William Paul Daniels

William Paul Daniels natawo didto sa Stellenbosch, South Africa, niadtong Agosto 20, 1864.¹ Siya ug ang iyang amahan, si William Carl, silang duha nailhan sa angga nga Pebrerohon sulod sa daghang katuigan, nagpasabot sa kagamay nga pamayhon ni William Carl o sa iyang kasapoton (ang Pebrero isip ang kinamub-an nga bulan sa tuig).²

Si William Paul nagdako sa usa ka kultura nga mapihigon sa kaliwat, ug giila isip may “kolor,” usa ka pulong nga gigamit sa South Africa nga nagpasabot sa mga tawo nga sagol ang kagikan sa kaliwat. Ang Habagatang Africa kanhi nahimong kabahin sa Dutch nga negosyo sa pagpamaligya sa mga ulipon, nga naggikan sa kabaybayonan sa Africa hangtod sa kapupud-an sa Indonesia. Sa kadugayan gisakop sa British, ang Habagatang Africa adunay populasyon sa kaliwat sa nagkalainlaing mga kolor nga miresulta niining komplikado nga kasaysayan. Giangkon ni Daniels nga ang pamilya sa iyang amahan maoy taga-Europa ug ang iyang inahan kaliwat sa naulipon nga Malay nga gikuha gikan sa Batavia (karon Jakarta, Indonesia) sa Dutch East India Company.³ Makita usab siya nga miangkon nga adunay kagikan nga Itom nga Afrikano.⁴

Niadtong 1893, si Willian naminyo ni Clara Elizabeth Carelse, usa ka babaye nga may kolor gikan sa Cape Town.⁵ Ang duha adunay upat ka anak nga nabuhi hangtod sa pagkahamtong.⁶ Bisan ang kultura sa diskriminasyon batok sa iyang kaliwat nakapugong sa daghan niyang mga oportunidad, si William nahimong usa ka tag-iya og gamay nga negosyo sa Cape Town, nga nagpadagan og usa ka tahianan, usa ka negosyo sa sakyanan ug usa ka gamay nga umahan.⁷ Nagsunod sa ehemplo sa iyang ginikanan, si William usa ka deboto nga Kristiyano. Siya kanhi usa ka sakop sa Dutch Reformed Church ug miserbisyo isip usa ka deacon, elder, ug usa ka sakop sa banda [brass band] alang sa kongregasyon sa simbahan sa St. Stephen didto sa Cape Town.⁸

Si William gipaila ngadto sa Ang Simbahan ni Jesukristo sa mga Santos sa Ulahing mga Adlaw pinaagi sa iyang igsoong babaye, si Phyllis Sampson. Siya ug ang iyang bana nabunyagan ug mibalhin ngadto sa Utah niadtong 1911. Ang anak nga lalaki ni Willian si Abel mibiyahe usab uban sa iyang iyaan ug uyoan ug nabunyagan didto sa Utah.⁹ Sa sinugdanan, si William mipakita nga dili interesado, apan sa wala madugay nakahigala siya sa presidente sa misyon nga si Nicholas G. Smith, kinsa usa sa iyang mga kleyente sa tahianan. Ang iyang pakig-istorya uban ni Smith ug sa uban nga mga misyonaryo nakapainteresado niya sa Simbahan, apan ang ilang pagpasabot sa restriksiyon sa pagpugong sa pag-orden sa mga kalalakin-an nga Itom ang kagikan maoy nakapabalaka kaniya. Determinado si William sa pagbiyahe ngadto sa Utah aron makat-on og dugang pa mahitungod sa Simbahan ug moapelar ngadto sa mga lider niini.¹⁰

Samtang didto sa Utah niadtong 1915, gikahimamat ni William si Presidente Joseph F. Smith, kinsa mimatuod sa restriksiyon apan mihatag kaniya og usa ka panalangin, nag-awhag kaniya nga magmatinud-anon ug namahayag nga siya sa kadugayan maorden ngadto sa pagkapari.¹¹ Si William gibunyagan didto sa Clearfield, Utah, kauban sa iyang anak, si Simon, nga mibiyahe uban kaniya. Si William mipauli sa iyang nasod uban sa iyang anak nga mga lalaki sa ulahing bahin nianang tuiga.¹²

Sa wala madugay iyang nadiskobrihan nga ang kinabuhi isip may kolor nga mga Santos sa Ulahing mga Adlaw didto sa Cape Town niadtong panahona nagdala og mga hagit ingon man mga panalangin. Sa usa ka bahin, ang kultura sa Afrikano sa Habagatan sa katuigan nga misangpot ngadto sa pagkamapihigon pabor sa puti nga mga Afrikano sa Habagatan, kinsa nag-anam ang pagpanuko sa pagpakig-uban sa mga tawo nga Itom ug may kolor. Si Daniels ug ang iyang pamilya mibati nga wala magustohi sa kadaghanan sa branch sa mga puti sa Mowbray. Maglingkod sila nga mag-inusara sa luyo ug mosibat inigkahuman sa mga miting.¹³ Sa laing bahin, si William kanunayng nagpamatuod sa mga panalangin sa ebanghelyo sa iyang kinabuhi. Gimahal gayod niya ang oportunidad nga makahangyo sa hugot nga pagtuo ug sa pagkapari sa mga misyonaryo ug sa lokal nga mga miyembro aron madawat ang mga panalangin sa pag-ayo alang sa iyang lain-laing mga problema sa panglawas. Siya mipamatuod nga ang gahom sa Dios miayo kaniya sa daghang higayon.¹⁴

Si William mitambong kanunay sa mga miting sa Dominggo, mihatag sa iyang pagpamatuod, milaban sa Simbahan diha sa lokal nga mga pamantalaan, ug mipakigbahin sa ebanghelyo sa iyang pamilya ug mga higala.¹⁵ Si Clara nabunyagan niadtong 1918 uban sa laing may kolor nga higala sa pamilya, si Emma Beehre.¹⁶ Ang anak nga babaye ni William, si Alice, ug ang iyang anak nga lalaki si William Carl nabunyagan niadtong 1920.¹⁷ Si William ug ang iyang pamilya mitabang sa pagtigom og kwarta alang sa organ nga para sa bag-ong gambalay sa Simbahan didto sa Mowbray, misugod og usa ka sinemana nga klase sa Biblia diha sa ilang panimalay, ug mitapos tali sa mga lider sa mga sangka sa tibuok misyon sa pagbasa sa kasulatan ug sa pagpakigbahin og mga kopya sa Basahon ni Mormon.¹⁸ Si William ug si Clara kanunayng modawat sa mga misyonaryo ug mga miyembro sa branch diha sa ilang balay para mangaon. Sulod sa katuigan, ang pagtambong og panihapon sa panimalay sa mga Daniels mao ang naandan nga buhaton alang sa bag-o nga mga misyonaryo.¹⁹ Kini nga mga pagpangaon mao ang usa ka importante nga paagi nga natampo sa pamilya ngadto sa komunidad sa mga Santos sa Ulahing mga Adlaw sa Habagatang Africa, ug si Clara nakabaton og reputasyon isip usa ka maayo kaayo nga moluto.

Si William (atubangan sa wala) ug si Clara (ikatulo gikan sa tuo) nga nagdawat sa tanan nga mga misyonaryo sa South African Mission sa usa ka espesyal nga panihapon, ca. 1927.

Si William mipadayon sa pagpatinguha alang sa ordinasyon sa pagkapari ug sa mga panalangin sa templo. Niadtong 1920, siya mipadayag og kadismaya ngadto sa presidente sa misyon nga si Nicholas G. Smith nga ang iyang bayaw nga si David naorden didto sa Utah. Si David pution kon tan-awon bisan og ang iyang inahan usa ka babaye nga may kolor.²⁰ Sama ni David, daghang tawo nga nagsagol ang kagikan sa kaliwat atol nianang panahona ang mipaila sa ilang kaugalingon nga nahisakop sa lahi nga pundok sa kaliwat, usa ka buhat nga giila isip “dili pag-angkon sa kaliwat.”²¹ Mga ingon niini nga panahon, si William mismo miangkon nga naggikan lamang sa mga katigulangan nga gikan sa Europa ug sa Malaysia.²² Bisan og klaro nga adunay mga panahon nga nawad-an og kadasig, si William mapailubon nga naghulat sa panahon nga siya maorden ug ang iyang pamilya mahimong angayan sa mga panalangin sa templo, niining kinabuhia man o sa sunod.²³

Sa misunod nga katuigan human sa iyang pagkakabig, ang pamilyang Daniels mipadayon sa pagpahigayon og Lunes sa gabii nga klase sa pagtuon sa Biblia. Ang mga miting mao ang usa ka paagi alang sa ilang pamilya aron magpabilin nga aktibong miapil sa mga Santos sa Ulahing mga Adlaw bisan pa sa ilang gibati nga nag-anam nga wala sila giabiabi sa ubang lokal nga mga kalihokan sa branch. Samtang ang mga anak nga lalaki ni William sa kadugayan mipalayo mismo sa Simbahan, si William, Clara, ug Alice aktibong mipadayon sa pag-apil.²⁴ Gisiguro ni William nga ang makuti nga mga sinulat bahin sa unsay mga panghitabo sa klase sa Biblia gitipigan ug gipadala ngadto sa Siyudad sa Salt Lake aron kini “mabutang ngadto sa Kasaysayan sa Simbahan.”²⁵

Niadtong Nobyembre 1931, ang presidente sa misyon nga si Don McCarroll Dalton mihimo og usa ka branch gikan sa klase sa pagtuon sa Biblia. Ginganlan og “Branch of Love,” kini naglangkob sa pamilyang Daniels ug Emma Beehre. Ang uban nga mga higala nga may kolor mitambong uban sa mga misyonaryo ug sa pipila ka miyembro nga puti gikan sa Cape Town. Si William gi-set apart isip presidente sa branch, mao lang ang lalaki nga gikan sa kaliwat sa Itom nga Africano nga nailhan nga nagserbisyo niana nga kapasidad sa wala pa ang 1978.²⁶ Si Clara gitawag isip presidente sa Relief Society ug si Alice isip klerk sa branch.²⁷

Si William miisip sa branch nga usa ka panalangin alang sa iyang pamilya. Mibati si Dalton nga ang paghatag ni William og “prebilihiyo sa paghimo og piho nga trabaho” diha sa Simbahan mao ang haom nga paagi sa pag-ila sa iyang mga gitampo ug debosyon. Sama sa daghang mga Santos sa Ulahing mga Adlaw, milaom si Dalton nga ang Ginoo sa dili madugay mohatag og dugang nga pagpadayag kalabot sa restriksiyon.²⁸ Kombinsido siya nga pinaagi sa hugot nga pagtuo ug debosyon ni William ug sa uban, “ang babag [mahimong] matangtang,” ug siya mituo “nga ang panahon [mahimong] moabot nga kining gamay nga panimalay ug ang regular nga miting sa Lunes sa gabii ug ang kamatinud-anon [ni William] mahimong magpunting ngadto sa Africa isip mga [ehemplo] sa hugot nga pagtuo.”²⁹

Ang kahimsog ni William nagkakunhod sa nahaunang bahin sa 1930. Bisan pa man sa medikal nga pag-atiman, sa mga panalangin sa pagkapari, ug sa hugot nga pagtuo ug mga pag-ampo sa Itom ug puti nga mga Santos sa Ulahing mga Adlaw didto sa Cape Town, si William namatay niadtong Oktubre 13, 1936. Ang lokal nga mga miyembro sa Simbahan nagbangutan sa iyang kamatayon didto sa meetinghouse sa Mowbray branch.³⁰ Sa wala pa siya mamatay, gimantala ni William ang iyang pagpamatuod diha sa mission newspaper: “Ako nasayod nga si Joseph Smith usa ka Propeta sa Dios sa Ulahing mga adlaw,” siya namahayag, “ug nasayod nga siya mao ang instrumento sa pagtukod og usab sa Simbahan ni Jesukristo, ug nga ang gipahiuli nga Ebanghelyo naglangkob lamang sa mga pagtulon-an ni Kristo Mismo.”³¹ Human sa pagpadayag niadtong Hunyo 1978 nga nagtangtang sa restriksiyon sa kaliwat kabahin sa ordinasyon sa pagkapari ug hingpit nga pag-apil sa templo, ang anak nila ni William ug Clara nga babaye, si Alice, misiguro nga ang buhat sa templo alang sa iyang ginikanan makompleto, nagtuman sa saad ni Presidente Smith nga moabot ang adlaw nga si William maorden.³²

May Kalabotan nga mga Hisgotanan: Paglain sa Kaliwat, Restriksyon sa Pagkapari ug sa Templo