Harold B. Lee

Miserbisyo si Harold B. Lee isip ika-11 nga Presidente sa Simbahan gikan sa Hulyo 1972 hangtod sa iyang kamatayon sa Disyembre 1973. Natawo siya ngadto ni Louisa Emeline Bingham Lee ug Samuel Marion Lee sa 1899 ug nagdako diha sa usa ka umahan sa Clifton, Idaho. Misugod siya sa pag-eskwela og sayo sa pagkabata ug nakabaton og usa ka sertipiko sa pagtudlo gikan sa Albion State Normal School sa 17 anyos ang panuigon, nahimong prinsipal sa eskwelahan sa Oxford, Idaho, paglabay sa usa ka tuig. Sa edad nga 21, miserbisyo siya og usa ka misyon didto sa kasadpang Estados Unidos ug sa pagpauli sa panimalay mipalista sa University of Utah sa pagpadayon sa iyang pagtuon sa edukasyon. Nakigminyo si Harold ni Fern Lucinda Tanner sa 1923, ug sila dihay duha ka anak nga babaye, si Maurine sa 1924 ug si Helen sa 1925.¹

Gitawag si Harold B. Lee isip presidente sa Pioneer Stake sa Siyudad sa Salt Lake sa 1930, samtang ang Grabeng Pagkahagsa sa Ekonomiya midala og malukpanong walay trabaho ug kalaglagan sa ekonomiya. Labaw sa katunga sa 7,500 ka miyembro sa iyang stake ang nanginahanglan og trabaho, ug nagsulay siya og mga programa sa pagtabang sa nanlimbasog nga mga pamilya sa pagpangita og panarbaho ug sa pagdugang sa listahan sa balay tipiganan sa bishop. Ang Unang Kapangulohan mitawag ni Lee sa pagpangulo og usa ka komitiba sa pagpalambo og tibuok Simbahan nga plano sa welfare. Gilunsad sa 1936, ang kasangpotan sa Programa sa Simbahan sa Seguridad mipauswag sa tubag sa lokal nga mga stake ngadto sa mga emerhensiya ug mipasiugda og bag-ong trabaho nga mga proyekto alang sa walay trabaho. Si Lee miserbisyo isip ang tigdumalang direktor sa programa gikan sa 1936 ngadto sa 1941.²

Sa 1941, sa edad nga 42, si Lee gi-orden nga usa ka Apostol ni Heber J. Grant. Mipadayon si Elder Lee sa pagdirekta sa programa sa welfare sa Simbahan ug milibot sa mga misyon sa tibuok kalibotan. Ang iyang apostolikanhong pangalagad misapaw uban sa tibuok kalibotan nga kahuyang sa panahon sa Ikaduhang Gubat sa Kalibotan ug sa bag-ong tibuok kalibotan nga sugo nga migawas resulta sa gubat. Ang ginsakopan sa Simbahan ug ang tibuok kalibotan nga pagbaligya ngadto sa mga pumapalit mitubo og mas kusog sa mga tuig human sa gubat kay sa kini nahimo sa milabay nga mga dekada, naghimo niini nga malisod sa pagpatuman sa mga programa sa Simbahan sa managsama nga paagi. Gipabuhat ni Presidente David O. Mckay si Elder Lee sa pagpangulo sa paningkamot sa Simbahan sa paghiusa sa mga pagpadagan sa Simbahan ug sa pagdala sa tanang pagpalihok sa organisasyon ug mga programa ubos sa pagpangulo sa pagkapari. Gidumala ni Elder Lee ang gipadali nga paningkamot sa pagtakdo sa programa ug sa wala madugay nalipay sa pagkakita sa mga korum sa pagkapari nga mas mabinantayon sa pagdirekta sa trabaho sa ebanghelyo ug ang mga Santos sa Ulahing mga Adlaw sa tibuok kalibotan nag-apil sa samang mga leksiyon ug mga kalihokan.³

Sulod sa tulo ka tuig sa wala pay 1962, namatay ang asawa ni Elder Lee, si Fern, ug anak nga babaye si Maurine ngadto sa kalit nga pagkadaot sa panglawas, usa ka panahon nga iyang gitawag og ang “labing masulub-ong kasinatian” sa iyang kinabuhi. Sa 1963, gipangasawa niya si Freda Joan Jensen didto sa Salt Lake Temple, ug ang duha kanunayng mibiyahe nga mag-uban sa mga buluhaton sa Simbahan atol sa nahibiling mga tuig ni Elder Lee isip usa ka Apostol ug sa wala madugay Presidente sa Simbahan.⁴

Sa 1970, ang bag-ong gi-orden nga Presidente sa Simbahan nga si Joseph Fielding Smith mitawag ni Harold B. Lee sa pagserbisyo isip usa ka magtatambag diha sa Unang Kapangulohan, agi og dugang ngadto sa bag-ong responsibilidad ni Elder Lee isip Presidente sa Korum sa Napulog Duha ka Apostoles. Sa dihang namatay si Presidente Smith 30 ka bulan wala madugay, si Presidente Lee gi-orden nga Presidente sa Simbahan. Siya hapit diha dayon misugod sa pag-antos og grabe nga sakit gumikan sa mga tibugol sa dugo ug miagi og hapit kanunay nga medikal nga pagtambal sulod sa nahibilin sa iyang pagkapangulo. Mibiyahe gihapon siya ngadto sa Siyudad sa Mexico alang sa ikaduhang komperensiya sa erya sa kasaysayan sa Simbahan, nga mipundok sa labing dako nga asembleya sa mga Santos sa Ulahing mga Adlaw diha sa usa ka kinatibuk-an o rehiyonal nga komperensiya hangtod karon. Mibiyahe usab siya ngadto sa Holy Land, nahimong ang unang Presidente sa Simbahan nga nakabisita sa Israel, diin iyang gisuroy ang makasaysayanong mga dapit kalabot sa pangalagad ni Jesukristo, mihimo og dihadiha nga debosyonal nga mga pangalagad, ug gi-organisar ang unang branch sa Simbahan sa Jerusalem.⁵

Sa buntag human ang Adlaw sa Pasko sa 1973, gipasulod si Presidente Lee ngadto sa ospital nga nag-antus og kakapoy ug mga problema sa baga. Namatay siya nga wala damha wala madugay nianang adlawa. “Si Presidente Lee usa ka maayong higala sa mga dinaogdaog,” misulat si Spencer W. Kimball, iyang manununod isip Presidente sa Simbahan. “Samtang siya usa ka inilang tagdumala ug walay kakapoy nga trabahante, kanunay makakaplag siya og panahon sa pagbisita sa masakiton ug niadtong nagmagul-anon. Kon si Presidente Lee mag-ampo, nakigsulti gyud siya ngadto sa iyang Langitnong Amahan.”⁶

Alang sa dugang nga impormasyon mahitungod sa kinabuhi ni Harold B. Lee, tan-awa ang Prophets of the Restoration nga mga bidyo sa history.ChurchofJesusChrist.org o diha sa Gospel Library app.

Kalabot nga mga Hilisgotan: Correlation, Mga Programa sa Welfare [Welfare Programs], Grabeng Pagkahagsa sa Ekonomiya [Great Depression]