Basahon sa mga Kasugoan

Sa unang pipila ka mga katuigan sa Simbahan, ang bugtong access sa kadaghanan sa mga miyembro sa pagpadayag sa Ginoo ngadto ni Joseph Smith mao ang pinaagi lang sa mga kopya nga gisulat diha sa mga panid nga gipasa-pasa taliwala sa mga Santos sa Ulahing mga Adlaw. Ang mga lider ug mga misyonaryo sa Simbahan nagsalig niining mga kopya alang sa direksyon ug inspirasyon. Dul-an sa hinapos sa 1831, si Joseph mipatawag og komperensya aron sa pagtino kon unsaon sa pagmantala niining mga pinadayag. Siya ug ang uban nga mga lider sa Simbahan gustong makasiguro nga tukma ang mga kopya nga magamit sa mga miyembro sa Simbahan. Sa usa ka pagpadayag nga nadawat ni Joseph atol sa komperensya, ang Ginoo miaprobar sa pagtingob sa mga pinadayag ug mipadayag sa pasiuna alang sa paggawas sa basahon.¹ Usa ka komite nga gitawag og Literary Firm maoy gitahasan sa pagdumala sa pagmantala sa basahon.² Ang mga Santos sa Ulahing mga Adlaw kasagaran mitawag sa mga pinadayag nga “mga kasugoan,” ug ang Literary Firm migamit niining pulong sa pagtingob sa ulohan: “Ang Basahon sa mga Kasugoan.”

litrato sa Basahon sa mga Kasugoan nga abli ang pahina sa ulohan, pirma ni Wilford Woodruff sa nag-atubang nga pahina

Ang Basahon sa mga Kasugoan, gimantala didto sa Independence, Missouri, niadtong 1833.

Nasugdan ang pag-imprinta niadtong 1832 sa printahanan didto sa Independence, Missouri, nga gipanag-iya ni William W. Phelps. Ang pag-imprinta hapit na makompleto niadtong Hulyo 1833 sa dihang gilungkab sa mga manggugubot nga panon ang printahanan. Pipila sa mga Santos mirisgo sa ilang kaluwasan aron masalbar ang mga pahina atol sa pag-atake. Ang mga miyembro sa Missouri ug sa Kirtland, Ohio, mihugpong sa nasalbar nga mga pahina ngadto sa pipila ka dili kompleto nga basahon, apan nababagan ang gilauman nga pagpagawas sa liboan ka mga kopya. Ang mga lider sa Simbahan sa wala madugay mihimo og laing paningkamot sa pagmantala sa mga pagpadayag.³ Milampos sila niadtong 1835, sa pagmantala niini didto sa Kirtland ubos sa ulohan nga Ang Doktrina ug mga Pakigsaad sa Simbahan sa mga Santos sa Ulahing mga Adlaw, diin gipaluyohan sa mga Santos isip “usa ka balaod ngadto sa simbahan” ug usa ka “lagda sa hugot nga pagtuo ug kalihokan.”⁴

Mga Kapanguhaan sa Simbahan

Book of Commandments, 1833, josephsmithpapers.org.

Bibliograpiya

Ang mosunod nga mga pagmantala nakahatag og dugang impormasyon kabahin niining hisgutanan. Pinaagi sa pag-refer o pag-link nimo ngadto niining kapanguhaan, wala kami mag-endorso o mogarantiya sa sulod o sa panglantaw sa mga tagsulat.

Richard E. Turley Jr. ug William W. Slaughter, How We Got the Doctrine and Covenants (Siyudad sa Salt Lake: Deseret Book, 2012).

Peter Crawley, ed., A Descriptive Bibliography of the Mormon Church, 3 vols. (Provo, Utah: Religious Studies Center, Brigham Young University, 1997–2012), 1:37–42.

May Kalabutan nga Hisgutanan: Doktrina ug mga Pakigsaad

Mubo nga mga sulat

1. “Revelation, 1 November 1831–B [DP 1],” sa Revelation Book 1, 125–27, josephsmithpapers.org; tan-awa usab sa “Revelation, 1 November 1831–B [DP 1],” Historical Introduction, josephsmithpapers.org.

2. “Literary Firm,” josephsmithpapers.org.

3. Book of Commandments, 1833, Historical Introduction, josephsmithpapers.org. Mas minus sa tulo ka dosena nga mga kopya sa orihinal nga 1833 nga Basahon sa mga Kasugoan ang nahibaloan nga anaa pa.

4. Minute Book 1, 98, josephsmithpapers.org. Tan-awa sa “Doktrina ug mga Pakigsaad,” Mga Hisgutanan sa Kasaysayan sa Simbahan.