Kampo sa Zion (Kampo sa Israel)

Gikan sa Mayo hangtud sa Hunyo 1834, gibana-bana nga mga 230 ka mga lalaki, mga babaye, ug mga bata ang mimartsa padulong sa Missouri aron sa pagtabang sa mga Santos nga gipapahawa gikan sa Distrito sa Jackson, Missouri, sa milabay nga tuig. Kini nga ekspedisyon, naila karon nga Kampo sa Zion, gitawag niadto og Kampo sa Israel. Natukod kini human makadawat og pagpadayag si Joseph Smith niadtong Pebrero 1834 nga nagmando kaniya sa pagtawag sa tanang kusgang mga tawo sa balay sa Ginoo aron sa pagluwas sa Zion gikan sa mga kaaway niini.¹ Ang pagpadayag mimando sa mga lider sa Simbahan sa pagpangita og dili mominus 100, ug labing maayo kon 500, ka mga lalaki nga mobiyahe ngadto sa Missouri. Pagka-Marso, si Joseph Smith ug ang uban mibiyahe agi sa New York sa pagpangita og mga boluntaryo ug pundo alang sa ekspedisyon.

Paghulagway sa Kampo sa Israel nga miabut sa Missouri.

Si Jospeh nangulo og usa ka grupo gikan sa Kirtland, Ohio, ngadto sa Missouri. Sa samang higayon, si Hyrum Smith ug Lyman Wight mibiya sa Pontiac, Teritorya sa Michigan, uban sa grupo sa gibana-bana nga 20 ka mga tawo. Mipundok og mga rekrut samtang nagbiyahe, ang duha ka grupo nag-abut pagka-Hunyo sa kabalayan sa Salt River [Salt River settlement] sa Missouri sa wala pa mipadayon ngadto sa Distrito sa Clay. Sa tibuok biyahe, ang mga partisipante usahay miantus sa kakulang sa pagkaon ug tubig. Tungod kay ang grupo mimartsa og kutob 40 ka milya [65 kilometro] matag adlaw, ang uban nakasinati usab og pamaslot ug pagdugo sa mga tiil. Pipila sa mga sakop sa ekspedisyon mireklamo mahitungod niini nga mga kahimtang, nga nakahimo sa biyahe nga malisud alang sa uban.

Bisan og ang Pebrero 1834 nga pagpadayag mihulagway sa kampo nga sama sa operasyon sa militar, si Joseph Smith ug ang ubang lider sa Simbahan mikonsiderar niini nga lonlon nga hiniusang tinguha sa pagdepensa sa mga Santos. Mituo nga ang gobernador sa Missouri nga si Daniel Dunklin andam nga motawag sa militar sa estado aron sa pagpahimutang og balik sa mga Santos sa ilang mga yuta, buot ni Joseph nga ang Kampo sa Israel magmartsa ngadto sa Missouri ug mohangyo nga si Dunklin mopatawag sa mga militar. Human miuban ang mga militar sa mga Santos balik ngadto sa Distrito sa Jackson, ang Kampo sa Israel mipabilin aron sa pagpanalipod sa mga miyembro sa Simbahan gikan sa pagpang-abug og balik.

Ang mga lumulupyo sa kasadpang Missouri, hinuon, nabalaka sa nagsingabut nga panon ug ang uban nangandam alang sa gubat. Pagka-Hunyo 19, 1834, sama pananglit, lima ka armadong lalaki ang mipaduol sa kampo sa Fishing River ug misaad nga ang Kampo sa Israel “makakita sa impeyerno sa dili pa mobuntag” gikan sa grupo sa 400 ka mga lalaki.² Hinuon, usa ka makalilisang nga unos ang mikuso-kuso nianang gabhiuna, mibubo og dagkung lusok sa ulan, mipasaka sa tubig sa Fishing River hangtud hapit 40 ka pye [12 ka metro] ang gilawmon, ug misanta sa pagpangataki. “Ingon og sama sa ang mando sa pagpanimalos miabut gikan sa Dios sa mga gubat aron sa pagpanalipod sa iyang mga sulugoon gikan sa kalaglagan sa ilang mga kaaway,” ang kasaysayan ni Joseph Smith mitapos.³

Nahibalo nga supak sa panon ug nakadungog nga si Dunklin miatras sa iyang saad sa pagtawag sa militar, si Joseph Smith mihangyo og giya gikan sa Ginoo. Pagka-Hunyo 22, 1834, nakadawat siya og pagpadayag nga miingon nga dili na kinahanglan nga ang panon moluwas sa Zion. Sa dili pa mahitabo ang pagluwas, ang pagpadayag mipasabut, ang mga elder sa Simbahan nagkinahanglan nga makadawat sa pagtuga sa gahum [endowment of power] diha sa balay sa Ginoo sa Kirtland, nga nianang higayuna padayon pang gitukod. Nagsugod og kabungkag ang kampo sa tapos sa Hunyo. Kini nga pagkabungkag napadali sa dihang ang epidemya sa kolera mitakboy sa mga sakop sa kampo, wala madugay mipatay og 13 ka mga partisipante ug 2 ka miyembro sa Simbahan sa Missouri. Sa Hulyo 1834, daghang mga miyembro sa kampo ang mibalik ngadto sa Kirtland.

Bisan tuod og ang mga Santos wala na mapabalik sa ilang yuta sa Distrito sa Jackson, ang kadaghanan nga miuban sa ekspedisyon sa Kampo sa Israel wala motan-aw niini nga usa ka kapakyasan. Ang uban, sama ni Brigham Young, mikonsiderar niadto nga usa ka pribilehiyo ang pagmartsa uban ni Joseph Smith ug magkat-on og mga baruganan sa pagpangulo [leadership principles] gikan kaniya. Ang uban nakita ang kamot sa Dios nga mipanalangin sa ilang kinabuhi sa tibuok nilang biyahe. Ang ekspedisyon misilbi usab nga pagsulay alang sa umaabut nga mga lider sa Simbahan. Sa dihang ang Korum sa Napulog Duha ka mga Apostoles natukod niadtong Pebrero 1835, 8 sa orihinal nga 12 ka mga lalaki nga gitawag nakauban og martsa sa Kampo sa Israel. Ang tanang lalaki nga gitawag isip unang mga Seventy pagka-Pebrero 1835 mga sakop usab sa kampo.

May Kalabutan nga Hisgutanan: Ang Kagubot sa Distrito sa Jackson [Jackson County Violence ]