Politikal ug Diplomatikong Tensiyon
Sa tunga-tunga sa ika-20 nga siglo, ang kadaot nga gibilin sa Ikaduhang Gubat sa Kalibotan nakapabaliktad sa miaging internasyonal nga kahimtang. Anaa sa 10 ug 20 ka porsiyento sa kinatibuk-ang populasyon sa Poland, sa Soviet Union, ug sa Yugoslavia ang nangamatay sa gubat; anaa sa 4 ug 6 ka porsiyento sa kinatibuk-ang populasyon sa Germany, Italy, Austria, Hungary, Japan, ug China ang nangamatay usab. Daghang uban pang wala gisaysay nga mga pagkawala ang nakapabilin sa mga nasod sa kalagmitan sa pagmugna pag-usab og organisasyon ug kasamok sa dili pa mapalambo ang taas og termino nga pagbangon gikan sa gubat. Ingon nga ang lainlaing politikanhong gahom mibalhin ngadto sa bag-ong mga kaalyado, usa ka milungtad nga politikanhong panagbangi nahitabo tali sa Soviet Union, Estados Unidos, ug sa ilang tagsa-tagsa ka kaalyado nga sa kataposan sa siglo komon nga gitawag og “Politikal ug Diplomatikong Tensiyon.” Kini nga panagbangi kasagaran gipakita pinaagi sa gubat sa pagsuporta sa lainlaing mga habig, paghatag og restriksiyon sa patigayon, ug komplikado nga diplomasiya, nga maoy miimpluwensya sa politikanhong palibot sa kadaghanan sa kalibotan sa ulahing bahin sa katunga sa siglo.
Ang pagkabungkag sa kolonisasyon sa mga rehiyon sa mga estado sa Uropa kanhi miangkon isip mga kolonya nagtimaan sa mahinungdanong bahin sa Politikal ug Diplomatikong Tensiyon. Sa pagtumaw sa bag-ong independente nga mga nasod, ilabi na sa Africa, Asya, ug sa Middle East, ang Estados Unidos ug ang Soviet Union nagkompetensya sa impluwensya ug nakita nga ang pagkabungkag sa kolonisasyon usa ka oportunidad sa pagpalapad sa ilang ideyolohikal nga pagpanakop—komunismo sa Soviet Union ug gawasnong merkado nga kapitalismo sa Estados Unidos. Pipila sa direktang mga komprontasyon kon hain sa pamaagi sa gobyerno ang ipuli sa miaging kolonya mitumaw, uban sa dili gayod maayo nga epekto. Ang Gubat sa Korea (1950–1953) ug ang Gubat sa Vietnam (1955–1975) hilabihan ka grabe, parehong nagmugna og internasyonal nga kontrobersiya ug nagtutok sa mga pag-alyansa sa lainlaing mga nasod ngadto sa bisan asa sa duha ka dagkong gamhanang mga nasod. Ang pagpasiugda sa dagkong gamhanang mga nasod sa panagbangi sa mga kaalyado niini o ang partisipasyon pinaagi sa pagsuporta misangpot sa panag-away tabok sa pipila ka gubat. Usa ka delikadong nukleyar nga kagubot tali sa Estados Unidos ug sa Soviet Union niadtong 1962, kasagaran gitawag og Cuban Missile Crisis, ang mitapos human sa grabe nga negosasyon ug dinalian nga diplomasiya taliwala sa daghang internasyonal nga mga panagdapigay.
Bisan kon ang armadong puwersa sa Soviet Union ug sa Estados Unidos wala moapil sa direkta nga pakiggubat, ang kompetisyon tali niining duha ka gamhanang mga nasod nakita gayod sa mga kalihokan sa sport sama sa Olympics ug kompetisyon sa pag-adto sa buwan.
Ang sunod-sunod nga mga kausaban sa estratehiya atol sa 1980 nakapausab sa nahibiling tensiyon sa Politikal ug Diplomatikong Tensiyon. Mipahimulos sa sitwasyon sa mga balita nga walay pag-uswag sa ekonomiya sa Soviet Union, ang mga opisyal sa gobyerno sa Estados Unidos midugang sa ilang diplomatika, suplay sa militar, ug mga paglisod-lisod sa ekonomiya. Ang pagtumaw ni Mikhail Gorbachev isip presidente sa Soviet nagdala og daghang kausaban, sama sa glasnost (“pagkabukas”) ug perestroika (“pag-organisar pag-usab”). Kini nga mga kausaban, inubanan sa pagtapos sa pag-apil sa Soviet sa Afghanistan niadtong 1989 ug sa pagbalibad ni Gorbachev nga mosuplay og tabang militar ngadto sa mga gobyerno sa Silangang Uropa, nagtimaan sa halapad nga pagkawagtang sa mga estruktura sa Politikal ug Diplomatikong Tensiyon. Daghang panag-away ug mga tensiyon sa politika ang nagpadayon gihapon, apan ang ubang miaging mga babag sa pagbiyahe, pagpatigayon, kooperasyon, ug bisan ang mga utlanan—sama sa Berlin Wall nga nagbulag sa Silangan ug Kasadpang Germany—nahugno.
Si Elder Thomas S. Monson uban nila ni Gary Schwendiman, Walter ug Edith Krause, Gottfried ug Gertraude Richter, ug Henry ug Inge Burkhardt sa Silangang Germany, 1975.
Ang internasyonal nga mga palisiya atol sa panahon sa Politikal ug Diplomatikong Tensiyon kasagaran nakahatag og limitasyon sa mga lider, mga misyonaryo, ug mga miyembro sa simbahan ngadto sa piho nga mga nasod ug mga rehiyon. Ang mga gubat sa Uropa, Korea, ug Vietnam nakahatag og pig-ot nga mga dalan aron maestablisar ang Simbahan. Taliwala niini nga mga hagit, daghang indibiduwal nga mga miyembro ug mga pamilya niini nga mga rehiyon ang nagpabiling lig-on bisan sa gagmay nga mga branch. Ingon man, niining mga dekada ang Simbahan sa tibuok kalibotan nakasinati sa labing paspas nga pagtubo sa kasaysayan niini ug mitubo ngadto sa internasyonal nga komunidad.
May Kalabotan nga mga Hisgotanan: Ikaduhang Gubat sa Kalibotan, Globalisasyon, Ezra Taft Benson, Thomas S. Monson