Mga Panon sa Nagkariton

Ang mga pioneer nga mga Santos sa Ulahing Adlaw mibiyahe ngadto sa Walog sa Salt Lake kasagaran pinaagi sa nagsunod nga mga karwahe hangtud sa tunga-tunga sa 1850, sa dihang ang panginahanglan sa mas barato og mas maayo nga pamaagi sa transportasyon nakaagni ni Brigham Young sa pagsugo sa mga lider sa pag-organisar og mga panon sa nagkariton. Imbes nga mogamit og mga karwahe nga kasagaran gibira sa mga baka, ang mga pioneer nga nagkariton ang mibira mismo sa mga kahoy nga kartilya. Ang mga kariton mas barato, ug ang mga pundok sa kariton makabiyahe og mas paspas kaysa mga pundok sa karwahe.

Paghulagway sa mga pioneer nga nagkariton pinaagi ni Minverva Teichert.

Ang pagbiyahe pinaagi sa kariton nagsugod pagka 1856 ug nagpadayon hangtud 1860. Ang Perpetual Emigrating Fund Company (PEF) nagpautang aron matabangan kadtong kinsa dili makasugakod sa paggasto sa biyahe. Sa kapin sa 350 ka milangyaw nga mga pundok sa mga Santos sa Ulahing mga Adlaw 10 lamang ang mibiyahe pinaagi sa kariton.¹

Kadaghanan sa mga panon nga nagkariton nakalampos sa biyahe nga walay dako nga problema. Ang duha ka pundok nga gipangulohan ni James G. Willie ug Edward Martin, hinoon, mahinumduman sa mga Santos sa Ulahing mga Adlaw tungod sa ilang makapasubo nga biyahe nga ulahi na sa panahon. Niadtong 1856 ang mga unos sa tingtugnaw nakatanggong sa mga pundok nila ni Willie ug Martin, kauban sa mga nagkarwahe nga pundok nila ni Hunt ug Hodgetts, sa kapatagan sa karon na nga Wyoming. Duol sa 1,500 ka tawo ang natanggong sa agianan, gibana-bana sa 250 ang namatay human mag-antus sa pagkababad, sa grabeng katugnaw ug sa kagutom. Usa ka paningkamot sa pagtabang ang milista og liboan ka mga sakop sa Simbahan sa Utah aron manghatag og pagkaon ug ayuda, ug sobra sa 300 ka tigluwas ang mirisgo sa ilang kaugalingong kaluwasan aron masugat ang mga panon diha sa ilang pagbiyahe ug matabangan sila nga makaabot sa Walog sa Salt Lake, nga miluwas og sobra sa 1,200 ka kinabuhi. Bisan kon ang uban nga mga sugilanon kabahin sa pagluwas ug ang sangputanan niini mipasobra sa mga detalye sa istorya,² kini nga pagluwas nakadasig og mga henerasyon sa mga Santos sa Ulahing mga Adlaw tungod sa dinaliang pagluwas sa mga Santos, ang bayanihon nga kaandam sa mga tigluwas nga personal nga mirisgo, ug ang suporta ug pag-atiman sa komunidad sa mga naluwas.

Sukwahi sa kalisdanan sa Willie ug Martin nga mga panon, ang gidaghanon sa namatay sa uban nga mga panon sa nagkariton wala molabaw sa mga panon sa karwahe, ug ang mga tigdumala sa PEF mipadayon sa pag-abag sa biyahe pinaagi sa kariton. Pagka 1860 mobana-bana sa 3,000 ka mga pioneer nga nagkariton ang malampusong nakahimo sa panaw.