāmita ke ne hoko ko e Palesiteni ʻo e Siasí ʻi he 1901.

ʻĪmisi
Siosefa F. Sāmita

Tā ʻo Siosefa F. Sāmita.

Lolotonga e taʻu ʻe 17 ʻo ʻene tataki e Siasí, naʻe maʻu ʻe Siosefa F. Sāmita ha ivi tākiekina lahi ʻi he aʻusia ʻa e kāingalotu ʻo e Siasí ʻi honau ngaahi uōtí pe koló. Naʻe lahi ha ngaahi liliu ʻi he malumalu ʻo ʻene tatakí, naʻe lahi ha ngaahi liliu ʻi he houalotu ʻo e ngaahi kōlomu ʻo e lakanga fakataulaʻeikí, kau ai hono ʻai ke faitatau ʻa e tuʻo lahi ʻo e ngaahi fakatahá mo e ngaahi naunau fakalēsoní, fokotuʻu ʻa e taʻu motuʻa ʻo hono fakanofo ki he ngaahi lakanga kehekehe ʻo e lakanga fakataulaʻeikí, mo fakamamafaʻi ʻa e ngaahi fakahokohoko ʻo e mafai ʻo e lakanga fakataulaʻeikí.2

Lolotonga e ngaahi taʻu ʻo ʻene hoko ko e Palesiteni ʻo e Siasí, naʻe ngāue ʻa Sāmita ke fakaleleiʻi ʻa e vā fetuʻutaki ʻi he vahaʻa ʻo e Siasí mo e kakaí fakalūkufua. ʻI he 1904 naʻá ne hā ʻi he Falealea ʻo e ʻIunaiteti Siteití ko e konga ia ʻo e ngaahi fakataha naʻe fakahoko pē ʻe fakaʻatā ʻa Liiti Simuti, ko ha ʻAposetolo kuo fili ki he Falealeá.3 ʻI he hoko atu ʻa e feinga ʻa Sāmita ke tokoni ki he kakai tokolahi angé, naʻá ne mamata tonu ki he ʻilonga e hōloa ʻa e fakafepakí ki he Siasí.

Naʻe kamata ʻe Sāmita ʻa e efiafi fakafāmili ʻi ʻapí (ʻoku ʻiloa he taimí ni ko e efiafi [fakafāmili] ʻi ʻapí) mo e ngaahi polokalama seminelí mo tokoniʻi e Siasí ke fokotuʻu ha feituʻu ko ha ngaahi feituʻu fakahisitōlia ʻi he fakahahake ʻo ʻIunaiteti Siteití. Naʻe maʻu ʻe Sāmita ʻi he 1918 ha mata-meʻa-hā-mai ki he maama tataliʻanga ʻo e ngaahi laumālié, ʻa ia naʻe toki tānaki kimui ange ki he folofolá ko e Tokāteline mo e Ngaahi Fuakava 138.

Ke maʻu ha fakamatala lahi ange fekauʻaki mo e moʻui ʻa Siosefa F. Sāmitá, vakai ki he Prophets of the Restoration ‘i he foʻi vitiō ʻi he history.ChurchofJesusChrist.org pea ʻi he Gospel Library app.

Ngaahi Fakamatalá

  1. Vakai ki he Tefito: Succession of Church Leadership.

  2. Vakai ki he Tefito: Adjustments to Priesthood Organization.

  3. Naʻe huʻuhuʻu e kau ʻAmelika tokolahi ʻi he taimi ko iá, ʻo nau pehē naʻe kei hoko atu hono poupouʻi fakapulipuli pē ʻe he kau taki ʻo e Siasí ʻa hono fakahoko taʻe fakalao ʻo e mali tokolahí, ʻo nau fakafehuʻia pe naʻe feʻunga nai ʻa e ʻAposetolo ʻa e Kau Māʻoniʻoni ʻi he Ngaahi ʻAho Kimui Ní ke hoko ko ha fakafofonga [Falealea]. Naʻa nau fakakikihi ʻo pehē te ne mateakiʻi ange ʻa e Siasí kae ʻikai ki hono fatongia ke tauhi ʻa e ngaahi lao ʻa e ʻIunaiteti Siteití. Vakai, “The Manifesto and the End of Plural Marriage,” Gospel Topics Essays, topics.ChurchofJesusChrist.org.