Ngaahi Fakahā ʻa Siosefa Sāmitá

Lolotonga e ngāue fakaepalōfita ʻa Siosefa Sāmitá, naʻá ne maʻu ai ha ngaahi fakahā naʻe laka hake ʻi ha 100 tupú ʻa ia naʻe hiki mo fakatahatahaʻi kimui ange.¹ Ko e konga lahi ʻo iá naʻe fakahoko mai ia ʻi he leʻo tonu ʻo Sīsū Kalaisí, pea ʻoku hā e konga lahi ko iá ʻi he ngaahi vahe ʻo e Tokāteline mo e Ngaahi Fuakavá. Naʻe maʻu ʻe Siosefa e fuofua fakahaá (ʻa ia ʻoku hā he taimí ni ʻi he Tokāteline mo e Ngaahi Fuakava 3) ʻi Siulai 1828 peá ne hiki ʻene fakahā fakamuimui tahá ʻi ha māhina ʻe tolu kimuʻa peá ne mālōlō he 1844.² ʻI he meimei tūkunga kotoa pē, naʻe ʻomi e ngaahi fakahā ko ʻení ko ha tali ki ha lotu, taimi ʻe niʻihi ne ʻomi ia ʻi ha kole ange ʻa ha niʻihi kia Siosefa ke kole ki he ʻEikí ke nau ʻilo Hono finangaló fekauʻaki mo kinautolu, pea ʻi he taimi ʻe niʻihi ne maʻu ia ʻi he fekumi ʻa Siosefa ki ha ngaahi tali ki he ngaahi fehuʻi faka-tokāteline pe fakahinohino ʻi he ngaahi tuʻutuʻuni mo hono puleʻi ʻo e Siasí. Naʻe hanga ʻe he kāingalotu kimuʻá ʻo fakafaikehekeheʻi e ngaahi fakahā ʻa Siosefá mei heʻene ngaahi tohí ʻi heʻenau ui kinautolu ko e “ngaahi fakahaá,” “ngaahi fekaú” pe “ngaahi fuakavá.”³ Naʻe ʻikai fakakau ha konga lahi ʻo e ngaahi fakahā ko ʻení ʻi he folofola ʻa e Siasí pe paaki he kei moʻui ʻa Siosefá. ʻOku maʻu ia ʻi he ʻahó ni ʻi he The Joseph Smith Papers.⁴

Makehe mei he ngaahi fakahā totonu ko ʻení, naʻe toe fai foki ʻe Siosefa Sāmita ha ngaahi fakamatala ʻo ha ngaahi meʻa-hā-mai, faʻu ha ngaahi lotu mo ha ngaahi malanga ne ueʻi fakalaumālie, mo liliu e Tohi ʻa Molomoná mo e tohi ʻa ʻEpalahamé pea fakakakato hono “liliu” foʻou e Tohi Tapú ʻo fakafou ʻi he fakahā.⁵

Naʻe ʻomi ha konga lahi ʻo e ngaahi fakahā kia Siosefa Sāmita kuo fakatahatahaʻí ʻi he vahaʻa ʻo e 1828 ki he 1835, ʻi he taimi naʻe fokotuʻu ai e ngaahi faʻunga ʻo e Siasí. Naʻe tali ʻe he ngaahi fakahā ko ʻení ha ngaahi fehuʻi vivili pea fokotuʻu e fakavaʻe ki hono puleʻi ʻo e Siasí. Hili iá, naʻe maʻu e Siosefa mo ha ngaahi fakahā ki he founga fua fatongia ʻoku fie maʻu ki he kau ʻōfisa, ngaahi fakataha alēlea mo e ngaahi kōlomu ʻo e Siasí ʻo fakatatau mo e ngaahi fakahā kuo maʻú mo toe fekumi ki ha ngaahi fakahā ʻi honau lakangá pē fatongiá.

Naʻe fakamatala ha taha ʻo e kau sikalaipe ʻa Siosefa Sāmitá, ʻa Uiliami Makelēlini, ki he founga naʻe hiki ai e ngaahi fakahaá: “Naʻe tangutu e sikalaipé ʻi he tafaʻaki ʻo ha tesi pe tēpile, mo ha peni, vaitohi mo ha pepa. Naʻe mahino e kaveinga ke fakafehuʻí, pea fehuʻi leva e Palōfitá mo e Tangata Kikité ki he ʻOtuá. Naʻá ne mamata, fanongo mo ongoʻi fakalaumālie, peá ne lea leva ʻo fakatatau mo hono ueʻi ia ʻe he Laumālie Māʻoniʻoní. Naʻe kamata leva e tala-kae-tohi ʻa Siosefa Sāmitá, ʻo tali ki he tangata tohí ke “hiki pea lau leʻolahi ʻa e setesi takitaha” kae ʻoua kuo fakaʻilongaʻi ʻe Siosefa kuo ʻosi ʻa e fakahaá ʻaki ʻene pehē “ʻEmeni.”⁶ Naʻe pehē ʻe Paʻale P. Pālati, ʻa ia naʻe sio tonu hono hiki ʻo e ngaahi fakahaá, “naʻe ʻikai pē toe ʻi ai ha momou, toe vakaiʻi, pe ʻe toe lau foʻou ia, ke fakapapauʻi e kaveingá.”⁷ Fakatatau ki hono ngaahi hisitōliá, naʻe ngāue ʻaki ʻe Siosefa ʻa e ʻŪlimí mo e Tūmemí ki hono maʻu ʻo e ngaahi fuofua fakahaá, ka naʻe hā mahino naʻe ʻikai ke ne toe fie maʻu ha faʻahinga tokoni pehē ki hono maʻu e ngaahi fakahaá hili e Sune ʻo e 1829.⁸

Ngaahi Maʻuʻanga Tokoni ʻa e Siasí

“Siosefa Sāmita ko e Tangata Kikite mo e Tangata Liliu Lea,” josephsmithpapers.org.

Matthew McBride mo James Goldberg, eds., Revelations in Context: The Stories behind the Sections of the Doctrine and Covenants (Salt Lake City: The Church of Jesus Christ of Latter-day Saints, 2016).

Ngaahi Fakamatalá

ʻOku ʻoatu ʻe he ngaahi pulusinga ko ʻení ha fakamatala lahi ange fekauʻaki mo e tefito ko ʻení. ʻI hono tuku atu pe fakafehokotaki kimoutolu ki he maʻuʻanga tokoni ko ʻení, ʻoku ʻikai ke mau poupouʻi pe fakapapauʻi atu e kanotohí pe ngaahi fakakaukau ʻa e kau faʻu tohí.

Robert J. Woodford, “Discoveries from the Joseph Smith Papers Project: The Early Manuscripts,” ʻi he Andrew H. Hedges, J. Spencer Fluhman, mo Alonzo A. Gaskill, eds., The Doctrine and Covenants: Revelations in Context (Provo, Utah: Religious Studies Center, Brigham Young University, 2008), 23–39.

Steven C. Harper, “‘That They Might Come to Understanding’: Revelation as Process,” ʻi he Scott C. Esplin, Richard O. Cowan, mo Rachel Cope, eds., You Shall Have My Word: Exploring the Text of the Doctrine and Covenants, (Provo, Utah: Religious Studies Center, Brigham Young University, 2012), 19–33.

Alexander L. Baugh, “Parting the Veil: Joseph Smith’s Seventy-six Documented Visionary Experiences,” ʻi he John W. Welch, ed., Opening the Heavens: Accounts of Divine Manifestations, 1820–1844 (Provo, Utah: Brigham Young University Press, 2005), 265–326.

Maʻuʻanga Fakamatalá

1. Fakafehoanaki ʻa e “Corresponding Section Numbers in Editions of the Doctrine and Covenants,” josephsmithpapers.org mo e “Revelations and Translations,” josephsmithpapers.org. Vakai foki ki he “Joseph Smith as Revelator and Translator,” josephsmithpapers.org.

2. “Revelation, July 1828 [DC 3],” ʻi he Revelation Book 1, 1–2, josephsmithpapers.org; “Revelation, 14 Māʻasi 1844,” ʻi he Matthew J. Grow, Ronald K. Esplin, Mark Ashurst-McGee, Gerrit J. Dirkmaat, mo Jeffrey D. Mahas, eds., Administrative Records, Council of Fifty, Minutes, March 1844–January 1846, vol. 1 of the Administrative Records series of The Joseph Smith Papers, ed. Ronald K. Esplin, Matthew J. Grow, mo Matthew C. Godfrey (Salt Lake City: Church Historian’s Press, 2016), 48.

3. Vakai ki he tefito ʻoku fekauʻaki mo e “Tohi ʻo e Ngaahi Fekaú.”

4. Hangē ko ʻení, vakai ki he “Revelation, circa Early 1830,” ʻi he Revelation Book 1, 30–31, josephsmithpapers.org; “Revelation, 15 Mē 1831,” ʻi he Revelation Book 1, 85, josephsmithpapers.org; “Revelation, 20 Māʻasi 1832,” ʻi he Revelation Book 1, 148, josephsmithpapers.org; “Revelation, 28{112}ʻEpeleli 1834 ,” ʻi he Revelation Book 1, 198, josephsmithpapers.org.

5. ʻI he ngaahi meʻa-hā-mai ʻa Siosefa Sāmita kuo tānakí, vakai, Alexander L. Baugh, “Parting the Veil: Joseph Smith’s Seventy-six Documented Visionary Experiences,” ʻi he John W. Welch, ed., Opening the Heavens: Accounts of Divine Manifestations, 1820–1844 (Provo, Utah: Brigham Young University Press, 2005), 265–326. ʻI ha fakataha ʻe ua, naʻe hiki ai ʻe Siosefa Sāmitá ha lotu ʻo fakafou ʻi he fakahā ueʻi fakalaumālie (vakai, “Revelation, 30{122}ʻOkatopa 1831 [DC  65],” ʻi he Revelation Book 1, 112, josephsmithpapers.org; “Prayer of Dedication, 27 Māʻasi 1836 [DC 109],” josephsmithpapers.org). ʻI he ngaahi liliu lea ueʻi fakalaumālie ʻa Siosefa Sāmitá, vakai ki he ngaahi kevainga ʻoku fekauʻaki mo iá ʻi he “Joseph Smith Translation of the Bible,” “Book of Mormon Translation,” mo e “Book of Abraham Translation.” Naʻe liliu foki ʻe Siosefa Sāmitá ʻa fakamatala naʻe hiki ʻi ha kiliʻi manu ʻa e ākonga ko Sioné ʻa ia naʻe mole (vakai, “Account of John, April 1829–C [DC 7],” ʻi he Revelation Book 1, 13–14, josephsmithpapers.org).

6. Uiliami E. Makalēlini, “Revelations,” Ensign of Liberty, vol. 1, no. 7 (ʻAokosi 1849), 98.

7. Paʻale P. Pālati, ʻOku hanga ʻe he Piokalafi ʻa Paʻale Paʻake Palatí, ko ha taha ʻo e Kau ʻAposetolo ʻe Toko Hongofulu Mā Ua ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní, ʻo Fakamatalaʻi ʻEne Moʻuí, Ngāue Fakafaifekaú mo e Fefonongaʻakí, ʻaki ha ngaahi Fakamoʻoni, ʻi he Lea mo e Tohi, mei Heʻene Ngaahi Tohi kuo Fakatahatahaʻí, ed. Paʻale P. Pātali ko e siʻi. (New York: Russell Brothers, 1874), 66.

8. Vakai ki he Joseph Smith, “History, 1838–1856, volume A-1 [23 Tīsema 1805–30 ʻAokosi 1834],” 10, 13, 15, 19, 22, 23, josephsmithpapers.org.