Hisitōlia ʻo e Siasí
Angatuʻu ʻi he Siasí

“Angatuʻu ‘i he Siasí,” Ngaahi Tefito ʻi he Hisitōlia ʻo e Siasí

“Angatuʻu ʻi he Siasí”

Angatuʻu ʻi he Siasí

Ne feilaulau lahi e fuofua Kāingalotu ʻo e Siasí ke nau fakatahataha ʻo fokotuʻu ha sosaieti ʻo fakatefito ʻi he Saione ʻa ʻĪnoké, ʻa ia ko e kakaí ne nau “loto-taha mo fakakaukau taha.”1 ‘I ha fakahā kimuʻa ne ʻoanga kia Siosefa Sāmita, ne fakahaaʻi ai ʻe he ‘Eikí ki he kāingalotú, “Kapau ʻoku ‘ikai te mou taha, ʻoku ‘ikai ʻaʻaku ‘a kimoutolu.”2 Ne faʻa kumi ʻe he kāingalotu ʻo e Siasí he kuonga muʻá he taimi lahi ha ngaahi founga ke fakahaaʻi ʻi he uouangataha ha ngaahi fakakaukau kehekehe, kae kei tauhi pē ʻenau uouangatahá neongo kapau ne ʻikai ke nau tui tatau ki ha palopalema fakasōsiale pe fakatokāteline. Ka neongo iá, ne ʻi ai ha taiami ʻe niʻihi ne ʻi ai ha niʻihi fakafoʻituitui pe kulupu ʻi loto ʻi he Siasí ne nau angatuʻu, ʻo nau fakafepaki ai kia Siosefa Sāmita pe kau taki kehé. Taimi lahi ʻi he hoko e ngaahi meʻa ko ʻení, ne fili ai ha tokolahi ʻo e kau angatuʻú ke nau mavahe mei he Kāingalotú. Ko e niʻihi, ne nau muimui ki he tukufakaholo faka-Palotisani ʻo hono fokotuʻu ha siasi pe haʻofanga lotu kehe ʻoku fakahaaʻi lelei ange ai e ngaahi meʻa ʻoku nau tui ki aí. ʻI he taimi ʻe niʻihi, naʻe faʻa tuʻusi ʻe he ngaahi fakataha alēlea ʻa e Siasí e kau angatuʻú koeʻuhí ko ʻenau fakafepaki ki he Siasí.3

Mahalo ko e taimi ne lahi taha ai ʻa e angatuʻú ʻi he kamata ʻa e Siasí ne hoko ia lolotonga e tō lalo fakaʻekonōmika ʻi Ketilani he 1837. ʻI he taimi ne ui ai ʻe he niʻihi ne nau fokotuʻu ʻa e Sōsaieti Malu ʻo Ketilaní (ko ha kautaha pangikē ne poupouʻi ʻe Siosefa Sāmita) ko ha kulupu ʻo ha kau mēmipa ʻiloa he Siasí, ke fetongi ʻa Siosefa Sāmita mei heʻene hoko ko e taki ʻo e Siasí, ne iku ai ʻo nau fokotuʻu honau siasi makehe pē ʻonautolu. ʻI he māvahevahe fakamamahi ne hokó, ne aʻu ai ki ha pēseti ʻe 10 ki he 15  ʻo e kau mēmipa ʻi Ketilani ne nau mavahe mei he Siasí. Ne kau heni ha kau mēmipa ʻo e Kōlomu ʻo e Toko Hongofulu Mā Uá mo ha niʻihi ʻo e kau fakamoʻoni ki he Tohi ʻa Molomoná.4 Naʻe vahevahe ‘e Kalolaine Paane Kolosipei ʻene mamahi ʻi heʻene vakai ki ha niʻihi ʻo hono ngaahi kaungāmeʻá ʻoku nau mavahe mei heʻenau tuí: naʻā ne tohi ʻo pehé “Naʻe kau ha tokolahi ʻo kinautolu ne mau feohi vāofi tahá ʻi he niʻihi ne hē mei he moʻoní.” “Ne mau maʻu fakataha ha ngaahi akonaki lelei, mo fononga fiefia ki he fale ʻo e ʻOtuá ko ha ngaahi kaungāmeʻa. … Ne u ongoʻi loto-mamahi, ka naʻe teʻeki ha taimi ke u fakakaukau ai ke mavahe mei he Siasí, pe siʻaki e palōfitá.”5

ʻOku ʻi ai maʻu pē ha niʻihi fakafoʻituitui pe kulupu ʻi he hisitōlia ʻo e Siasí ʻoku nau angatuʻu. ‘Oku kau ‘i he ngaahi sīpingá ‘a e taʻefiemālie pea mo hono tuʻusi ʻo ha kau taki mahuʻinga mei he Siasí ‘i Mīsuli ʻi he 1838 pea mo ha mēmipa ‘o e kau Palesitenisī ʻUluakí ‘i Nāvū, ‘Ilinoisi he 1844.6 Hili ha ngaahi taimi mei ai, ne laka ki muʻa e ngāue ʻa e ʻEikí neongo e ngaahi fili ʻa e niʻihi ne taʻeloto mo fakafepaki ki he Siasí. Naʻa mo e ʻosi ʻa e ngaahi fakafepaki ʻi ʻOhiō, Misulí, ne teuteuʻi ʻe he ʻEikí ha kāingalotu kehe ʻo e Siasí ke nau ngāue ʻi he tuʻunga ʻo kinautolu ne mavahe mei he siasí. Ko e meʻa fakamamahí, naʻe motuhi ʻe he tokolahi ʻo e kau angatuʻú honau vā fetuʻutaki pea mo e Siasí. Naʻe ‘alu pē taimí, ne foki mai ha tokolahi ʻo mālohi kakato ʻi he Siasí.7

ʻOku ʻikai iku e taʻefemahinoʻaki kotoa pē ki he angatuʻu. Ko hono moʻoní, ʻoku faʻa hoko hono fakahaaʻi mahino e ngaahi fakakaukaú, kae tautautefito ʻi he ngaahi fakataha alēleá, ko ha teuteu ki hano maʻu ʻo ha fakahā. Hangē ko ʻení, naʻe haʻisia e kau mēmipa ʻo e Fakataha Alēlea ʻo e Toko Nimangofulú, ko ha kulupu ne fokotuʻu ʻe Siosefa Sāmita ʻi Nāvū, ke nau fakatou fakahaaʻi ʻenau ngaahi fakakaukaú ʻi he taimi ʻoku fokotuʻu ai ha palani pea ke nau ngāue ʻi he uouangataha ʻi heʻenau feinga ke aʻusia ha tuʻutuʻuní. Naʻe akoʻi ʻe Siosefa Sāmita e kau mēmipa ʻi he fakataha alēleá ko e ʻuhinga ʻe taha ʻoku ʻikai ke faʻa lavaʻi ai ʻe he ngaahi kulupú ʻenau taumuʻa ngāué, “koeʻuhí ko e ʻikai ke nau faʻa fakaʻaongaʻi ha taimi feʻunga ke nau fakaʻikaiʻi pea mo fakamavahevaheʻi ai ʻa e meʻa ʻoku mahuʻingá pea mei he meʻa ʻoku ʻikai mahuʻingá ʻi he taimi ʻoku nau fakahoko ai ha fakatotolo.”8

ʻOku ʻi ai ha ngaahi tūkunga ʻe niʻihi, tautefito ki he taimi ne tau ai e Māmongá mo Mīsuli ʻi he 1838, naʻe fakahoko ʻe he kau taki ʻo e Siasí mo e kau mēmipá ha fakatokanga mālohi pe fakailifiaʻi e kau angatuʻú. Hili iá, ne ʻoatu ha tohi meia Siosefa Sāmita ʻo naʻinaʻi ki he Kāingalotu tui faivelengá ke nau feinga ʻi he kahaʻú ke tokoniʻi honau ngaahi kaungāmeʻa kuo nau hē atú ʻo “ngata pē ʻi he feifeingaʻi, ʻi he faʻa kātaki fuoloa, ʻi he angavaivai mo e angamalū, pea mo e ʻofa taʻemālualoi.”9 Ne tapou kimuí ni mai ʻa Palesiteni Tieta F. ʻUkitofa ki he kāingalotu ‘o e Siasí ke nau fakaʻapaʻapaʻi ʻa e ngaahi fili ‘a kinautolu ʻoku nau mavahe mei he Siasí lolotonga ʻenau tengihia ʻi heʻenau mavahé: “Mahalo ʻe mamahi hotau lotó ʻi heʻenau mavahe mei he Siasi ʻoku tau ʻofa aí mo e moʻoni kuo tau maʻú, ka ʻoku tau fakaʻapaʻapaʻi ʻenau totonu ke lotu ki he ʻOtua Māfimafí ʻo fakatatau mo e fakahinohino honau konisēnisí, ʻo tatau pē mo ʻetau totonu ki haʻatautolú.”10

Related Topics: Zion/New Jerusalem, Church Discipline, Other Latter Day Saint Movements, Witnesses of the Book of Mormon, Kirtland Safety Society

Ngaahi Fakamatalá

  1. Mōsese 7:18; vakai foki, “Old Testament Revision 1,” 16, josephsmithpapers.org.

  2. “Revelation, 2 January 1831 [DC 38],” 51, josephsmithpapers.org; punctuation standardized.

  3. Vakai ki he Tefito: Church Discipline.

  4. Milton V. Backman Jr., The Heavens Resound: A History of the Latter-day Saints in Ohio, 1830–1838 (Salt Lake City: Deseret Book, 1983), 328.

  5. Caroline Barnes Crosby, No Place to Call Home: The 1807–1857 Life Writings of Caroline Barnes Crosby, Chronicler of Outlying Mormon Communities, edited by Edward Leo Lyman, Susan Ward Payne, and S. George Ellsworth (Logan: Utah State University Press, 2005), 48.

  6. Naʻe kau heni ‘a William W. Phelps, Oliver Cowdery, David Whitmer, John Whitmer, Thomas B. Marsh, mo Orson Hyde ʻi Misuli mo e tokoni ʻa Siosefa Sāmita, William Law ʻi Nāvū. Vakai, Mark Ashurst-McGee, David W. Grua, Elizabeth Kuehn, Alexander L. Baugh, mo Brenden W. Rensink, eds., Documents, Volume 6: February 1838–August 1839, Vol. 6 of the Documents series of The Joseph Smith Papers, edited by Ronald K. Esplin, Matthew J. Grow, and Matthew C. Godfrey (Salt Lake City: Church Historianʻs Press, 2017), 294–310; “William Law” mo e “Orson Hyde,” josephsmithpapers.org.

  7. ʻOku fakafuofua ne toe foki mai ha vaeua ‘e taha ‘o e kau taki ne kau ʻi he angatuʻu he taʻu 1837–38 ne nau toe foki mai ki he Siasí. Ne kau ʻi he kau taki ‘iloa ne toe foki mai hili ha vahaʻataimi ʻo ʻenau mavahe mei he Siasí ʻi he kuonga muʻá ʻa Paʻale P. Palati, ʻOasoni Haiti, Uiliami W. Felipisi, Feletiliki G. Uiliamisi, Luke Sionisoni, ʻŌliva Kautele, Tōmasi B. Maasi, mo Māteni Hālisi.

  8. “Minutes, Thursday, Apr. 4, 1844,” in Matthew J. Grow, Ronald K. Esplin, Mark Ashurst-McGee, Gerrit J. Dirkmaat, mo Jeffrey D. Mahas, eds., Administrative Records: Council of Fifty, Minutes, March 1844–January 1846, Vol. 1 of the Administrative Records series of The Joseph Smith Papers, edited by Ronald K. Esplin, Matthew J. Grow, and Matthew C. Godfrey (Salt Lake City: Church Historianʻs Press, 2016), 79.

  9. “Letter to Edward Partridge and the Church, circa 22 March 1839,” 3; naʻe fakatonutonu e sipelá. Vakai foki, Tokāteline mo e Ngaahi Fuakava 121:41

  10. Dieter F. Uchtdorf, ”Haʻu, ʻo Kau Mo KimautoluEnsignpe Liahona, Nōvema 2013, 22.