Niadtong Septiyembre 30, 1978, sa ika-148 nga Matag Tunga sa Tuig nga Kinatibuk-ang Komperensiya sa Ang Simbahan ni Jesukristo sa mga Santos sa Ulahing mga Adlaw, ang mosunod gipresentar ni Presidente N. Eldon Tanner, Unang Magtatambag sa Unang Kapangulohan sa Simbahan:

Sa sayo sa Hunyo niini nga tuig, ang Unang Kapangulohan mipahibalo nga ang usa ka pagpadayag nadawat ni Presidente Spencer W. Kimball nga magtugyan sa pagkapari ug sa mga panalangin sa templo ngadto sa tanang takos nga lalaki nga miyembro sa Simbahan. Si Presidente Kimball mihangyo nga akong ipahibalo sa komperensiya nga human niya madawat kini nga pagpadayag, nga miabot kaniya human sa dugayng pagpamalandong ug pag-ampo didto sa sagradong mga lawak sa balaan nga templo, kini napahibalo na niya sa iyang mga magtatambag, kinsa midawat niini ug miuyon niini. Gipahibalo dayon kini ngadto sa Korum sa Napulog Duha ka Apostoles, kinsa nagkahiusa sa pag-uyon niini, ug sunod niana gipahibalo kini ngadto sa tanang uban pa nga Kinatibuk-ang Awtoridad, kinsa nagkahiusa nga miuyon niini.

Si Presidente Kimball mihangyo nga karon akong basahon kini nga sulat:

Samtang nasaksihan namo ang paglambo sa buhat sa Ginoo ibabaw sa yuta, mapasalamaton kami nga ang katawhan sa daghang kanasoran mitubag sa mensahe sa gipahiuli nga ebanghelyo, ug nagpasakop sa Simbahan sa padayong nagtubo nga gidaghanon. Kini, sa ingon, nakapadasig kanamo uban sa tinguha sa paghatag sa matag takos nga miyembro sa Simbahan sa tanang kahigayonan ug mga panalangin nga mahatag sa ebanghelyo.

Nakahibalo sa mga saad nga gihimo sa mga propeta ug mga presidente sa Simbahan nga nag-una kanamo nga sa umaabot nga panahon, diha sa walay kataposang plano sa Dios, tanan sa atong kaigsoonan nga takos mahimo nang makadawat sa pagkapari, ug kay nakasaksi sa kamatinud-anon niadtong wala pa tugoti nga makadawat sa pagkapari, dugay na kaming naghangyo ug nagtinguha gayod alang kanila, ang atong matinud-anon nga kaigsoonan, migahin og daghang takna sa Ibabaw nga Lawak sa Templo nga nangamuyo sa Ginoo alang sa langitnon nga giya.

Gidungog niya ang among mga pag-ampo, ug pinaagi sa pagpadayag nagmatuod nga ang dugay nang gisaad nga adlaw miabot na diin ang matag matinud-anon, takos nga lalaki sa Simbahan mahimo nang makadawat sa balaan nga pagkapari, uban sa gahom sa paggamit niining balaanong awtoridad, ug makatagamtam uban sa iyang mga minahal sa matag panalangin nga naggikan niini, lakip na ang mga panalangin sa templo. Sumala niini, ang tanang takos nga lalaki nga miyembro sa Simbahan mahimo nga i-orden sa pagkapari sa walay pag-isip sa kaliwat o kolor. Ang mga lider sa pagkapari gitudloan sa pagsunod sa palisiya sa mainampingong pag-interbiyo sa tanang girekomendar nga i-orden ngadto sa Aaronic o sa Melchizedek nga Pagkapari aron sa pagseguro nga sila nagtuman sa naestablisar nga mga sumbanan sa katakos.

Among ipahayag uban sa kaligdong nga ang Ginoo karon mipadayag sa iyang kabubut-on sa pagpanalangin sa tanan niyang anak sa tibuok yuta nga mopatalinghog sa tingog sa iyang awtorisado nga mga sulugoon, ug moandam sa ilang mga kaugalingon sa pagdawat sa matag panalangin sa ebanghelyo.

Kay giila si Spencer W. Kimball isip ang propeta, manalagna, ug tigpadayag, ug presidente sa Ang Simbahan ni Jesukristo sa mga Santos sa Ulahing mga Adlaw, kini gisugyot nga kita isip usa ka bahin sa katigoman modawat niini nga pagpadayag isip pulong ug kabubut-on sa Ginoo. Tanan nga mouyon palihog ipakita pinaagi sa pagpataas sa inyong tuo nga kamot. Bisan kinsa nga mosupak pinaagi sa mao gihapon nga timailhan.

Ang boto alang sa pagpaluyo sa gihisgotan nga mosyon gikauyonan sa tanan.