John Taylor
Miserbisyo si John Taylor isip ang ikatulong Presidente sa Ang Simbahan ni Jesukristo sa mga Santos sa Ulahing mga Adlaw tali sa 1880 ug sa iyang kamatayon sa 1887. Natawo sa 1808 sa Milnthorpe, Inglatera, mipasakop siya sa Simbahan sa 1836 uban sa iyang asawa nga si Leonora Cannon Taylor samtang nagpuyo sa Toronto, Canada. Nabuhi siya sa pagpang-atake sa manggugubot nga panon didto sa Bilanggoan sa Carthage nga mipatay ni Joseph ug Hyrum Smith apan grabing nasamdan. Sulod sa 40 ka tuig nga si Taylor miserbisyo isip Apostol, gi-edit niya ang daghang mga pamantalaan sa Simbahan, mimantala og mga basahon ug mugbo nga mga sinulat kabahin sa relihiyon, misangyaw sa Gran Britanya ug Amihanang Amerika ug midumala og unang mga misyon sa Alemanya ug France. Human sa kamatayon ni Brigham Young sa 1877, gisugdan ni Taylor ang pagpangulo sa Simbahan isip Presidente sa Korum sa Napulog Duha ka mga Apostoles. Sa 1880 gi-orden siya isip ang ikatulo nga Presidente sa Simbahan ug gi-organisar pag-usab ang Unang Kapangulohan.
Hulagway ni John Taylor nga pinakilid.
Samtang nagdumala sa Simbahan isip Presidente sa Korum sa Napulog Duha, gi-aprubahan ni John Taylor ang paghimo og organisasyon sa Primary ug gi-set apart ang unang Kinatibuk-ang mga Presidente sa mga organisasyon sa mga kababayen-an sa Simbahan. Isip Presidente sa Simbahan gidumala niya ang pagsagop sa Perlas nga Labing Bililhon isip kasulatan ug ang usa ka programa sa pagwala sa utang ug ubang mga paningkamot sa welfare alang sa mga kabus isip kabahin sa pagsaulog sa kasumaran [jubilee] sa ika-50 nga anibersaryo sa Simbahan.
Samtang ang panghingusog sa gobyerno batok sa dinaghang kaminyoon nagtubo sa mga 1880, misupak si Taylor, ingon nga gidawat ang dinaghang kaminyoon sa Nauvoo, Illinois. Sa tibuok niyang kinabuhi, nangasawa siya og walo ka mga babaye. Gigahin ni Presidente Taylor ang kadaghanan sa iyang katapusang pipila ka mga tuig sa iyang kinabuhi sa paglikay sa mga awtoridad sa kapangulohan [federal]. Namatay siya sa Hulyo 1887.
Alang sa dugang nga impormasyon mahitungod sa kinabuhi ni John Taylor, tan-awa sa Prophets of the Restoration nga mga video sa history.ChurchofJesusChrist.org o diha sa Gospel Library app.