Ngaahi Akoʻanga ʻa e Siasí

ʻI he vahaʻa ʻo e taʻu 1870 mo e 1930, naʻe fakalele ai ʻe he Siasí ha ngaahi ʻapiako lotoloto ʻe tolungofulu mā ono ʻa ia naʻe ui ko e ngaahi akoʻanga makehé. Naʻe fakatefito ʻa e tokoni ʻa e ngaahi ʻapiakó ni ki he talavou mo e finemui ʻo e Siasí ʻaki ha ako lolotonga e uiké, hili ʻa e ako lautohí pea kimuʻa ʻi he ʻunivēsití. Hili e kamata ʻa e ngaahi ako māʻolunga fakapuleʻangá ʻi he ʻIunaiteti Siteití, naʻe tāpuni pe fakatau atu ʻe he Siasí ʻa e lahi taha ʻo e ngaahi akoʻanga makehé ni ki he vahefonua ʻa ia naʻe tuʻu aí.

Ngaahi Akoʻanga Makehe ʻi he Konga Kimuʻá

ʻI he ngāue ʻa e Kāingalotu ʻo e Siasí ʻi Nāvuú ʻi he konga kimuʻa ʻo e 1840 tupú ke maʻu ha tohi fakangofua fakafonua mei he puleʻanga fakavahefonua ʻo ʻIlinoisí, naʻa nau kamataʻi ha ngaahi akoʻanga fakaemāmani lahi, kau ai ha ʻunivēsiti. Ka naʻe fuonounou pē ʻa e lele ʻa e ʻunivēsití kimuʻa pea mavahe ʻa e Kāingalotú ki he Fakahihifo ʻo ʻAmelika Tokelaú.¹ ʻI he Vahefonua ʻIutaá, naʻe fokotuʻu ai ʻe he fuofua Kāingalotu paioniá ʻa e University of Deseret (ʻUnivēsiti ʻo Teseletí), ka naʻe tāpuni ʻa e ʻapiakó ʻi he 1852 kimuʻa pea toe fakaava hili ia ha taʻu ʻe 15 mei ai. Naʻe toe fakahingoa ia kimui ko e University of Utah (ʻUnivēsiti ʻo ʻIutaá).

Hili hono fakakakato ʻa e halanga lēlue fakakonitinēnití ʻi he 1869, naʻe fokotuʻu ʻe ha kau faifekau Palotisani mo Katolika ʻe niʻihi ha ngaahi ʻapiako lotoloto ʻi he Vahefonua ʻIutaá ke akoʻi ai ʻa e fānau ako ʻa e Kāingalotú.² ʻI he hohaʻa ʻa Pilikihami ʻIongi naʻa fakaʻevangeliooʻi ʻe he ngaahi ʻapiakó ʻa e fānau ʻa e Kāingalotú, naʻá ne fokotuʻu ai ʻa e Akoʻanga Pilikihami ʻIongí ʻi Polovo ʻi he 1875 pea mo e Kolisi Pilikihami ʻIongí ʻi Lōkani ʻi he 1877. Ko e konga kelekele naʻá ne tuku mavahe ke langa ai e ʻapiako hono tolú ne tuʻu ai ʻa e Akoʻanga ʻa e Siteiki Sōlekí ʻi he 1886, ko ha meimei taʻu ia ʻe 10 hili e pekia ʻa ʻIongí.

Naʻe fakalotolahiʻi ʻe he fakalakalaka ʻo e ngaahi ʻapiako ko ʻení ʻa e kau taki ʻo e Siasí ke fakalahi ʻa e ngaahi lelei fakaakó ki he ngaahi siteiki kotoa pē ʻo Saioné. Lolotonga hono fakafepakiʻi fakapuleʻanga ʻa e mali tokolahí ʻi he 1887, naʻe fakapaasi ʻe he Falealea ʻo e ʻIunaiteti Siteití ʻa e Lao Fakaangaanga ʻEtimani-Taká (Edmunds-Tucker), ʻa ia naʻá ne puleʻi ʻa e akoʻanga fakapuleʻanga ʻi ʻIutaá.³ Naʻe hohaʻa ʻa e kau taki ʻo e Siasí naʻa ʻikai ke fakangāueʻi ʻe he ngaahi ʻapiako fakapuleʻangá ʻa e Kāingalotu ne nau faiakó ʻa ia naʻe akoʻi ʻi he ngaahi akoʻanga ʻe tolú, pea ʻe ʻikai maʻu ai ʻe he kau akó ha ako fakalotu ʻi he lolotonga ʻo e uiké. ʻI he taʻu hono hokó, naʻe fakahinohinoʻi ʻe Uilifooti Utalafi ʻa e ngaahi siteikí ke fakaava haʻanau ngaahi akoʻanga pē ʻanautolu, pea ke takitaha tokangaʻi ʻaki ha poate ako ʻa ia naʻe sea ai ʻa e palesiteni fakasiteikí. Naʻe laka hake ʻi he ngaahi akoʻanga makehe mo e ngaahi ʻapiako ʻe 50 naʻe fokotuʻu ʻi ʻAlapeta, Kānata, mo Hualesa, Mekisikoú. Naʻe tokangaʻi ʻe Kala G. Meisa, ko e puleako ʻo e Akoʻanga Makehe Pilikihami ʻIongí, ʻa e ngaahi ʻapiakó ni ʻi he malumalu ʻo e fakahinohino ʻa ha Poate Ako ʻa e Siasí ne fokotuʻu foʻou.

Ngaahi Fehikitakí, Aofangatukú, mo e Liliú

Naʻe tumutumu e mafola ʻa e ngaahi akoʻanga ʻa e Siasí ʻi he 1890 tupú ʻi he taimi naʻe fakaʻau ke lahi ange ai ʻa e ngaahi ʻapiako naʻe fakalele ʻaki ʻa e paʻanga tokoni mei he kakaí. ʻI he fakaʻau ke hōloa ʻa e hū ʻa e fānau akó ki he akó, naʻe hoko ia ko ha meʻa faingataʻa hono feingaʻi ke lele lelei ʻa e ngaahi akoʻangá. Ke hokohoko atu ʻa hono fakahoko e ako fakalotú, naʻe fokotuʻu leva ʻe he kau pule ngāue ʻi he Siasí ʻa e seminelí maʻá e fānau ako ʻi he ako māʻolungá pea mo e ʻinisititiuti fakalotú maʻá e fānau ako ʻi he ʻunivēsití, ʻa ia naʻe fakatahaʻi ʻa e ngāue fakaako angamahení mo e folofolá mo e fakahinohino fakalotú. Naʻe kamata ʻi he 1920 tupú ʻa hono foaki ʻe he Poate Ako Lahi ʻa e Siasí ʻa hono fakalele mo hono puleʻi ʻo e konga lahi taha ʻo e ngaahi akoʻangá pea tāpuni ha konga lahi ʻo e ngaahi akoʻanga īkí. Naʻe tuʻu maʻu pē ʻa e ngaahi akoʻanga lalahi angé hangē ko e Kolisi Uepá (Weber College), Kolisi Tikisií (Dixie Junior College), mo e Kolisi Silá (Gila College), ko ha ngaahi akoʻanga ʻiloa ia naʻe tokangaʻi ʻe he vahefonuá ʻo aʻu mai ki he senituli 21. Naʻe tauhi ʻe he Poaté ʻa e Kolisi Likí (Ricks College) (hoko kimui ange ko e ʻUnivēsiti Pilikihami ʻIongi-ʻAitahoó), Kolisi Akoʻanga Faka-Pisinisi ʻa e Siasí (LDS Business College), ʻUnivēsiti Pilikihami ʻIongí, mo e Akoʻanga Hualé (Juárez Academy) ʻi Mekisikoú.

ʻI he 1950 tupú, naʻe fakatahaʻi ai ʻe he Kau Palesitenisī ʻUluakí ʻa e kotoa ʻo e seminelí, ʻinisititiuti ʻo e lēsoni fakalotú, mo e toenga ʻo e ngaahi akoʻanga ʻa e Siasí naʻe toé, ki ha polokalama pē ʻe taha. Naʻe hoko atu hono fokotuʻu ʻe he Polokalama Ako ʻa e Siasí (CES) ne fokotuʻu foʻoú, ha ngaahi ʻapiako hangē ko e Kolisi ʻa e Siasí ʻi Hauaiʻí (Church College of Hawaii) (hoko kimui ange ko e ʻUnivēsiti Pilikihami ʻIongi—Hauaiʻí), ko e Kolisi ʻa e Siasí ʻi Nuʻu Silá (Church College of New Zealand), mo e ngaahi ako lotoloto mo e ako māʻolunga ʻe niʻihi ʻi he ʻOtu Motu Pasifikí. ʻI he vahaʻa ʻo e taʻu 2009 mo e 2017, naʻe fokotuʻu ai ʻe he CES ha polokalama ʻinitaneti maʻá e akoʻanga māʻolunga angé, BYU-Pathway Worldwide, ʻa ia ne aʻu ki he 2019 kuó ne tokoniʻi ha kau ako Kāingalotu ʻo e Siasí mei ha ngaahi fonua ʻe 100.⁴

Ngaahi Maʻuʻanga Tokoni ʻa e Siasí

“Latter-day Saints and Education: An Overview,” Newsroom, newsroom.ChurchofJesusChrist.org.

Ngaahi Maʻuʻanga Fakamatalá

By Study and Also by Faith: One Hundred Years of Seminaries and Institutes of Religion (Salt Lake City: The Church of Jesus Christ of Latter-day Saints, 2015).

Scott C. Esplin and Arnold K. Garr, “Church Academies, 1875–1933,” ʻi he Brandon S. Plewe, ed., Mapping Mormonism: An Atlas of Latter-day Saint History (Provo, Utah: Brigham Young University Press, 2012), 126–27.

Scott C. Esplin and E. Vance Randall, “Living in Two Worlds: The Development and Transition of Mormon Education in American Society,” History of Education, vol. 43, no. 1 (2014), 3–30.

Ngaahi Maʻuʻanga Fakamatalá

1. Vakai, Tefitó: Mavahe mei Nāvuú

2. Vakai, Tefitó: Halanga Lēlué

3. Vakai, Tefitó: Lao Fakafepaki ki he Mali Tokolahí

4. Sarah Jane Weaver, “First Presidency Announces BYU–Pathway Worldwide,” Church News, Feb. 7, 2017, ChurchofJesusChrist.org; BYU–Pathway Worldwide, byupathway.org.