Tulunghaan sa mga Propeta

Niadtong Disyembre 1832, si Joseph Smith nakadawat og usa ka pagpadayag nga nagsugo kaniya sa pagtukod og usa ka tulunghaan alang sa mga elder sa Simbahan sa Kirtland.¹ Si Joseph Smith ug ang iyang mga kaubanan migamit sa termino nga “tulunghaan sa mga propeta” sa paghulagway niining bag-ong tulunghaan. Kining termino komon nga gigamit sa paghulagway sa mga seminary sa Harvard ug sa Yale ingon man sa ubang mga tulunghaan diin ang kaparian nakadawat og pagbansay alang sa ilang pagpangalagad.² Alang sa uban, ang ngalan makapahinumdom sa Daang Tugon nga “ang pundok sa mga manalagna,” diin gilangkoban sa mga tawo sama nilang Samuel, Elija, ug Elisha.³

Tulunghaan sa mga Propeta sa Kirtland

Gipahigayon sa matag tingtugnaw gikan sa 1833 hangtud sa 1836, ang Tulunghaan sa mga Propeta sa Kirtland nakatanyag sa mga partisipante og espirituhanon ingon man sa sekular nga edukasyon. Nakatabang kini nila nga maandam alang sa misyonaryo nga pagserbisyo ug alang sa usa ka saad nga “matugahan sa gahum” sa dihang nakompleto na ang Templo sa Kirtland.⁴ Ang unang sesyon sa tulunghaan gisugdan niadtong Enero 22, 1833, diha sa usa ka taas nga lawak sa tindahan ni Newel K. Whitney. Samtang ang nag-unang katuyoan sa tulunghaan mao ang pag-andam sa kalalakin-an alang sa misyon, ang mga kababayen-an nanambong usab sa unang miting ug miapil diha sa mga espirituhanon nga pagbubo, nga naglakip sa gamhanang mga impluwensya sa Espiritu Santo ug sa pagpamulong sa mga dila.⁵ Ingon nga sinugo pinaagi sa pagpadayag, nagsugod ang mga partisipante sa mga miting uban sa pormal nga pakighimamat, ug ang bag-ong mga sakop gi-welcome sa tulunghaan pinaagi sa ordinansa sa paghugas sa mga tiil.⁶

Ang lawak diha sa tindahan ni Newel K. Whitney sa Kirtland diin gihimo ang panagtigum sa Tulunghaan sa mga Propeta.

Ang tulunghaan nagtanyag sa espirituhanon ug sekular nga instruksyon, gilakipan og mga hilisgutan sama sa kasaysayan, kasamtangang mga panghitabo, pagbasa ug pagsulat, matematika, pagtuon sa pinulongan, ug pagtulun-an sa doktrina. Niadtong Pebrero 27, 1833, si Joseph Smith nakadawat og pagpadayag nga nailhan isip Pulong sa Kaalam atol sa usa ka miting sa Tulunghaan sa mga Propeta, naaghat isip kabahin sa mga pangutana ni Emma Smith.⁷ Ang tulunghaan mipadayon sa tingtugnaw sa 1834 ubos sa ulohan nga “tulunghaan alang sa mga elder.”⁸ Atol sa sesyon sa 1835, si Joseph Smith ug si Sidney Rigdon nagtudlo og mga klase base sa teyolohikanhon nga mga panudlo nga naila isip ang Lectures of Faith. Diha sa sesyon niadtong 1836, ang mga Santos nagsuhol ni Joshua Seixas, kinsa mitudlo ni Lorenzo Snow sa Oberlin College, aron motudlo og kurso sa Herbreohanon.⁹

Laing mga Tulunghaan sa mga Propeta

Ang Simbahan migamit sa nag-unang mga sundanan sa Tulunghaan sa mga Propeta sa Kirtland sa laing mga panahon ug mga dapit. Sa dihang ang unang Tulunghaan sa mga Propeta sa Kirtland mitapos niadtong Abril 1833, si Parley P. Pratt mipahigayon og usa ka sesyon sa ting-init didto sa Missouri. Sa Utah, si Brigham Young miorganisar og Tulunghaan sa mga Propeta niadtong 1867 agig koneksyon sa University of Deseret. Sa wala madugay ang ubang mga Tulunghaan sa mga Propeta naorganisar sa tibuok teritoryo. Agig dugang sa espiritwal ug sekular nga pagkat-on, ang mga sakop miapil diha sa pagplano sa ekonomiya ug sibika samtang ang mga nanimuyo nga mga pioneer naningkamot sa pagpatuman sa mga baruganan sa balaod sa pagpahinungod. Si John Taylor, ang misunod ni Brigham Young, mipahigayon usab og usa ka Tulunghaan sa mga Propeta sa Siyudad sa Salt Lake ug sa St. George gikan sa 1883 hangtud 1884.¹⁰

Sa hinapos sa ika-19 nga siglo, ang Simbahan wala na migamit sa ngalan nga “Tulunghaan sa mga Propeta” aron sa paghulagway sa mga paningkamot nga pang-edukasyon niini, apan nagpabilin kining masaligon sa gipadayag nga tumong sa tulunghaan ug gipadayon kini sa nagkadaiyang mga paagi. Ang Simbahan maoy nahimong instrumento sa pagtukod og mga tulunghaan ug mga akademya sa mas taas nga pagtuon sa tibuok Kasadpang Amerika ug sa daghan pang mga dapit. Samtang mas nagkahalapad ang pagkaanaa sa sekular nga edukasyon ug mga programa sa pagbansay, ang mga lider sa Simbahan miawhag sa mga Santos sa pag-enrol ug pag-establisar og mga programa aron masuportahan ang mga miyembro sa Simbahan sa ilang paningkamot sa edukasyon.¹¹ Aron masangkapan ang espiritwal nga pagkat-on ug ang pagbansay sa lokal nga pagpangalagad ug ang misyonaryo nga pagserbisyo, ang Simbahan mitukod sa mga seminary, mga institute of religion, mga missionary training center, ug uban pang mga miting sa pagbansay sa pagkapangulo ug mga sibya. Matag usa niining mga programa nagpadayon, sa kaugalingon niining pamaagi, ang panulundon sa Tulunghaan sa mga Propeta sa Kirtland.

May Kalabutan nga mga Hisgutanan: Washing of Feet, Word of Wisdom (DC 89), Endowment of Power