1 N̄aa-ntị, O unu ndị nke nzukọ nsọ m, ka Onye-nwe Chineke unu kwuru, na nụrụ nụ okwu nke Onye-nwe gbasara unu.

2 Onye-nwe, onye nke ga-abịa na temple ya; na mberede, Onye-nwe, onye nke ga-agbadata n’elu ụwa jiri ịbụ ọnụ na ikpe-ikpe, e, n’elu mba nile na-echefu Chineke, na n’elu isi ndị nile na-amaghị Chineke n’etiti unu.

3 N’ihi na ọ ga-agbawa ogwe aka ya ọtọ n’anya nile nke mba nile, na nsọtụ nile nke ụwa ga-ahụ nzọpụta nke Chineke ha.

4 Ya mere, kwadobe nụ, kwadobe nụ, O ndị nke m, sachaanụ onwe unu nile, gbakọtaanụ ọnụ, O unu ndị nke nzukọ nsọ m, n’elu ala nke Zaịọn, unu nile ndị na-enyeghị iwu ka unu chere.

5 Si nụ na Babịlọn pụọ. Dị nụ ọcha bụ ndị na-ebu ngwa-ọrụ nile nke Onye-nwe.

6 Kpọọ ọgbakọ ofufe ime mụọ unu nile, na kwuo nụ okwu ugboro ugboro otu onye nye onye ọzọ. Na ka nwoko ọbụla kpọkuo aha nke Onye-nwe.

7 E, n’ezie asị m unu ọzọ, oge ahụ abịawo mgbe olu-okwu nke Onye-nwe na-adara unu: Sinu na Babịlọn pụọ, gbakọta nụ site n’etiti mba nile, site n’ifufe anọ nile, site n’otu ngwụcha nke elu-igwe ruo na nke ọzọ.

8 Zipụ ndị okenye nke nzukọ nsọ m nye mba nile, bụ ndị nọ n’ebe dị anya; nye ala nile mmiri gbara gburu gburu, ziga nye ala ndị ọzọ nile, kpọkuo mba nile, nke mbụ nye ndị Jentaịlụ nile, na mgbe ahụ ndị Juu nile.

9 Na lee, na hụ, nke a ga-abụ iti mkpu ha, na olu-okwu nke Onye-nwe nye mmadụ nile: Gaa nụ baa n’ime ala nke Zaịọn, ka oke ala ndị m buwanye ibu, na ka stek ya nile nwee agbam-ume, na ka Zaịọn wee gaa n’iru baa n’ime mpaghara nile dị gburu gburu.

10 E, ka iti mkpu ahụ gaa n’iru n’etiti madụ nile: Teta na bilie na gaa n’iru izute Onye ahụ na-alụ nwunye ọhụrụ; lee na hụ, Onye na-alụ nwunye ọhụrụ na-abia; pụọ nụ gaa zute ya. Kwadobe onwe unu nile maka oke ụbọchị nke Onye-nwe.

11 Ya mere, chee nu nche, n’ihi na unu amataghị ụbọchị ahụ ma-ọbụ oge awa ahụ.

12 Ya mere, ka ha-ra, bụ ndị nọ n’etiti ndị Jentaịlụ nile gbaba na Zaịọn.

13 Na ka ha ra bụ ndị Juda gbaba na Jerusalem, n’ugwụ nile nke ụlọ nke Onye-nwe.

14 Pụọ nụ site n’etiti mba nile, ọbụladị site na Babịlọn, site n’etiti ajọọ omume nke bụ Babịlọn nke mụọ.

15 Mana n’ezie, otu a ka Onye-nwe kwuru, ka mgbapụ unu ghara ịdị ọsọ ọsọ, mana ka a kwado ihe nile n’iru unu, na onye na-aga, ya elekwala anya n’azụ, ka mbibi mberede ghara ịdakwasị ya.

16 N̄aa ntị na nụrụ, O unu ndị bi n’elu ụwa. Gekọtaa nụ ntị ọnụ unu ndị okenye nile nke nzukọ nsọ m, na nụrụ nụ olu okwu nke Onye-nwe; n’ihi na ọ na-akpọ madụ nile oku, ọ na enyekwa madụ nile ịwu n’ebe nile ka ha chegharịa.

17 N’ihi lee, Onye-nwe Chineke ezipụwori mụọ-ozi ahụ na-eti mkpu n’etiti nke elu-igwe, na-asị: Kwado nụ ụzọ nke Onye-nwe, na mee ka okporo ụzọ ya dị warawara, n’ihi na oge awa ahụ nke ọbịbịa ya adịwo nso—

18 Mgbe Nwa-atụrụ ahụ ga-eguzo, n’elu Ugwụ Zaịọn, ya na otu narị puku na iri puku anọ na anọ, bụ ndị e deworo aha nke Nna ya n’egedege iru ha nile.

19 Ya mere, kwado nụ maka ọbịbịa nke Onye na-alụ nwunye ọhụrụ; gaa nụ, gaa nụ n’ezi i zute ya.

20 N’ihi lee, ọ ga-eguzo n’elu ugwụ Olivet, na n’elu nnukwu oke osimiri, ọbụna ebe miri oke emi, na n’elu ala nile mmiri gbara gburu gburu, na n’elu ala nke Zaịọn.

21 Na ọ ga-ekwupụta olu okwu ya site n’ime Zaịọn, na ọ ga-ekwu okwu site na Jerusalem, a ga-anụkwa olu okwu ya n’etiti ndị nile;

22 Ọ ga-abụkwa olu okwu dika olu okwụ nke ọtụtụ mmiri nile, dika kwa olu okwu nke oke egbe elu-igwe, nke ga-akwatu ugwu ukwu nile, na ndagwurugwụ nile ka na-agaghị achọta.

23 Ọ ga-enye ebe miri oke emi iwu, ma e wee chụghachi kwa ya azụ n’obodo nile nke elu elu, na ala nile mmiri gbara gburu-gburu ga-aghọ otu ala;

24 Na ala nke Jerusalem na ala nke Zaịọn ka a ga-eweghachi azụ bịa n’ime ọnọdụ nke ha, na elu ụwa ga-adị dịka ọ dịworo n’ụbọchị nile tutu e kewaa ya.

25 Na Onye-nwe, ọbụna Onye nzọpụta ga-eguzo n’etiti ndị nke ya, na o ga-achị eze nye anụ arụ nile.

26 Na ka ha ra bụ ndị nọ n’obodo nke elu elu nile ga-abịa na ncheta n’iru nke Onye-nwe, na ndị amụma ha nile ga-anụ olu okwu ya, na ha a gaghị kwa akwụsị onwe ha, ha ga-emekpa kwa nkume nile arụ, na mmiri jụrụ oyi ga-eruda n’iru ha.

27 A ga ewu kwa okporo ụzọ n’ime etiti ebe ahụ miri oke emi.

28 Ndị iro ha ga-abụrụ ha anụ mgburi.

29 Na n’ime ọzara nile nke na-enweghi ike ịmịta mkpụrụ, ebe ahụ ka ọdọ mmiri nile nke ndụ ga-esi pụta, na ala ahụ nke kpọrọ nkụ a gaghị abụ kwa ala nwere agụụ mmiri.

30 Na ha ga-eweta ụba akụ ha nile nye n’aka ụmụ Ifrem, ndị odibo m nile.

31 Na oke ala nile nke ugwụ nile nke mgbe nile na-adigide ga-ama jijiji n’iru ha.

32 N’ebe ahụ kwa ka ha ga-ada n’ala, e wee kpube ha okpu eze ebube, ọbụladị n’ime Zaịọn, site n’aka nile nke ndị odibo nke Onye-nwe, ọbụna ụmụ nke Ifrem.

33 Na ha ga-ejupụtakwa n’abụ nile nke ọn̄ụ mgbe nile na-adigide.

34 Lee, nke a bụ ngọzi ahụ nke Chineke mgbe nile na-adigide n’elu agbụrụ nile nke Israel, na ngọzi nke kacha n’ụba n’elu isi nke Ifrem na ndị ibe ya nile.

35 Na ha onwe ha kwa nke agbụrụ Juda, mgbe ahụ mgbu ha gafere, a ga-asacha ha n’ime ịdị nsọ n’iru Onye-nwe, ibi n’iru ya ehihie na abalị, ruo mgbe nile na mgbe nile.

36 Na ugbụ a, n’ezie ka Onye-nwe kwuru, ka-amata ihe ndị a n’etiti unu, O ndị nile bi n’elu ụwa, ezipuwo m ri mụọ-ozi nke m ka ọ na-efe n’etiti elu-igwe, na-enwe ozi-ọma mgbe nile na-adigide, onye gosiworo onwe ya nye ụfọdụ, o nyefewo kwa ya n’aka mmadụ, onye ga-egosikwa onwe ya nye ọtụtụ ndị bi n’elu ụwa.

37 Na ozi-ọma nke a ka a ga-ezisa nye mba nile, na ebo nile, na asụsụ nile, na ndị nile.

38 Na ndị odibo nile nke Chineke ga-aga n’iru, na-asị n’oke olu okwu: Tụọ nụ Chineke egwu na nye ya otuto, n’ihi n’oge awa nke ikpe ya abiawo;

39 Kpọọ kwa nụ isi ala nye ya bụ onye kere elu-igwe, na ala na oke osimiri, na isi iyi nile nke mmiri nile—

40 Na-akpọku aha nke Onye-nwe, ehihie na abali, na-asị: O asị na ị ga-adọwa elu-igwe nile ka i wee rịdata, asi na ugwụ ukwu nile ga-eruda dika mmiri n’iru gị.

41 Na a ga-aza ya n’isi ha nile; n’ihi na iru nke Onye-nwe ga-adị ka ọkụ na-agbaze ihe nke na-ere, na dịka ọkụ na-eme ka mmiri nile sụọ.

42 O Onye-nwe, ị ga-aridata ime ka aha gị pụta ìhè nye ndị iro gị, na mba nile ga-amakwa jijiji n’iru gị—

43 Mgbe i mere ihe nile di egwu, ihe nile ha na-eleghị anya ha;

44 E, mgbe i rịdatara, na ugwu ukwu nile esi n’iru gị ruda dịka mmiri, ị ga-ezute onye ahụ nke na-an̄ụrị ọnụ ma na-arụkwa ọrụ ezi omume, onye nke na-echeta kwa gị n’ime ụzọ gị nile.

45 N’ihi site na mbido nke ụwa, mmadụ anụghị, ha anụtaghị kwa na ntị, ma-ọbụ anya ọbụla ahụghi kwa, O Chineke, ewezuga gị, ka ihe nile sị dị ukwuu nke i kwadoworo nye onye nke na-echere gị.

46 Na a ga-ekwu sị: Onye bụ nke a na-esi na Chineke nke elu-igwe na-arịdata, yi uwe nsọ e tejiri ọbara-ọbara; e, site na mpaghara nile nke na-amaghị ama, onye na-eyi uwe dị ebube mara nma ya, na-azọ ije na ịba-ụba nke ike ya?

47 Na onye ahụ ga-asị: Abụ m ya onye nke kwuworo okwu n’ezi omume, dị ike ịzọpụta.

48 Onye-nwe ga-adi ọbara ọbara n’uwe ya, na uwe nsọ ya dịka nke onye ahụ nke na-ayọcha mmanya n’ebe ịnara mmanya.

49 Na ọ ga-adị ukwuu bụ ebube nke iru ya, nke mere na anyanwụ ga-ezopụ iru ya n’ihere, na ọnwa ga-ejide ìhè ya, na kpakpando nile ka a ga-atụda site n’ebe nile nke ha.

50 Na a ga-anụ olu okwu ya: azọchawo m ebe ịnara mmanya nanị m, na ewetawo m ikpe megide ndị nile; na ọ dịghị onye ọbula mụ na ya nọ;

51 Na azọpịawo m ha n’oke iwe m, na m zọdara ha na ọnụma m, na ọbara ha ka m fesara n’uwe nsọ m nile, na merụọ uwe oyiyi m nile, n’ihi na nke a bụ ụbọchị ịbọ ọbọ nke dịworị n’ime obi m.

52 Na ugbua afọ nke ndị m agbapụtaworo abịawo, na ha ga-ekwupụta ịhụnanya obi-ọma nke Onye-nwe ha, na-ihe nile o nyeworo n’aka ha dịka ịdị nma ya siri dị, na dịka ịhụnanya obi-ọma ya siri dị ruo mgbe nile na mgbe nile.

53 N’ime mkpagbu nile ha, ya ka-akpagburu. Na mụọ-ozi nke iru ya azọpụtawo ha, na n’ime ịhụnanya ya, na ọmiko ya, ọ gbapụtara ha, na palie ha, na kụrụ ha ụbọchị nile nke mgbe ochie;

54 E, na Inọk kwa, na ndị ahụ bụ ndị nọnyeere ya; ndị amụma nile ndị bu ya ụzọ; na Noa kwa, na ndị ahụ bụ ndị bu ya ụzọ; na Moses kwa, na ndị ahụ bu ndị bu ya ụzọ;

55 Na site na Moses ruo na Elaịja, na site na Elaịja ruo na Jọn, ndị nonyeere Kraịst n’ime mbilite n’ọnwụ ya, na ndị-ozi nile dị nsọ, tinyere Abraham, Aịsak, na Jekọb ga-anọ n’iru nke Nwa-atụrụ ahụ.

56 Na ili nile nke ndị-nsọ ka a ga emeghe; na ha ga-apụta, guzokwa n’aka nri nke Nwa-atụrụ ahụ, mgbe ọ ga-eguzo n’elu Ugwu ukwu Zaịọn, na n’elu obodo ukwu ahụ dị nsọ, Jerusalem Ọhụrụ ahụ; na ha ga-abụ abụ nke Nwa-atụrụ ahụ, ehihie na abalị ruo mgbe nile na mgbe nile.

57 Na n’ihi nke a, ka e mee ka ndị mmadụ keta oke n’ebube nile nke a ga-ekpughe, Onye-nwe ezipuwo uju nke ozi-ọma ya, ọgbụgba-ndụ mgbe nile na-adigide nke ya na-ịtụgharị uche na ịdị mfe nghọta na enweghị mpako.

58 Ka e wee kwadobe ndị na-adịghị ike maka ihe ndị ahụ na-abịa n’elu ụwa, na n’ihi ozi nke Onye-nwe, n’ụbọchị ahụ mgbe ndị na-adịghị ike ga-eme ka ihere mee ndị oke amamihe, na onye dị nta ga-aghọ mba dị ike, na madụ abụọ ga-eme ka puku mmadụ iri ha nile gbalaga.

59 Na site n’ihe nile na-adịghị ike nke ụwa, Onye-nwe ga-azọcha mba nile site n’ike nke Mụọ ya.

60 Na n’ihi nke a ka-enyeworo iwu nsọ nile ndị a; e nyere iwu nsọ ndị a ka-ewezuga ha site n’ụwa n’ụbọchị nke e nyere ha, mana ugbụ a ha ga-aga n’iru nye anụ arụ nile—

61 Na nke a dịka uche na ọchịchọ obi nke Onye-nwe siri dị, onye na-achị eze nye anụ arụ nile.

62 Na nye onye ahụ nke na-echegharị ma na-asacha onwe ya n’iru Onye-nwe ka a ga-enye ndụ ebighi-ebi.

63 Na n’isi ha bụ ndị na-an̄aghị ntị nye olu okwu nke Onye-nwe ka a ga-emezu nke ahụ e dere site n’aka onye-amụma Moses, na-aga ebepụ ha site n’etiti ndị mmadụ.

64 Na kwa nke ahụ e dere site n’aka onye-amụma Malakaị: N’ihi na, lee, ụbọchị ahụ na-abịa nke ga-ere ọkụ ka ite ọkụ, na ndị nfuli-elu nile, e, na ndị nile na-eme ihe mmebi iwu, ga-abụ ahịhịa ọka, na ụbọchị ahụ nke na-abia ga-erechapụ ha, ka Onye-nwe nke usuu nile nke ndị agha kwuru, nke mere na a gaghị ahapụrụ ha, ọbụghị mgbọrọgwụ, na-ọbụghị alaka.

65 Ya mere, nke a ga-abụ ọzịza nke Onye-nwe nye ha.

66 N’ụbọchị ahụ mgbe m bịakwutere ndị nke m, ọ dịghị onye ọbụla n’etiti unu nke nabatara m, ma a chụpụrụ unu n’ezi.

67 Mgbe m kpọrọ oku ọzọ, ọ dịghị onye ọbụla n’ime unu nọ maka ịza; mana aka m adịghị mkpụ mkpụ ma ọlị nke m agaghị agbapụta, ma-ọbụ ike m ịnapụta.

68 Lee, na-ibasi mba ike m, ana m eme ka oke osimiri taa. Ana m eme ka osimiri nile ghọọ ọzara; azụ ha na-esi-isi, na ha na-anwụ n’ihi akpịrị ịkpọ nkụ.

69 Ana m eyikwasị elu-igwe nile uwe ojii, na ana m eme akwa uwe ịgba mkpe ihe mkpuchi ahụ ha.

70 Na nke a ka unu ga-enweta n’aka m—unu ga-edina ala na mwute.

71 Lee, na hụ, ọ dịghị ndị ọbụla ga-enwe ike ịnapụta unu, n’ihi na unu erubeghị isi n’olu okwu m mgbe m kpọrọ unu oku site n’ime elu-igwe nile; unu ekwenyeghị okwu ndị odibo m, na mgbe e zitere ha nye unu, unu a nabataghị ha.

72 Ya mere, ha arachiwo ọgbụgba ama ahụ na kechie iwu ahụ, na e nyefewo unu n’aka ọchịchịrị.

73 Ndị a ga-apụ baa n’ime ọchịchịrị nke ezi, ebe ịkwa akwa, ịkwa arịrị, na-ịta ikekere eze dị.

74 Lee Onye-nwe bu Chineke gị ekwuwo ya. Amen.