Seksiyon 111
Pagpadayag nga gihatag pinaagi ni Joseph Smith ang Propeta, didto sa Salem, Massachusetts, Agosto 6, 1836. Niining higayona ang mga lider sa Simbahan nakautang og dako tungod sa ilang mga buluhaton sa pagpangalagad. Tungod kay nakadungog nga adunay dakong kwarta nga ilang magamit didto sa Salem, ang Propeta, si Sidney Rigdon, Hyrum Smith, ug si Oliver Cowdery mibiyahe padulong sa Kirtland, Ohio, aron sa pagsusi niini nga pamahayag, uban ang pagsangyaw sa ebanghelyo. Ang kaigsoonan miatiman sa daghang butang nga atimanonon sa Simbahan ug mihimo og mga pagsangyaw. Sa dihang natino nga walay kwartang moabot, namalik sila sa Kirtland. Daghan sa mga butang nga makita sa naglibot nga panghitabo mabasa sa mga pulong niini nga pagpadayag.
1–5, Ang Ginoo nagtan-aw sa temporal nga mga panginahanglan sa Iyang mga sulugoon; 6–11, Siya mopakita og kaluoy sa Zion ug mopahigayon sa tanang butang alang sa kaayohan sa Iyang mga sulugoon.
1 Ako, ang Ginoo nga inyong Dios, wala masuko sa inyong pag-abot niini nga pagbiyahe, bisan pa sa inyong mga binuang nga buhat.
2 Ako adunay daghang bahandi niini nga siyudad alang kaninyo, alang sa kaayohan sa Zion, ug daghang mga tawo niini nga siyudad, ang akong pundokon sa tukma nga higayon alang sa kaayohan sa Zion, pinaagi kaninyo.
3 Busa, gikinahanglan nga makighigala kamo sa mga tawo niini nga siyudad, ingon nga kamo pagatudloan, ug kini ihatag kaninyo.
4 Ug mahitabo nga sa tukmang panahon nga akong ihatag kini nga siyudad sa inyong mga kamot, aron kamo adunay gahom niini, nga niana dili sila makahibalo sa inyong tinago nga mga plano; ug ang bahandi niini kalabot sa bulawan ug pilak inyong mapanag-iya.
5 Ayaw kabalaka sa inyong mga kaugalingon mahitungod sa inyong mga utang, kay hatagan ko kamo og gahom nga makabayad niini.
6 Ayaw kabalaka sa inyong mga kaugalingon bahin sa Zion, kay ipakita nako kaniya ang kaluoy.
7 Pabilin niining dapita, ug sa mga rehiyon sa palibot;
8 Ug sa dapit nga gusto nako nga kamo magpabilin, kay ang kadaghanan, ipakita nganha kaninyo pinaagi sa kalinaw ug gahom sa akong Espiritu, nga moabot kaninyo.
9 Kini nga dapit inyong maangkon pinaagi sa abang. Ug kugihi ang pagpakisayod mahitungod sa labing karaang mga lumulupyo ug mga magtutukod niini nga siyudad;
10 Kay adunay daghan pang bahandi alang kaninyo niini nga siyudad.
11 Busa, pagmaalamon kamo sama sa mga bitin apan walay sala; ug mandoan nako ang tanang butang alang sa inyong kaayohan, ingon ka paspas kutob sa mahimo ninyong dawaton. Amen.