Seksiyon 134
Usa ka pamahayag bahin sa gituohan mahitungod sa mga gobyerno ug sa mga balaod sa kinatibuk-an, gidawat sa kadaghanan atol sa kinatibuk-ang katigoman sa Simbahan nga gipahigayon sa Kirtland, Ohio, Agosto 17, 1835. Daghang Santos ang nagpundok aron ikonsiderar ang gisugyot nga mga hilisgotan sulod sa unang edisyon sa Doktrina ug mga Pakigsaad. Nianang panahona kini nga pamahayag gihatagan sa mosunod nga pasiuna: “Nga ang among gituohan kalabot sa yutan-ong mga gobyerno ug mga balaod sa kinatibuk-an unta dili lainon sa pagsabot o masaypan sa pagsabot, naghunahuna kami nga angay ipahayag, sa kataposan niini nga basahon, ang among opinyon mahitungod sa sama nga butang.”
1–4, Ang mga gobyerno kinahanglang mopatunhay sa kagawasan sa tanlag ug pagsimba; 5–8, Ang tanang tawo kinahanglang mosuporta sa ilang mga gobyerno ug motahod ug motamod sa balaod; 9–10, Ang relihiyoso nga mga kapunongan kinahanglang dili mogamit sa sibil nga mga gahom; 11–12, Ang mga tawo gihatagan og kaangayan sa pagpanalipod sa ilang kaugalingon ug sa ilang kabtangan.
1 Nagatuo kami nga ang mga gobyerno gitukod sa Dios alang sa kaayohan sa tawo; ug gihatagan niya ang mga tawo og tulubagon sa ilang mga binuhatan kalabot niini, sa paghimo og mga balaod ug sa pagdumala niini, alang sa kaayohan ug kaluwasan sa katilingban.
2 Nagatuo kami nga walay gobyerno nga molungtad sa kalinaw, gawas kon kana nga mga balaod gitukod ug gipatuman nga walay paglapas ingon man mopanalipod sa matag indibidwal sa gawasnon nga paggamit sa tanlag, sa katungod ug pagkontrol sa kabtangan, ug pagpanalipod sa kinabuhi.
3 Nagatuo kami nga ang tanang gobyerno angay gayod nga mosugo sa sibil nga mga opisyal ug mga maghuhukom sa pagpatuman sa maong mga balaod; ug nga sa ingon ang pagdumala sa balaod diha sa katarong ug kaangayan kinahanglang tinguhaon ug suportahan pinaagi sa tingog sa katawhan kon usa kini ka republika, o sa kabubut-on sa labaw nga kamandoan.
4 Nagatuo kami nga ang relihiyon gitukod sa Dios; ug ang tawo adunay kapangakohan ngadto kaniya, ug ngadto kaniya lamang, sa paggamit niini, gawas kon ang ilang relihiyoso nga mga opinyon moaghat nila sa paglapas sa mga katungod ug mga kalingkawasan sa uban; apan dili kami motuo nga ang balaod sa tawo adunay katungod sa pagpanghilabot sa paghimo og mga lagda sa pagsimba aron pugngan ang mga tanlag sa mga tawo, ni momando og mga paagi alang sa kadaghanan o kinaugalingon nga paghalad; nga ang sibil nga maghuhukom kinahanglang mopugong sa krimen, apan dili gayod mokontrol sa tanlag; kinahanglang mosilot sa sala, apan dili gayod mopugong sa kagawasan sa kalag.
5 Nagatuo kami nga ang tanang tawo kinahanglang mopaluyo ug mosuporta sa kaugalingong mga gobyerno diin sila nagpuyo, samtang gipanalipdan sa ilang kinaiyanhon ug dili mailog nga mga katungod pinaagi sa mga balaod niana nga mga gobyerno; ug nga ang pagsupak ug pagsupil dili angay sa matag lumulupyo sa ingon niana gipanalipdan, ug kinahanglang silotan sumala niana; ug nga ang tanang gobyerno adunay katungod sa paghimo nianang mga balaod sumala sa ilang kaugalingong mga paghukom nga gihunahuna nga labing maayo aron mapanalipdan ang tinguha sa kadaghanan; sa samang higayon, hinuon, nagtamod sa kasagrado sa kagawasan sa tanlag.
6 Nagatuo kami nga ang matag tawo kinahanglang tahoron sa iyang kahimtang, ingon nga mga magmamando ug mga maghuhukom, nga gibutang aron sa pagpanalipod sa walay sala ug sa pagsilot sa may sala; ug ngadto sa mga balaod ang tanang tawo kinahanglang motahod ug motamod, kay kon wala kini ang kalinaw ug panag-uyon mapulihan sa kagubot ug kahadlok; ang tawhanong mga balaod nga gitukod sa klaro nga katuyoan sa paghan-ay sa atong mga tinguha isip mga indibidwal ug mga nasod, tali sa usa ka tawo ngadto sa usa ka tawo; ug ang balaanong mga balaod nga gihatag sa langit, nagtudlo og mga lagda nga may kalabotan sa espirituhanong mga butang, alang sa pagtuo ug pagsimba, parehong pagatubagon sa tawo ngadto sa Iyang Magbubuhat.
7 Nagatuo kami nga ang mga magmamando, mga nasod, ug mga gobyerno adunay katungod, ug kinahanglang mohimo og mga balaod aron mapanalipdan ang tanang lumulupyo sa gawasnong paggamit sa ilang relihiyoso nga pagtuo; apan dili kami motuo nga sila adunay katungod sumala sa kaangayan nga mohikaw sa mga lumulupyo niini nga kahigayonan, o sa pagdili kanila sa ilang mga opinyon, basta ang pagtamod ug pagtahod sa balaod gipakita ug kana nga relihiyosong mga opinyon dili himoon nga katarongan sa pagsukol ni sa panagkunsabo.
8 Nagatuo kami nga ang paghimo og krimen kinahanglang silotan sumala sa matang sa sala; nga ang pagpatay, pagbudhi, pagpanulis, pagpangawat, ug pagguba sa kinatibuk-ang kalinaw, sa tanang paagi, kinahanglang silotan sumala sa gibug-aton sa ilang sala ug sa ilang kalagmitan nga mohimo og daotan taliwala sa mga tawo, pinaagi sa mga balaod niana nga gobyerno diin ang sala gibuhat; ug alang sa kalinaw ug panagdait sa kadaghanan ang tanang tawo kinahanglang mangusog ug mogamit sa ilang abilidad sa pagsilot sa mga makasasala nga mibatok sa maayong mga balaod.
9 Dili kami motuo nga makiangayong itipon ang relihiyoso nga impluwensya sa sibil nga gobyerno, diin ang usa ka relihiyoso nga kapunongan atimanon ug ang lain did-an sa espirituhanong mga kahigayonan niini, ug ang tagsa-tagsa nga mga katungod sa mga sakop niini, isip mga lumulupyo, ihikaw.
10 Nagatuo kami nga ang tanang relihiyoso nga kapunongan adunay katungod sa pagbadlong sa ilang mga sakop tungod sa dili maayong pamatasan, sumala sa mga lagda ug mga balaod niana nga mga kapunongan; kon kana nga mga pagbadlong gihimo alang sa panagdait ug maayo nga kadungganan; apan dili kami motuo nga ang bisan unsa nga relihiyoso nga kapunongan adunay awtoridad sa paghusay sa mga tawo bahin sa katungod sa katigayonan o sa kinabuhi, sa pagkuha gikan nila niining kalibotanong mga kabtangan, o sa pagbutang nila sa kakuyaw sa kinabuhi man o ubang bahin sa lawas, o sa pagpahamtang nila og bisan unsang pisikal nga silot. Makahimo lamang kini sa pagpahimulag nila gikan sa kapunongan, ug sa pagtangtang nila gikan sa ilang panagdait.
11 Nagatuo kami nga ang mga tawo kinahanglang mosang-at ngadto sa sibil nga balaod alang sa pagtul-id sa tanang kasaypanan ug mga pasipala, diin ang personal nga pag-abuso gipahamtang o ang katungod sa kabtangan o pagkatawo gilapas, diin adunay ingon nga mga balaod nga mopanalipod niana; apan nagatuo kami nga ang tanang tawo adunay katungod sa pagpanalipod sa ilang kaugalingon, sa ilang mga higala, ug mga kabtangan, ug sa gobyerno, gikan sa supak sa balaod nga mga pagsulong ug mga paglapas sa tanang tawo sa mga panahon sa panginahanglan, diin ang dinalian nga paghangyo og kahupay dili mahimo sa mga balaod, ug ang tabang dili mahatag.
12 Nagatuo kami nga makiangayon nga isangyaw ang ebanghelyo ngadto sa mga nasod sa yuta, ug pasidan-an ang mga matarong sa pagluwas sa ilang kaugalingon gikan sa kadaotan sa kalibotan; apan kami dili motuo nga matarong ang pagpanghilabot sa mga ulipon, ni mosangyaw sa ebanghelyo, ni mobunyag kanila nga supak sa kabubut-on ug tinguha sa ilang mga agalon, ni manghilabot o moimpluwensya kanila bisan sa labing gamay nga paagi aron dili sila makontento sa ilang mga kahimtang dinhi niini nga kinabuhi, nga pinaagi niana mabutang sa peligro ang mga kinabuhi sa mga tawo; nagatuo kami nga kana nga pagpanghilabot supak sa balaod ug dili makiangayon, ug makadaot sa kalinaw sa matag gobyerno nga nagtugot sa mga tawo nga magpabilin diha sa pagkaulipon.