Ngaahi Meʻafoaki ʻo e Laumālié

ʻI he Fuakava Foʻoú, naʻe talaʻofa ai ʻe Sīsū Kalaisi ki Heʻene kau ākongá “ [ʻe hoko mai ʻa e ngaahi fakaʻilonga] kiate kinautolu ʻoku tuí,” ʻo kau ai ʻa hono kapusi ʻo e tēvoló, lea ʻaki ʻa e “ngaahi lea foʻou,” mo hono fakamoʻui ʻo e mahakí.¹ Ka ʻi he konga kimuʻa ʻo e 1800 tupú, naʻe tokolahi ʻa e kau Kalisitiane ne nau fakakikihi pe naʻe fakataumuʻa nai ʻa e ngaahi mana ko iá ko ha fakaʻilonga ki he mafai ʻa e kau ʻAposetolo ʻi he kuonga muʻá pe naʻe hoko ia ki he kakai ne nau maʻu ʻa e tuí ʻi ha faʻahinga kuonga pē. ʻOku faʻa ui ʻa e kau Kalisitiane ʻoku nau tui naʻe ngata ʻa e ngaahi meʻafoaki ko iá ʻi he kau ʻAposetoló ko e kau “tui fakangatangatá,” ka ko kinautolu ʻoku nau tui ʻoku kei hokohoko atu pē ʻa e ngaahi meʻafoaki ko ʻení ʻoku ui kinautolu ko e kau “tui olopotó.” Naʻe tui olopoto ʻa e Kāingalotu ʻo e Siasí ʻi he kuonga muʻá, ne nau tui ki he pōpoaki ʻi he Tohi ʻa Molomoná kuo teʻeki ke ngata ʻa e “ʻaho ʻo e ngaahi manᔲ: naʻa nau fekumi mo fakahaaʻi ʻa e ngaahi meʻafoaki ʻo e Laumālié ʻi ha ngaahi founga kehekehe.

Ka naʻe vave ke ʻiloʻi ʻe he Kāingalotú, naʻe ʻikai mei he ʻOtuá ʻa e ngaahi fakaʻaliʻali olopoto kotoa pē. ʻI he taimi naʻe haʻu ai ʻa Siosefa Sāmita mei Niu ʻIoke ki Ketilani ʻi he 1831, naʻá ne mātātonu ʻi ha ngaahi fakataha naʻe lahi ai ʻa e ngaahi ʻulungaanga olopotó pea naʻá ne loto-hohaʻa telia hono fakafaikehekeheʻi ʻa e ngaahi meʻafoaki fakalaumālie totonú mei he ngaahi meʻa kehé.³ Naʻe ako ʻe he Kāingalotú ʻo fakafou ʻi he ngaahi fakahā naʻe foaki ki he Palōfitá, ʻe malava ʻe he ngaahi laumālie loí ʻo takihalaʻi ʻa e niʻihi ne nau fekumi ki he ngaahi fakahā fakalaumālié maʻá e lelei pē ʻanautolú pea ʻoku totonu ke fakaʻaongaʻi ʻa e ngaahi meʻafoakí ke tokoni mo langaki moʻui.⁴ Naʻe fakamahinoʻi foki ʻe he ʻEikí ʻe maʻu ʻe kinautolu naʻe fakanofo ke “leʻohi ʻa e Siasí” ʻa e meʻafoaki ke ʻiloʻi pe naʻe mei he ʻOtuá nai ʻa hono fakaʻaongaʻi ʻo e ngaahi meʻafoaki ʻe niʻihi.⁵ Naʻe hokohoko atu hono feakoʻiʻaki ʻe he kau taki ʻo e Siasí ʻiate kinautolu pē pea mo e Kāingalotú ʻa e taumuʻa ʻo e ngaahi meʻafoaki fakalaumālié pea mo hono ngāue ʻaki totonú.⁶

ʻOku ʻalu pē taimí mo e kehekehe e ngaahi founga kuo fakahaaʻi ai ʻa e ngaahi meʻafoaki fakalaumālié ʻi he Siasí. Hangē ko ʻení, ʻi he senituli 19 naʻe angamaheni ke lea ʻaki mo fakatonulea e ngaahi lea kehekehé ʻi he ngaahi fakatahaʻanga ʻo e Siasí. Kimui angé, naʻe aʻusia ʻe he kāingalotu ʻo e Siasí ʻa e meʻafoaki ʻo e lea ʻi he ngaahi lea kehekehé ko ha tokoni fakalangi naʻe foaki ki he kau faifekaú ke tokoniʻi kinautolu ʻi heʻenau malanga ʻaki e ongoongoleleí ʻi he ngaahi lea fakafonua kehé.⁷ ʻOku kei fiefia pē ʻa e Kāingalotu ʻo e Siasí he ʻahó ni ʻi he ngaahi meʻafoaki ʻoku foaki ki he kau ākonga ʻa Kalaisí, ʻoku fakapapauʻi mai leva ai kuo teʻeki ke mole atu e ʻaho ʻo e ngaahi maná.

Ngaahi Maʻuʻanga Tokoni ʻa e Siasí

“Ngaahi Meʻafoaki Fakalaumālié,” Gospel Topics, topics.lds.org.

Matthew McBride, “Religious Enthusiasm among Early Ohio Converts: DC 46, 50,” in Matthew McBride and James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016), 105–11.

Ngaahi Maʻuʻanga Fakamatalá

Ko e ngaahi pulusinga ko ʻení ʻoku nau ʻomai ha toe fakamatala fekauʻaki pea mo e tefitó. ʻI hono tuku atu pe fakafehokotaki kimoutolu ki he maʻuʻanga tokoni ko ʻení, ʻoku ʻikai ʻuhinga ia ʻoku mau poupouʻi pe fakapapauʻi atu honau kanotohí pe ngaahi fakakaukau ʻa honau kau faʻú.

J. Spencer Fluhman, “The Joseph Smith Revelations and the Crisis of Early American Spirituality,” in Andrew H. Hedges, J. Spencer Fluhman, and Alonzo L. Gaskill, eds., The Doctrine and Covenants: Revelations in Context (Provo, Utah: Religious Studies Center, Brigham Young University, 2008), 66–89.

Mark Lyman Staker, Hearken, O Ye People: The Historical Setting of Joseph Smith’s Ohio Revelations (Salt Lake City: Greg Kofford Books, 2009).

Ngaahi Tefito Fekauʻakí: Gift of Tongues [Meʻafoaki ʻo e Leá], Healing [Fakamoʻui]

Ngaahi Fakamatalá

1. Maʻake 16:17–18

2. Vakai, Molonai 7:35.

3. Vakai, Matthew McBride, “Religious Enthusiasm among Early Ohio Converts: DC 46, 50,” in Matthew McBride and James Goldberg, eds., Revelations in Context: The Stories behind the Revelations in the Doctrine and Covenants (2016), 105–116; Mark Lyman Staker, Hearken, O Ye People: The Historical Setting of Joseph Smith’s Ohio Revelations (Salt Lake City: Greg Kofford Books, 2009), 119–46, 175–91.

4. “Revelation, 9 May 1831 [DC 50],” in Revelation Book 1, 82–85, josephsmithpapers.org; J. Spencer Fluhman, “The Joseph Smith Revelations and the Crisis of Early American Spirituality,” in Andrew H. Hedges, J. Spencer Fluhman, and Alonzo L. Gaskill, eds., The Doctrine and Covenants: Revelations in Context (Provo, Utah: Religious Studies Center, Brigham Young University, 2008), 66–89.

5. “Revelation, circa 8 March 1831 [TF 46],” josephsmithpapers.org.

6. Ki ha sīpinga ʻo ha fakamatala ʻe ha alēleaʻanga māʻolunga ki ha ngāue olopoto ʻo ha kolo ʻo e Siasí, vakai ki he Minute Book 2, 57–60, josephsmithpapers.org. Ki ha ngaahi sīpinga ʻo e akonaki fekauʻaki mo hono fakaʻaongaʻi totonu ʻo e ngaahi meʻafoaki fakalaumālié, vakai ki he “Journal, December 1841–December 1842,” in Record Book, 1841–1845, 94, josephsmithpapers.org; “Journal, December 1842–June 1844; Book 1, 21 December 1842–10 March 1843,” 43–44, josephsmithpapers.org; “Try the Spirits,” Times and Seasons, vol. 3, no. 11 (Apr. 1, 1842), 743–48.

7. Vakai ki he Tefito: Healing [Fakamoʻui], Gift of Tongues [Meʻafoaki ʻo e Leá].